Uhulumeni Ofeza Lokho Umuntu Angenakukufeza
“Wozani nibone izenzo zikaNkulunkulu; uyesabeka ekwenzeni kwakhe kubantwana babantu.”—IHUBO 66:5.
1, 2. (a) Indawo yonke ebonakalayo iwabonisa kanjani amandla asabekayo oMdali? (b) Kungani kumelwe sikukholelwe lokho iZwi likaJehova lesiprofetho elikushoyo ngesikhathi sethu?
UJEHOVA unamandla okwenza lokho umuntu angenakukwenza. Ngokwesibonelo: Abantu besaba amandla ebhomu yenyukliye, kodwa amandla ayo mancane kakhulu kunamandla asabekayo aselangeni lethu. Kodwa ilanga limane nje lingenye yezinkanyezi ezingaba yizinkulungwane eziyizigidi ezingama-200 emthaleni wethu owodwa kuphela iMilky Way. Osonkanyezi balinganisela ukuthi kulo lonke izulu kungase kube nemithala eyizigidi eziyizinkulungwane eziyi-100, eminye inezigidigidi zezinkanyezi. Yeka amandla amakhulu kakhulu ayedingeka ekwakheni konke lokhu! (Isaya 40:26) Lamandla asabekayo oMdali enza amandla abantu abonakale eyize.—Isaya 40:15.
2 Kanjalo akukho muntu okumelwe angabaze ukuthi uJehova angakufeza lokho athi uyokwenza. (Isaya 46:9, 10; 55:11) Kumelwe sikukholelwe uma iZwi lakhe lesiprofetho lisitshela ukuthi sisondela ekupheleni kwesikhathi asivumele sokuba abantu bahambe ngendlela yabo yenkululeko. Umlando ubonisa ukuthi lokho abantu abaye bakwenza kubantu nasezilwaneni, ngisho nasemhlabeni ngokwawo, kuyihlazo, kungcolisa indawo yonke kaNkulunkulu. Ngakho, uJehova ufaneleke ngokuphelele ukuba asuse lokhu kungcola kungabuye kube khona.—Hoseya 4:1-3; Juda 14, 15.
3. Yini isiprofetho seBhayibheli esiyishoyo ngesikhathi esizayo esiseduze?
3 Lokho okwenzeka ezweni namuhla kuwubufakazi obusobala bokuthi lesimiso sezinto sisengxenyeni yokugcina ‘yezinsuku zokugcina’ ezabikezelwa kweye-2 kuThimothewu isahluko 3. Ngokushesha, uJehova uzosichoboza siphele futhi avalele inhloko yaso, uSathane uDeveli. Lokho kuyolandelwa isimiso sezinto esisha ngokuphelele emhlabeni, esilawulwa uhulumeni wasezulwini lowo uJesu afundisa abalandeli bakhe ukuba bawuthandazele lapho ethi: “Mawufike umbuso wakho; mayenziwe intando yakho emhlabeni njengasezulwini.”—Mathewu 6:10; Daniyeli 2:44; Roma 16:20.
Isimiso Sokuhlenga
4. UJehova wasisebenzisa kanjani isimiso sokuhlenga kuIsrayeli wasendulo?
4 Ohulumeni babantu abanakusiqeda isono, ukugula nokufa. Kodwa, uhulumeni kaNkulunkulu uyokwenza lokho abantu abangenakukwenza. Sithola umbono wokuthi lokho kuyokwenzeka kanjani ngokuhlola ukusebenzelana kukaJehova nabantu bakhe bakwaIsrayeli wasendulo. Emuva ngalesosikhathi, uNkulunkulu wasebenzisa isimiso sokuhlenga, noma inhlawulo. Ngokwesibonelo, uma umIsrayeli eba mpofu, wayengase azithengise njengesigqila kongeyena umIsrayeli. Kodwa isihlobo esiseduze sasingamhlawulela uma sinenani elanele lokumhlenga.—Levitikusi 25:47-49.
5, 6. (a) Isimiso sokuhlenga sisebenza kanjani ekukhululeni isintu esonweni esizuzwe ngofuzo? (b) Ingabe wonke umuntu ukhululeka ngokuzenzakalelayo esonweni?
5 Ngendlela efanayo, uNkulunkulu uye walungiselela ukuhlengwa kwesintu ebugqilini besono. Inani kwakufanele kube ngelifana nalokho okwalahleka. (Duteronomi 19:21) UAdamu walahla ukuphelela, ukuphila okuphakade kobuntu. Njengoba akukho lutho abantu abanesono abanakho okulingana nalelonani, ‘abanakumhlenga ngisho nomfowabo.’ (IHubo 49:7) Nokho, iBhayibheli labikezela ngokuza kwalowo owayengakwenza lokho. Lowo kwaba uJesu Kristu. Kwembulwa ukuthi uJesu wayekhona ezulwini ngaphambi kokuba abe umuntu wenyama. Kodwa ukuphila kwakhe kwagudlulelwa esizalweni sikaMariya ngamandla kaJehova. Ngalendlela wazalwa njengomuntu. Kodwa enoNkulunkulu njengoYise, akazange athole isono ngofuzo esesisixhwalise sonke isintu.—Mathewu 1:18-21; Johane 1:1, 14; 1 Petru 2:22.
6 Kanjalo, uJesu wayenalokho kanye okulingana nenani lokuphila okuphelele kobuntu—okunye ukuphila okuphelele kobuntu. Kodwa ngokungafani noAdamu ongalaleli, uJesu waqhubeka elalela uNkulunkulu. Futhi lapho enikela ngokuphila kwakhe ngenxa yomkhaya wesintu, uJehova wakwamukela njengenani elifanele lesihlengo. (Galathiya 1:4) Kodwa ingabe lokho kusho ukuthi wonke umuntu ukhululeka ngokuzenzakalelayo esonweni futhi uyozuza ukuphelela ngaphansi kokubusa koMbuso? Cha, ngoba uJohane 3:16 uthi: “UNkulunkulu walithanda izwe kangaka, waze wanikela ngeNdodana yakhe ezelwe yodwa ukuba yilowo nalowo okholwa yiyo angabhubhi kodwa abe-nokuphila okuphakade.” Kuphela uma samukela ilungiselelo lesihlengo futhi senza okuthile ngalo lapho siyothola ukuvuselelwa kwemizimba yethu nezingqondo ukuze ziphelele ePharadesi.—IsAmbulo 21:4.
Imfundo OHlelweni Olusha
7, 8. Iliphi ikhono lokufunda kwesikhathi esizayo elisebuchosheni bomuntu?
7 Ingqondo inamandla amakhulu okufunda, ngisho nasesimweni somuntu samanje sokungapheleli. Kodwa lokhu kuwubala uma kuqhathaniswa nalokho oyokwazi ukukufunda oHlelweni Olusha, lapho isono singenakuvimbela ukusebenza kwayo. KuThe Brain Book umlobi uthi: “Emakhanda ethu kunesinye sezimiso eziyinkimbinkimbi kunazo zonke endaweni yonke eyaziwayo. Amandla aso nekhono lokwenza izinto ezihlukene lidlula kude elanoma iyiphi icomputer eyenziwe umuntu.” Uyanezela: “Kuvame ukuba kuthiwe sisebenzisa kuphela amaphesenti ayi-10 amandla engqondo yethu agcwele. Lokhu, manje kubonakala sengathi, kuwukweqisa. Cishe asisebenzisi ngisho nephesenti elilodwa—cishe kungaba yingxenye eyodwa kweziyishumi yephesenti elilodwa noma ngaphansi.”
8 Cabanga ngalokho ubuchopho obuyokwenza abantu bakwazi ukukufeza uma bufinyelela amandla abo agcwele oHlelweni Olusha. Cabanga ngazo zonke izinto ezikhangayo esingafunda ngazo uJehova aye wazibeka kulomhlaba, njengezilwane zawo, izilwane zasemanzini, nezitshalo. Cabanga futhi, ngokufunda ngendawo yonke esabekayo kanye nemithala yayo eyizigidigidi. Cabangela wonke amakhono esiyoba nawo emisebenzini yobuciko, emculweni, emsebenzini wezandla, nakweziningi ezinye izinto.
9. Hlobo luni lwemfundo oluyoletha izinzuzo ezinkulu oHlelweni Olusha?
9 Kunolunye uhlobo lwemfundo oHlelweni Olusha oluyoletha inzuzo enkulu kunazo zonke. UJesu wathi: “Bonke bayakuba-ngabafundiswé nguNkulunkulu.” (Johane 6:45) Lokhu kuyizinga eliphakeme kakhulu lemfundo. Futhi iyotholakala kubo bonke abayizikhonzi zoMbuso kaNkulunkulu, kuhlanganise nalabo abayosinda ekupheleni kwalesimiso sezinto. (IsAmbulo 7:9, 14) Ezinye izikhonzi zoMbuso zibhalwe kuJohane 5:28 no-29, lapho uJesu ethi khona: “Isikhathi siyeza, lapho bonke abasemathuneni beyakulizwa izwi layo, . . . baphumele ekuvukeni.” Loluvuko lwezigidigidi zabantu abafile—okungenakwenzeka neze ukuba lufezwe abantu—lusho umsebenzi omkhulu wokubafundisa okuyodingeka wenziwe.
10. Imfundo iyoqhubeka kanjani oHlelweni Olusha?
10 Namuhla kunezimiso eziningi eziphikisanayo zemfundo. Kodwa oHlelweni Olusha, uhulumeni kaNkulunkulu wasezulwini uyolungiselela isimiso esisodwa semfundo emhlabeni wonke sokufundisa abantu iqiniso ngoJehova ngendlela enobunye. Ingxenye yalokhu iyoba ukufundisa abantu ngobuhlobo obufanele babantu. Akuyikuba bikho ukufundisa ukuziqhenya kohlanga, ngobuzwe, noma ngesikhundla emphakathini. Esikhundleni salokho, abakhileyo emhlabeni bayofunda ukuthandana, nokuhloniphana. Imfundo enjalo iyophumela futhi ekuvuselelweni okuphilayo kobuntu ukuze kubonakaliswe izimfanelo eziphakeme zikaJehova.—IzEnzo 10:34, 35; Kolose 3:9-12.
11, 12. Singaqiniseka kanjani ukuthi imfundo enjalo oHlelweni Olusha iyophumelela enjongweni yayo?
11 Ingabe imfundo enjalo ingasebenza ngempela? Siyaqiniseka ukuthi ingasebenza, futhi iyosebenza. Esinye isizathu siwukuthi uJehova, ongeke aqambe amanga, uthi iyosebenza. (Thithu 1:2) Ngaphezu kwalokho, loluhlobo lwemfundo luyasebenza kwamanje! UJehova kakade unenhlangano yokufundisa yomhlaba efundisa izigidi zabantu ngohulumeni woMbuso wakhe nezimfuneko zawo. Lokhu kuyenzeka ngoba ukubusa koMbuso kuye kwaqala ukusebenza kusukela ekuqaleni ‘kwezinsuku zokugcina’ ngo-1914.
12 Kusukela kulesosikhathi, isiprofetho sikaMathewu isahluko 25 besigcwaliseka. Kubonisa ukuthi uJesu uza emandleni oMbuso lapho izitha zikaNkulunkulu zisesemhlabeni. Math 25 Ivesi 32 lithi: “Kuzakubuthelwa phambi kwayo izizwe zonke, ibahlukanise abanye kwabanye, njengomalusi ahlukanisa izimvu nezimbuzi.” Laba abanjengezimvu manje bafundiswa uJehova ngenhlangano yakhe ebonakalayo, nekhulayo. Ngokwazisa abakufundayo, basebenzela ukwenza busha ubuntu babo ngokomfanekiso kaNkulunkulu. Futhi iqiniso lokuthi lemfundo ithonyela izigidi zabantu kokuhle kwamanje liwuphawu oluqinisekisa ukuthi iyokwenza kanjalo ngezinga elikhulu kakhulu oHlelweni Olusha lukaNkulunkulu.
Ukwakha IPharadesi
13. Imuphi umsebenzi omuhle wokwakha oyokwenziwa ngaphansi kokubusa koMbuso?
13 Olunye uhlobo lomsebenzi ngaphansi kokubusa koMbuso luyoba ukuguqula lomhlaba ube yipharadesi. Futhi iPharadesi alinakuhlanganisa izindlu ezingamafuku noma ubumpofu. Abantu bafuna amakhaya ahloniphekayo nendawo ethile enemithi, izimbali, nezingadi. Labo abazimisele ukufundiswa uNkulunkulu bayoba nalokho kanye. UIsaya 65:21 no-22 uyabikezela: “Bayakwakha izindlu, bahlale kuzo; bayakutshala izivini, badle izithelo zazo. Abayikwakha kuhlale omunye; abayikutshala, kudle omunye, . . . nomsebenzi wezandla zabakhethiweyo bami uyakugugela kubo.”
14, 15. Kungani singaqiniseka ukuthi izinceku zikaJehova ziyokwazi ukwakha ipharadesi?
14 Ungakungabazi lokho uJehova ayokufeza ngezinhliziyo nezandla ezivumayo zabantu bakhe oHlelweni Olusha. Ngisho nanamuhla abezokwakha bayamangala ngalokho oFakazi BakaJehova abakufezayo ekwakheni, njengamaHholo oMbuso akhiwa ngokushesha. Ngemva kokuba elinye lalawa lakhiwe eUnited States, uhlu lwephephandaba elithile lwathi: ‘Okuthile okuyigugu kunesakhiwo kwenziwa yilezozisebenzi zokuzithandela eziyizi-2 000. Abaholi bedolobha kumelwe bakubhekisise okuye kwafezwa ngempela-sonto edlule. Intshiseko, ukuzinikezela nesifiso sokuhlangabeza umgomo kwakuhlangene nemiphumela emangalisayo. Uma nje amaqembu endawo engabamba lawomandla, noma imuphi umgomo—kungaba ukuvuselela, ukuvinjelwa kobugebengu, noma ukuthuthukiswa komphakathi—ungafinyelelwa. Ibutho lezisebenzi labonisa okungafezwa uma umphakathi unobunye. Sithemba ukuthi iHholo LoMbuso liwumthombo wokushukunyiswa kwebandla loFakazi. Ukuba khona kwalo kakade kungokushukumisayo kithina sonke.’
15 Lokhu kuzimisela nekhono elikhulayo lezinceku zikaJehova kuzosetshenziswa ngisho nangezinzuzo ezinkulu oHlelweni Olusha lukaNkulunkulu. Futhi yeka ukuthi kuyojabulisa kanjani ukwakha amakhaya amahle nokuba nezindawo ezinhle, esikhundleni sazo zonke izindawo ezingafiseleki! Yeka ukuthi kuyokwanela kanjani ukwazi ukuthi usuku ngalunye imizamo yakho iyosondeza lomhlaba ngosuku olulodwa eduze nokuba yipharadesi!
Umkhaya Onobunye Wembulunga Yonke
16. Kungani abantu boHlelo Olusha bengayikukwesaba neze ukusongela kobudlova?
16 Abantu boHlelo Olusha ngeke futhi besabe ukusongelwa ubugebengu, ukubhikisha, noma impi. IHubo 46:9 lithi: “[UNkulunkulu] uphelisa ukulwa kuze kube-semikhawulweni yomhlaba.” “INkosi yokuThula” uJesu Kristu iyoqinisekisa ukuthula okuhlala njalo emhlabeni, ngoba “umbuso uyakuba-mkhulu, ukuthula kungabi-nakuphela.” (Isaya 9:6, 7) Kunokuthula kweqiniso, futhi wonke umkhaya wesintu ofundiswe ngezimiso ezifanayo eziphakeme, bonke baba munye esibophweni esinganqamuki sothando. Kanjalo, ayisayikuba khona imingcele ehlukanisayo yezwe.
17. Kubanzi kangakanani ukuthula nobunye izinceku zikaJehova ezinakho ngisho namanje?
17 Ingabe izithembiso ezinjalo zinhle kakhulu ukuba zingagcwaliseka? Cha, ngoba ukuthula nobunye, kakade kungokoqobo kulabo abazithoba ngokwethembeka ekubuseni koMbuso! Cabangela lokhu: Ofakazi bakaJehova abangaphezu kwezigidi ezimbili nengxenye basakazeke emhlabeni wonke. Kodwa, kakade bagcwalisa uIsaya 2:4, othi: “Bayakukhanda izinkemba zabo zibe-ngamakhuba, nemikhonto yabo ibe-ngocelemba; isizwe asiyikuphakamisela isizwe inkemba, zingabe zisafunda ukulwa.” OFakazi BakaJehova abanakubabulala abazalwane babo noma imuphi omunye, noma ngaphansi kwanoma iziphi izimo, kunoma yiliphi izwe. Njengoba incwadi yaseItaly i-Il Corriere di Trieste yaphawula: “Bakulungele ukubhekana nokufa kunokuba baphule umyalo oyisisekelo . . . UNGABULALI!” Ngenxa yokunamathela ezimisweni zikaNkulunkulu, oFakazi BakaJehova banokuthula kweqiniso nobunye, lelizwe elingenakukufinyelela. Futhi iqiniso lokuthi izigidi zabo zijabulela lesisimo phakathi kwezwe elihlukaniswe umbango liwubufakazi balokho okuyokwenzeka ngaphansi kokuphatha koMbuso kaNkulunkulu kuzo zonke izindaba zomhlaba.—Johane 13:34, 35; 1 Johane 3:10-12.
18, 19. Iziphi ezinye zezinzuzo ezitholwa yilabo abanamathela ezimisweni zikaNkulunkulu eziphakeme?
18 Ngaphezu kwalokhu kuthula kwezizwe zonke nobunye, ukunamathela ezindinganisweni zikaNkulunkulu eziphakeme kuveza abantu abakhathalela omakhelwane babo nempahla yomakhelwane babo. Kanjalo ‘baziphatha kahle ezintweni zonke.’ (Heberu 13:18) Ngokuphathelene nalokhu, intatheli yaseCanada engumFulentshi, lapho ibhala kuLe Journal de Montreal, yathi ngoFakazi BakaJehova: “Uma bekuyibona kuphela abantu emhlabeni, besingenakukhiya iminyango yethu ebusuku futhi sicuphe ama-alarm.”
19 Lezikhonzi ezithembekile zikahulumeni kaNkulunkulu azinankinga yobugebengu phakathi kwazo, kuyilapho budlangile ezweni. Futhi, njengoba zinamathela ezimisweni eziphakeme zeBhayibheli zokuziphatha, azihlushwa izifo ezidluliselwa ngobulili noma ukukhipha izisu okuwumshayabhuqe kuzo zonke izizwe. Futhi izinceku zikaJehova ziwuhlonipha ngokujulile umshado, ngokuphambene nombono wezwe oyekelelayo elungiselelweni lomshado. Kungani oFakazi BakaJehova belondoloza izimiso ezinjalo? Ngoba uJehova uqondisa abakhulekeli bakhe abathembekile, futhi “kuNkulunkulu kungenzeka konke.”—Mathewu 19:26.
Baqoqelwa Ekukhulekeleni Kweqiniso
20. Iyiphi intuthuko enkulu kakhulu yezikhathi zanamuhla?
20 Kungakhathaliseki ukuthi abantu bayakuqaphela noma cha, ukuqoqelwa kwabantu abanjengezimvu enhlanganweni kaJehova kuyo yonke imbulunga kuyintuthuko enkulu yezikhathi zanamuhla. Lokhu kugcwalisa isiprofetho esiphawulekayo sikaIsaya 2:2, 3: “Kuyakuthi ngezinsuku ezizayo intaba yendlu kaJehova [ukukhulekelwa kwakhe okuphakanyisiwe kweqiniso] iqiniswe esiqongweni sezintaba, iphakame kunamagquma, nezizwe zonke, ziyakugobhozela khona. Abantu abaningi bayakuhamba, bathi: Wozani sikhuphukele entabeni kaJehova . . . uyakusifundisa izindlela zakhe, sihambe emikhondweni yakhe.”
21. Yini abantu abanhliziyo ziqotho abakhuthazwa ukuba bayenze?
21 Sikhuthaza bonke abantu abanhliziyo ziqotho ukuba babe yingxenye yalenhlangano yomhlaba evusa amadlingozi ekukhulekeleni kweqiniso nakuhulumeni olungileyo. Jabulela izibusiso ezivela ekuhlanganyeleni nabantu abafundiswa imithetho nezimiso zikaNkulunkulu khona manje. Zithobe ngokwethembeka kuhulumeni woMbuso ozoqala ngokushesha ukuguqula lomhlaba ube yipharadesi. Beka ithemba lakho kulowoMbuso hhayi emacebweni alelizwe, ngoba njengoba iHubo 127:1 lisho: “Uma uJehova engayakhi indlu, basebenzela ize abayakhayo.” Sabela esimemweni esikumaHubo 66:5: “Wozani nibone izenzo zikaNkulunkulu; uyesabeka ekwenzeni kwakhe kubantwana babantu.” Ngakho woza kuNkulunkulu oqinisekisa uhulumeni omuhle kakhulu wesintu, uhulumeni oyofeza lokho umuntu angenakukufeza, uhulumeni ngokushesha okuyoba ukuphela kwawo lomhlaba oyoba nawo.
Ungaphendula Kanjani?
◻ Kungani singaqiniseka ukuthi uJehova uyozifeza izinjongo zakhe?
◻ Isimiso sokuhlenga sisebenza kanjani ekukhululeni umuntu esonweni?
◻ Imiphi imisebenzi emikhulu yokufundisa nokwakha eyoba khona oHlelweni Olusha?
◻ Ibuphi ubufakazi obukhona manje bokuthi ukuthula, ubunye, nothando kuyoba khona emhlabeni wonke oHlelweni Olusha?
[Isithombe ekhasini 15]
Ngaphansi kokubusa koMbuso, abantu abathanda iqiniso ‘bayofundiswa uJehova’
[Isithombe ekhasini 17]
Ukuthula nobunye kakade kungokoqobo phakathi kwalabo abazithoba kuhulumeni woMbuso