Ukuphila Nenkonzo KaJesu

Umlungiseleli Wendlela Uyazalwa

UELISABETHE cishe usekulungele ukuthola ingane yakhe. Kulezinyanga ezintathu ezidlule uMariya ubehlala naye. Kodwa manje sekuyisikhathi sokuba uMariya avalelise futhi athathe uhambo olude lokubuyela ekhaya eNazaretha. Cishe ezinyangeni eziyisithupha, naye, uzothola ingane.

Ngokushesha ngemva kokuhamba kukaMariya, uElisabethe uyabeletha. Yeka injabulo okuyiyo lapho ukubeletha kuphumelela futhi uElisabethe nengane bephile kahle! Lapho uElisabethe ebonisa omakhelwane bakhe nezihlobo ingane, bonke bajabula naye.

Ngosuku lwesishiyagalombili ngemva kokuzalwa kwayo, ngokomthetho kaNkulunkulu, ingane engumfana yakwaIsrayeli kumelwe isokwe. Ngalesisikhathi abangane nezihlobo bayavakasha. Bathi umfana kumelwe ethiwe ngegama likayise, uZakariya. Kodwa uElisabethe uyakhuluma. Uthi, ‘Cha bo! Uzakuthiwa uJohane.’ Khumbula yilelogama ingelosi uGabriyeli eyathi kumelwe lethiwe ingane.

Nokho, abangane babo bayaphikisa: ‘Akekho noyedwa emndenini wakini onalelogama.’ Khona-ke, bekhuluma ngokuqhweba, babuza uyise ukuthi iliphi igama afuna lethiwe umfana. Ucela isileti, bonke bemangele, uZakariya uyabhala ‘NguJonane igama lakhe.’

Ngenxa yalokho, ngokumangalisayo uZakariya wakwazi ukukhuluma. Uzokhumbula ukuthi walahlekelwa amandla akhe okukhuluma lapho engakholelwa isimemezelo sengelosi sokuthi uElisabethe uzothola umntwana. Nokho, lapho uZakariya ekhuluma, bonke abangomakhelwane bayamangala futhi bathi ezinhliziyweni zabo: ‘Kodwa lomntwana uyakuba-yini na?’

Manje uZakariya usegcwaliswe ngomoya ongcwele, futhi uyaprofetha maqondana nendodana yakhe: ‘Uyakuthiwa umprofethi woPhezukonke, ngokuba uyakuhamba phambi kweNkosi ukulungisa izindlela zayo ukunika abantu bayo ukuyazi insindiso ngokuthethelelwa kwezono zabo.’

Ngalesikhathi uMariya, ngokusobala osengowesifazane ongakashadi, usefikile ekhaya eNazaretha. Yini ezokwenzeka kuye lapho kutholakala ukuthi ukhulelwe? Luka 1:56-80; Levitikusi 12:2, 3.

◆ UJohane wayemdala kangakanani kuJesu?

◆ Iziphi izinto ezenzeka lapho uJohane enezinsuku eziyisishiyagalombili ubudala?

◆ Yimuphi umsebenzi okwabikezelwa ukuthi uJohane wayezowenza?