IBrithani, Igazi, NeAIDS
CISHE eminyakeni emibili edlule, INqabayokulinda yakhipha isihloko esithi “Izimiso ZikaJehova Ziyasisiza.” (IHubo 20:4) Yanikeza njengesibonelo sosizo olutholakala eziqondisweni zikaNkulunkulu ezilungile nezilondekile, isivikelo esitholwa amaKristu agcina umthetho wakhe wokungalidli igazi. Ngalesosikhathi eUnited States babeqala ukugxilisa ukunakekela esifweni esisha esasisongela impilo—iAIDS. Kwakusolwa ukuthi lezimpawu ezibulalayo zalesifo zingase zandiswe ngokumpontshelwa kwegazi. Nokho, abafundi eYurophu nakwezinye izindawo ngalesosikhathi babengase babe nomuzwa wokuthi lengozi yokwephulwa komthetho kaNkulunkulu yayiphelela kuphela ezindaweni ezithile ezikude. Eminyakeni emibili kamuva, cabangela lokhu kwaziswa okusanda kukhishwa okuvela eGreat Britain
“UDADEWETHU kudingeka ukuba ahlinzwe kodwa wesaba ukuthi angase athole iAIDS. Asibona oFakazi BakaJehova, kodwa ningasisiza yini ngokusitshela udokotela ongase ahlinze ngaphandle kokusebenzisa igazi?” Lokhu kwakumane kungezinye zezicelo ezijulile eziye zatholwa muva nje oFakazi BakaJehova endlunkulu yabo, eLondon, eNgilandi. Yini eyenza kube nalezicelo?
Kusukela ekuqaleni kwawo, Umnyango WaseBrithani Wokumpontshelwa Igazi uye waziphakamisa ngokuba umthombo wegazi olithola kubanikeli abazithandelayo. “lkhefu ngemva kokunikela [ngesilinganiso esithile segazi], isiphuzo namakhekhe, bese ubuyela emsebenzini. Kungani ungakuzami?” kukhuthaza ipheshana labo elalisakazwa kubantu. Ngokomphumela, iminikelo yokuzithandela eyizigidi ezimbili iye yenziwa unyaka ngamunye ngamaphesenti ama-3 omphakathi.
“Igazi elitholwa kwabazithandelayo abangakhokhelwa, njengoba kunjalo eBrithani, lingcono kakhulu kunalelo elitholwe kubantu abakhokhelwayo,” kusho iThe Guardian. Ngamanye amazwi, sekunesikhathi eside kunombono wokuthi iBrithani iyayigwema ingozi yokuthelelana ngesifo okuvela egazini elithengwe kubantu abayimihuqa yemilaliso noma abanye abanelincane kabi ukuba balithengise. Kodwa izenzakalo zamuva ziye zembula amaphutha angathi sína kulombono, okuye kwaphumela ekulahlekelweni okungakaze kubonwe kokwethenjwa umphakathi. Ngemva kokufa kwabantu ababili bebulawa isifo segazi, umkhulumeli weNhlangano Yezifo Zegazi wathi ‘imithombo yegazi yoMnyango Wezempilo Yesizwe ngeke iphinde ibhekwe njengelondekile.’ Kwenzekani?
Nakuba bekwaziwa kahle eminyakeni eminingi ukuthi akunakwenzeka ukuba kuhlolwe isifo ngasinye ukuthi sikhona yini egazini nokuthi izifo ezithathelwana kakhulu, ezinjengesifo sokusha kwesibindi noma umalaleveva, zingadluliselwa komunye ngokumpontshelwa igazi, izingozi ezinjalo azizange zidalulwe ngokusobala eBrithani. Njalo umqondo bewulokhu uwukuthi igazi elinikelwe aliyidali inkathazo. Kodwa izici ezimbili ezithusayo ziye zahlangana, zenza iThe Daily Telegraph ukuba iphethe ngokuthi: “IBrithani iye yahluleka ukuvimbela amagciwane esifo iAIDS ahlasela imithombo yegazi.”
Ukushaqeka kokuqala kube yilapho imibiko yephephandaba imbula ukuthi eminyakeni eminingi iBrithani eqinisweni ibilokhu ithenga igazi kwezinye izindawo. “Igazi lithengwa kubantu abasemazweni ampofu lapho kunokwanda okukhulu kwezifo ezithathelwana ngegazi,” kusho inxusa lenhlangano ye“laboratory” yomkhiqizo wegazi. Ngokungaphezulu, izigidi ezingama-70 zezilinganiso zomuthi othakiwe iFactor VIII zithengwa eUnited States futhi zisetshenziselwa ukwelapha abantu baseBrithani abaphethwe isifo segazi. Ingxube ngayinye yeFactor VIII yenziwa ngeplasma ekhishwe egazini elitholwe kubantu abanikelayo abangangezi-2 500. Kubonakala ukuthi ngokwethekela lomkhiqizo wegazi amagciwane eAIDS angena emithonjeni yeBrithani.
Okunye futhi ukushaqeka kwaba yilapho kuqinisekiswa ukuthi iAIDS iye yonakalisa igazi elinikelwe ongqingili baseziQhingini zaseBrithani. Nakuba ongqingili baye baba phakathi kwalabo abaye bacelwa ukuba banganikeli igazi ngenxa yengozi enkulu yokuba neAIDS, lesixwayiso asizange sigcizelelwe kakhulu njengoba kwakufanele, kuvuma Umnyango Wezempilo. Isixwayiso esasisepheshaneni labo elikhuluma ngeAIDS sabhekisela kuphela “kongqingili abanabangane abaningi abahlukahlukene.” Isenezelo sepheshana eliphuma njalo iA.I.D.S. nendlela ethinta ngayo abanikela ngegazi, laphawula ukuthi “abazitika ngobungqingili nabazitika ngobulili bemvelo obuhlangene nobungqingili” “bashesha kakhulu ukuthola” iAIDS. Kodwa isixwayiso safika sekonakele. Ekuqaleni kuka-1985 abantu abangaphezu kwama-40 kuhlanganise nengane esanda kuzalwa, base behlaselwe yilesifo. Ngokwengeziwe, kunesici esikhathazayo sokuthi igciwane leAIDS lihlala lingabonakali isikhathi esingangeminyaka emibili. Khona-ke bangaki abanye abengeziwe abaye bahlaselwa yilesisifo? “Kunebhomu engaqhuma noma ngasiphi isikhathi,” njengoba iThe Sunday Times yakubeka. Ngokufanelekile, Umnyango Wesizwe Wokumpontshelwa Kwegazi muva nje uye wanyathelisa ipheshana elengeziwe eliqondene nabo bonke abathanda ukunikela ngegazi eBrithani, Ezinye Izizathu Zokuthi Kungani Kumelwe Unganikeli Ngegazi.
Kakade sekuye kwaba nabantu abangama-50 ababulewe iAIDS eBrithani, ezigulini ezingaphezu kwekhulu eziye zabikwa. Inani labantu eliphathwa yilesisifo manje liphindwa kabili njalo ezinyangeni eziyisishiyagalombili. Intatheli yezokwelapha yeThe Sunday Times yalinganisela ukuthi kungase kube neziguli ezingaphezu kweziyizi-12 000 phakathi neminyaka emihlanu. Futhi ngisho isilinganiso esethusa kakhulu esakhishwa Ikholiji Labahlengikazi Lobukhosi Bemibuso Ehlangene siwukuthi abantu abayisigidi eziQhingini zaseBrithani bangase bahlaselwe yilesisifo ngonyaka ka-1991 uma kungathathwa isinyathelo sokuvimbela ukusakazeka kweAIDS.
Owenza isicelo okukhulunywe ngaye ngenhla wathi: “Kimina kubonakala sengathi nina boFakazi BakaJehova nifakazelwa njengabantu abenza okuqondile ngokuphathelene nendaba yokumpontshelwa kwegazi.” Kuyiqiniso, ngokushaya emhloleni, uJehova uNkulunkulu, ngeZwi lakhe, iBhayibheli, lowo omelelwayo. Eminyakeni engamakhulu edlule wayala amaKristu ukuba ‘ayeke igazi.’ (IzEnzo 15:29; 21:25) Isiyalo sakhe nezimiso ngokuqinisekile ziye zabonakala ziyisivikelo kubantu bakhe futhi ziyoqhubeka ziyiso.
[Ibhokisi ekhasini 30]
Iyini IAIDS?
IAIDS isinciphiso esisuselwa egameni elithi Acquired Immune Deficiency Syndrome. IAIDS yona ngokwayo ayibulali. Kodwa, njengoba kusho igama layo, isisulu sishiywa sinesimo somzimba okhubazekile ongenakuzivikela. Entula lesivikelo, umuntu onalesifo ngokuvamile ubulawa isifo esithathelwanayo, esinjengohlobo oluvelele lofuba noma uhlobo lwekhensa yesikhumba engajwayelekile, iKaposi’s sarcoma. Ukucwaningisisa ngobukhona balesifo nendlela yokuselapha kusanda kuqala, futhi, kuze kube manje, alaziwa ikhambi lokwelapha iAIDS.