Ziqeqeshele Ukuzinikela KuNkulunkulu Njengomgomo Wakho
“Ziqeqeshele umgomo wokuzinikela kuNkulunkulu.”—1 THIMOTHEWU 4:7, NW.
1. Kungani omunye umgijimi omuhle ahluleka ukuphumelela?
WAYENGUMGIJIMI ohamba phambili eqenjini lesigaba sakhe. Ukunqoba okwedlule kwakuye kwambeka ezingeni labagijimi besizwe. Ngakho kwakulindelwe ukuthi wayezonqoba kulomncintiswano ovelele wokugijima. Nokho, okwadumaza umqeqeshi wakhe, abeqembu lakhe, naye ngokwakhe, wagijima ukugijima okubi kunakho konke emlandweni wakhe wokugijima. Kungani? “Ngavilapha ekuzivivinyeni futhi ngayeka ukuziqeqesha kanzima,” kuvuma owesifazane osemusha, odumazeke kakhulu. “Umqeqeshi wami wazama ukungenza ngizikhandle kanzima futhi wangixwayisa, kodwa angizange ngilalele.” Ukwehluleka kwakhe ukuziqeqesha ngokufanele kwamlahlekisela ukuphumelela ayekuhlosile.
2. AmaKristu kumelwe aziqeqeshe ngayiphi indlela, futhi kungani wonke kumelwe afune ukwazi ukuthi kanjani?
2 NjengomKristu, ikakhulukazi uma usemusha, nawe unokuziqeqesha okubalulekile. “Ziqeqeshele umgomo wokuzinikela kuNkulunkulu.” (1 Thimothewu 4:7) Igama lesiGreki elisho ‘ukuziqeqesha’ (gy·mnaʹzo) lalichaza ukuzivivinya okukhandlayo futhi ngokuvamile okubuhlungu okwakwenziwa abagijimi ezindaweni zokuqeqesha umzimba. Ngakho-ke, ngokuphathelene nokuzinikela kuNkulunkulu nemivuzo yakho, umphostoli uPawulu wanezela: “Sikhandlekela lokho, siyashikashikeka.” (1 Thimothewu 4:10) Lemfanelo ebalulekile ayikhona okuthile okuzizela ngokwemvelo nje noma okusulelwa kuwe abazali abakholwayo. Kodwa iziphi izinyathelo okumelwe uzithathe? AmaKristu abo bonke ubudala kumelwe afune ukwazi.
Ukukhulumisana Okuhle NoNkulunkulu
3. (a) Kungani isifundo somuntu siqu sibaluleke kangaka? (b) Iziphi izimfanelo zikaNkulunkulu ezikusondeza kuye?
3 Njengoba ukuzinikela kuNkulunkulu kuhilela ukwazisa okuthinta inhliziyo ngezimfanelo zikaJehova, kumelwe wazi ukuthi unjani ngempela. UJehova ukuveza eBhayibhelini lokhu. Kodwa kumelwe utadishe iZwi lakhe nezincwadi ezisekelwe eBhayibhelini ngokunakekela, ngaleyondlela “wondliwa ngamazwi okukholwa nesifundiso esihle.” (1 Thimothewu 4:6) Ukutadisha okunjalo kuyokusiza “ukubona ubuhle bukaJehova.”—IHubo 27:4.
4. Ikuphi okuhlangenwe nakho okubonisa ukubaluleka kwesifundo somuntu siqu, futhi imiphi imibuzo okumelwe uyicabangele ngokungathi sína?
4 “Kukwenza uzizwe useduze noJehova ukufunda ngokwengeziwe ngaye,” kusho umshumayeli wesikhathi esigcwele (iphayona), oneminyaka engama-22. “Lapho ngifunda iziprofetho futhi ngibona indlela ezigcwaliseka ngayo, kungenza ngimesabe. Isifundo somuntu siqu yisona esingisiza ngempela.” Oneminyaka eyi-16, owayecindezeleke kanzima, wabhala ngesinye sezihloko zochungechunge oluthi “Intsha Iyabuza” oluvela njalo kumagazini iPhaphama!: “Lapho nje sengilahle lonke ithemba, lesihloko saphuma. Ngajabula kakhulu kangangokuba ngangingenakusibeka phansi! Sangenza ngazizwa ngiseduze kakhulu noJehova, futhi ngaqaphela ukuthi uyaqonda futhi unakekela kakhulu. Manje nginomuzwa wokuthi sengingabhekana nalenkinga.”a Ingabe uyakunakekela ukufunda ngamunye womagazini bethu? Nakuba kudinga ukuzikhandla, ingabe uyasenza isikhathi sokondla ingqondo yakho nenhliziyo ngesifundo seBhayibheli somuntu siqu? Ngokwenza ukuhlola kwakho siqu, ungaziqinisekisa ngempela ukuthi unalo iqiniso. Lapho ulwazi olunjalo lufinyelela inhliziyo, cishe ngokuqinisekile luyokushukumisa, ngoba ‘luyimfundiso ehambisana nokuzinikela kuNkulunkulu.’—1 Thimothewu 6:3; Roma 12:2.
5, 6. Hlobo luni lwemithandazo ekusondeza ngokwengeziwe kuNkulunkulu? Bonisa.
5 Ukukhulumisana okuhle noNkulunkulu kuhilela futhi imithandazo ethinta inhliziyo nengagunciyo. Lena isiza ekwakheni ubungane bomuntu siqu noJehova. Lapho wenza amaphutha, zimisele ukuxolisa njengoba kwenza uDavide: “Ungazikhumbuli izono zobusha bami neziphambeko zami.” (IHubo 25:7, 11) Futhi yazi ukuthi uyokuthethelela uma uphenduka. Funda ukunamathela emthandazweni, uthulula inhliziyo yakho. Omunye omusha, nakuba ayekhuliswe ekhaya elikholwayo, wayeye wavumela amalimi ukuba avimbele ukuhlanganyela kwakhe enkolweni yeqiniso. “Khona-ke ngobunye ubusuku,” kwembula lona oneminyaka engama-22, “ngancenga uJehova, ‘ngisize ukuba ngifune ukukukhonza, futhi hhayi ngoba nje abadala noma abazali bami befuna ngenze kanjalo.’” Yeka indlela ukuphila kwakhe okwaqala ukushintsha ngayo! Naphezu kokungingiza kwakhe, wahlanganyela ngokugcwele enkonzweni. Ngenjabulo uthi, “ngithemba kuJehova ngokwengeziwe manje ngoba ngiyazi ukuthi ngaso sonke isikhathi uwusizo.”—IHubo 62:8.
6 Omunye umKristu osemusha wathandaza ngokungagunciyo ngokuphathelene nokuhlela kwakhe ukuze aphayone. Lapho imithandazo yakhe iphendulwa, wathi: “Ngangazi ukuthi uJehova ungokoqobo nokuthi uyasinakekela! Ngaphambi kwalokhu ngangicabanga ukuthi nganginobuhlobo naye, kodwa manje unjengomngane ngokwengeziwe—omkhulu kakhulu.” UJehova ngeke ngaso sonke isikhathi aphendule ngendlela ethile eyisimangaliso, kodwa uma uqotho futhi usebenza ngokuvumelana nemithandazo yakho, uyokubona ukuqondisa kwakhe kothando.—IHubo 145:18.
Yiba Nonembeza Omuhle
7. Uyini unembeza, futhi kungani kumelwe ube nomuhle?
7 Lapho uPawulu ekhuthaza uThimothewu ukuba aqhubeke ‘enonembeza omuhle,’ umphostoli wayazi ukuthi kwakuyodinga umzamo wangempela. (1 Thimothewu 1:19) Ngani? Unembeza wethu ungamandla esiwanikwe uNkulunkulu ukuba sizihlole futhi sidlulisele isahlulelo ngalokho esiye sakwenza noma esicabanga ukukwenza. ‘Ungasimangalela,’ usole kabuhlungu inkambo yethu, noma ‘usivune,’ uvumele esikwenzayo njengokulungile. (Roma 2:15) Kodwa uma wonakala, ungakhipha isigijimi esiyiphutha. Abanye abanonembeza abonakele bangenza njengezilwane ezinonya, nokho ‘izwi elingaphakathi alibamangaleli.’ Bangase ngisho ‘bavume ukuthi bayamazi uNkulunkulu’ kodwa ‘bamphike ngemisebenzi yabo.’ Ungakugwema kanjani ukuba nonembeza owonakele?—Thithu 1:10-16.
8. Abanye ngekhulu lokuqala ‘bawulahla’ kanjani unembeza omuhle?
8 UPawulu wayetshele uThimothewu ukuthi amaKristu athile ‘ayebalahlile’ onembeza bawo abahle ‘ngokunaka izinganekwane nokukhuluma okuyize.’ (1 Thimothewu 1:4, 19, 20; 6:20; 2 Thimothewu 2:16-18) Ngoba alalela lezinto, ukholo lwawo lonakaliswa, futhi lokhu kwaphumela ekufeni komkhumbi ongokomoya. Nokho, uPawulu wabonisa ukuthi ezinye izinto ngaphandle kwezimfundiso zokuhlubuka ‘zaziphambene nesifundiso esiphilileyo.’ Kweyoku-1 Thimothewu 1:9, 10 ubeka izinto ezinjalo njengokubulala, ubufebe, nobungqingili.
9, 10. (a) Yini engafundwa esibonelweni sombhangqwana ongamaKristu owahluleka ukuba nonembeza omuhle? (b) Singawuvikela kanjani unembeza wethu ekonakaleni?
9 Namuhla ubudlova nokuziphatha okubi kobulili kugcwele ezinkulumweni zamabhayisikobho namaTV nasezincwadini. Uma sondla izingqondo zethu ngokunjalo, unembeza wethu ungonakala kancane kancane. Lokhu kwenzeka embhangqwaneni ongamaKristu osemusha owahlobonga ngaphambi nje kosuku lwawo lomshado. “Ngicabanga ukuthi kwakuxhumene nalokho esasikubone kuTV,” kuvuma owesifazane osemusha. “Ubona abantu ngaso sonke isikhathi bangana beqabulana, ngakho akubonakali kungokungathi sína. Uyakujwayela. Ngakho saqala ukukwenza. Uma nje ngangicabange ngokwengeziwe ngokuthi kwakungokungathi sína kangakanani!” Ngaphambi kokuba akuqaphele, walahlekelwa unembeza wakhe omuhle. Insizwa yanezela: “Nami nganginenkinga yokushaya indlwabu, futhi lokhu konakalisa unembeza wakho kwenze kube lula ukuhileleka ekwangeni nasekuqabuleni bese ekugcineni kuba ukuhlobonga.” Nakuba babebonakala bebeka isibonelo esihle phambi kwabanye, lokho ababekubuka ukuze bazijabulise, kanye nomkhuba wasekusithekeni ongahlanzekile, kwakuye kwabulala unembeza njengoba nje inyama ishiswa ukuthinta okuphindaphindiwe insimbi yokushisa izinkomo eshisa kakhulu.—1 Thimothewu 4:2.
10 Ingabe unembeza wakho ngokufanayo ungabulawa yilokho okubukayo noma okufundayo ukuze uzijabulise? Ingabe ngempela usebenza kanzima ukuze unqobe noma imuphi umkhuba omubi ongalimaza unembeza wakho? Ukuze uvikeleke, ungathatha isenzo esiqondile ngokufunda—uphinde ufunde—izincwadi ezisekelwe eBhayibhelini ezixoxa ngokukhethekile ngenkinga yakho noma ngokuxoxa inkinga nomdala. Unembeza omuhle, ohlanzekile uyisipho esiyigugu esivela kuNkulunkulu esiyokusiza ukuba uzinikele kuNkulunkulu. Ungavumeli lutho lukwenze ukulahlekele!
Khetha Abangane Abafanelekile
11, 12. (a) Isiphi isixwayiso esinikezwa kweyesi-2 Thimothewu 2:20, 21? (b) Ungasigcina kanjani lesosixwayiso?
11 Umphostoli uPawulu wabhala: “Endlini enkulu [ibandla] akukho izitsha zegolide nezesiliva kuphela kodwa nezemithi nezebumba, ezinye ezihloniphekayo, ezinye ezingahloniphekiyo; ngalokho uma umuntu ezihlanza kulezozinto, uyakuba-yisitsha esihloniphekayo, esingcwelisiwe, esinosizo kumninindlu, esilungiselwe umsebenzi wonke omuhle.” (2 Thimothewu 2:20, 21) Imizwelo yethu nokuziphatha kuthonywa kakhulu yilabo esibakhetha njengabangane. Ngokusobala, abangakholwayo abasibo abangane abangcono kakhulu. Kodwa uPawulu lapha ubonisa ngokusobala ukuthi ngisho abasebandleni bangaba khona abantu abangabangane abangafiseleki. Kuyiqiniso, ungase uthole kujabulisa ukuba nabanjalo, kodwa ithonya labo ngeke likusize ukuba ‘ubalekele izinkanuko zobusha’ noma ukuba uzinikele kuNkulunkulu. Funa abangane abakhayo ebandleni. UPawulu uyaqhubeka 2Thim 2 evesini 22: “Ujonge ukulunga, nokukholwa, nothando, nokuthula kanye nabakhuleka eNkosini ngenhliziyo ehlambulukileyo.”—Qhathanisa nabaseFilipi 4:8, 9.
12 Cabangela indaba yomunye umKristu osemusha okwathi, naphezu kokuqeqeshwa ngokwaphezulu, ngaso sonke isikhathi wayengena enkathazweni. Wathi: “Ikakhulukazi kwakungenxa yabantu engangizihlanganisa nabo.” Lapho ebona ukuphila kwakhe kwehluleka, washintsha abangane bakhe. Uyaphetha: “Uma uzungezwe abangane abathanda uJehova, kukusiza ukuba uhlale unonembeza osebenzayo futhi ungangeni enkathazweni. Lapho bebonisa ukunengwa isenzo sobubi, kukwenza uzizwe ngendlela efanayo.” Ngokuzihlukanisa nabangane abangabazekayo, uye waba isitsha “esinosizo kumninindlu, esilungiselwe umsebenzi wonke omuhle.” Esekhonze iminyaka eyishumi njengephayona, uyanezela: “Ngithola ukuthi manje uJehova uye wangisebenzisa ukuba ngisize abanye.”—2 Thimothewu 2:21; IzAga 15:31.
13. Ungabona kanjani ukuthi ibaphi abangabangane abahle, futhi bangakuthonya kanjani?
13 Ngalokho-ke, cabanga ngokoqobo ngabangane bakho. Ingabe bajonga ukulunga, ukholo, uthando olunezimiso, nokuthula? Ingabe bagcwele intshiseko yobuKristu? Ngokwenza abanjalo babe abangane bakho abaseduze, nawe ngokwakho ungase ube isibonelo ekukhulumeni, ekuziphatheni, othandweni, okholweni, ekuhlanzekeni, njengoba nje kwenza uThimothewu, umngane oseduze kaPawulu. Lokhu akusho ukuthi kumelwe ungabanaki noma ungabi namusa kulabo abangesizo izibonelo. Isibonelo sakho senjabulo singase sibashukumise, nabo, ukuba baqondise izindlela zezinyawo zabo.—1 Thimothewu 4:12; Heberu 12:12-15.
Zidele NgoNkulunkulu
14, 15. (a) Yini eyayidingekile kubagijimi basendulo lapho beziqeqesha? (b) Imuphi umsebenzi odinga ukuzidela, futhi iziphi izibonelo ezinhle esinazo?
14 Ngosuku lukaThimothewu, lapho abagijimi beziqeqesha ‘babezithiba ezintweni zonke,’ bezincisha izinjabulo eziningi ezifanelekile. (1 Korinte 9:25) Babelandela isimiso esinzima sokudla. Ngokusho kukaHorace umlobi wezinkondlo wekhulu lokuqala B.C.E., ‘babeyeka abesifazane newayini’ ukuze ‘bafinyelele umgomo abebewulangazelela.’ Ngokufanayo. ukuziqeqeshela ukuzinikela kuNkulunkulu njengomgomo wakho kufuna ukuzidela. UPawulu wathi ngoThimothewu: “Anginamuntu onenhliziyo enjengeyakhe . . . ngokuba bonke bafuna okwabo, abafuni okukaJesu Kristu. Kepha . . . ukhonzile kanye nami ngenxa yevangeli njengomntwana kuyise.”—Filipi 2:19-22.
15 UThimothewu wayalwa: “Wenze umsebenzi womvangeli, ufeze ukukhonza kwakho.” (2 Thimothewu 4:5) Kungakhathaliseki ukuthi izithakazelo zakhe siqu zazingase zikhange kangakanani, wazidela ukuze aphelelise umsebenzi kaNkulunkulu. Ingabe uzimisele ukwenza okufanayo? Namuhla amanye amaKristu amasha angenawo umthwalo wemfanelo osindayo ongokomBhalo aye aphishekela imfundo ephakeme noma imisebenzi yesikhathi esigcwele eholela kakhulu kunokwenza inkonzo yobuKristu umgomo wawo. Omunye walawa wayelindele umsebenzi onjalo ngokulangazelela. Nokho, ngaphambi kokuba aqale umsebenzi, wemukela isimemo sokusebenza nombhangqwana ongamaphayona enkonzweni yasensimini lonke ihlobo. Wakujabulela. Ngenxa yalokho, wadela lowomsebenzi wesikhathi esigcwele ofiselekayo wathatha umsebenzi wesikhashana ongathakazelisi kangako ukuze aphayone. Enalomoya ofana nokaThimothewu, manje ukhonza endlunkulu yomhlaba yoFakazi BakaJehova. Ukuzimisela ukuzidela kuwubufakazi bothando lwangempela, futhi ukuzidela kujulisa lolothando, njengoba athola.
16. Ikuphi okunye ukuzidela abantu abasha okungase kudingeke bakwenze?
16 ‘Njengommemezeli nomphostoli,’ uPawulu wagcizelela ukufiseleka kwesizotha ekugqokeni. Ingabe wawuyozimisela ukudela indlela ethile yokugqoka noma ukuzihlobisa ebingacasula abanye noma ikhubaze ukuphumelela kwakho njengomshumayeli? (1 Thimothewu 2:7-10) Eqhubeka, uPawulu wabhala: “Bonke abathanda ukuhamba [ngokuzinikela kuNkulunkulu] . . . bayakuzingelwa.” (2 Thimothewu 3:12) Ingabe uzimisele ukumelela iqiniso ngisho noma kungasho ukuhlekwa usulu, udela ukuthandwa ngabangane bakho besikole? Konke ukuzidela okunjalo okwenziwa ngesisusa esihle kuyokusiza ukuba ube nokuzinikela kuNkulunkulu futhi ngesikhathi esifanayo kukufundise ukuthembela kuJehova nokucabangela imizwa yakhe ngaphezu kwanoma yini enye.
Qhubeka Uthuthuka
17. Mayelana nokuthuthuka, uThimothewu waba kanjani isibonelo ezikhonzini ezingabasha namuhla?
17 Ukuba nokuzinikela kuNkulunkulu kuyinto eqhubekayo. UPawulu watshela uThimothewu: “Nakekela lezozinto, ume kuzo, ukuze ukuqhubeka kwakho kuqhame kubo bonke.” (1 Thimothewu 4:15) Abanye, ngenxa yokuba bebancane kakhulu ukuba babe izinceku ezikhonzayo noma abadala, bangase bazizwe bengakwazi ukuthuthuka, becabanga ukuthi ukuthuthuka kubonakala kuphela ngemithwalo yemfanelo yebandla noma amalungelo. Kuyiqiniso, uThimothewu wayengafaneleki nje kuphela ngokuthuthuka ngokomoya ukuba akhonze njengomdala kodwa futhi nangeminyaka. Kodwa uThimothewu kwakumelwe aqhubeke ezimisela, futhi kulokhu wabekela zonke izikhonzi ezisencane isibonelo esivelele ukuba zisilandele kunoma imaphi amathuba angase azivulekele.—1 Thimothewu 4:12, 13.
18. AmaKristu amasha angathuthuka ngaziphi izindlela?
18 Ngakho, njengoThimothewu, wena nceku ethuthukayo kaJehova ungaba ‘isibonelo kwabakholwayo’ ngokuvumela iqiniso liyithonye ngokujulile indlela ophila ngayo nangokuthuthuka enkonzweni yakho. Njengamanje ningalwela ukuthuthuka ngokufunda ukuhlakulela izimfanelo ezinjengokuzikhuza, ukuziphatha ngokufaneleyo, ukungenisa izihambi, nokuzimisela. Ngokuzenza nitholakale kubadala ngokuthatha ngokungathi sína noma imuphi umsebenzi abanicela ukuba niwenze, ningasebenzela ukubonakalisa ‘ukufaneleka kwenu lapho nihlolwa.’ (1 Thimothewu 3:1, 2, 8-10) Ngisho nakuba intuthuko yakho ingasheshi iqashelwe abanye, qiniseka ngokuthi uJehova uyabona. Ngokuhamba kwesikhathi, nabanye bayobona.—1 Thimothewu 5:25.
19. Naphezu komzamo, kungani kumelwe uziqeqeshele ukuzinikela kuNkulunkulu njengomgomo wakho?
19 Ungalingi ukhohlwe ukuthi kungokuba nokuzinikela kuNkulunkulu lapho ungase ufinyelele ubuhlobo bomuntu siqu obuvumelekile noJehova. Ukuntula ukuziqeqesha okungokomoya kuphumela ekulahlekelweni okukhulu kakhulu kunalokho komgijimi odumazekile oshiwo ekuqaleni kwalesihloko. Ukuhlakulela ukuzinikela kuNkulunkulu kuwumsebenzi onzima. Kodwa kuwo wonke umhlaba, uquqaba lwamazwi asemasha ajabulayo luyamemeza: KUWUFANELE WONKE UMZAMO! Ukuzuza lemfanelo kuholela endleleni yokuphila eyanelisayo manje, engenakho ukudumazeka, futhi kuvula ithemba lenjabulo yaphakade. Ngakho qhubeka uziqeqesha. Qhubeka wenza okusemandleni akho, ngisho nalapho kunzima. Duduzeka ngokuthi “uNkulunkulu womusa wonke . . . uyakuniphelelisa, aniqinise, aninike amandla, anisekele. Makube-kuye amandla kuze kube-phakade naphakade. Amen.”—1 Petru 5:10, 11.
[Umbhalo waphansi]
a “Kungani Ngicindezeleka Kangaka?” kuPhaphama!, kaNovember 8, 1983, umagazini owumngane weNqabayokulinda.
Ungaphendula?
◻ Imuphi umzamo odingekile ukuze kugcinwe ukukhulumisana okuhle noNkulunkulu?
◻ Yini ehilelekile ekubeni nonembeza omuhle?
◻ Eyesi-2 Thimothewu 2:20-22 ingasetshenziswa kanjani ekubeni nokuzinikela kuNkulunkulu?
◻ AmaKristu amasha angathuthuka kanjani?
[Ibhokisi ekhasini 17]
Ezinye Izimfanelo ZikaNkulunkulu Wethu Onenhliziyo Enhle
◼ Unemizwa. Ngakho-ke, izenzo zethu zingambangela ukuba ‘adabuke’ noma ajabule.—IHubo 78:40; IzAga 27:11.
◼ Njengoba abantu ngokuvamile bebheka nje ukubonakala komunye, yena “ubheka okusenhliziyweni.”—1 Samuweli 16:7.
◼ Uyasinakekela futhi usimema ukuba siphonse izinkathazo zethu kuye, futhi “uyinqaba ngosuku lwenhlupheko.”—Nahume 1:7; 1 Petru 5:7.
◼ Ubizwa ngokuthi “uNkulunkulu ojabulayo,” futhi ‘uthokozela’ izinceku zakhe.—1 Thimothewu 1:11, NW; IHubo 35:27.
◼ Akasoze enza ngokungalungile noma abonise ukukhetha.—Jobe 34:10; IzEnzo 10:34, 35.
◼ Njengoba engasiyekeli isenzo sobubi, lapho siphenduka ephutheni noma ebuthakathakeni, “ungothethelelayo,” akenzi “njengokufanele izono zethu” “akasivuzi njengokwamacala ethu.”—IHubo 86:5; 103:8-14.
◼ Uyangeneka, futhi ukhuthaza izidalwa zakhe ezithembekile ukuba zisebenzise amakhono azo. Naphezu kokuhlakanipha kwakhe okungapheliyo, ulalela ukusikisela. INkosi uDavide yabhala: “Nobumnene bakho bungikhulisile.”—IHubo 18:35; 1 AmaKhosi 22:19-22.
[Isithombe ekhasini 20]
AmaKristu amaningi athola injabulo ejulile enkonzweni kunasemisebenzini eholela kakhulu