Imibuzo Evela Kubafundi
◼ Ngemva kokuba uDavide noBati-Sheba bonile, kungani kwadingeka ukuba indodana yabo ife, njengoba uDuteronomi 24:16 noHezekeli 18:20 ethi indodana ayiyikufa ngenxa yesono sikayise?
UDavide noBati-Sheba bobabili babengabantu abashadile lapho bephinga futhi uBati-Sheba ekhulelwa. Ukuphinga kwabo kwakuyisono esibi esisijeziso saso singukufa ngaphansi komthetho kaMose. (2 Samuweli 11:1-5; Duteronomi 5:18; 22:22) Ngakho ukuba uNkulunkulu wayevumele ukuba bahlulelwe abantu abangaphansi koMthetho, indodana eyayikhula esibelethweni ngabe yafa nonina. Kodwa uJehova wakhetha ukusingatha indaba yabo ngokwehlukile, okuyinto “umahluleli womhlaba wonke” ngokuqinisekile ayenelungelo lokuyenza.—Genesise 18:25.
Lapho ebhekene necala lakhe, uDavide wavuma: “Ngonile kuJehova.” Khona-ke umkhulumeli kaNkulunkulu watshela uDavide: “NoJehova ususile isono sakho; awuyikufa.” (2 Samuweli 12:13) UDavide waboniswa umusa ngenxa yesivumelwano soMbuso. Ngokungaphezulu, njengoba uNkulunkulu ekwazi ukufunda izinhliziyo, kumelwe ukuba wabubeka esilinganisweni ubuqotho bokuphenduka kukaDavide futhi waphetha ngokuthi sasikhona isisekelo sokwelulela uMusa kuDavide noBati-Sheba. Nokho babengenakulubalekela lonke usizi lwesono sabo. Batshelwa: “Nokho, ngokuba ngalesosenzo waveza ithuba elikhulu lokuba izitha zikaJehova zihlambalaze, umntwana omzalelweyo uyakufa nokufa.”—2 Samuweli 12:14.
UNkulunkulu ‘wabashaya ngosizi’ olwaluhilela ingane yabo eyayizelwe ngokungemthetho; umfana wagula futhi wafa. Umuntu namuhla angase anake ukufa kwengane bese eba nomuzwa wokuthi kwakhishwa isahlulelo sonya. Nokho, kuhle ukukhumbula ukuthi ukube ukuphinga kwakusingathwe futhi kwanikezwa ubufakazi bakho phambi kwabahluleli abangabantu abangaphansi koMthetho, bobathathu (uDavide, uBati-Sheba, nendodana esesibelethweni sakhe) babeyolahlekelwa ukuphila kwabo. Sibheka ngalowombono, ukuvumela kukaNkulunkulu ababili babo ukuba baphile kwakuwumusa. Ngokungaphezulu, kuze kube namuhla asinawo wonke amaqiniso, njengokwaziswa okuphathelene nempilo yosana ngokushesha ngemva kokuzalwa kwalo. Nokho, singakwemukela ukusingatha kukaNkulunkulu lendaba, siqiniseka ngokuthi lokho akwenza kwakuwukungakhethi, kuhlakaniphile, futhi kulungile. Ngisho noDavide kamuva wavuma: “Indlela kaNkulunkulu iphelele.”—2 Samuweli 22:31; qhathanisa noJobe 34:12; Isaya 55:11.
Lokhu kuyavumelana nalokho okwenziwa uDavide ngemva kokuzwa isahlulelo sikaNkulunkulu. Ngesikhathi ingane isagula, uDavide waba lusizi futhi wazila. Kodwa lapho isifile, uDavide wakwazisa ukuthi indaba yayisiphelile. (2 Samuweli 12:22, 23) Ngakho, ethemba isahlulelo sikaNkulunkulu, uDavide waqhubeka eduduza uBati-Sheba (manje owayesengumkakhe ongokomthetho), emqinisekisa ngokuthi ubuhlobo babo bomshado babuzoqhubeka. Kamuva bazala uSolomoni futhi walandela uDavide esihlalweni sobukhosi.
Indlela kaNkulunkulu yokusingatha leyondaba akumelwe ibhekwe njengeshayisana noDuteronomi 24:16 noma uHezekeli 18:20.
Njengengxenye yoMthetho, uNkulunkulu wayala: “Oyise abayikubulawa ngenxa yabantwana, nabantwana abayikubulawa ngenxa yawoyise; yilowo nalowo uyakubulawa ngesakhe isono.” (Duteronomi 24:16) Lezoziqondiso zazingezabahluleli bakwaIsrayeli ababesingatha amacala angokomthetho. Abahluleli babengakwazi ukufunda izinhliziyo. Kwakumelwe bahlulele umuntu ngamunye ngesisekelo sokuziphatha kwakhe siqu njengoba kuvezwa ubufakazi.
Ngokufanayo, uHezekeli 18:20 uyaphawula: “Indodana ayiyikuthwala ukona kukayise, uyise angathwali ukona kwendodana; ukulunga kolungileyo kuyakuba phezu kwakho, nobubi bomubi buyakuba-phezu kwakhe.” Lokhu ngokuyinhloko kwakubhekiselwe kwabadala. Umongo ukhuluma ngendodana eyabubona ububi bukayise kodwa yenqaba ukuhlanganyela kubo; kunalokho, indodana yafeza izahlulelo zikaJehova futhi yahamba emithethweni yakhe. Indodana enjalo yayiyosindiswa lapho uyise efa.—Hezekeli 18:14-17.
Nokho, akunakuphikwa ukuthi izingane zingayithola imiphumela ngenxa yezenzo zabazali bazo. Abazali abasaphazayo noma abayiziwula bangase babangele ubumpofu kuwo wonke umkhaya. Noma cabanga ngomphumela ezinganeni uma umzali egqunywe ejele ngenxa yesenzo sobugebengu. Ngisho nosizi uNkulunkulu aluletha ngokufanelekile kumaIsrayeli ngenxa yobubi bawo lwazithinta izingane zangaleso sikhathi. (Duteronomi 28:15, 20-32; Hezekeli 8:6-18; 9:5-10) Ngokuphambene, uNkulunkulu wanxusa abantu bakhe: “Khethani ukuphila ukuba niphile, wena nenzalo yakho, ukuba umthande uJehova uNkulunkulu wakho, ulilalele izwi lakhe, unamathele kuye, ngokuba lokho kungukuphila kwakho nobude bezinsuku zakho.”—Duteronomi 30:19, 20.
Ngakho-ke, okuhlangenwe nakho kukaDavide noBati-Sheba kumelwe kugcizelele kubazali ukuthi ukuziphatha kwabo kungazithinta kakhulu izingane zabo. Uma abazali ‘belesaba igama likaNkulunkulu, kuyakuphuma ilanga lokulunga kubo’ kube isibusiso emkhayeni wonke.—Malaki 4:2.