AmaKristu Angathathi-Hlangothi Ezweni Elingcoliswe Yigazi
“Ochitha igazi lomuntu, igazi lakhe liyakuchithwa ngabantu, ngokuba uNkulunkulu wamenza umuntu ngomfanekiso wakhe.”—GENESISE 9:6.
1. Yiziphi izinto eziye zenzeka emhlabeni kusukela ngo-1914 ezinikeza isizathu sokukhathazeka?
AMACHIBI egazi, labantu abangaphezu kwezigidi eziyikhulu, aye achithwa empini kusukela ngo-1914. Futhi liyini ithemba ngekusasa? Ukuchithwa kwamadolobha amabili aseJapane ngo-1945 kwabulala cishe abantu abayizi-200 000 futhi ekugcineni kwaholela esimisweni somthetho esisha, esaklanywa imibuso emikhulu futhi sabizwa ngokufanelekile ngokuthi i“MAD” (Mutually Assured Destruction). Lokhu kuye kwaba isisekelo sokuhloma kwezizwe ngokulinganayo, okwenziwa ngokunqwabelanisa izikhali zenuzi ezingacekela phansi umhlaba wethu ngokuphindwe izikhathi eziningi. Imikhumbi-ngwenya iye yayisa lezikhali zonya ezilwandle, futhi muva nje usongo lwempi yasemkhathini luye lwengeza ingozi. Ngisho nokuhloma kwezizwe ngokulinganayo manje kuyantengantenga. Ingabe ikhona indlela yokuphuma kulobuhlanya?
2. Yini uJesu ayiprofetha ngokuqondene nalezikhathi, kodwa nasiphi isiqinisekiso kumaKristu?
2 Yebo ikhona. Kodwa ayinakuba ngokuzikhethela kwezizwe. UJesu waprofetha ngokuqondene nesimo sazo samanje esibucayi: “Kuyakuba khona izibonakaliso elangeni nasenyangeni nasezinkanyezini; nasemhlabeni usizi luyakwehlela izizwe, zixakeke ngokuduma kolwandle namaza, abantu baphele amandla ngokwesaba nangokubheka okuvelela umhlaba; ngokuba amandla ezulu ayakunyakaziswa.” UJesu waphetha lesosiprofetho ngesiqinisekiso sokuthi amaKristu ‘ayelinda . . . ayeyophepha kukho konke lokhu okuyakwenzeka.’—Luka 21:25, 26, 36.
Ukuphishekela Ukuthula NoNkulunkulu
3. (a) Izizwe zizikhonza kanjani izithakazelo ‘zikankulunkulu walelizwe’? (b) UJehova uyoyixazulula kanjani impikiswano?
3 Izizwe, ikakhulukazi lezo ezihlome ngezikhali zenuzi, zivaleleke emncintiswaneni wokubuswa komhlaba, ngokuqondakalayo ongaphela ekubhujisweni komhlaba. Lokhu kukhonza izithakazelo ‘zikankulunkulu walelizwe.’ Izizwe ‘ziye zaceba icebo ngoJehova [nangoKristu] wakhe,’ manje obekwe esihlalweni sobukhosi emazulwini. Lapho uJehova ekhipha izwi, uKristu uyokwephula lezozizwe njengokungathi ngentonga yensimbi. Khona-ke lesithembiso siyogcwaliseka: “UNkulunkulu wokuthula uzakumchoboza masinyane uSathane phansi kwezinyawo zenu.”—2 Korinte 4:4; IHubo 2:2, 6-9; Roma 16:20.
4. Singakuphishekela kanjani ukuthula noNkulunkulu? (1 Petru 3:11)
4 Thina, ngokwethu, kumelwe sifune ukuphishekela ukuthula nalowoNkulunkulu. Singakwenza kanjani lokho? Phakathi kokunye, kumelwe sifise ukuba nombono kaNkulunkulu ngokuqondene nobungcwele bokuphila komuntu nobegazi lokuphila okuyigugu eligijima emithanjeni yethu.
5. Yiziphi izibonelo ezibonisa ukuthi uJehova uyakuphindisela ukuchithwa kwegazi okwenziwa ngamabomu?
5 UJehova unguMdali womuntu nowegazi elimangalisayo elithwala ukudla komzimba womuntu, ngaleyondlela lisigcine siphila. UNkulunkulu akazange ahlose ukuba igazi lomuntu lichithwe ngamabomu. Ngemva kokuba uKayini enze icala lokuqala lokubulala, uJehova wathi igazi lika-Abela lalikhalela ukuphindiselwa. Kamuva, omunye wabazukulu bakaKayini, uLameka, waba umbulali futhi washo ngokusankondlo ukuthi uma yena ebulawa, lelocala legazi kumelwe liphindiselwe. Ngokuhamba kwesikhathi, izwe elonakele lagcwala ubudlova. UJehova waletha uZamcolo ukuba ubhubhise lelozwe lokuqala lesintu. Umkhaya kaNowa owayenokuthula, ogama lakhe lisho “Ukuthula,” yiwo kuphela owasinda.—Genesise 4:8-12, 23, 24; 6:13; 7:1.
6. Uthini umthetho kaNkulunkulu ngokuqondene negazi, futhi ubopha kobani?
6 UJehova wabe esazisa uNowa ngentando yaKhe eqondile ngokuqondene negazi. Wafinyelela umvuthwandaba walokhu ngokuthi: “Ochitha igazi lomuntu, igazi lakhe liyakuchithwa ngabantu, ngoba uNkulunkulu wamenza umuntu ngomfanekiso wakhe.” (Genesise 9:3-6) Sonke isintu namuhla siyinzalo kaNowa; ngakho-ke lomthetho waphezulu ogcizelela inhlonipho ngokuphila usebenza kubo bonke abantu abafisa ukuvunyelwa uNkulunkulu. UMthetho wesithupha kweyishumi wathi futhi, “Ungabulali.” Icala legazi lidinga isinyathelo esifanele nempindiselo.—Eksodusi 20:13; 21:12; Duteronomi 21:1-9; Heberu 10:30.
7. (a) Kungani kwakufanelekile ngoJehova ukuyala uIsrayeli ukuba aye empini? (b) Iyiphi impi amaKristu ahileleke kuyo namuhla?
7 Njengoba ukuchithwa kwegazi kwakwenqatshelwe ngokusobala kangaka, kungani uJehova avumela, futhi wayala, isizwe sakwaIsrayeli ukuba silwe izimpi? Kumelwe sikhumbule ukuthi lezi kwakuyizimpi ezingcwele uJehova, uMahluleli womhlaba wonke, aqeda ngazo izizwe ezazikhulekela amademoni. Ngokwesibonelo, abantu baseKhanani babezihlalise bona eZweni Lesithembiso futhi balandela indlela yokuphila yobudemoni, eyonakele eyayiyofaka abantu abangcwele bakaNkulunkulu engozini. UJehova wenza ukuba lelozwe ‘lihlanze’ labo bantu abonakele kuleyondawo yabo, esebenzisa impi engokwasezulwini ukuze kwenziwe lokhu. (Levitikusi 18:1-30; Duteronomi 7:1-6, 24) Lokhu kubonisa impi engokomoya yomKristu namuhla.—2 Korinte 10:3-5; Efesu 6:11-18.
8. Yini ebonisa ukungakuvumeli kukaNkulunkulu ukuchithwa kwegazi elingenacala?
8 Nokho, uJehova akazange akuvumele ukuchithwa kwegazi kokuyekelela. Ngakho, ngokuqondene nenkosi yakwaJuda kulotshwe ukuthi: “Futhi uManase wachitha kakhulu igazi elingenacala, waze wagcwalisa iJerusalema kusukela ekuqaleni kuze kube-sekugcineni.” Nakuba uManase kamuva aphenduka futhi wazithoba phambi kukaJehova, lelocala legazi lahlala kuye nasohlwini lobukhosi bakhe. Umzukulu kaManase owayesaba uNkulunkulu, iNkosi uJosiya, ngesibindi wathatha isinyathelo sokuhlanza izwe nokubuyisela ukukhulekela kweqiniso. Kodwa wayengenakulisusa lelocala legazi. Phakathi nokubusa kwendodana kaJosiya uJehoyakimi, uJehova washukumisela uNebukadinesari ukuba amelane noJuda, ukuze ehlise isahlulelo kulesosizwe. “Impela kwaba-khona lokho kwaJuda ngezwi likaJehova ukubasusa ebusweni bakhe ngenxa yezono zikaManase njengakho konke akwenzileyo, nangenxa yegazi elingenacala alichithayo, ngokuba wagcwalisa iJerusalema ngegazi elingenacala, lokhu uJehova akavumanga ukukuthethelela.”—2 AmaKhosi 21:16; 24:1-4; 2 IziKronike 33:10-13.
Indinganiso YamaKristu
9. Iyiphi indinganiso uJesu ayibekela amaKristu ngokuqondene nokuchithwa kwegazi?
9 Singalindela ukuba uJesu, uMqalisi wobuKristu, abeke indinganiso yamaKristu ngokuqondene nokuchithwa kwegazi. Ingabe wayibeka? Nokho, ngokushesha ngemva kokuba emise iSikhumbuzo sokufa kwakhe, uJesu waqiniseka ngokuthi abafundi bakhe babenezinkemba ezimbili. Ngayiphi injongo? Ukuze bamise isimiso esibalulekile, leso wonke amaKristu okwakuyodingeka ukuba asiqaphele. Lapho ibutho lamasosha lizobopha uJesu eGetsemane, uPetru onamawala wahosha inkemba, wagenca indlebe yangakwesokudla kaMalkusi, inceku yompristi omkhulu ongumJuda. Ingabe kwakungeyona into enhle ukulwela iNdodana kaNkulunkulu ngaleyondlela? UJesu akazange acabange kanjalo. Welapha indlebe yenceku futhi wakhumbuza uPetru ukuthi uYise wasezulwini wayekwazi ukuthumela amalegiyona ayi-12 ezingelosi azosiza uJesu. Lapho uJesu washo isimiso esiyisisekelo: “Bonke abaphatha inkemba bayakubhubha ngenkemba.”—Mathewu 26:51-53; Luka 22:36, 38, 49-51; Johane 18:10, 11.
10. (a) Isiphi isimiso esibalulekile esenziwa kuJohane 17:14, 16, no-18:36? (b) Iyiphi inkambo eyaphumela ekusindisweni kwamaKristu ekhulu lokuqala?
10 Kamuva amaKristu ekhulu lokuqala ayengawukhumbula umthandazo wentshiseko kaJesu owawuya kuJehova, athi kuwo ngabafundi bakhe: “Abasibo abezwe, njengalokhu nami angisiye owezwe.” Babesayikhumbula impendulo kaJesu echazayo eyayiya kuPontiyu Pilatu: “Umbuso wami awusiwo owalelizwe. Uma umbuso wami ubungowalelizwe, izikhonzi zami zaziyakulwa ukuba nginganikezelwa kubaJuda. Kepha kalokhu umbuso wami awusiwo owalapha.” (Johane 17:14, 16; 18:36) Ngalezozinsuku, amaqembu amaJuda ayephikisana nombuso ayelwa wodwa, kokubili ngomlomo nangokuchitha igazi. Kodwa abafundi bakaJesu abazange bazihlanganise naleyomikhankaso yokuvukela umbuso. Cishe iminyaka engama-30 babelinde eJerusalema. Khona-ke balalela isibonakaliso sikaJesu esingokwesiprofetho ‘ngokubalekela ezintabeni.’ Isimo sabo sokungathathi-hlangothi nokubaleka kwabo kwaphumela ekusindisweni kwabo.—Mathewu 24:15, 16.
11, 12. (a) Isiphi isinqumo uKorneliyu noSergiyu Pawulu okwadingeka ukuba basenze lapho beba abakholwayo? (b) Babeyolutholaphi usizo ukuze benze isinqumo esiqondile? (c) Lokhu kubonisani kithi namuhla?
11 Abanye bangase babuze, ‘Kuthiwani ngoKorneliyu, induna yekhulu, noSergiyu Pawulu, umbusi wezwe owayesekelwa ibutho eKhupro? Lamadoda ayengazihlanganisile yini nezimpi?’ Yebo, lapho amukela isigijimi sobuKristu. Nokho, imiBhalo ayisitsheli ukuthi yini uKorneliyu nabanye abayenza ngemva kokuguquka kwabo. Akungabazeki ukuthi uSergiyu Pawulu, owayeyindoda ehlakaniphile futhi “emangaliswa ngesifundiso seNkosi,” ngokushesha wayeyohlola isikhundla sakhe esingokwezwe ngokucabangela ukholo lwakhe olusha futhi enze isinqumo esifanele. UKorneliyu wayeyokwenza okufanayo. (IzEnzo 10:1, 2, 44-48; 13:7, 12) Awukho umbhalo ogciniwe wokuthi abafundi babatshela lokho okwakumelwe bakwenze. Babeyokubona ekuzitadisheleni kwabo siqu iZwi likaNkulunkulu.—Isaya 2:2-4; Mika 4:3.
12 Ngokufanayo, amaKristu namuhla akumelwe ayale abanye ngokomuntu siqu ngokuma okumelwe bakuthathe ezimpikiswaneni ezihlangene nokungathathi-hlangothi kobuKristu. Ngamunye kumelwe enze izinqumo zakhe siqu ngenxa kanembeza ngokuhambisana nokuqonda kwakhe izimiso zeBhayibheli.—Galathiya 6:4, 5.
Ezikhathini Zanamuhla
13. Benza kanjani abaFundi BeBhayibheli ekuzameni ukugwema icala legazi phakathi neMpi Yezwe I?
13 Kwakungo-1914 lapho impi yezwe yokuqala igqashuka emhlabeni wonke. Yonke imithombo yezizwe, kuhlanganise namabutho azo, yasetshenziswa empini. Abafundi BeBhayibheli abaningi, njengoba oFakazi BakaJehova babebizwa kanjalo ngalesosikhathi, benza imizamo etusekayo ukuze bagweme icala legazi. Bashushiswa ngonya, njengoba nje uJesu athi babeyoshushiswa.—Johane 15:17-20.
14, 15. (a) UJehova wasinikeza kanjani isiqondiso phakathi neMpi Yezwe II? (b) Yikuphi ukuma okuqondile oFakazi BakaJehova abakuthatha ngalesosikhathi? (c) Lokhu kwaphambana kanjani nalokho abalandeli bezinkolo zezwe ababekwenza?
14 Lapho impi yomhlaba wonke igqashuka futhi ngo-1939, uJehova wanikeza isiqondiso esikhanyayo ngezinceku zakhe. Phakathi nezinyanga ezimbili zokumenyezelwa kwempi, lesiqondiso seza ngohlobo lwesihloko esifundwayo esingokweBhayibheli esithi “Ukungathathi-hlangothi” kuNqabayokulinda yesiNgisi kaNovember 1, 1939. Saphetha ngalomusho: “Bonke abangasohlangothini lweNkosi abanakuthatha-hlangothi ezizweni ezilwayo, futhi bayoba ngasohlangothini LOMBUSI omkhulu neNkosi yakhe ngokuphelele.”
15 Waba yini umphumela? Njengobuzalwane bomhlaba wonke, oFakazi BakaJehova bakugwema ngokuqhubekayo ukuchitha igazi labantu abangenacala, kuhlanganise nabafowabo bakwamanye amazwe. Lapho amaKatolika, amaProthestani, amaBuddha, nabanye babebulalana bodwa, abafundi beqiniso bakaJesu babelalela umthetho wakhe omusha: “Njengalokho nginithandile, nani nithandane.”—Johane 13:34.
16. (a) OFakazi BakaJehova bazibonisa kanjani beyizakhamuzi ezilungile? (b) OFakazi baqhubeka kanjani nokunika uNkulunkulu okukaNkulunkulu, futhi ngezinye izikhathi kwakuba namuphi umphumela?
16 LamaKristu aqhubeka enika uKesari okukaKesari. Alalela imithetho yezwe njengezakhamuzi ezilungile. (Mathewu 22:17-21; Roma 13:1-7) Kodwa okubaluleke ngokwengeziwe, anika uNkulunkulu okwakhe, kuhlanganise nokuphila kwawo kokuzinikezela nokukhulekela kobuKristu. Ngakho-ke, lapho uKesari efuna ukuba nezinto zikaNkulunkulu, enza ngokuvumelana nezimiso ezibekwe kuzEnzo 4:19 no–IzE 5:29. Kungakhathaliseki ukuthi impikiswano yayiwukuchitha igazi, umsebenzi wezempi ongahileli ukulwa, enye inkonzo ayengayikhetha, noma ukukhulekela isithombe njengefulege lesizwe, amaKristu athembekile athatha isimo sokuthi kwakungekho ukuba phakathi nendawo. Ngezinye izikhathi ayebulawa ngenxa yalesisimo.—Mathewu 24:9; IsAmbulo 2:10.
Abazange Bahlehle
17. (a) Ngokwenye incwadi, amaNazi ayebaphatha kanjani oFakazi BakaJehova? (b) Ekuhlangabezaneni nenselele, kukanjani oFakazi BakaJehova babengafani nabanye?
17 Incwadi yamuva enesihloko esithi Of Gods and Men yabonisa ukuthi phakathi nokuBusa Kwesithathu kukaHitler, oFakazi BakaJehova babeyiqembu elingokwenkolo elathola “ukuphikiswa okukhulu kakhulu.” OFakazi BakaJehova abazange bahlehle. Labo bezinye izinkolo eJalimane balandela abefundisi babo bezempi, ngaleyondlela benza inkonzo engokwenkolo embusweni waseJalimane futhi bamukela “uphawu” lwesilo sasendle esingokwezombangazwe “esandleni sabo sokunene noma ebunzini labo.” (IsAmbulo 13:16) Laba basekela ngenkuthalo ngesandla sabo sokunene izinqola zezombangazwe zaseJalimane futhi benza ukuma kwabo kwabonakala ngokusobala ngokunikeza uHitler udumo nangokukhulekela ifulege leswastika.
18. (a) Yimuphi umbhalo ogciniwe obonisa ukuthi oFakazi BakaJehova “‘babengathathi-hlangothi’ kwezombangazwe”? (b) Lendaba engokomlando kumelwe isithinte kanjani thina ngabanye namuhla?
18 Isiphi isimo esathathwa amaKristu eqiniso lapho? Isihloko okukhulunywe ngaso ngenhla sithi: “OFakazi BakaJehova kuphela abamelana nalokhu kubusa. Balwela ukufa nokuphila futhi ngenxa yalokho ingxenye yabo yaboshwa futhi ingxenye eyodwa kwezine yabulawa. . . . Bona, ngokuphambene [nezinye izinkolo], ababona abezwe ngomqondo wokuthi abalufuni udumo noma imivuzo yalelizwe futhi abazicabangeli njengabangamalungu alo. ‘Abathathi-hlangothi’ kwezombangazwe njengoba kakade sebengabelinye izwe—likaNkulunkulu. . . . Abazifuni futhi abazenzi izivumelwano. . . . Ukukhonza empini, ukuvota, noma ukukhulekela uHitler kwakuyosho ukulalela lokho okushiwo yilelizwe njengokungaphezu kwalokho okushiwo uNkulunkulu.” Lokuphishekela koFakazi BakaJehova ukuthula nokungabi nabudlova kwaqashelwa ngisho nasemakamu okuhlushwa. Kanjani? Ngokuthi “oFakazi kuphela ababevunyelwe ukuba baphuce abalindi bamaS.S. besebenzisa izinsingo ezazingabajuqula intamo, njengoba kwakuyibo kuphela ababebathemba ngokuthi abanakubulala.”
19. OFakazi BakaJehova baye basilandela kanjani isibonelo sikaJehova sesibindi, futhi kwaba namuphi umphumela?
19 Phakathi nempi yezwe yesibili, oFakazi BakaJehova baba yisibonelo esivelele sokungathathi-hlangothi kobuKristu. Ngokufanayo, emhlabeni wonke balandela ngesibindi isibonelo sikaJesu ‘sokungabi yingxenye yezwe’; balinqoba lelizwe elinecala legazi njengoba nje noKristu enza.—Johane 17:16, NW; 16:33; 1 Johane 5:4.
Ukuthola Isiphephelo Ecaleni Legazi
20. (a) Kungani kuphuthuma ukubaleka enkolweni yamanga? (b) Singatholakalaphi kuphela isiphephelo seqiniso namuhla?
20 Emakhulwini eminyaka edlule, izinhlangano zenkolo ziye zenza umlando waba bomvu ngokuchitha igazi elingenacala ezimpini zenkolo, izimpi “ezingcwele,” nangenqubo eyayenziwa amaKatolika yokujezisa izihlubuki. Ziye zenza izivumelwano nomashiqela abanequngo. Zavuma lapho omashiqela befaka oFakazi BakaJehova emajele nasemakamu okuhlushwa, lapho abaningi babo bafa khona. Zawasekela ngokuzithandela amaführers (abaholi) ayebulala oFakazi ngokubadubula nangokubanquma amakhanda. Lezimiso ezingokwenkolo azinakusibalekela isahlulelo sikaJehova sokulunga. Ngeke sephuze. Futhi akumelwe noma ubani othanda ukulunga ephuze ukuphuma enkolweni yamanga—“iBabiloni Elikhulu” elingcoliswe yigazi—futhi afune isiphephelo enhlanganweni kaNkulunkulu.—IsAmbulo 18:2, 4, 21, 24.
21. Yini efanekiselwa ilungiselelo likaNkulunkulu lemizi yesiphephelo?
21 Abaningi bethu, ngaphambi kokuba sifunde iZwi likaNkulunkulu, kungenzeka siye sachitha igazi labantu noma saba amalungu ezinhlangano zenkolo noma zezombangazwe ezinecala legazi. Kulokhu singafaniswa nowayebulale ngokungenhloso kwaIsrayeli. Wayengabalekela kweminye yemizi eyisithupha lapho ayengathola khona isiphephelo, futhi ekugcineni, akhululwe ekufeni kompristi omkhulu wakwaIsrayeli. Namuhla, lokho kusho ukwamukela nokuhlala ngaphansi kwezinzuzo zenkonzo esebenzayo yomPristi oMkhulu kaNkulunkulu, uJesu Kristu. Ngokuhlala lapho sizihlanganise nabantu bakaNkulunkulu abagcotshiwe, singasinda lapho “umphindiseli wegazi” wosuku lwanamuhla, uKristu Jesu, ekhipha isahlulelo sikaNkulunkulu ngecala legazi. “Isixuku esikhulu” manje esibalekela enhlanganweni kaNkulunkulu kumelwe sihlale kulesosiphephelo kuze kube yilapho uKristu, esikhundleni sakhe njengomPristi oMkhulu, ‘efa’ ngokuqondene nokuqeda umsebenzi wakhe wokuhlenga.—Numeri 35:6-8, 15, 22-25; 1 Korinte 15:22-26; IsAmbulo 7:9, 14.
22. NgokukaIsaya 2:4, izizwe zeUN zihluke kanjani esizweni sikaNkulunkulu esingcwele?
22 Odongeni lweUN eNew York, eU.S.A., ungafunda lamazwi alandelayo asekelwe ku-Isaya 2:4: “Bayakukhanda izinkemba zabo zibe-ngamakhuba, nemikhonto yabo ibe-ngocelemba; isizwe asiyikuphakamisela isizwe inkemba, zingabe zisafunda ukulwa.” Kodwa obani abenza ngokuvumelana nalawomazwi namuhla? Akukho nelilodwa lamalungu abizwa ngokuthi iZizwe Ezihlangene elenza kanjalo. Kuphela “isizwe” somhlaba wonke esiphishekela ukuthula soFakazi BakaJehova abayizigidi ezintathu nangaphezulu esiye sabonisa ngokusobala ukuthi ukungathathi-hlangothi kobuKristu kungalondolozwa kanjani ezweni ezingcoliswe yigazi.
Imibuzo Yokubukeza
◻ Singakuphishekela kanjani ukuthula noNkulunkulu?
◻ UJehova ukubheka kanjani ukuchithwa kwegazi okwenziwa ngamabomu?
◻ Kusho ukuthini ukungathathi-hlangothi kobuKristu?
◻ Yiziphi izibonelo ezinhle zobuqotho esinazo?
◻ Singasithola kanjani isiphephelo sensindiso?
[Ibhokisi ekhasini 21]
Irekhodi Lokholo, Isibindi Nobuqotho
Incwadi ethi New Religious Movements: A Perspective for Understanding Society inikeza lokhu kukhulumela okwengeziwe ngobuqotho boFakazi BakaJehova ekubhekaneni nokushushiswa ngamaNazi:
“Ekwenqabeni kwabo ukuvuma, oFakazi BakaJehova babekela inselele umqondo wokubusa kobushiqela womphakathi omusha, futhi lenselele, kanye nokuphikelela kwayo, ngokusobala yabaphazamisa labo ababeklama uhlelo olusha. Lapho oFakazi beshushiswa ngokwengeziwe, kulapho babeletha inselele yangempela. Izindlela ezindala zoshushiso, ukuhlushwa, ukuboshwa nokuhlekwa usulu zazingaphumeli ekuguqulelweni kwanoma yibaphi oFakazi esimweni sobuNazi futhi eqinisweni zaziphendukela abashoshozeli bazo. AmaNazi ayetatazela lapho ebhekene nalokhu kusabela ayengakucabangi.”
Ukulwa phakathi kwalezimbangi ezimbili zokwethembeka kwakushubile, futhi kwakudlulele ngoba amaNazi ayenamandla ngokomzimba, ngezindlela eziningi ayengaqinisekile kangaka, ayengagxilile kangako, enkolelweni yawo, eyengaqinisekile kangako ngokuthi ukuBusa (kukaHitler) kweminyaka eyi-1 000 kwakuyohlala. OFakazi babengazingabazi izimpande zabo, ngoba ukholo lwabo lwaba sobala kusukela ngesikhathi sika-Abela. Lapho amaNazi ephikelela nokuphikisa futhi enza abasekeli bawo bakholelwe kuwo, ngokuvamile esebenzisa indlela yokukhuluma ngolimi olungokomfanekiso lobuKristu obungamahlelo, oFakazi babeqiniseka ngokwethembeka okuphelele, okungenakwephulwa kwamalungu abo, kuze kube sekufeni.”
Kuyoba usuku olujabulisayo ngempela lapho lokhu kunqoba kokwethembeka kobuKristu sekuphelelisiwe. (Roma 8:35-39) Khona-ke ngaphansi kokubusa koMbuso ‘kweNkosi yokuthula,’ uJesu Kristu okhazinyulisiwe, “umbuso uyakuba-mkhulu, ukuthula kungabi-nakuphela.”—Isaya 9:6, 7.
[Ibhokisi ekhasini 22]
Abagcina Ubuqotho Abasebasha
Lokhu okulandelayo kucashunwe encwadini yemihla ngemihla ekhishwe muva nje yingqapheli ezweni laseYurophu. Kubonisa indlela oFakazi abasebasha abaye babhekana ngayo ngesibindi nempikiswano yokungabi “abezwe.”—Johane 17:14.
‘NgoMarch 12, 1945: Kwakuthethwa amacala aphathelene nempi. Abalandeli bakaJehova ababili abasebasha babemangalelwe. Icala: Ukwenqaba inkonzo yezempi (ngenxa yomoya wenkolo yabo). Omncane, ongakafinyeleli eminyakeni engama-20, wathola isigwebo sasejele seminyaka eyi-15. Nokho, omdala wagwetshwa intambo, futhi ngokushesha wayiswa endaweni yakubo ukuze abulawelwe khona obala njengesibonelo sokwesabisa. Uyisisulu se-14 lapha. Kwangathi angalala ngokuthula. Lendaba ingithinte ngokujulile. Ngeke wenze ngaleyondlela koFakazi BakaJehova. Abenzanga isibonelo esiyisixwayiso kulomfana, kodwa umfel’ ukholo. Wayengumfana ophile kahle. Ngiyadabuka ngaye.
‘Ntambama, siye sazi imininingwane ngokubulawa kwalensizwa, okwenzeka phakathi kwabantu abaningi endaweni yomphakathi. Elinye lamasosha elalimi phakathi kwamaningi lazidubula ngenxa yokudabuka ngaphambi kokuba ibulawe. Lokhu kwakungenxa yokuthi umphathi wamasosha wayefuna ukuba lisize indoda eyayizoyilengisa. Ngoba lalingazimisele ukukwenza lokho. Lakhetha ukuzibulala. Insizwa ngokwayo yafa ngesibindi. Ayizange isho lutho.’
Ovukweni, yeka indlela intsha enjalo eyojabula ngayo ngokuthi yakhetha ukuthola udosi lokufa kunokuba ilahlekelwe indawo esimisweni esisha sezinto sikaJehova!—Qhathanisa noHoseya 13:14.