Ukuphila NeNkonzo KaJesu

Umthandazo, Nokuthembela KuNkulunkulu

NJENGOBA uJesu eqhubeka nentshumayelo yakhe, usola ukuzenzisa kwabantu ababukisa ngezimfanelo zabo zokuzisholo zokwesaba uNkulunkulu. Uthi, “Nxa wabela isipho, ungakhalisi icilongo phambi kwakho, njengalokhu kwenza abazenzisi.”

UJesu uyaqhubeka, “Nalapho nikhuleka, ningabi-njengabazenzisi, ngokuba bethanda ukukhuleka bemi emasinagogeni nasezinhlanganweni zezindlela ukuba babonwe ngabantu.” Kunalokho, uyayala: “Nxa ukhuleka, ngena ekamelweni lakho, uthi usuvale umnyango wakho ukhuleke kuYihlo osekusithekeni.” UJesu ngokwakhe wayethandaza obala, ngakho akakugxeki. Usola imithandazo eshiwo ngenjongo yokuhlaba izilaleli umxhwele neyenza ukuba zikutuse.

UJesu uyeluleka ngokuqhubekayo: “Nxa nikhuleka, ningathemelezi njengabezizwe.” UJesu akasho ukuthi ukuphindaphinda ngokwakho akulungile. Ngesinye isikhathi, yena ngokwakhe waphindaphinda “lona lelozwi” lapho ethandaza. Kodwa lokhu akwenqabayo ukushiwo kwamazwi agcinwe ekhanda ‘ngokuthemeleza,’ njengoba kwenza labo abaphatha ubuhlalu lapho bephindaphinda imithandazo yabo ngokungenangqondo.

Ukuze asize izilaleli zakhe ukuba zithandaze, uJesu uzinikeza umthandazo oyisibonelo ohlanganisa izicelo eziyisikhombisa. Ezokuqala ezintathu zibonisa ukwazisa okufanele ngobukhosi bukaNkulunkulu nezinjongo zakhe. Ziyizicelo zokuthi igama likaNkulunkulu lingcweliswe, uMbuso wakhe ufike, nentando yakhe yenziwe. Ezine zokugcina ziyizicelo ezingokomuntu siqu, okungukuthi, zokudla kwemihla ngemihla, ukuthethelwa kwezono, ukungalingwa ngaphezu kwamandla omuntu, nokukhululwa komubi.

Lapho eqhubeka, uJesu ukhuluma ngogibe lokugxila ngokungafanele ezintweni ezibonakalayo. Uyanxusa: “Ningazibekeleli ingcebo emhlabeni, lapho kona inundu nokugqwala, nalapho amasela afohla khona, ebe.” Akukhona ukuthi ingcebo enjalo iyaphupha kuphela kodwa uNkulunkulu akanakukuvuza ngayo.

Ngakho-ke, uJesu uthi: “Kepha zibekeleleni ingcebo ezulwini.” Lokhu ungakwenza ngokubeka inkonzo kaNkulunkulu kuqala ekuphileni kwakho. Akekho ongathatha umvuzo ozibekelele wona kuNkulunkulu noma izinzuzo zawo ezinhle. Khona-ke uJesu uyanezela: “Lapho kukhona ingcebo yakho, nenhliziyo iyakuba-khona lapho.”

Lapho eqhubeka ekhuluma ngogibe lwezinto ezibonakalayo, uJesu unikeza lomfanekiso: “Isibani somzimba yiso. Ngakho uma iso lakho lilihle, uzakukhanya umzimba wakho wonke. Kepha uma iso lakho lilibi, uzakuba-mnyama umzimba wakho wonke.” Iso elisebenza kahle emzimbeni lifana nesibani esikhanyisiwe endaweni emnyama. Kodwa ukuze ubone kahle, iso kumelwe libe lihle, okungukuthi, kumelwe ligxile entweni eyodwa. Iso elingaboni kahle liholela ekuboneni izinto ngokungeyikho, ekuphishekeleni izinto ezibonakalayo ngaphezu kwenkonzo kaNkulunkulu, okuphumela ekubeni “umzimba wonke” ube mnyama.

UJesu uqokomisa lendaba ngokwenza umfanekiso onamandla: “Akakho ongakhonza amakhosi amabili. Ngokuba uyakuzonda enye, athande enye, noma abambelele kwenye, adelele enye. Ningekhonze uNkulunkulu noMamona.”

Ngemva kokunikeza leseluleko, uJesu uqinisekisa izilaleli zakhe ukuthi akudingeki zikhathazeke ngezidingo zazo ezingokwenyama uma zibeka inkonzo kaNkulunkulu kuqala. Uthi, “Bukani izinyoni zezulu ukuthi azihlwanyeli, azivuni, azibekeleli ezinqolobaneni; nokho uYihlo wasezulwini uyazondla.” Khona-ke uyabuza: “Nina kanizidluli kakhulu na?”

Ngokulandelayo, uJesu ukhomba iminduze yasendle futhi uphawula ukuthi “noSolomoni ebukhazikhazini bakhe bonke wayengembathisile okomunye wayo.” Uyaqhubeka, “Uma uNkulunkulu embathisa kanjalo utshani basendle . . . akayikunembathisa kakhulu nina eninokukholwa okuncane na?”

Ngakho-ke uJesu uyaphetha: “Ningakhathazeki nithi: Siyakudlani? noma: Siyakuphuzani? noma: Siyakwembathani na? . . . uYihlo wasezulwini uyazi ukuthi niyakudinga konke lokhu. Kodwa funani kuqala umbuso kaNkulunkulu nokulunga kwakhe, khona konke lokhu kuyakwenezelwa nina.” Mathewu 6:1-34; 26:36-45.

◆ Iziphi iziyalezo ngomthandazo uJesu azinikeza?

◆ Kungani ingcebo yasezulwini ibalulekile, futhi itholakala kanjani?

◆ Imiphi imifanekiso enikeziwe esiza umuntu ukuba agweme ukuthanda izinto ezibonakalayo?

◆ Kungani uJesu athi asikho isidingo sokukhathazeka?