Ukwazisa—Kodwa Kungani Kunokuzisola?
NGONOVEMBER ngonyaka odlule, phakathi nomhlangano wababhishobhi abangamaNtaliyane owawenzelwe eBologna, eItaly, iSonto lamaKatolika lahlasela oFakazi BakaJehova. Ngaphansi kwesihloko esithi “UKristu UNkulunkulu Wethu Nethemba Lethu: amaKristu phambi koFakazi BakaJehova,” umpristi uGiovanni Marinelli wamangalela oFakazi ngokuthi “bayingozi enkolweni nasemphakathini.” Ngenxa yokwanda kwabo okusheshayo eItaly besuka ekubeni ngamaKatolika, wabeka oFakazi icala lokuba ‘igciwane elihlasela ikakhulukazi labo abangagonyiwe.’
Izifunda zababhishobhi nezabefundisi bamaKatolika kulo lonke elaseItaly zayalwa ukuba zimelane ngokuqinile noFakazi. Kanjani? Ngokwenza amaqembu kuwo wonke amadolobha “azozijabulisa” emsebenzini woFakazi ukuze “avule amehlo abathembekileyo bethu.”
Ingabe amaqembu anjalo amelene noFakazi BakaJehova aye aphumelela? Encwadini eyakhishwa kuPiario Parish Magazine, umpristi othile wabhala: “Ngokwami, ngiyabathanda oFakazi BakaJehova, ngikuvuma obala lokho. Nonke nivumelekile ukucabanga ngokwehlukile futhi, mhlawumbe, nize ngisho ningixoshe. . . . Labo engibaziyo banenhlonipho, bakhuluma ngomusa . . . [futhi] banethonya elikhulu. Kunini lapho siyoqonda khona ukuthi iqiniso lidinga ukunikezwa ngendlela eyamukelekayo? Ukuthi akudingeki ukuba labo abamemezela iqiniso babe nenhliziyo engaphelele, babe nephunga elibi, babe amadlabha, babe amanuku?
“Futhi, oFakazi BakaJehova bakuvakashela ekhaya lakho. Ekhaya lakho usendaweni yakho siqu futhi ngaleyondlela kuyinzuzo ngawe . . . Ungelula isandla futhi uthathe iBhayibheli lakho . . . eshalofini futhi uhlole ukuthi ivesi elikhulunyelwe linjalo, uthole umqondo walo ofanele, njll.
“Futhi ngingasho ukuthi okunye okungihlaba umxhwele ngempela iqiniso lokuthi oFakazi BakaJehova bazizwa ‘bebiziwe’ ngokomuntu siqu . . . enkonzweni yezwi. Lokho kuwumsebenzi esawukhohlwa kudala futhi oye wabangela umonakalo ongenakulinganiswa ekushumayeleni kwethu. “Bayokuzwa kanjani kungekho obatshelayo?” Kimina oFakazi BakaJehova babonakala ‘bephelele’: hhayi nje ngokuqondene nekhaya, umsebenzi, nokuziphumuza kuphela, kodwa ngokuqondene nesifundo somuntu siqu sezivumo zabo zokholo nezindlela zokusiza abanye ukuba baziqonde. Kodwa okufike ‘kungiqede’ yimingcwabo yoFakazi BakaJehova. Uma ngiyiqhathanisa nemingcwabo yethu maKatolika, lapho okuwukuphela komuntu othulile kungumufi, lapho kungekho noyedwa ophethe iBhayibheli ukuze ahlanganyele lapho bonke abanye befunda. . . . Yeka ukukhanyiselwa! Yeka imithandazo! Yeka ukholo! Yeka ukuthula! Ngubani owaziyo ukuthi ngiyokwazi ukumelana nesilingo sokwenezela encwadini yami yefa ukuthi: “Ngifisa ukungcwatshwa oFakazi BakaJehova.” Ngubani owaziyo!
“Izingeniso zabo zifaneleke kakhulu. Mhlawumbe kungenxa yokuthi nami ngiyakhononda, angenelisekile, futhi ngiyakuqonda ukusola kwabo okungagunciyo. Bathi, ‘umhlaba esiphila kuwo ugcwele ubudlova nokuziphatha okubi.’ Ingabe unomuzwa wokuthi ungazama ukubaphikisa? Anginawo. . . . ISonto lamaKatolika, njengoba lingenye yezinkolo ezindala kakhulu ezigcwele yonke indawo, linomthwalo oyinhloko ngalokhu kunukubezeka okungaka. Ingabe uyophikisana nalokhu? Mina ngeke. Bangabantu abahle, abanenhlonipho, . . . abazinikezele. OFakazi BakaJehova banesibindi esiza ngolwazi. Baphetha ngokuthi, “Ngakho, shiyani amasonto enu futhi nize kithi.”
“Ngiyaqaphela ukuthi, ukushiya inkolo engayincela ebeleni, futhi ngibambelele kwenye, kuyoba okubuhlungu. Kodwa uma lokhu kwakungokunengqondo kungani ungathathi lesinyathelo? Cabanga ngakho, ukushintsha izinkolo akukhona neze okudumazayo. . . . Kuyoba okudumazayo ukushiya inkolo kanti uzothola into engenalusizo, ukulahlekelwa okukhona ngokungekho. Kodwa kuthiwani uma bengicabanga ukuthi izingubo zami zimhlophe ngenxa yokuthi bengingakaziboni ezakho? Kubonakala kunengqondo ngami ukukhetha insipho engcono, ehlanzisisa kube mhlophe qwá! Injongo yezithunywa zevangeli yinye nje vó: ukushintsha inkolo yabantu. . . . Kungani kungamelwe ngishintshe inkolo uma unembeza wami uthi mangenze kanjalo? Uma umshumayeli engikholisa ukuba ngenze kanjalo? Uma kunengqondo ukwenza kanjalo? Uma inkolo yoFakazi BakaJehova ilungile . . . , khona-ke . . . ngizohamba noFakazi BakaJehova. . . . Ngifuna ukwazi ukuthi oFakazi BakaJehova baqinisile yini.”
Lapho ephetha incwadi yakhe, umpristi wagcizelela ukuthi ukusebenzisa koFakazi igama elithi Jehova kunelithi Yahweh lapho bephimisela igama laphezulu “akusona isizathu esingangilahlekisela uthando enginalo ngoFakazi BakaJehova.” Ngani? “Kakade,” enezela, “bangoFakazi bakaNkulunkulu futhi yilokho okubalulekile!”
Isithasiselo: Ngokusobala incwadi yompristi yavusa isiyaluyalu kubabhishobhi abakhulu. Kumagazini owalandela wasesifundeni somfundisi, wazisola ngenkulumo yakhe ngoFakazi BakaJehova.