Ukwethaba Phakathi Kwabantu BakaNkulunkulu

AMAZWI eNkosi uDavide, alotshwe kumaHubo 68, amavesi 2-4, ahlanganisa isimemo esifudumele kubo bonke abathandi benkululeko yeqiniso: “Hlabelelani kuNkulunkulu, nidumise igama lakhe; menzeleni umendo lowo odabula amahlane; igama lakhe linguJehova; yethabani phambi kwakhe.” Iliphi ilungelo elikhulu ebelingaba khona kunokwethaba phambi kukaNkulunkulu wethu? (Isaya 12:2, 3) Phakathi nonyaka ka-1986, uJehova uye wasekela ofakazi bakhe ngokumangalisayo njengoba beye baqhubeka bememezela inkululeko kubantu bomhlaba.

Amakhasi alandelayo anikeza ukuhlaziywa komsebenzi woFakazi BakaJehova ngo-1986 emhlabeni wonke. Yeka isizathu sokwethaba! Njengoba izibalo zibonisa, inani eliphakeme loFakazi abakhuthele emazweni angama-208 abikayo liye lenyuka laba izi-3 229 022, ukwanda kwamaphesenti ayi-6,8 phakathi nonyaka. Inani lababhapathizwa laliyizi-225 868.

Ukukhumbula Ukufa KukaJesu

Inani lababekhona emhlanganweni oyinhloko wonyaka, iSikhumbuzo sokufa kukaJesu, lenyukela okungenani ezi-8 160 597, nakuba eminye imibiko ingatholakalanga ngenxa yezimo zezwe eziya ziba zimbi. Inani labahlanganyela izifanekiselo zeSikhumbuzo lehlela ezi-8 927, njengoba abagcotshiwe asebegugile befeza inkonzo yabo yasemhlabeni.—IsAmbulo 2:10.

Abaningi balabo abahlangana ngokulalela umyalo kaJesu babonisa isibindi esiyisibonelo. (1 Korinte 11:23-26; Johane 16:33) Ezweni laseAfrika lapho umsebenzi kaJehova uvinjelwe khona, ibandla lalihlangene ekhaya likadade ukuze ligubhe iSikhumbuzo. Emizuzwini eyisishiyagalombili nje inkulumo iqalile, iziphathimandla zendawo zafika ukuze zibophe abazalwane. Zabayala ukuba bamise umhlangano. Abazalwane ngomusa kodwa ngokuqinile bagcizelela ukuthi kumelwe bahloniphe leSikhumbuzo sokufa kukaJesu okuwumhlatshelo. Ngemva kokubonisana nokuncenga amaphoyisa, bavunyelwa ukuba baqhubeke izikhulu zilalele. Umhlangano waphethwa ngokuthula, khona-ke bonke baboshwa. Ngemva kokuthethwa kwecala, abayisihlanu bavalelwa. Bahlala ejele okwesikhashana kodwa base bekhululwa, bejabula ngokuthi bakwazi ukugubha iSidlo SeNkosi Sakusihlwa!—1 Johane 5:3, 4.

ENigeria, lapho inani loFakazi liye lenyuka laba yizi-128 461, kwaba nababa khona eSikhumbuzweni abayizi-394 370—okuyinani eliphakeme kakhulu kunanini. Omunye umhlangano weSikhumbuzo waba sesizeni sesakhiwo seBethel entsha eIgieduma, futhi abangaphezu kwama-700—cishe sonke isigodi sendawo—baba khona!

Nanku umbiko ovela eMexico: “Noma kuphi lapho sihamba khona kulelizwe, abamemezeli bamane nje bagcwele intshiseko, futhi izwe lonke libonakala likhangwe yiqiniso. Iqiniso ligubuzela abazalwane, futhi ukuphila kwabo kugxiliswe eqinisweni. Yonke imikhaya iza eqinisweni. Amaphesenti aphakeme abantu abafundayo aqala ukuba khona emihlanganweni ngesikhathi esifanayo. Lokhu kubasiza ukuba bathuthuke ngokushesha.” IMexico yabika inani lababa khona eSikhumbuzweni abayizi-838 467. NgoAugust, abamemezeli boMbuso abayizi-198 003 kulelozwe babeqhuba izifundo zeBhayibheli eziyizi-327 664 emakhaya abantu. Yeka ukwanda okuqhubekayo abangakulindela!

Ukwanda Okuqhubekayo Emhlabeni Wonke

Endaweni eyisikhungo seLobukholwa kuvela imibiko efanayo yokwanda. I-Italy yafinyelela inani eliphakeme labamemezeli abayizi-139 570 ngoAugust, futhi abayizi-301 009 babekhona emkhosini weSidlo SeNkosi Sakusihlwa. OFakazi BakaJehova ngempela ‘benza ukukhanya kwabo kukhanye kubo bonke.’ (Mathewu 5:16) Ngokwesibonelo: “Udade wayefaka imali emshinini wamathikithi ebhasini lapho othile ajwayelene naye emtshela ukuthi sasingekho isidingo sokukhokhela ithikithi njengoba wayezosheshe ehle. Udade wachaza ukuthi kwakulungile ukukhokha ithikithi, ngisho noma kungelesitobhi esisodwa nje. Ngemva kwalokho, umngane wakhe wehla ebhasini. Khona-ke umshayeli webhasi waphendukela kuye wathi: ‘Ingabe ungomunye woFakazi BakaJehova?’ ‘Yebo,’ kuphendula udade, ‘yini ekwenze wabuza?’ ‘Ngizwe ingxoxo yenu ngokukhokhela ithikithi lebhasi, futhi ngiyazi ukuthi oFakazi BakaJehova bangabanye babantu abambalwa kakhulu abenza kanjalo futhi bathembekile ezintweni zonke.’ Ezinyangeni ezimbalwa kamuva, indoda yeza kudade emhlanganweni futhi yathi, ‘Uyangazi mina? Ngingumshayeli webhasi owakhuluma nawe ngokukhokhela ithikithi. Ngokubona ukuziphatha kwakho, nganquma ukuqalisa ukutadisha iBhayibheli noFakazi BakaJehova.’”

IBrithani yaba nenani eliphakeme labamememezeli boMbuso abayizi-107 767, kuhlanganisa nalomzalwane osanda kubhapathizwa: “UGeorge useneminyaka engama-84 manje. Ngemva kweminyaka engama-50 engumshumayeli ongaqeqeshiwe esontweni lendawo yakubo, wathola ulwazi lweqiniso. Ekuqaleni, kwakuthi lapho eqeda isifundo sakhe seBhayibheli sasekhaya, agijimele kwelinye ikamelo eyobhema ugwayi. Wayeseneminyaka engama-70 eyixhwele likagwayi. Kodwa ngokufunda isahluko 26 sencwadi ethi Ungaphila Phakade Epharadesi Emhlabeni, akazange aphinde abheme. UGeorge usenesikhathi esingaphezu konyaka ebhapathiziwe futhi ushiseka kakhulu enkonzweni yasensimini, etshela abanye ngezibusiso uJehova azoziletha esimisweni saKhe esisha sezinto.”

IFederal Republic of Germany ibika inani eliphakeme labamemezeli abayizi-118 645. Kunezinkulungwane futhi zoFakazi abathembekile ‘abenza ukukhanya kwabo kukhanye’ eRepublic yaseJalimane eBuswa Ngentando Yeningi engumakhelwane. EJalimane asebegugile abathembekile bayenqaba ukubeka phansi “inkemba kamoya.” (Efesu 6:16, 17) Ibandla liyabika: “Sinodade oseneminyaka eyi-103 futhi usahlala yedwa. Abadala balungiselela iqembu lodade abayisikhombisa kuya kwabayisishiyagalombili ukuba bashintshane ekumnakekeleni isonto ngalinye. Lokhu sebeye bakwenza iminyaka emithathu kuya kwemine edlule. Izisebenzi zezenhlalakahle, ezikhokhelwa umphakathi, ziyeza ukuze zinakekele ukumgeza nokumshintsha. Kodwa lapho zigula noma zisesikhathini sokuphumula, odadewetnu benza umsebenzi. Lobubufakazi bothando lobuKristu nokuzidela buye baba ubufakazi obuhle kwabangaphandle. Udadewethu oneminyaka eyi-103 unengqondo ephapheme futhi ubheka izisebenzi zezenhlalakahle ‘njengensimu’ yakhe. Ushumayela ngentshiseko kuzo lapho zimgeza futhi azinike izincwadi.” Ngempela, “ubumpunga bungumqhele wodumo; bufumaniswa endleleni yokulunga.”—IzAga 16:31.

Nokho, isimemo sokudumisa uJehova siya kubantu babo bonke ubudala—“nani-zinsizwa nezintombi, nani-maxhegu nabafana.” Intsha eningi ‘ikhumbula umdali wayo emihleni yobusha bayo.’ (IHubo 148:12; UmShumayeli 12:1) EBrazil, lapho kwakunenani elihle elisha eliphakeme labamemezeli abayizi-196 948, iWatch Tower Society yathola incwadi ivela edolobheni elingaphandle lapho abazalwane ababili abasebasha bafakaza khona izinyanga ezithile. Yayithi ngokwengxenye: “Ngithanda ukunincoma ngentsha enhle eninayo enkolweni yenu. Nginguthisha wesikole futhi ngisebenzelana nentsha, futhi ngiyazi ukuthi ayisekhona lokho eyayivame ukuba yikho. Intsha yenu iyisibonelo ngempela. Ihlonipha abantu abadala, ithobekile futhi igqoka ngendlela ezothile. Futhi yeka indlela ewazi ngayo amaBhayibheli ayo! Inkolo ngempela leyo! Kuyadabukisa ukuthi kufanele ihambe.” Imikhaya yabazalwane bethu manje ithuthela unomphela kwezinye zalezindawo ezingazodwa ukuze inakekele isithakazelo.

Iyiphi intuthuko eyenziwa yiqiniso ezindaweni ezingezona ezobuKristu? IThe Wall Street Journal kaJuly 9, 1986, yakhipha indaba ende ngaphansi kwesihloko esithi “Umhlabathi Owugwadule—Izithunywa Zevangeli EzingamaKristu Zihlwanyela Imbewu EJapane Kodwa Kuncane Okuhlumayo.” Isithunywa sevangeli seUnited Church of Christ kwabikwa ukuthi sithi, “Ayikho indlela yokuthi ubuKristu buyoke bugxile ngempela eJapane,” nompristi waseFrancisco ephawula, “Usuku lwesithunywa sevangeli sakwelinye izwe eJapane luphelile.” Bobabili babesebenzele ize iminyaka engaphezu kwama-30. Indaba yathi: “Abangaphansi kwephesenti elilodwa enanini labantu bebonke bangamaKristu, futhi naphezu kwawo wonke umsebenzi wezithunywa zevangeli, inani lamaphesenti liyehla.” Ukwehla okungaka ezinkolweni zeLobukholwa! Kodwa kuthiwani ngoFakazi BakaJehova, abafundisa ubuKristu obumsulwa kulelozwe? Ezinyangeni ezingama-92 zilandelana, baye bandisa inani labo lezikhonzi ezikhuthele laba inani eliphakeme lezi-113-062 (kuhlanganisa nesilinganiso samaphayona esiyizi-46 390 inyanga ngayinye). EJapane kuqhutshwa izifundo zeBhayibheli zasekhaya eziyizi-146 316 nabantu abasanda kuthakazela. Lokhu ngempela kuyisandulela sokwanda okukhulu okuqhubekayo. Lapha, sibona ukugcwaliseka okungokoqobo kukaIsaya 65:13, 14.

Indima Yobuphayona

Kuthiwani ngesikhungo sawo wonke lomsebenzi omkhulu—iUnited States of America? Lapho, inani eliphakeme labamemezeli boMbuso abayizi-744 919 lalisensimini. Kodwa ingabe ‘izithunywa zevangeli ezinjalo zasemakhaya’ ziyadingeka ngempela? Ngempela ziyadingeka, njengoba ubugebengu, imilaliso, ukuziphatha okubi, izifo, nokonakala kwenyukela ezingeni elibi ngokwengeziwe kunasemazweni amaningi abizwa ngokuthi awobuqaba. Abantu abafisa izinto ezingcono badinga induduzo nethemba, futhi oFakazi BakaJehova banesigijimi esinjalo. (Isaya 61:1, 2; Mathewu 24:14) EUnited States ngo-1986, lezi zikhonzi zanikela ngamahora ayizi-146 673 490 ekumemezeleni izindaba ezinhle zoMbuso. Lokho kufinyelela ukwanda kwamaphesenti angama-12,6, noma izi-16 449 229 zamahora angeziwe kunangonyaka odlule. Lesosikhathi sasetshenziswa ngokunenzuzo, njengoba kwahanjiswa izincwadi eziyizi-6 138 938, okuwukuthuthuka kwamaphesenti angama-23,2 kunangonyaka odlule. NgoApril kuphela, ingqikithi yayingaphezu kwezincwadi eziyi-1 000 000 ezichaza ithemba leqiniso lokuthula nokulondeka.

Esinye sezici ezithakazelisa kakhulu zombiko waseUnited States ukwanda kwenkonzo yobuphayona. NgoApril kwakunenani eliphakeme lamaphayona avamile ayizi-45-786, ukwanda kwamaphesenti angama-23 kunangonyaka odlule. Lapho uhlanganisa lelonani kanye nesilinganiso samaphayona asizayo esiyizi-43 369 nesilinganiso samaphayona akhethekile esingama-279, kusho ukuthi inyanga ngayinye abacishe babe yizi-90 000 babememezela kabanzi ngoMbuso kaNkulunkulu emsebenzini wobuphayona. Laba ngabantu abasha nabadala, ngokufanayo, abasebenzisa ngokuhlakanipha isikhathi sabo ekudumiseni uJehova.

Ukunikeza Ubufakazi Benkuthalo

Lapho efundisa obala nasendlini ngendlu, uMphostoli uPawulu ‘wafakaza ngenkuthalo’ ngezindaba ezinhle. (IzEnzo 20:20, 21, qhathanisa neNW) Ubufakazi obufanayo buyanikelwa ezindaweni eziningi namuhla. Ngokwesibonelo, nanku umbiko ovela eGuadeloupe: “Ngasekupheleni konyaka wenkonzo, sasinommemezeli oyedwa kubantu abangama-72. Nakuba kungadingeki ukuba sisho, saziwa kakhulu kulo lonke izwe! Eqinisweni, ezindaweni eziningi siya ensimini isonto ngalinye. Abanye bangase bathi ngempela abantu sebekhathele ukusibona, noma ukuthi kuwukuqeda isithakazelo ukuba sensimini efanayo masonto onke. Kodwa ngokuphambene, lapho sisebenza insimu ngokwengeziwe, kulapho kuvuswa isithakazelo esengeziwe. Futhi kuthiwani ngobufakazi? Nokho, buyinani eliphakeme ngoApril odlule lezifundo zeBhayibheli zasemakhaya eziyizi-7 136 ezaqhutshwa abamemezeli bethu abayizi-4 558! Kamuva umagazini wawunesihloko esikhulu esithi: ‘OFakazi BakaJehova—Amakhosi Endlini Ngendlu’! Lokho sikubheka njengokutuswa. Ngonyaka wenkonzo, abazalwane nodade abasha abangama-458 babhapathizwa.” Ubuqotho nenjabulo eboniswa ekusebenzeni insimu yethu ngokuphindaphindiwe, ukwazi nokwakha ubungane nabantu, ukuqeda ngothando ubandlululo lwabo—lokhu kungaholela ekutholeni abanjengezimvu.

UJehova ubusisa izinceku zakhe ngokucebile ezweni laseAfrika lapho umsebenzi uvinjelwe khona nempi idlangile. Kulelozwe abaningi babazalwane bethu bahlupheka emajele, futhi enye intsha engoFakazi iye yabulawa. Nokho, uApril waba nombiko ovelele, ngamanani aphakeme ayishumi asikhathi sonke. Inani elisha labamemezeli liwukwanda kwamaphesenti angama-29 kunangonyaka odlule. Yeka intshiseko labazalwane abayibonisayo! Isilinganiso samahora ngoApril sasingaphezu kwe-18 kummemezeli, ngamunye nezifundo zeBhayibheli zasemakhaya zazingu-2,6 kummemezeli ngamunye.

Umbiko oxakayo owatholwa ihhovisi legatsha elinakekela lensimu wanele ukuba udlulise umqondo othile ngezimo ezikhona. Ufundeka kanje: “Ukushisa kuyaqhubeka kudlanga. Umzamo odingekayo ukuze wehle wenyuka futhi ubone othile uwubufakazi bokuthi sinokushisa okukhulu. Kodwa siyazi ukuthi sakhiwe ngendlela yokuba sikwazi ukujwayelana nanoma iliphi izinga lokushisa nanoma iyiphi indawo. Naphezu kwakho konke, siyabekezela futhi sethemba ukuthi sizoqhubeka.” Yeka ubuqotho!

Abagcina ubuqotho ngabanye benza inhlangano egcina ubuqotho. Inhlangano yomhlaba wonke yofakazi abayizi-3 229 022 bakaJehova iyilokho kanye! Babheke phambili ekusindeni “osizini olukhulu” oluzayo nasekuhlanganyeleni emsebenzini omkhulu wokuguqula umhlaba ube yipharadesi, ngaphansi koMbuso kaKristu. (IsAmbulo 7:14; 21:3, 4; Isaya 65:17, 21-23, 25) Bayethaba ngendlela uJehova abusisa ngayo umsebenzi wabo wentshiseko ngisho kwamanje, kungakhathaliseki ukuthi bashumayela izwi “kuyisikhathi” noma “kungesiso.” (2 Thimothewu 4:2) Amakhasi alandelayo abonisa ukuthi baye basilalela kanjani isihloko setekisi labo lonyaka: “Hamba . . . , ushumayele umbuso kaNkulunkulu.”—Luka 9:60.

[Ibhokisi/Isithombe ekhasini 7]

Ezinye izici zoMbiko Womhlaba Wonke woFakazi BakaJehova

Ukwanda:

Inani eliphakeme labamemezeli: 3 229 022 6,8%

Isilinganiso sanyanga zonke samaphayona: 391 294 21,2%

Ingqikithi yamahora okushumayela: 680 837 042 15,3%

Ingqikithi yenani lababhapathizwa ngo-1986: 225 868 19%

[Ishadi ekhasini 10-13]

UMBIKO WONYAKA WENKONZO KA-1986 WOFAKAZI BAKAJEHOVA WOMHLABA WONKE

(Bheka umqulu)

[Izithombe ekhasini 8, 9]

UKUFAKAZA “PHAMBI KWABANTU NAKUZO IZINDLU NGEZINDLU” “KUZE-KUBE SEKUGCINENI KOMHLABA”

IDavao ePhilippines

IVenice eItaly

ICastle Combe eNgilandi

IGålå eNorway

IKowloon eHong Kong

ITaipei eTaiwan

IQueenstown eNew Zealand

IBolgatanga eGhana

IParis eFrance

IQuetzaltenango eGuatemala

IKerala eNdiya

IBanff eCanada