Abantu Abajabulayo—Kungani?

AMAKRISTU eqiniso namuhla angabantu abajabulayo. Kakade, sikhonza “uNkulunkulu othokozayo,” uJehova. (1 Thimothewu 1:11) Usinikeza umoya wakhe, futhi isithelo salowomoya ukujabula.—Galathiya 5:22.

Injabulo enjalo ejulile ivumelana nezimo futhi iyakwazi ukumelana nokucindezeleka. Ngokwesibonelo, uJesu Kristu wezwa ubuhlungu bokubethelwa nehlazo lokubulawa njengohlambalazayo. Nokho, “ngenxa yenjabulo eyayibekwe phambi kwakhe wakhuthazelela isigxobo sokuhlushwa.” (Heberu 12:2, NW) UJesu wayazi ukuthi phambi kwakhe kwakunamathuba namalungelo amahle ngokuqondene nenkonzo yakhe kuJehova. Ukucabanga ngalamalungelo esikhathi esizayo kwamsiza ukuba alondoloze injabulo yakhe ngezikhathi zokuhlupheka.

UJesu ufuna ukuba nabafundi bakhe bajabule. Wathi: “Nginitshelile lokho ukuba ukuthokoza kwami kube-kini, nokuthokoza kwenu kugcwale.” (Johane 15:11) Lokhu kuye kwaba njalo ngoFakazi BakaJehova namuhla. Kunezizathu eziningi zokuthi singabantu abajabulayo. Siyalazi iqiniso, eliye lasikhulula emaketangeni okukholelwa ezeni nawezinkolelo zenkolo yamanga. (Johane 8:32) Futhi, siyazi ukuthi sikuphi ngokuqondene nesikhathi futhi siyajabula ngethemba lensindiso elizoba ngokoqobo ngokushesha. (Luka 21:28) Futhi sivikelekile ezinkingeni eziningi—phakathi kwazo okukhona izifo ezithathelwana ngobulili—ababhekene nazo labo abangakusebenzisi ukuziphatha okusekelwe eBhayibhelini. Sijabulela ubudlelwane obuhle kakhulu nabantu abanesithakazelo ekwenzeni intando kaJehova. Futhi, yebo, sinelungelo elihle lokuhlanganyela ekushumayeleni izindaba ezinhle zoMbuso nokwenza abantu abanjengezimvu abafundi.—Mathewu 24:14; 28:19, 20.

Kodwa nakuba lokhu kunjalo ngoFakazi BakaJehova bebonke, kuthiwani ngawe njengomuntu siqu? Kungani kungathiwa unesizathu sokujabula kanye nabanye abantu bakaJehova?

Ukuthola Injabulo Emsebenzini Wokushumayela

Abanye bakuthola kunzima ukuhlanganyela emsebenzini wokushumayela endlini ngendlu. Mhlawumbe banamahloni okuya kubantu abangabazi baqalise izingxoxo. Noma bangamane babe nomuzwa wokungafaneleki lapho kuziwa ekufundiseni abanye. Ingabe ngezinye izikhathi uzizwa ngaleyondlela? Uma kunjalo, ungayithola kanjani injabulo emsebenzini wokushumayela?

Okokuqala, yiba nombono oqondile. Abantu abaningi bangakujabulela ukuqashwa othile odumile noma umuntu owaziwayo kwezombangazwe. Kodwa yeka injabulo enkulu kunaleyo okumelwe siyithole ngokusetshenziswa “iNkosi yaphakade,” uJehova uNkulunkulu ngokwakhe!—1 Thimothewu 1:17.

Futhi, khumbula ukuthi lona umsebenzi ongasoze waphindwa. Cabanga nje! Izingelosi ngokwazo zihola futhi ziqondisa amaKristu lapha emhlabeni emizamweni yawo yokuthola abanjengezimvu. (IsAmbulo 14:6) Ingabe lokhu akuyiletheli injabulo inhliziyo yakho?

Ukuthola Injabulo Ekwandeni KoMbuso

Esinye isizathu sokuba nombono oqondile womsebenzi wokushumayela siwumphumela omuhle onawo. IBhayibheli labikezela: “Omncane uyakuba-yinkulungwane, ophansi abe-yisizwe esinamandla; mina nginguJehova, ngiyakukusheshisa ngesikhathi sakho.” (Isaya 60:22) Lesithembiso sikaJehova siye sagcwaliseka ezikhathini zamuva. Ngokwesibonelo, phakathi nonyaka wenkonzo ka-1986, abayizi-225 868 babhapathizwa bebonakalisa ukuzinikezela kwabo komphefumulo wonke kuJehova uNkulunkulu. Kwaba nokwanda kwamaphesenti ayi-6,9 esilinganisweni senani elihlanganyela ekusakazeni amaqiniso eBhayibheli kwabanye.

Akungabazeki ukuthi lokhu kwanda kuyabonakala ebandleni lakini noma esifundeni. Abasha beza emihlanganweni futhi benza ushintsho oludingekile ekuphileni kwabo ukuze bakwazi ukukhonza uNkulunkulu. Ingabe lokhu akubonisi iqiniso lokuthi umsebenzi woku shumayela unesibusiso sikaJehova? Khona-ke ukuba nengxenye kulokhu kwanda kungaba umthombo wenjabulo enkulu kuwe. Iqiniso, kungenzeka awukaze utadishe nomuntu aze afinyelele ezingeni lokuba abhapathizwe. Kodwa empeleni asinakuthola udumo ngokuletha umuntu eqinisweni. “UNkulunkulu okhulisayo,” kusho uPawulu. (1 Korinte 3:6-9) Wonke amalungu ebandla anengxenye ekusizeni abasha. Kanjani? Ngokuba khona emihlanganweni, ngokuphendula, ngokubingelela abasha ngomoya wokungenisa izihambi, nangokuziphatha kwawo ngendlela eyenza iqiniso likhange.

Nokho, ungathola injabulo enkulu uma unengxenye eqondile ngokwengeziwe emsebenzini wokushumayela endlini ngendlu nasemsebenzini wezifundo zeBhayibheli zasekhaya. Ngonyaka odlule, ngokwesilinganiso, kwaqhutshwa izifundo zeBhayibheli zamasonto onke eziyizi-2 726 252. Kungani ungenzi umzamo owengeziwe wokuhlanganyela kulomsebenzi ojabulisayo? Zama isifundo seBhayibheli kothile omaziyo, mhlawumbe umakhelwane noma othile oye wamhambisela incwadi. Cela usizo kuJehova ekutholeni umuntu onjalo onjengemvu.

Ukunqoba Izithiyo Zenjabulo

Yebo, uma umuntu enomuzwa wokungafaneleki ngokufundisa abanye, lokhu kungaba isithiyo sangempela ekutholeni kwakhe injabulo enkonzweni yasensimini. Nokho, khumbula ukuthi “amandla ethu avela kuNkulunkulu.” (2 Korinte 3:5) Futhi ngenhlangano yakhe uJehova uye walungiselela usizo oluhle lokusisiza ukuba sifaneleke njengezikhonzi eziphumelelayo.

Okokuqala, baningi phakathi kwethu asebenesikhathi eside bekhonza uNkulunkulu futhi abanokuhlangenwe nakho okuningi enkonzweni yasensimini. Singahlanganyela nalezikhonzi ezinokuhlangenwe nakho emsebenzini wazo futhi sifunde kuzo. Ngaphezu kwalokho, ukusikisela okuhle kuvela nyanga zonke kuNkonzo Yethu YoMbuso. Khona-ke kunencwadi ethi Ukubonisana NgemiBhalo, equkethe ingcebo yokwaziswa okulolonga amakhono ethu okushumayela. Wasebenzise kahle lamathuluzi futhi uyilungiselele kahle ngokwengeziwe inkonzo yasensimini. Cabanga ngezindlela ezintsha nezithakazelisayo zokuzethula ezindlini. Noma cabanga ngezindlela ezihlukahlukene zokudonsela umninikhaya engxoxweni. Njengoba uba ngophumelela ngokwengeziwe ensimini, ngokungangabazeki intshiseko yakho nenjabulo ekushumayeleni izokhula.

Inkonzo ijabulisa ngokwengeziwe uma sikwazi ukukhuluma nabantu. Kwamanye amasimu lokhu kuyinkinga ngempela. Ingabe ungahlela ukuhlanganyela enkonzweni yasensimini ngesikhathi lapho abantu abaningi besuke besekhaya, njengalapho sekuhwalala? Abaningi bakuthola kuphumelela ukwenza kanjalo. Nawe ungathatha isinyathelo kuqala futhi ukhulume nabantu nomaphi lapho betholakala khona—abasemigwaqweni, abahlezi emapaki, nabageza izimoto zabo. Khumbula ukuthi abantu badinga iqiniso nokuthi ukuphila kuhilelekile. Lokhu kungasiza ekukushukumiseleni ukuba unqobe ukuthambekela kokuba namahloni. Nakuba kuyiqiniso ukuthi abantu abaningi abanakusabela kahle, labo abasabela kahle basilethela injabulo enkulu.

Nokho, olunye usizo olukhulu kakhulu lokulondoloza kwethu injabulo umthandazo. Cela umoya kaJehova ukuba ukuqinise futhi ukukhuthaze. UPawulu wathi: “Nginamandla ukwenza konke ngaye ongiqinisayo.” (Filipi 4:13) Nathi, singazizwa ngaleyondlela njengoba sifunda ukuncika kuJehova ngokugcwele ngokwengeziwe.

Ukukhuthazela Njengabantu Abajabulayo

Abantu abaningi abawazisi umsebenzi wethu. UJesu wayazi ukuthi lokhu kwakuyoba njalo. Khona-ke lapho ethuma abalandeli bakhe ukuba bayoshumayela, wabayala: “Yilowo nalowo ongayikunamukela engawezwa amazwi enu, anothi niphuma kuleyondlu noma kulowomuzi nivuthulule uthuli ezinyaweni zenu. . . . Bhekani, ngiyanithuma ninjengezimvu phakathi kwezimpisi; ngakho-ke hlakaniphani njengezinyoka, nibe-mnene njengamajuba.” Futhi uJesu wathi: “Kini zibaliwe nezinwele zonke zekhanda lenu. Ngakho maningesabi.”—Mathewu 10:11-16, 30, 31.

Lamazwi asisiza ukuba sikhuthazele ngenjabulo. Asisiza ukuba siqaphele ukuthi lapho sihlangana nabantu abangayazisi imizamo yethu ngabo, naphezu kwalokho sisenza igama likaJehova laziwe; sisamdumisa. (IHubo 100:4, 5) Ngokuthakazelisayo, ngezinye izikhathi abaninikhaya abenqabayo ukuvula umnyango bangase bezwakale bethi kwabanye: “BekungoFakazi BakaJehova.” Yebo, ngaphandle kokukhuluma, igama likaJehova liye ladunyiswa, futhi abantu baye bathola ithuba lokwamukela noma lokwenqaba iqiniso. (Mathewu 25:31, 32) Ngakho ngisho namasimu angasabeli angakhuthazelelwa ngenjabulo.

Ngaphandle kwalokho, ngeke sazi ukuthi abantu abanjalo bangawushintsha nini umbono wabo. Ngolunye usuku, owesifazane owayexoshe udade ongumKristu izikhathi eziningana wabuza udade ukuthi ikhona yini incwadi entsha anayo. Udade wamangala futhi waphawula ukuthi owesifazane wayengakaze azemukele izincwadi zeBhayibheli ngaphambili. Owesifazane wachaza ukuthi umyeni wakhe wayesebenza nendoda eyayitadisha iBhayibheli noFakazi BakaJehova. Yayinikeze yena nomyeni wakhe enye yezincwadi zeWatch Tower Society. Ngenxa yesifiso sokufuna ukwazi, owesifazane wayeyifundile futhi waqaphela ukuthi isigijimi siyiqiniso. Khona-ke wanquma khona lapho ukuthi lapho uFakazi efika ngesikhathi esizayo uyomngenisa. Kwaqaliswa isifundo seBhayibheli sasekhaya, futhi kamuva owesifazane waba uFakazi ozinikezele kaJehova!

Khona-ke sinelungelo elikhulu—ilungelo elijabulisayo—lokumemezela okuwukuphela kwesigijimi sethemba ezweni. Futhi umsebenzi wokushumayela uyisabelo uNkulunkulu asinikeze sona phakathi nalezinsuku zokugcina. Kumelwe wenziwe ngaphambi kokuba ukuphela kufike. (Mathewu 24:14) Kuyothatha isikhathi eside kangakanani ngaphambi kokuphela kwesimiso esibi sikaSathane? Siyazi ukuthi ukuphela akunakwephuza. (Qhathanisa noHabakuki 2:3.) Okwamanje, sisekhona isikhathi sokuba abanye bafunde iqiniso. Masisisebenzise ngokunenzuzo lesikhathi esisele futhi ngentshiseko sibe semsebenzini wethu wokushumayela. Futhi masibe nombono oqondile, sisebenze kanzima ukuze ‘sizisindise thina nalabo abasizwayo.’ (1 Thimothewu 4:16) Ngokwenza kanjalo, siyohlala singabantu abajabulayo abanengxenye ekwandeni koMbuso.

[Isithombe ekhasini 23]

Umsebenzi wethu wokushumayela uwumthombo wenjabulo yangempela—ngisho nalapho abantu bengasabeli esigijimini soMbuso