Abamemezeli BoMbuso Bayabika
ENew Zealand—Usuku Olungekukhohlakala
“SIJABULA kakhulu ngokuba nani. Asisoze sakukhohlwa!”
“Kuyo yonke imibuthano engokwasezulwini engake ngaba kuyo, angikaze ngikubone okunjengalokhu.”
“Kwabonakala sengathi sasijabulela usuku esimisweni esisha sezinto.”
Lokhu kwakungokunye kokukhulumela kwezihambeli zesimiso sokunikezelwa kwendlunkulu yegatsha leWatch Tower Bible and Tract Society eNew Zealand, ngo November 29, 1986. Kungani labantu babeshukumiseleka kangaka? Ngoba ngempela kwakuwusuku olungenakukhohlakala. Ake sihlanganyele nawe ezinye zezizathu zalokhu.
Okokuqala, izakhiwo ezinhle ezazinikezelwa zenza usuku lwaba olungenakukhohlakala. UJohn E. Barr, weNdikimba Ebusayo yo Fakazi BakaJehova, wachaza iHholo LoMbuso elalisanda kwakhiwa nezakhiwo zegatsha ezihlobene nalo ngokuthi “zinhle, zisezingeni eliphezulu, ziyakhanga . . . Umsebenzi osuphelile ubonisa ukunakekela okukhulu emininingwaneni, ebuhleni. Konke kubonakala kuhambisana.”
Ubuzalwane BobuKristu
Khona-ke, kwakuyinto engenakukhohlakala ukubona oFakazi abangomakadebona, abaningi kangaka asebeneminyaka eminingi kakhulu bekhonza uJehova ngokwethembeka behlangene. Eqinisweni, laba yibo ababebaningi kakhulu phakathi kwezimenywa ezingama-658. Lapho behlangana nabangane abadala, abaningi babo abasebenamashumi eminyaka bengababoni, bazizwa njengoPawulu, lapho, ngemva kohambo olude, ehlangana nabazalwane baseRoma: “UPawulu ebabona [abazalwane bakhe] wabonga uNkulunkulu, wema isibindi.” (IzEnzo 28:15) Ukuzibonela izibonelo ezinjalo zokwethembeka okukhuthazelayo—njengoba abanye babekhona naphezu kwempilo ebuthakathaka—kwakuwumthombo wesikhuthazo nokubonga.
Usuku lwalungenakukhohlakala, futhi, ngobuzalwane obuhle bezizwe zonke obaba khona. OFakazi BakaJehova bangabobuzalwane bomhlaba wonke, futhi lokhu kwafakazelwa yizivakashi ezazivela ezindaweni ezikude njengeAustralia, eUnited States, eCanada, eBrithani, naseTaiwan, kanye nasePapua New Guinea, eSamoa, nakwezinye iziqhingi zaseNingizimu Pacific. Izincwadi zocingo zafika zivela kwabaningi ababengena kuba khona ngokomuntu siqu, kuhlanganise nemikhonzo evela eNdikimbeni Ebusayo, emalungwini omkhaya weBethel yaseBrooklyn, kanye nasekilasini lama-82 lesikole saseGileyadi sezithunywa zevangeli. Ngempela, kwakuqinisa ukholo ukuqaphela isithakazelo sabazalwane abaningi kangaka emazweni amaningi kangaka eku nikezelweni kwezakhiwo zegatsha laseNew Zealand.
Izisekelo Ezabekwa OFakazi Abathembekile
Ukukhunjuzwa ngomlando omude womsebenzi wokushumayela eNew Zealand owaholela ekwakhiweni kwalezakhiwo zegatsha zamuva kwakujabulisa futhi kwenza usuku lwaba olukhumbulekayo. (Qhathanisa namaHeberu 10:32.) Kunjengoba esinye isikhulumi sasho: “Nakuba izisekelo ezingokoqobo zesakhiwo seBethel entsha enhle zibalulekile, ezibaluleke ngisho nangokwengeziwe yizisekelo ezingokomfanekiso ezabekwa abazalwane nodade abathembekile, abazidelayo emuva ekuqaieni kwalelikhulu leminyaka.”
Lokhu kwalandelwa yizingxoxo namadoda nabesifazane abathembekile abayi-11 ababeneminyaka engama-680 ehIanganisiwe enkonzweni yokuzinikezela. Bakhuluma ngomunye wemihlangano yokuqala eNew Zealand, ngo-1913. Bakhumbula ubunzima bokuphayona eSouth Island ngawo-1930, ubunzima beminyaka yeMpi Yezwe II lapho inhlangano ivalwa, nokwakhiwa kwegatsha laseNew Zealand ngo-1947, ukufika kwezithunywa zevangeli zokuqala zaseGileyadi, ukwakhiwa kweHholo LoMbuso lokuqala kulelozwe ngo-1950. Nanku umuzwa ovamile walabo okwaxoxwa nabo: “Yeka indlela esijabula ngayo ngokuba lapha futhi sibone ubufakazi bokwanda, ezinsukwini ezingaphambiii, esasingenakukuphupha njengokunokwenzeka!”
Isibusiso SikaJehova
Mhlawumbe into eyinhloko eyenza usuku lwaba olungenakukhohlakala kwakuwukuqaphela ukuthi isibusiso sikaJehova esasiqondise umsebenzi wokwakha futhi sawuletha ekupheleni kwawo, Ngokufanelekile, enye ingxenye yesimiso sosuku yayinesihloko esithi: “Isandla Esihle SikaNkulunkulu Wethu Siphezu Kwethu.”—Nehemiya 2:8.
Isandla esihle sikaJehova sabonakala ekubeni usizo nokubambisana kosomabhizinisi neziphathi-mandla zendawo, kanye nasezimfanelweni zobuKristu ezaboniswa yizisebenzi ngokwazo ezazisesakhiweni. Omunye usomabhizinisi, evakashele esakhiweni, waphawula: “Angikaze ngiwuthole kwenye indawo umuzwa wokuthula engiba nawo uma ngilapha.”
Isibusiso sikaJehova sabonakala ekuphaneni koFakazi abavamile kulo lonke izwe abasekela iSakhiwo ngokwezimali. Kwabonakala futhi ekuzimiseleni kwalabo abazinikela ekwenzeni umsebenzi ngokoqobo. Sekukonke, bayi-1 237 abagcwalisa izicelo zenkonzo yokuzithandela, abanye beya esakhiweni besuka emazweni akude nangezindleko zabo siqu beyohlala amasonto ambalwa noma izinyanga besiza emsebenzini wokwakha. Omunye umzalwane wathi: “Ukusiza esakhiweni kwakuyinkathi yenguquko ekuphileni kwami.”
Njengoba uMzalwan’ uBarr aphawula enkulumweni yokunikezela, izakhiwo ezintsha zegatsha kumelwe zibhekwe “njengobufakazi obusobala, obuqand’ ikhanda boMbuso kaNkulunkulu wobuMesiya manje omisiwe.” Yebo, ngempela, kwakuwusuku olungenakukhohlakala eNew Zealand. Ekupheleni kosuku, kwaba nokusabela okusuka enhliziyweni kwabo bonke ababekhona ezwini lesinqumo elithi “ayisekelwe ngokugcwele inhlangano kaJehova njengoba imelelwe yigatsha lethu.”