Amaphuzu Avelele EBhayibheli IsiHlabelelo SeziHlabelelo 1:1–8:14
Uthando Lweqiniso Luyanqoba!
Kukhona uthando olungehluleki. Luhlala njalo, luyabekezela, luyanqoba. Uthando olunjalo olungantengantengi lutholakala phakathi kukaJesu Kristu “nomlobokazi” wakhe, noma ibandla elizelwe ngomoya. (IsAmbulo 21:2, 9; Efesu 5:21-33) Futhi yeka ukuthi loluthando luchazwe kahle kanjani encwadini yesiHlabelelo seziHlabelelo!
‘Lengoma ezidlula zonke’ (1:1, NW) eyaqanjwa yiNkosi yakwaIsrayeli ehlakaniphile uSolomoni cishe eminyakeni eyizi-3 000 edlule, isitshela ngothando oluphakathi kukamalusi nentombi yakwelinye izwe emzini waseShunemi (Shulemi). Naphezu kwayo yonke ingcebo yayo nobukhazikhazi, inkosi yahluleka ukuzuza uthando lomShulamiti, ngoba wayethembekile kumalusi wakhe othandekayo.
Lapho lencwadi esankondlo ifundwa ngokucophelela nokwazisa okufanelekile, inikeza izinceku zikaJehova ezingashadile nezishadile okuningi ezingacabanga ngakho ngokuqondene nobumsulwa, ubumnene, ukwethembeka, nothando oluhlala njalo okumelwe kube yizimpawu zefindo lomshado wobuKristu. Ngempela, sonke singazuza kulengoma yokunqoba kothando lweqiniso.
UmShulamiti Ekamu LikaSolomoni
Siza ufunde IsiHlabelelo seziHlabelelo 1:1-14. Ematendeni obukhosi, umShulamiti wakhuluma sengathi umalusi wakhe othandekayo wayekhona. USolomoni wababaza ubuhle bakhe futhi wathembisa ukumhlobisa ngezinto zegolide nesiliva. Kodwa lentombi yakwenqaba ukweshela kwakhe futhi yamtshela ukuthi yayinothando lweqiniso ngomalusi kuphela.
◆ 1:2, 3—Kungani leziqhathaniso zewayini namafutha zazifaneleka kakhulu?
Iwayini lijabulisa inhliziyo futhi liqinise umphefumulo odangeleyo. (IHubo 104:15; IzAga 31:6) Amafutha ayethelwa ezivakashini ezithandwa kakhulu ngenxa yezici zawo ezithobayo. (IHubo 23:5; Luka 7:38) Ngakho-ke umShulamiti okhathazekile waqiniswa futhi waduduzwa ngokukhumbula “uthando” lukamalusi “negama” lakhe. Ngokufanayo, insali yabalandeli bakaKristu abagcotshiwe iyakhuthazwa ngokuzindla ngothando nangokuqinisekiswa nguMalusi wayo, uJesu Kristu, noma isesezweni futhi ihlukanisiwe naye.
Esikufundayo: USolomoni wayezohlobisa umShulamiti ‘ngezintambo zobuhlalu begolide,’ “namaqhosha esiliva,” kodwa wazenqaba lezilingo zezinto ezibonakalayo futhi waqinisekisa uthando lwakhe olungehluleki ngomalusi. (1:11-14) Ukucabanga ngesimo sakhe sengqondo kungaqinisa isinqumo sesigaba ‘somlobokazi’ ukuba senyanye isimiso sezwe esiyengayo sokuthanda izinto ezibonakalayo futhi sihlale sithembekile kuMyeni waso ongokwasezulwini. Uma amathemba ethu kungawasemhlabeni futhi sicabangela umshado, sengathi isibonelo salentombi singasishukumisela ukuba senze izithakazelo ezingokomoya, hhayi ezezinto ezibonakalayo, zithole ukukhathalela kwethu kokuqala.
Ukulangazelelana
Funda izahluko 1:15–3:5. Umalusi wangena ekamu lobukhosi futhi wakhuluma ngothando lwakhe ngomShulamiti onesizotha, omazisa ngaphezu kwabo bonke abanye. Lapho behlukanisiwe, intombi yakhumbula izikhathi zenjabulo ababenazo nothandekayo wakhe futhi yacela ukuba asheshe eze kuyo. Ebusuku, yayimlangazelela.
◆ 2:1-3—Zisho ukuthini lezingcezu zenkulumo?
UmShulamiti wazibiza ngokuthi ‘uyintebe yaseSharoni’ ngenxa yokuthi wayeyintombi ethobekile, enesizotha eyayizibheka njengenye nje yezimbali eziningi ezijwayelekile. Nokho, umalusi waqaphela ukuthi ‘yayingumnduze phakathi kwameva,’ ngoba yayibukeka, ifaneleka, futhi ithembekile kuJehova. Kulentombi, umalusi ‘wayenjengama-apula phakathi kwemithi yasehlathini’ ngenxa yokuthi wayeyinsizwa ethembekile ezintweni ezingokomoya ezinikele ngokufanayo kuNkulunkulu futhi enezici ezinxanelekayo namakhono. UmKristu ongashadile ofuna umngane wokuphila kwakhe konke kumelwe afune kuphela akholwa naye othembekile onezici ezinjengezomShulamiti noma umalusi wakhe othandekayo.
◆ 3:5—Kungani lesifungo sahlanganiswa nalezilwane?
Izindluzele nezinsephe ziyizilwane ezithobile, ezinomusa nezinhle ezisheshayo futhi ezingakhubeki. Khona-ke, eqinisweni lentombi yayibopha “amadodakazi aseJerusalema” ngesifungo sakho konke okuthobekileyo nokuhle. Ngalezidalwa, yayibopha lababesifazane ukuba bayeke ukuzama ukuvusa uthando kuyo nganoma ubani ngaphandle kukamalusi wakhe othandekayo.
Esikufundayo: Intombi yabeka “amadodakazi aseJerusalema,” noma abesifazane basesigodlweni ababelindele inkosi, ngaphansi kwesifungo ‘sokungaluvusi uthando lungakavumi.’ (2:7; 3:5) Lokhu kubonisa ukuthi akunakwenzeka ukuthanda noma ubani ngothando lwezithandani. Intombi ngokwayo ayibanga nomuzwa wokukhangwa nguSolomoni. Khona-ke yeka ukuthi kuwukuhlakanipha kanjani ngomKristu ongashadile ocabangela umshado ukuba acabangele kuphela umkhulekeli kaJehova ofanelekile nothembekile ongathandwa ngeqiniso!—1 Korinte 7:39.
Intombi EJerusalema
Funda izahluko 3:6–6:3. USolomoni wabuyela eJerusalema esebukhazikhazini. Umalusi wahlangana nentombi lapho futhi wayiqinisa ngamazwi othando. Ephusheni, yephuza ukusabela ekungqongqozeni kothandekayo wayo futhi yaphathwa kabi ngabalindi lapho imfuna ikhathazekile. Lapho ibuzwa ukuthi kuyini lokho okwakwenza othandekayo wayo abe ngovelele, yanikeza “amadodakazi aseJerusalema” incazelo efudumele ngaye.
◆ 5:12—Kukanjani amehlo omalusi ‘ayenjengamajuba ageza obisini’?
Ekuqaleni, amehlo omShulamiti ayefaniswe nawejuba ngenxa yokuthi ayethambile, emnene. (1:15; 4:1) Ngalesosizathu, umalusi wayebize intombi ngokwayo ngokuthi “ijuba” lakhe. (5:2) Lapha lentombi ephethwe uthando yafanisa amehlo omalusi namajuba ampunga ngokuluhlaza, ageza ezizibeni zobisi. (5:8, 12) Ngokunokwenzeka, lesifaniso sasibhekisela engxenyeni emnyama yeso ezungezwe okumhlophe okukhazimulayo kweso lakhe.
Esikufundayo: UmShulamiti ‘wayenjengensimu ehluthulelweyo.’ (4:12) Ngokuvamile insimu ngezikhathi zikaIsrayeli wasendulo yayinjengepaki, ipharadesi elingokoqobo enomthombo wamanzi amtoti nemifino, izimbali, nemithi okunhlobonhlobo. Ngokuvamile, yayibiyelwa ngothango noma ngogange futhi kwakungangenwa kuyo ngesango elihluthulelwe kuphela. (Isaya 5:5) Kumalusi, ukuziphatha okumsulwa komShulamiti nokubukeka kwakhe kwakunjengensimu enobuhle obungavamile, enezithelo ezinhle, enamakha amnandi, nobuhle obenamisayo. Imizwelo yakhe yayingeyona eyanoma iyiphi indoda, ngoba wayemsulwa, ‘njengensimu ehluthulelwe’ engenakubamukela abafohli kodwa evulekele umniniyo ongokomthetho kuphela. Ngokuziphatha okuqotho nokwethembeka umShulamiti wabeka isibonelo esihle ngabesifazane abangamaKristu abangakashadi namuhla.
“Ilangabi LikaJehova”
Funda izahluko 6:4–8:14. USolomoni watusa ubuhle balentombi, kodwa yamenqaba futhi yazisa ngokuzinikela kwayo kumalusi. Ehluleka ukuzuza uthando lwayo, uSolomoni wayivumela ukuba iye ekhaya. ‘Inothandiweyo’ wayo eceleni kwayo, yabuyela eShunemi njengowesifazane ovuthiwe oye wabonakalisa ukuqina kwakhe. Uthando phakathi kwayo nomalusi lwaluqine njengokufa, futhi namalangabi alo ‘ayenjengelangabi likaJehova.’
◆ 6:4—Yayiyini i“Tirisa”?
Leligama elisho “uBuhle, Ukwenamisa,” lingahunyushwa njengelisho “uMuzi oMuhle.” ITirisa yayingumuzi odumile ngobuhle owaba inhloko-dolobha yokuqala yombuso wasenyakatho wakwaIsrayeli.—1 AmaKhosi 14:17; 16:5, 6, 8, 15.
◆ 7:4—Intamo yalentombi yayifana kanjani ‘nombhoshongo woPhondo lweNdlovu’?
Ngokusobala yayimsulwa njengophondo lwendlovu futhi incane njengombhoshongo. Ngaphambili, intamo yayo ifaniswe ‘nombhoshongo kaDavide,’ mhlawumbe umbhoshongo weNdlu YeNkosi owawungasogangeni olusempumalanga yeJerusalema. Phezu kwawo ‘kwakulengiswa izihlangu eziyizindilinga eziyinkulungwane zamadoda anamandla,’ okusikisela ukuthi intamo enesithunzi yomShulamiti yayihlotshiswe ngomgexo onocu oluhlotshiswe ngamatshe ayigugu ayizindilinga.—4:4; Nehemiya 3:25-27.
◆ 8:6, 7—Kukanjani uthando “lunamandla njengokufa”?
Ukufa kuye kwathatha ngokungehluleki ukuphila kwabantu abanesono, futhi uthando lweqiniso lunamandla ngaleyondlela. Ngesikhwele salo sokufuna ukuzinikela okuphelele, uthando olunjalo lungolungahlehli njengeSheol (ithuna) lapho lifuna izidumbu zabafileyo. Njengoba uJehova afaka ikhono lokuthanda kubantu, lemfanelo ivela kuye futhi ibizwa ngokufanelekile ngokuthi “ilangabi likaJehova.” Ngisho neNkosi ecebile uSolomoni yayingenakuluthenga uthando olunjalo.
Esikufundayo: Okuhlangenwe nakho komShulamiti neNkosi uSolomoni kwakuwuvivinyo oluhlolisisayo adlula kulo ngokuphumelelayo. Wayengongaxegiyo othandweni nangobumsulwa njengesicabha esivuleka kalula esifuna ukuba sivinjwe ngepulangwe lomsedari ukuze singavuleki kunoma ubani ongemukeleki nongalungile. Cha, intombi yanqoba ekuyengweni yinkosi, yama njengogange ngokumelene nabo bonke ubucwazicwazi bezinto ezibonakalayo balelizwe. Ngokwencika kuJehova nangokukhumbula isibonelo esihle somShulamiti, ngokufanayo abesifazane abangamaKristu namuhla bangabonisa ukuvuthwa kwabo njengabantu abaqinile ezimisweni ezimbulwa kube udumo kuJehova.—8:8-10.
Ngokuqinisekile, ‘lengoma ezidlula zonke’ enesihloko sothando, iphakamisa ukwazisa kwethu ngobudlelwane obukhona phakathi kukaJesu nalabo abakhethelwe ukuba “umlobokazi” wakhe wasezulwini. Kodwa zonke izinsizwa nezintombi kanye namadoda nabafazi abazinikele kuJehova bangazuza ngokufuna ukulingisa ubuqotho bomShulamiti nomalusi lapho bebhekene nezilingo. Futhi lengxenye enhle kakhulu yeZwi likaNkulunkulu kumelwe isishukumisele sonke ukuba sihlale njalo sithembekile kuJehova, uMthombo wothando olunqobayo.