Imifanekiso Evela Ezweni Lesithembiso

INazaretha—Ikhaya LomProfethi

“IZIXUKU zathi: Lo ungumprofethi, uJesu waseNazaretha laseGalile.” Yebo, ngisho naphakathi nenkonzo kaJesu, ukukhuluma nje ngaye kwakukhumbuza ngomuzi waseNazaretha manje owawusudumile. Kanjalo, labo ababezombopha abashongo ukuthi babefuna uJesu kodwa bathi bafuna “uJesu waseNazaretha.”—Mathewu 21:11; 26:71; Johane 18:3-5; IzEnzo 26:9.

Isithombe esingenhla sibonisa lokho oyokuthola uma uvakashela eNazaretha namuhla. Inkulu kakhulu kunangesikhathi ingelosi ifika “emzini waseGalile ogama lawo yiNazaretha” ukuzotshela uMariya ukuthi wayezozala iNdodana kaNkulunkulu. (Luka 1:26-33) Ngalesosikhathi, iNazaretha yayifana nomzana oboniswe ekhasini elilandelayo, imizi eyizikwele eqoqene eqeleni. Ngokunokwenzeka uJosefa noMariya babehlala emzini ofana nalena. Kodwa ngaphambi nje kokuba uMariya abelethe, kwadingeka ukuba baye eningizimu eBetlehema, futhi uJesu wazalelwa lapho. Kamuva babalekela eGibithe ukuze bavikele umntwana emacebweni kaHerode okubulala. Ngemva kwalokho, “babuyela eGalile emzini wakubo iNazaretha.”—Luka 2:4, 39; Mathewu 2:13-23.

Kanjalo uJesu akakhulelanga esikhungweni esimatasa njengeJerusalema noma iTiberiya, kodwa endaweni ethulile. INazaretha yayisesigodini esizungezwe amagquma aseGalile Esezansi, lapho kwakuchuma khona ukudla okusanhlamvu, ezithelo zomvini, iminqumo, namakhiwane. Yayiba nehlobo eliphole kamnandi, nokho ubusika babungabandi kakhulu njengaseGalile Esenhla.

UJosefa wayondla umkakhe, amadodana, namadodakazi akhe ngokusebenza njengombazi, mhlawumbe enendawo yokusebenzela enjengalena eseNazaretha lanamuhla. Kungenzeka ukuthi wayenzela izindlu zasedolobheni imishayo yophahla nezicabha zokhuni, noma amatafula, izihlalo, nezinye izimpahla zasendlini zokhuni. Siyazi ukuthi uJesu wayebukela futhi efunda, ngoba naye wabizwa ngokuthi “umbazi.” (Marku 6:3; Mathewu 13:55) Ngokunokwenzeka umsebenzi wezolimo owawenziwa eNazaretha waholela kweminye imisebenzi. Mhlawumbe uJesu walolonga ijoka elifana naleli elibonakala kulezilwane. Ngalesosikhathi, kungenzeka ukuthi uJosefa wayesebenzisa amathuluzi akhe akha amageja noma izihlibhi zokubhula ezidonswa yijoka.—2 Samuweli 24:22; Isaya 44:13.

Kungenzeka ukuthi uJesu, njengebhungu, wayehambahamba endaweni ezungeze iNazaretha, ‘njengeKhana laseGalile,’ eliqhele ngamakhilomitha ayi-13 ukuya enyakatho, lapho kamuva enza khona isimangaliso sakhe sokuqala. (Johane 2:1-12) Ehamba amakhilomitha athi awabe ayi-10 ukuya ngaseningizimu-mpumalanga eya ngasesiGodini SaseJizreyeli naseGqumeni LaseMore, uJesu wayengafika emzini waseNayini, obonakala ekhasini 17.a (AbaHluleli 6:33; 7:1) Khumbula ukuthi ohambweni lwakhe lokuqala lokushumayela, uJesu wahlangana nodwendwe lomngcwabo eduze kwaseNayini. Eshukunyiswe isihawu, wavusa indodana yomfelokazi.—Luka 7:11-16.

INazaretha yayingakhiwe emizileni eyinhloko edabula ezweni, nokho kwakufinyeleleka kalula emigwaqweni enjalo. Lokhu ungakubona ebalazweni elisesembozweni seKhalenda LoFakazi BakaJehova Lika-1990, futhi elinesithombe esikhudlwana seNazaretha namuhla. Umzila osuka empumalanga uye entshonalanga odabula esiGodini SaseJizreyeli wawuxhuma ichweba lase-Acre, noma iPtolemais, noLwandle LwaseGalile nesiGodi SaseJordani. Umzila owawunqamula lowo kwakungovela eningizimu eDamaseku futhi wehle udabule iSamariya uye eJerusalema.

INazaretha yayinesinagoge layo, futhi ekuqaleni kwenkonzo yakhe, uJesu waya khona “njengokwenza kwakhe.” Wafunda uIsaya 61:1, 2, ewusebenzisa kuye ngokwakhe. Abantu bendawo babeyosabela kanjani, abanye babo ayekhulele phambi kwabo okungenzeka futhi ukuthi bamkhokhela ngomsebenzi wokubaza? Bathukuthela futhi bazama ukumphonsa eweni, kodwa uJesu waphunyuka. (Luka 4:16-30) Ngokusobala, umbiko walokho akwenza kamuva eNayini wafika eNazaretha, ngoba lapho ebuya futhi efundisa esinagogeni lendawo, akekho owakhuluma ngokumbulala. Noma kunjalo, “akenzanga lapho imisebenzi eminingi yamandla,” ngoba ababemjwayele eNazaretha abamkholwanga njengomprofethi.—Mathewu 13:53-58.

UMarku ubhala indlela uJesu asabela ngayo: “Umprofethi kadelelwa ngaphandle kwesezweni lakubo, nesezihlotsheni zakhe, nasendlini yakwabo.” Yeka ukuthi kudabukisa kanjani ukuthi lokhu kwenzeka kwabaningi eNazaretha. Noma kunjalo, sisengacabanga ngalowomuzi njengoyikhaya lomProfethi esikhetha ukumhlonipha.—Marku 6:4.

[Umbhalo waphansi]

[Umthombo Wesithombe ekhasini 16]

Pictorial Archive (Near Eastern History) Est.

[Isithombe ekhasini 17]

[Isithombe ekhasini 17]

[Isithombe ekhasini 17]