Isibusiso SikaJehova Singicebisile

Njengoba ilandiswa uElsie Meynberg

“ISIBUSISO sikaJehova siyacebisa; akenezeli usizi kuso.” (IzAga 10:22) Ngiye ngaba nokuhlangenwe nakho komuntu siqu ngokuba yiqiniso kwalesisaga seBhayibheli. Ngivumele ngikutshele ukuthi kanjani.

Lapho ngineminyaka nje eyisithupha, ngalalela izingxoxo zikamama nomfundisi weBhayibheli owayesivakashele, futhi ngaphawula indlela umama ayejatshuliswe ngayo yilokho ayekufunda. Ngobunye ubusuku obubandayo basebusika, ngehlela esitezi esingezansi ngiyophuza amanzi futhi ngathola uMama efunda eduze komnyango kahhavini ovuliwe. Kunokuba angithethise njengoba ngangilindele, wangigona futhi wachaza ukuthi igama likaNkulunkulu uJehova. Ukufudumala kwezwi lakhe kwangitshela ukuthi lokho ayekufundile kwakubaluleke kakhulu kuye.

Ngemva kwezingxoxo ezimbalwa ezengeziwe nalomfundisi weBhayibheli, uMama wahamba ngezinyawo eyohlanganyela nomakhelwane izindaba ezinhle ayezifundile. Nokho, wayengamukelwa kahle ngaso sonke isikhathi. Sasihlala ezweni eliseduze neBeatty, eSaskatchewan, eCanada, futhi iningi lomakhelwane bethu laliyizihlobo zethu, amaLuthela noma amaEvangelist ashisekayo. Nokho, uMama waqhubeka ebavakashela.

Ngangibuka ngamafasitela anongqoqwane njengoba uMama ayezama ukukhipha amahhashi esitebeleni, njengoba ngangazi ukuthi wayengajwayele ukuwabophela. Ngezinye izikhathi wayeya emihlanganweni noma enkonzweni yasensimini naphezu kokukhonona kukaBaba. Wayengavumelani nokholo olusha lukaMama, kodwa yena wayezimisele. Njalo wayebuya enenjabulo yangaphakathi eyayisobala kubo bonke. Wayesethi, “Isibusiso sikaJehova siyacebisa.” Ngangivame ukuzibuza ukuthi wayesho ukuthini ngalokho. Nakuba ngangineminyaka nje eyisithupha, nami futhi ngafuna ukukhonza uJehova.

Ngolunye usuku ngangisophahleni nobaba, lapho ayelungisa khona amapulangwe okufulela. UMama nodadewethu uEileen babehamba neqembu ngemoto yeFord enguModel T ukuze bahlanganyele ‘ekumasheni kokwaziswa.’ Babezokwehla benyuka nedolobha benezingqwembe ezimemezela inkulumo yeBhayibheli.

“Ingabe nawe uzoba yisiphukuphuku kangaka?” ngibuzwa uBaba. Kodwa ngisho nakuba ngangiyintombazane eyayizithandela ukukhwela ezindaweni eziphezulu, ngangingamane ngibe kulokho kumasha kokwaziswa kunokuba ngibe phezulu ophahleni. Nokho, bathi ngangimfushane kakhulu ukuba ngingaphatha uqwembe.

Ukuhlangabezana Nenselele Yokuvinjelwa

Ekugcineni, ithuba lami lokuqala lokuba ngihlanganyele ekushumayeleni ngoMbuso lafika ngoNovember 1940. Yeka injabulo okwakuyiyo! Njengoba ngalesosikhathi umsebenzi wokushumayela woFakazi BakaJehova wawuvinjelwe eCanada, saphuma phakathi nobusuku futhi sashiya incwajana ethi End of Nazism kuzo zonke izindlu.

Lapho ngineminyaka eyisishiyagalolunye, ngazimisela ukunikezela ukuphila kwami kuJehova futhi ngibhapathizwe. Ngenxa yoshushiso, sasingatshelwa indawo umhlangano okuyo, kodwa sasiholelwa endaweni esehlathini lapho iqembu elikhulu loFakazi BakaJehova lalijabulela khona “idili.” Mina nodadewethu omdala uEleanor sasilapho phakathi kwabaningi ababhapathizwa emanzini abandayo echibi elaliseduze.

Ngalezozinsuku isikole sasiqalisa ngokuba ikilasi likhulekele ifulege futhi lihlabelele iculo lesizwe. Naphezu kokunyonkolozwa ngesifunda nabo, sasinqaba ngenhlonipho ukuhlanganyela ngenxa yemfundiso yeBhayibheli ngokukhulekelwa kwezithombe. (Daniyeli, isahluko 3) Umzala wami, uElaine Young, naye owayenguFakazi, kwakumelwe ahambe amakhilomitha ayisithupha eya esikoleni, kodwa usuku ngalunye wayexoshwa ngenxa yokungakhulekeli ifulege. Ngemva kwalokho wayephinda ahambe yonke lendlela futhi eya ekhaya. Lokhu wakwenza isikhathi esiyingxenye yonyaka wokufunda ukuze angaphawulwa njengongekho abese engaphumeleli ezifundweni.

Ngemva kokuphuma esikoleni, ngasebenza ebhange. Kodwa kwafika uvivinyo lapho kunqatshwa isicelo sami sokuya emhlanganweni wezizwe zonke woFakazi BakaJehova eNew York ngo-1950. Nganginemadlana engangiyibekile futhi nganquma ukuwuyeka umsebenzi futhi ngiqale enkonzweni yesikhathi esigcwele. Ngakho-ke mina noElaine sathuthela edolobheni laseRegina. “Kothi kufika intwasahlobo abe esesekhaya ehamba ecela,” kubhinqa abanye. Nokho, ngakwazi ukuzinakekela ngokusebenza emakhishini ngezinsuku ezithile. Ukuceba kwesibusiso sikaJehova kuye kwangigcina ngisenkonzweni yesikhathi esigcwele kusukela ngalesosikhathi.

Ukufinyelela Umgomo Wethu

Ngo-1955 mina noElaine sajabula ngokumenyelwa ekilasini lika-26 laseGileyadi futhi kamuva nangokuthola izabelo zokuya eBolivia, eNingizimu Melika. Ngalesosikhathi kwakunoFakazi abacishe babe ngu-160 kuphela ezweni lonke. Ekugcineni, saya eTarija ukuze sihlangane nezinye izithunywa zevangeli ezimbili esabelweni sethu sokuqala.

ITarija kwakuyidolobha elihle. Kwakuthakazelisa kakhulu ukubona abesifazane begqoke izingubo zabo zomdabu bethwele imithwalo emakhanda abo. Abantu babebahle futhi babengasitsheli ukuthi abanasithakazelo. Ngokusobala babenomuzwa wokuthi kuhlonipheke kakhulu ukusitshela ukuthi siphinde sibuye ngesikhathi abaziyo ukuthi bayobe bengekho ngaso ekhaya. Kwathatha isikhashana ukuba sikujwayele lokho.

Ngelinye ilanga sasikhuluma nendoda emnyango wendlu yayo lapho kuma iveni futhi kugxuma umpristi othukuthele, egane unwabu. “Uma ungayeki ukukhuluma nalawomantombazane, uzoxoshwa esontweni!” ethethisa lendoda. Ephendukela kithi, wasongela: “Aninalungelo lokushumayela lapha. Uma ningayeki ngizothatha ezinye izinyathelo.” Ngalesosikhathi omakhelwane abaningi base bephumile bezobukela. Ngakho samane saqhubeka nomsebenzi wethu, sihambisa izincwadi eziningi namaBhayibheli ezibukelini ezinokulangazelela.

Sesihlalé iminyaka emibili kulendawo enhle eyisigodi lapho kumila khona amapetshisi, amantongomane, namagilebhisi, ekuqaleni asizange sikujabulele ukushintsha isabelo ukuze siye ePotosí, idolobha lasezimayini elibanda kakhulu elisendaweni ephakeme ngamamitha angaphezu kuka-4 000. Sasijwayelene nobusika obubanda kakhulu baseCanada, kodwa umehluko kwakungukuthi ePotosí ngokuvamile amakhaya ayengenakho ukushisa. Nokho, ePotosí kwakunobuhlobo obufudumele bebandla lobuKristu, kuyilapho eTarija kwakungekho bandla elase lakhiwe.

Ukuqalisa Isabelo Esisha

Ngokulandelayo, mina noElaine sabelwa eVillamontes ukuze siyoqalisa umsebenzi wokushumayela lapho. Iloli esaligibela lalilayishe ushukela owenqatshelwe, ngakho ukuze agweme izinkinga emaphoyiseni asemasangweni okukhokha intela, umshayeli akazange asuke kwaze kwaba sebusuku. Yeka indlela esasifisa ngayo ukuba ngabe siphathé ithoshi, ngoba ngokungazelele kwanyakaza okuthile eceleni kwethu ngaphansi kukaseyili! Kwakungumsizi womshayeli weloli.

Ngehora lesihlanu ekuseni, sama. Sigula ngenxa yesisi sombhobho wenjini futhi sigcwele uthuli, saphuma sesigaqa ngamadolo. Inhlabathi edilikile yayisivimbele endleleni. Ekugcineni, ngemva kwamahora amane omsebenzi onzima, umnikazi wanika umsizi wakhe iloli ukuba aliwelise ngaphesheya konqenqema oluncane olwase lulungisiwe. Umnikazi wayengafuni ngisho nokubuka njengoba iloli lalihamba kancane liwela futhi amasondo alo angaphandle alawo angamabili ephenduka emoyeni ngaphezu komgodi owawubonakala ungenasiphelo eceleni komgwaqo. Mina noElaine sawela ngezinyawo. Njengoba sasiqhubeka sisondela eVillamontes ngeloli, amajika amabi ezikhaleni zezintaba ayesondelene kakhulu kangangokuba umshayeli waphoqeleka kaningi ukuba ahlehle futhi ajike ngokuhlakanipha kuwo. Ekugcineni, ngemva kwamahora angu-35 aqeda amandla, safika.

Kwakungokuhlangenwe nakho okusha kimi noElaine ukuba sibe sodwa ngokuphelele. Okunye okwakukusha kithi kwakuyizinambuzane zasezindaweni ezishisayo. Amabhungane amakhulu anamagobolondo aqinile ayewela phezu kwethu ngemva kokushayisa izibani ezingaphezu kwamakhanda ethu. Izimpukane ezincane zazisiluma kabuhlungu, zibangela amaqhuqhuva alumayo aphuma amanzi. Ngobusuku bokuqala ekhaya lethu elisha, ngaphuma ngiya endlini yangasese engaphandle. Kodwa lapho ngikhanyisa ithoshi, yonke indawo yaphansi yabonakala sengathi iyaphila ngenxa yamaphela. Izibankwa zahlakazeka, futhi amaxoxo amakhulu angigqolozela esemachosheni. Nganquma ukuba ngilinde kuze kube sekuseni.

Kamuva, sasingasemfuleni futhi sasicabanga ukuthi sizoke siphumule ogodweni esalubona lapho. Nokho, sanquma ukuba siqale ngokuya empindelweni eseduze. Lapho sibuya, ugodo lwalungasekho. Abantu ababemangele abadlulayo basitshela ukuthi lapho bekunenyoka enkulu. Ngiyajabula ngokuthi asizange sizame ukuhlala ‘kulologodo’!

Esasikujabulela kakhulu ngeVillamontes kwakuwukuvakashela abantu ebusuku. Sasibathola behlezi ngaphandle ezihlalweni ezalukiwe ezindleleni eziseceleni komgwaqo, bephuza isiphuzo samakhambi okuthiwa yimaté. Sasebenzisa amahora amaningi ajabulisayo sichaza izithembiso zoMbuso ezimweni ezinjalo. Kodwa izikhathi ezinzima kakhulu zafika ngemva kokuba uElaine eshadile futhi ngaphinda ngabelwa eVallegrande nomngane omusha.

Kufana NeNtshonalanga Engaphucuzekile

Ukuze sifinyelele eVallegrande, kwadinga olunye uhambo oluqeda amandla lwezinsuku ezintathu, futhi manje ngangingedwa. Imigwaqo emincane enothuli yayibukeka sengathi izungeza unomphela ehlane. Ekugcineni ngafika njengoba ilanga lalishona. Ibhasi laliphazamisa ukuthula kwedolobha lapho amahhashi ayevame khona kakhulu kunezimoto. Abantu babebuka bengaphansi kwemipheme yophahla, eyayelulekele ngaphezu kwezindlela eziseceleni komgwaqo futhi isekelwe ngezinsika. Amanye amadoda ancike ezinsikeni ayegqoke amabhande anezikhwama ezinezibhamu. Cishe wonke umuntu wayebonakala egqoke okumnyama. Ngacabanga: ‘Phela lokhu kufana ncamashi neNtshonalanga engaphucuzekile!’

Futhi empeleni, kwakunjalo. Imibango yayixazululwa ngesibhamu. Ngisho nakuba kwakuyidolobha elinabantu abayizinkulungwane eziyishumi kuphela, ukubulala nobudlova kwakuvamile ngalesosikhathi. Izakhamuzi zazibuswa yiqembu lezigebengu elathatha izintambo esangweni lokukhokha intela ekungeneni kwedolobha. Amalungu aleliqembu lezigebengu ayephila ngokumisa amabhasi bese ewaphanga. Abalimi nabo babephangwa njengoba babeletha imikhiqizo yabo edolobheni. Amantombazanyana ayedlwengulwa ekhonjwe ngezibhamu phambi kwamehlo abazali bawo. Omama babengawavumeli amadodakazi abo ukuba ayothenga wodwa ngisho nasezitolo eziseduze.

Cabanga nje ngalokho esakucabanga ngelinye ilanga lapho umholi weqembu lezigebengu engena eHholo LoMbuso. Wayedakiwe. Umbonisi wesifunda, owayenikela inkulumo, waphaphatheka. “Ngiyakholwa!” kumemeza lomholi weqembu lezigebengu njengoba eshaya ingemuva lebhentshi ngamandla amakhulu kangangoba laphuka. Wabe esebamba umbonisi wesifunda. Kodwa ngokungazelele wadamba, futhi owayengumngane wakhe wasesikoleni ezilalelini wakwazi ukumholela ngaphandle.

Ekugcineni, ujenene wempi waphonsa inselele kulomholi weqembu lezigebengu ukuba balwe. Lojenene wayelengise inja efile endaweni yomphakathi inophawu oluthi: “Phuma uphele edolobheni, kungenjalo kuzokwenzeka okunjengalokhu kuwe.” Lesigebengu sahamba, futhi izimo zaba ngcono eVallegrande.

Ngezinye izikhathi sasihamba ngamahhashi amahora angu-12 siyoshumayela emadolobhaneni asemaphethelweni. Kwelinye lamadolobha omunye uthisha wasemukela ngomoya omuhle futhi kamuva waba ngomunye woFakazi BakaJehova. Ngesinye isikhathi ngaboleka umnyuzi ukuze ngiye lapho, kodwa njalo lapho udlula ikhaya lomunye owayekade engumniniwo, wawuya khona, futhi kwakudingeka baphinde basikhiphele ngaphandle emkhondweni.

Izinselele—Kodwa Ngisacebile

Njengoba kunjalo nangezinye izithunywa zevangeli eziningi, ngiye ngathola ukuthi inselele enkulu kakhulu ingase ingabi ukushisa noma izinambuzane, ukubanda noma ukuphakama kwendawo, noma ngisho nezifo nobumpofu. Kunalokho, ingaba ukungezwani kobuntu. ‘Kungani kuphakama izinkathazo ezinjena enhlanganweni kaJehova?’ ngazibuza, futhi ngaqala ngisho nokungabaza ukuthi uJehova wayengicebisa ngezibusiso. Khona-ke ngakhumbula umbhalo okhuluma ngesibusiso sikaJehova kuzAga 10:22. Ingxenye yesibili yalelivesi ithi, “Akenezeli usizi kuso.” Ngakho akumelwe sisole uJehova ngenxa yalezinkathazo. Ngaqonda ukuthi ziyingxenye yalokho uAdamu akudlulisela kithi futhi zihlanganisiwe kulokho uPawulu akuchaza kwabaseRoma 8:22: “Konke okudaliweyo kuyabubula kanyekanye kunezinseka.”

Ngangibhalelana noWalter Meynberg waseBethel yaseCanada, futhi lapho ngiseholidini eCanada ngo-1966, sashada futhi sabelwa eLa Paz, inhloko-dolobha yaseBolivia. Yeka isibusiso okuye kwaba yiso ukubona amabandla lapha anda kusuka kwelilodwa kuphela lapho ngifika eBolivia kuya kwangu-24, kuzo zonke izingxenye zedolobha. Kuye kwaba ngokufanayo nakwamanye amadolobha alelizwe. Ngempela, iqembu labamemezeli abacishe babe ngu-160 ababeshumayela izindaba ezinhle eBolivia lapho ngifika okokuqala ngo-1955 liye lakhula lafinyelela kwabacishe babe ngu-7 000!

Isibonelo sikamama sokuzimisela asibeka kudala kangaka saphumela ekutheni abangaphezu kweshumi bomkhaya wakithi oseduze babe senkonzweni yesikhathi esigcwele. Ngiyajabula ngokusho ukuthi ubaba wami waba uFakazi ozinikezele, futhi abantu abangaphezu kuka-30 engaba nelungelo lokufunda nabo iBhayibheli baye babhapathizwa. Ingabe lokhu akuwona umcebo? Yebo, ngikholelwa ukuthi kuyiwo. Ngempela, ‘isibusiso sikaJehova yisona esingicebisile.’