Izinceku Ezisezintsha Ngezikhathi ZeBhayibheli

IBHAYIBHELI lisitshela ngentsha eningi ekahle eyathatha inkonzo yayo eyenzela uNkulunkulu ngokungathi sína futhi yabusiswa ngokucebile ngokwenze njalo. Kungakhathaliseki ukuthi sibasha noma sesikhulile futhi simpunga, lezibonelo ezinhle ezingokweBhayibheli zingaba isikhuthazo esikhulu.

UJosefa wayeneminyaka engu-17 kuphela lapho ethengiselwa ebugqilini eGibithe. Lapho, ekude nomkhaya wakubo futhi engenakubonwa abamaziyo, uJosefa wabonakalisa ubuqotho bakhe. Lapho umkaPotifari ezama ukuyenga uJosefa, wathi: “Ngingenza kanjani lobobubi obungaka, ngone kuNkulunkulu, na?” Ngisho naphambi kukaFaro onamandla, inkosi eyayinamandla kakhulu emihleni yayo, uJosefa wathatha ithuba lokunikeza uNkulunkulu udumo ngencazelo yamaphupho kaFaro. Wabusiswa ngokucebile. UNkulunkulu wamsebenzisa ukuba asindise kokubili abaseGibithe nomkhaya wakubo ekubulaweni yindlala futhi alethe uyise, uJakobe, nabendlu yakhe eGibithe.—Genesise 37:2; 39:7-9; 41:15, 16, 32.

UMose Nabanye Ababeqotho Ebusheni

Indodakazi kaFaro yathatha uMose njengomntanayo siqu, kepha unina noyise kaMose bakwazi ukumfundisa ngoNkulunkulu weqiniso. IBhayibheli lithi lapho esekhulile, uMose “wala ukubizwa ngokuthi indodana yendodakazi kaFaro; kunalokho wakhetha ukuphathwa kabi kanye nabantu bakaNkulunkulu kunokuba athokoze isikhashana esonweni.” UNkulunkulu wasebenzisa uMose ukuba akhiphe abantu bakhe eGibithe, ukuba amukele uMthetho eSinayi, futhi abhale ingxenye evelele yeBhayibheli. Kungakhathaliseki ubudala bakho, ingabe uthuthukisa ukuzimisela ukukhonza uNkulunkulu njengoba uMose enza?—Heberu 11:23-29; Eksodusi 2:1-10.

ImiBhalo isitshela ‘ngabantwana’ ababelalela kanye nesizwe sonke lapho uMthetho kaNkulunkulu ufundwa phambi kukaIsrayeli. (Duteronomi 31:10-13) “Bonke ababenengqondo yokuzwa” babema “kusukela ekuseni kuze kube-semini” ukuba bezwe uMthetho emihleni kaNehemiya. (Nehemiya 8:1-8) Ngisho nakuba abantwana babengakuqondi konke, babeqonda ukuthi kwakumelwe bathande, bakhulekele, futhi balalele uJehova uNkulunkulu. Kungakhathaliseki ubudala bakho, ingabe uye walalela emihlanganweni emikhulu nakwemincane lapho kuxoxwa khona ngeZwi likaNkulunkulu? Ingabe uye wakufunda ukubaluleka kokumlalela, njengoba lawomaIsrayeli amasha enza?

UDavide, UJosiya NoJeremiya

UNkulunkulu wakhethela uDavide, omncane kunabo bonke kubafowabo abayisishiyagalombili, inkonzo ekhethekile futhi wathi ngaye: “Ngimfumene uDavide kaJesayi, umuntu ongowenhliziyo yami, oyakwenza konke engikuthandayo.” UNkulunkulu wamkhetha ukuba abe ‘umalusi’ wabantu bakhe, futhi uDavide wayenza leyonkonzo, ngesikhathi esifanayo ebonakalisa uthando lwakhe ngoJehova iminyaka eminingi. Wabhala amaHubo angaphezu kuka-70 futhi waba ukhokho kaJesu Kristu. Umusha noma umdala, ingabe uyazazisa izindlela zikaNkulunkulu, futhi wenza lokho akuthandayo, njengoba uDavide enza?—IzEnzo 13:22; IHubo 78:70, 71; 1 Samuweli 16:10, 11; Luka 3:23, 31.

UJosiya waba yinkosi eneminyaka eyisishiyalombili kuphela ubudala. Lapho eneminyaka ecishe ibe ngu-15, “esengumfana waqala ukufuna uNkulunkulu kaDavide uyise.” Ngaphambi kokuba abe neminyaka engu-20, uJosiya waqalisa umkhankaso ngokumelene nokukhulekela kwamanga. Kamuva wavuselela ithempeli, futhi wabuyisela ukukhulekela okumsulwa ezweni. Siyafunda: “Zonke izinsuku zakhe abasukanga ekumlandeleni uJehova uNkulunkulu wawoyise.” Sonke ngeke sibe amakhosi njengoJosiya, kodwa singamkhonza uNkulunkulu futhi sime siqinile ngokumelene nokukhulekela kwamanga, kungakhathaliseki ubudala bethu.—2 IziKronike 34:3, 8, 33.

UNkulunkulu uMninimandla onke watshela uJeremiya: “Ngingakakubumbi esiswini ngakwazi; ungakaphumi esizalweni ngakungcwelisa, ngakubeka umprofethi ezizweni.” UJeremiya wazilandulela ngokuthi wayesemncane kakhulu ukuba abe umprofethi: “Awu, Nkosi Jehova! Bheka, angikwazi ukukhuluma, ngokuba ngingumntwana.” UJehova waphendula: “Ungasho ukuthi ungumntwana, ngokuba uyakuya kubo bonke engikuthuma kubo, nakho konke engikuyala ngakho uyakukukhuluma.” Iminyaka engu-40 uJeremiya wenza lokho kanye, ngisho nalapho esefuna ukuyeka, akakwazanga ukuma. Izwi likaNkulunkulu “laba njengomlilo oshisayo, uvalelwe emathanjeni [akhe].” Kwakumelwe akhulume nakanjani! Kungakhathaliseki ubudala bakho, ingabe uthuthukisa uhlobo lokholo uJeremiya ayenalo, uqhubekela phambili enkonzweni kaNkulunkulu ngendlela enza ngayo?—Jeremiya 1:4-8; 20:9.

UDaniyeli, UJesu, NoThimothewu

Ingabe ubungakezwa ngoDaniyeli? Kumelwe ukuba wayeneminyaka engaphansi kuka-20 lapho ethathwa kanye nabanye “abafana” njengabathunjwa beyiswa ekomkhulu likaNebukadinesari, inkosi yaseBabiloni. Naphezu kobuncane bukaDaniyeli, wayezimisele ukulalela uNkulunkulu. UDaniyeli nabangane bakhe benqaba ukuzingcolisa ngokudla okwakungase kube kwephulé uMthetho kaNkulunkulu noma okwakungcoliswe imicikilisho yobuqaba. Iminyaka engaphezulu kwengu-80, uDaniyeli akazange ayendayende, elondoloza ubuqotho bakhe kwaze kwaba sephuzwini lokwenqaba ukuyeka ukuthandaza kuNkulunkulu, nakuba lokhu kwakuzophumela ekubeni aphonswe ezingonyameni. Ingabe ubheka inkonzo yakho oyenzela uNkulunkulu nemikhuleko yakho njengengathi sína kangako? Ufanele ukwenze.—Daniyeli 1:3, 4, 8; 6:10, 16, 22.

Lapho eneminyaka engu-12, uJesu watholakala ehlezi phakathi kwabafundisi benkolo ethempelini eJerusalema, “ebezwa ebabuza. Bonke ababemuzwa [uJesu osemusha] bamangazwa ukuqonda nangokuphendula kwakhe.” Ingabe ingxoxo engokomBhalo yamadoda amadala ethempelini yayingakuthakazelisa nawe njengoba yenza kuJesu? Ingabe abanye babeyomangala ngokuqonda kwakho nezimpendulo zakho? Namuhla, oFakazi abasebasha abaningi abatadisha, balalele ngokucophelela, futhi bahlanganyele emihlanganweni yobuKristu banolwazi olungokomBhalo olubamangazayo abantu abadala.—Luka 2:42, 46, 47.

Ingabe unjengoThimothewu, okwathi esewumntwana wafundiswa “imibhalo engcwele”? Lapho eseyinsizwa, uThimothewu “wayefakazelwa kahle ngabazalwane” okungenani emabandleni amabili. Umphostoli uPawulu wakhetha uThimothewu ukuba ahambe naye, hhayi nje ukuba abe ludibi, kodwa ukuba asize uPawulu ekufundiseni abanye. Ingabe wawungakhethelwa amalungelo anjalo? Ingabe umsebenzi wakho “ufakazelwa kahle,” hhayi ebandleni lakini nje kuphela kepha nakwamanye?—2 Thimothewu 3:15; IzEnzo 16:1-4.

Hlobo Luni Lwekusasa Olufunayo?

Kungenzeka yini ngabasha namuhla ukuba babe qotho njengoJosefa, uMose, uDavide nabanye? Yebo, kungenzeka. Yiqiniso, intsha eningi ikhathalela ukuzijabulisa kuphela. Kodwa enye isebenzisa ubusha bayo ngokuhlakanipha, ifinyelela ekwazini uNkulunkulu nentando yakhe ngayo. Lena igcwalisa isiprofetho seBhayibheli: “Abantu bakho bayazinikela ngenjabulo ngosuku lwempi yakho; . . . abasha bakho bavela njengamazolo.”—IHubo 110:3.

Intsha enjalo enhle ibonisa ukuhlakanipha okwedlula iminyaka yayo, ngoba uNkulunkulu angayisiza ukuba yenze ukuphila kwayo kwamanje kube yimpumelelo futhi ayinikeze ikusasa elikhazimulayo ezweni elisha elizayo. (1 Thimothewu 4:8) Nokho, intsha yanamuhla ingaluthuthukisa kanjani ukholo olunjengalolo lwentsha ekhulunyelwe eBhayibhelini? Uma ungathanda ukwazi, sikumema ukuba ufunde isihloko esithi “Intsha Ejabulayo Enkonzweni KaJehova,” esiqala ekhasini 10 lalomagazini.

[Izithombe ekhasini 5]

UMose osemusha akazange ayengwe ingcebo yaseGibithe

UDavide osemusha wayemuhle enhliziyweni kaJehova

[Izithombe ekhasini 6]

Nakuba uJeremiya azibona ‘engumntwana’ washumayela isigijimi esingathandeki ngesibindi

Eneminyaka engu-12, uJesu wamangaza abadala bakubo ngokuqonda kwakhe iZwi likaNkulunkulu

[Isithombe ekhasini 7]

KwaIsrayeli ngisho nabancane babelalela lapho kufundwa uMthetho kaNkulunkulu. Ingabe kunjalo nangawe?