Abamemezeli BoMbuso Bayabika
Izindaba Ezinhle Ezivela ENorway
ABAMEMEZELI boMbuso abangaphezu kuka-9 500 bezindaba ezinhle eNorway bathola okuhlangenwe nakho okuningi okuhle. Abanhliziyo-ziqotho baqaphela isigijimi seBhayibheli esimenyezelwa oFakazi BakaJehova njengesiyiqiniso nesiyimpendulo yemithandazo yabo, njengoba kuphawulwa kokuhlangenwe nakho okulandelayo.
◻ Umbhangqwana osemusha wathandaza kuNkulunkulu ukuba awusize uthole injongo ekuphileni. Esontweni elilodwa kamuva oFakazi BakaJehova bafika, futhi inkosikazi yabangenisa. Indoda yayixwayisiwe ngoFakazi, ngakho yaphuma endlini yayogeza imoto yayo. Inkosikazi yazalelwa eLebanon futhi yayinenkinga yolimi, ngakho oFakazi bayibonisa igama likaJehova eBhayibhelini layo lesiArabhu. Emasontweni amabili kamuva oFakazi babuya, futhi indoda yaphinde yaphuma yayogeza imoto yayo. OFakazi babuza inkosikazi ukuthi yayicabanga ukuthi indoda yayo yayingaba khona yini esikhathini esizayo uma befika ukuze ihumushe, futhi yathembisa ukuyicela.
Ekuhambeleni kwesithathu, imoto yayihlanzeke kangangokuthi indoda ayibanga nomuzwa wokuthi yayingayisebenzisa njengezaba zokuhamba, ngakho yahlala futhi yabuza imibuzo eminingana ukuze ithole umehluko phakathi koFakazi nesonto loMbuso. Lokho kuhambela kwathatha amahora amathathu, futhi kwahanjiswa incwajana kulombhangqwana. Lapho oFakazi behamba, inkosikazi yaya kolala kodwa indoda yaqala ukufunda lencwajana, futhi ibheka yonke imibhalo. Phakathi nobusuku yavusa inkosikazi yayo futhi yathi: “Kumelwe ukufunde lokhu.” Yavuka, futhi bayifunda ndawonye kwaze kwaba yihora lesihlanu ekuseni. Beqaphela ukuthi babethole iqiniso, bakhala izinyembezi zenjabulo futhi bathandaza kuJehova, besebenzisa igama lakhe. Kwaqaliswa isifundo seBhayibheli sasikhathi sonke nabo, futhi baqala ukuba khona emihlanganweni. Indoda yayeka umsebenzi wayo kwezempi, futhi basula esontweni bayeka nokubhema. Manje babhapathiziwe futhi bakhonza uJehova ngenjabulo kanye nabazalwane babo nodade kuwo wonke umhlaba.
◻ Odade ababili enkonzweni yabo yendlu ngendlu eNorway bahlangana nowesifazane owabonisa isithakazelo. Wabamema ukuba babuye futhi wababuza ukuthi wayengabamema yini abanye abesifazane. Ekuhambeleni okulandelayo, kwakukhona abanye abesifazane abane. Omunye wabo wayeshiseka kakhulu esontweni. Wathi kusukela esemncane, wayefuna ukulalela umyalo kaJesu wokwenza abafundi. Lokhu kwakumholele eAfrika nomyeni wakhe emsebenzini wokusiza amanye amazwe. Bonke abesifazane babenemibuzo eminingi, futhi kwahlelwa ukuba odade babahambele njalo ngemva kwamasonto amabili. Abanye omakhelwane bamenywa, futhi abanye baqhubeka beza kuyilapho abanye beyeka ukuza, kodwa ilungu elishisekayo lesonto laqaphela ukuthi lalifunda iqiniso. Ngolunye usuku, lapho umfundisi wesonto lalo ethi wayezosekela impi nokuthi wayekholelwa emfundisweni kaZiqu-zintathu, lahoxa esontweni. Laqala ukuya emihlanganweni yoFakazi BakaJehova futhi ngokushesha laqala ukuhlanganyela emsebenzini wokushumayela. Ngokushesha ngemva kwalokho labhapathizwa. Ekugcineni manje, ngemva kweminyaka engu-30, selikujabulela ngempela ukulalela umyalo kaJesu wokwenza abafundi.—Mathewu 28:19.
UJehova ubusisa abazalwane eNorway enkonzweni yabo engcwele kanye nalabo abalalela izindaba ezinhle!