Ulimi Oluhlanzekile Luhlanganisa Isixuku Esikhulu Sabakhulekeli
ULIMI oluhlanzekile oluvela kuNkulunkulu lungamandla obunye bobuKristu. Ubufakazi balokho babusobala kubo bonke ababekhona emhlanganweni omkhulu woFakazi BakaJehova owawuseNtshonalanga Berlin kusukela ngoLwesibili kuya kuLwesihlanu, ngoJuly 24 kuya ku-27, 1990, njengoba kwakukhona oFakazi abavela emazweni angu-64 ahlukahlukene.
Ngenkathi kuneMihlangano Yesigodi “Yokuzinikela KuNkulunkulu” ePoland phakathi nehlobo [enhla nenkabazwe] lika1989, kwafika izinkulungwane zezihambeli zivela eRussia naseCzechoslovakia, kodwa kwakunamakhulu ambalwa kuphela avela eMpumalanga Jalimane. Yeka ukuthi isimo sezwe sesiye sashintsha kanjani ngokwezombangazwe kusukela ngalesosikhathi! Kulokhu, izihambeli ezilinganiselwa ku-30 000 ezivela eMpumalanga Jalimane zahlangana noFakazi eOlympia Stadium eNtshonalanga Berlin. Lomhlangano omkhulu wawufana neminye engamakhulukhulu eyayikwezinye izingxenye zomhlaba, ngokuvamile eyaba ngoLwesine kwaze kwaba yiSonto.
Enkulumweni yakhe yokuvula yokwamukela ngoLwesibili, usihlalo walandisa ngendima imihlangano emikhulu eye yayifeza kusukela ngo-1919 ekusizeni oFakazi BakaJehova ukuba bathuthuke ekukhulumeni ulimi oluhlanzekile. Lomhlangano ngokufanayo wawuzosiza bonke abakhona ukuba bathuthuke ekhonweni labo lokukhuluma ulimi oluhlanzekile futhi baphile ngokuvumelana nalo. Wakhumbuza izihambeli ukuthi ngayo kanye indlela yokuzilungisa nokuziphatha kwabo, abantu bakaJehova babonakalisa intuthuko asebeyenzile ekukhulumeni ulimi oluhlanzekile.
“Ulimi Oluhlanzekileyo Lwazo Zonke Izizwe”
Ngokufanelekile, inkulumo eyisihluthulelo yomhlangano yaqokomisa isihloko esishiwo ngenhla. Yayisekelwe kuZefaniya 3:9, lapho uNkulunkulu athembisa khona: “Lapho ngiyakunika abantu izindebe ezihlanzekileyo [“ukushintshela olimini oluhlanzekile,” NW], ukuze bonke babize igama likaJehova, bamkhonze nganhliziyonye.” Ulimi oluhlanzekile luhilela ukuliqonda kahle nokulazisa iqiniso ngoNkulunkulu nezinjongo zakhe. UJehova kuphela ongakunikeza lokhu ngomoya wakhe ongcwele. Ukuthanda iqiniso kumelwe kube amandla ashukumisayo okufunda ulimi oluhlanzekile, olungenakho nokuncane ukungcola kokuziphatha.
Ngaphezu kwalokho, ukukhuluma ulimi oluhlanzekile akuyona nje indaba yokusebenzisa ulwazi oluthile lwamagama. Kunalokho, indlela yethu yokuphila kumelwe ivumelane nalokho okuphuma ezindebeni zethu. Empeleni, isimo sephimbo lethu, ukubonakala kobuso, kanye nokunyakaza komzimba nakho kubalulekile, ngoba kubonisa lokho esiyikho ngaphakathi. Ukuze sihambisane nolimi oluhlanzekile olwandayo, kumelwe sibe nohlelo lokutadisha olungaguquki futhi sibe khona njalo kuyo yonke imihlangano yebandla.
Ukufunda Ulimi Oluhlanzekile
Njengoba inkulumo yangoLwesibili ntambama yagcizelela, ukufunda ulimi oluhlanzekile kusho “Ukuthuthuka Kokuyisisekelo Sithuthukele Ekuvuthweni.” Ukukhula kubalulekile uma sizoqhubeka sithuthuka ngokomoya. Lokho kusho ukusebenzisa wonke amalungiselelo entuthuko engokomoya nokusebenzisa izimiso zeBhayibheli nsuku zonke.
Ukuze sishelele olimini oluhlanzekile, kumelwe ‘Sifundiswe NguJehova,’ okwakuyisihloko sochungechunge ngoLwesine ekuseni. Isikhulumi sokuqala sabonisa indlela lokhu ‘Okwaboniswa Ngayo UJesu Kristu.’ Ukuthi uJesu wafundiswa uJehova kwakusobala emazwini nasezenzweni zakhe. Ngakho sifuna ukumlingisa endleleni afundisa ngayo. Futhi njengoba uJesu azithoba ngaso sonke isikhathi ngaphansi kwentando kaYise, nathi kumelwe senze okufanayo.
Izikhulumi ezintathu ezilandelayo zabonisa ukuthi uJehova ufundisa kanjani ngemihlangano yebandla nemikhulu. Siyazuza kuyo futhi yonke imihlangano yebandla emihlanu akufanele sidebeselele noma yimuphi kuyo. Umhlangano ngamunye ubalulekile entuthukweni yethu engokomoya. UJehova futhi usifundisa ngomhlangano wethu wesifunda, umhlangano wesigodi, nangezinhlelo zemihlangano yosuku olukhethekile. Ukuze sizuze kuyo yonke lena, kumelwe silalelisise bese sikusebenzisa lokho esikufundayo.
Loluchungechunge lwalandelwa inkulumo ethi “Ukuzidela Ngenxa Yesifundo Somuntu Siqu.” Ukuze sisitholele isikhathi, kumelwe silalele iseluleko esikweyabase-Efesu 5:15, 16 sokuba sithengisise isikhathi ezintweni ezingabalulekile kangako.
Umgomo onengqondo wokufunda kwethu ulimi oluhlanzekile uwukuzinikezela nobhapathizo. Leliqiniso laqokonyiswa enkulumweni ethi “Ubhapathizo Lwalabo Abafunda Ulimi Oluhlanzekileyo.” Lolulimi luholela abaningi ekuzinikezeleni nobhapathizo. Nokho, ngemva kwalokho umuntu kumelwe aqhubeke elandela isibonelo sikaJesu ngokushumayela izindaba ezinhle ngentshiseko, embatha ubuntu obusha, futhi azigcine ehlukile ezweni.
Ukudla Okuqinile Okungokomoya
Abeze emhlanganweni bajabula futhi ukuthola ukudla okungokomoya okuqinile okusekelwe ekugcwalisekeni kwezenzakalo ezingokwesiprofetho. NgoLwesine ntambama, izinkulumo ezimbili zazisekelwe ezihlokweni ezithathwe esiprofethweni sikaHezekeli. Eyokuqala, ethi “Inqola KaJehova Yasezulwini Iyaqhubeka,” yachaza isithuthi sasezulwini esikhulu, esikhazimulayo, esesabekayo esihamba ngesivinini sonyazi. Sifanekisela inhlangano kaJehova yasezulwini, leyo uNkulunkulu ayigibela ngomqondo wokuthi uqondisa ngothando ukuhamba kwayo futhi ayisebenzise ekufezeni izinjongo zakhe. UHezekeli ufanekisela insali egcotshwe ngomoya, ikakhulukazi kusukela ngo-1919. “Isixuku esikhulu” siye sazihlanganisa nayo ikakhulu kusukela ngo-1935.—IsAmbulo 7:9.
Inkulumo elandelayo yayinesihloko esithi “Hambisana Nenhlangano Ebonakalayo.” Akukho ukungabaza mayelana nokuthi inhlangano kaNkulunkulu ebonakalayo iyahambisana nenhlangano yakhe yasezulwini enjengenqola. Njengoba kwenza uHezekeli, izinceku zikaJehova namuhla kumelwe zifeze ngokulalela ukuthunywa kwazo okungokwesiprofetho naphezu kokunganaki, ukuhlekwa usulu, noma ngisho nokuphikiswa. Ukungasaleli emuva kuholela ezibusisweni eziningi manje nasekuphileni okuphakade ezweni elisha likaNkulunkulu elisondela ngokushesha.
NgoLwesihlanu ekuseni, ukudla okuqinile okungokomoya kwanikezwa futhi ngezinkulumo ezintathu ezisekelwe kuIsaya isahluko 28. Eyokuqala yazo yabonisa ngokunamandla ukuthi izidakwa ezingokomoya zikaIsrayeli noJuda wasendulo zazifanekisela izidakwa ezingokomoya zeLobukholwa. Futhi njengoba uIsrayeli noJuda bathola izahlulelo zikaJehova ezinzima, kuyoba njalo nangalabo beLobukholwa.
Inkulumo eyalandela, eyayinesihloko esithi “Isiphephelo Sabo—Singamanga!,” yayiphethe lesixwayiso esinamandla: Njengoba nje ukuthembela kukaJuda wasendulo eGibithe kwaba isivikelo esingenalusizo, kuzoba njalo nangokuzihlanganisa kweLobukholwa nemibuso yezombangazwe yosuku lwethu. Inkulumo yesithathu kuIsaya isahluko 28, ethi “Qhubeka Uxwayisa Ngomsebenzi KaJehova Ongavamile,” yayibhekiswe kubantu bakaNkulunkulu. Lokho uJehova azokwenza kweLobukholwa kubizwa ngokufanelekile ngokuthi akuvamile, ngoba kuzolehlela lingazelele ngokuphelele. Namuhla, uJehova ungumqhele wenkazimulo eqenjini elincane lamaKristu agcotshiwe kanye ‘nakwezinye izimvu’ ezingaphezu kwezigidi ezine. (Johane 10:16) Isikhulumi saphetha ngalamazwi ashukumisayo: “Kwangathi intshiseko yethu, ukuzimisela, kanye nokwethembeka kunganikela ekudunyisweni kwaphakade kukaNkulunkulu wethu, uJehova!”
Ukukhuluma Ulimi Oluhlanzekile Kusho Ukubonakalisa Uthando Lobuzalwane
NgoLwesithathu ntambama kwagcizelelwa kwabeze emhlanganweni ukuthi ukukhuluma ulimi oluhlanzekile kusho futhi ‘Ukucabangela Izintandane Nabafelokazi Osizini Lwabo.’ Abafana abangenabo oyise bangasizwa ngokunikezwa ukuqeqeshwa komuntu siqu. Singabonisa ukucabangela ngabafelokazi ngamazwi esikhuthazo anomusa, ngokubahlanganisa emisebenzini yethu yobuKristu nasemibuthanweni, kanye nangokubanikeza usizo lwezinto ezibonakalayo uma befaneleka futhi beswele ngempela. Izingxoxo zabonisa ukuthi lezinto zazenziwa kanjani.
NgoLwesine ntambama, enye inkulumo ethakazelisayo yabonisa “Indlela AmaKristu Anakekelana Ngayo.” OFakazi BakaJehova banomlando omuhle wokunakekelana, ikakhulukazi lapho kugadla izinhlekelele ezinjengeziphepho nokuzamazama komhlaba, lapho kunesidingo sokubhalela iziphathimandla, noma lapho kunezidingo zasendaweni yakubo. Kodwa lapho kuphakama izinkathazo ngenxa yokungapheleli kobuntu, kufanele sisebenzise izimiso ezihilelekile eselulekweni sikaJesu esikuMathewu 5:23, 24 kanye no 18:15-17. Ikakhulukazi lapho kuziwa ezindabeni zebhizinisi phakathi kwabazalwane kunesidingo sokuhloniphana nokuqapha ukuze bobabili umqashi noma umqashwa bangasebenzisi ubuhlobo babo obungokomoya ngobugovu.
Ukukhuluma Ulimi Oluhlanzekile Kusho Ukuqaphela Ukuziphatha Kwethu
Isidingo sokuqaphela ukuziphatha kwethu sagcizelelwa ngokuphindaphindiwe. Ngaleyondlela, isikhulumi sokuqala ngoLwesibili ntambama sakhuluma ngesihloko esithi “Ukuzwa Nokugcina Izwi LikaNkulunkulu.” Sabonisa ukuthi kunezizathu ezimbili eziyinhloko zokuya emihlanganweni emikhulu: ukungenisa ulwazi oluqondile nokushukunyiselwa ukuba senze ngokuvumelana nalololwazi.
Inkulumo yokuqala ngoLwesithathu ekuseni yaphakamisa umbuzo ophenyayo othi “UKristu ‘Wazonda [Ukungabi-namthetho, NW]’—Ingabe Wena Uyakuzonda?” Ukuthanda ukulunga akwanele. Kumelwe futhi sizonde ukungabi-namthetho ukuze sibe nonembeza omuhle, silondoloze ubuhlobo obuhle noJehova, sigweme ukuletha isihlamba egameni lakhe, futhi sigweme ukuvuna izithelo zokungabi-namthetho—ukonakala nokufa.
Inkulumo elandelayo yayihlobene ngokuseduze nalesosihloko, yayinesihloko esithi “Yenqaba Amaphupho Ezwe, Phishekela Izinto Ezingokoqobo ZoMbuso.” USathane, uEva, nezingelosi ezimbi bonke baphishekela amaphupho aholela encithakalweni yabo. Amaphupho ezwe, akhiwa izinto ezibonakalayo noma lezo eziphathelene nezindaba zokuziphatha okubi, aphumela ekudumazekeni uma kungekhona ekoneni okungathi sina. Ukuze simelane nalamaphupho, kumelwe siphishekele izinto ezingokoqobo zoMbuso ngokutadisha, umthandazo, ukuba khona emihlanganweni, nenkonzo yasobala.
Ukuze siphile ukuphila okuqotho kobuKristu, kumelwe futhi silalele iseluleko esanikezwa ngoLwesithathu ntambama enkulumweni ethi “MaKristu—Philani Ngokwemali Eninayo.” Ukwehluleka ukwenza lokhu ngokuqinisekile kuba nemiphumela elimazayo kokubili ngokomzimba nangokomoya. Inkambo yokuhlakanipha iwukuthiba izifiso zomuntu zobugovu ngokungangeni esikweletini esingadingekile nangokuhlela isimiso sokusebenzisa imali esiwusizo bese unamathela kuso. Sidinga ukuhlakulela ukuzinikela kokwesaba uNkulunkulu ngaso sonke isikhathi. Kanye nokwaneliseka, lokhu kuyinzuzo enkulu.—1 Thimothewu 6:6-8.
Ukubaluleka kokuqapha abangane bethu kwaqokonyiswa enkulumweni yangoLwesibili ethi “Ingabe Abangane Bakho Bangabangane BakaJehova?” Abangane bethu kufanele kube amaKristu aye embatha ubuntu bobuKristu futhi ashisekayo emsebenzini wokushumayela. Abangane bezwe abasibo abangane bakaNkulunkulu, futhi ngeke sizihlanganise nabo ngaphandle kokuba sizilimaze thina. Ngisho naphakathi ebandleni, kumelwe sibe abakhethayo uma abangane bethu bezoba abakhayo ngempela.
Iseluleko esingenhla ngokuphathelene nokuziphatha sagcizelelwa ngokucacile yidrama yosuku lwanamuhla. Yayinesihloko esithi “Ukubhekana Nezenzo ZikaDeveli Zobuqili.”
Iseluleko Solimi Oluhlanzekile Emikhayeni
Inkulumo ethi “Bazali—Fezani Izibopho Zenu!” yayidingeka kakhulu. Abazali ngokwabo kumelwe bayazi intando kaNkulunkulu futhi bayenze ngamandla abo onke. Kumelwe futhi bagxilise iZwi likaNkulunkulu kubantwana babo. Ngaphezu kwalokho, akwanele nje ukuya nabantwana emihlanganweni yobuKristu nangaphandle enkonzweni yasensimini. Kumelwe bafundiswe ukuthanda uJehova nokubona ukuhlakanipha kwangempela kokwenza izinto zokwesaba uNkulunkulu.
Kwalandela izinkulumo eziwuchungechunge kwesithi “Umkhaya Osukwini Lwethu.” Isikhulumi sokuqala sabonisa ukuthi umkhaya wavela kuNkulunkulu. Obaba kumelwe kuxhunyanwe nabo kalula ngokuphathelene nezindaba ezingokomoya. Omama kumelwe babe abaphathi bemizi abahle, futhi abantwana kumelwe babonise inhlonipho ngoJehova ngokubambisana nabazali babo.
Isikhulumi esilandelayo sabonisa ukuthi umkhaya ungaphansi ‘Kokuhlaselwa Izitha.’ Ukucindezela kwezomnotho kunezinkathazo zakho. Indawo yokusebenza igcwele izilingo zokwenza okubi, futhi okukhishwa emsakazweni kugcwele ubudlova, ukuziphatha kabi ngokobulili, kanye nokukhanga ngezinto ezibonakalayo. Ukufundisa kumelwe kuqale ngokushesha, futhi kudingeka inkuthalo enkulu ukuze kunqotshwe amathonya ezwe. Amathuluzi angokwasezulwini anikezwa iWatch Tower Society kumelwe asetshenziswe kahle.
Inkulumo elandelayo, eyayikhuluma ‘Ngokulondolozwa [komkhaya] Ungene Ezweni Elisha’ yagcizelela ngokwengeziwe umthwalo wemfanelo ongathi sina abazali abanawo. Ukuqeqeshwa kwabantwana kumelwe kwenziwe ngenkuthalo enkulu kakhulu. Kwanikezwa iseluleko esihle ngokuphathelene nezifundo zeBhayibheli zemikhaya nokuthi yini okumelwe itadishwe, ngenjongo nje yokufinyelela izinhliziyo zabantwana. Kungokwenza lokho kuphela lapho abazali nabantwana bengathemba khona ukulondolozwa bangene ezweni elisha njengomkhaya.
Inkulumo eyanikeza iseluleko esihle ngesimo somkhaya oFakazi abaningi abazithola bekuso yayithi “Ukubhekana Nesimo Sokuphila Emkhayeni Ohlukene.” Labo abasezimweni ezinjalo belulekwa ukuba bangalokothi balahlekelwe ithemba lokuthi ongakholwayo ngelinye ilanga angaba okholwayo. Yiba nesikhathi nomlingane ongakholwayo futhi uqiniseke ukuthi wenza konke okulindeleke kumlingane ongumKristu. Ungathola usizo kubadala noma mhlawumbe kwabanye abasemikhayeni ehlukene.
Ukukhuluma Ulimi Oluhlanzekile Kwabanye
Ngokufaneleke kakhulu, kwabhekiswa ukunakekela okukhulu ekusebenziseni kwethu amathuba okufundisa abanye ulimi oluhlanzekile. Ngakho, ngoLwesithathu ekuseni abeze emhlanganweni bezwa inkulumo yangoLwesithathu ethi “Sebenzisa Isikhathi Sakho Esiyigugu Ngokuhlakanipha.” Ukuze senze lokho kumelwe sihlele izinto eziza kuqala, ngokuvumelana noMathewu 6:33, othi: “Kodwa funani kuqala umbuso kaNkulunkulu nokulunga kwakhe.” Lokho kuhlanganisa ukubekela eceleni isikhathi sesifundo seBhayibheli somuntu siqu, ukuba khona kuyo yonke imihlangano, nokuvama enkonzweni yasensimini. Lokhu kudinga ukuba sithengisise isikhathi emisebenzini engabalulekile kangako nakuba ijabulisa. Izingxoxo eziningana zabonisa ukuthi abanye bakwenza kanjani lokhu.
Akumelwe sikhohlwe nakanye ukuthi singoFakazi BakaJehova. NgoLwesine ntambama, imiboniso eminingana yaligcizelela lelophuzu ngaphansi kwesihloko esithi “Qhubeka Ukhuluma Ulimi Oluhlanzekile Ngazo Zonke Izikhathi.” Lemiboniso yabonisa ukuthi lokhu kungenziwa kanjani ekufakazeni emgwaqweni, ekufakazeni ngokwethukela, nangokusetshenziswa kocingo. Uthando olungenabugovu ngoJehova uNkulunkulu nomakhelwane wethu luyosishukumisela ukuba sikhulume ulimi oluhlanzekile ngawo wonke amathuba.
Inkulumo elandelayo eyayihlobene ngokuseduze nalesihloko yayithi, “Izibusiso Zalabo Abangahoxi.” Ngokuphambene kakhulu neLobukholwa kunenhlangano yomhlaba wonke yokufundisa yoFakazi BakaJehova. Njengabantu ngabanye, kumelwe simelane nakho konke ukucindezela, njengokuphikiswa okungokomthetho, ukungabi nasithakazelo okwandile, kanye nezinkinga ezingokomnotho. Imiboniso esekelwe encwadini ethi Ukubonisana NgemiBhalo yabonisa ukuthi lokhu kucindezela kunganqotshwa kanjani.
Idrama engokweBhayibheli eyayithi Ukwenza Intando KaNkulunkulu Ngentshiseko nayo yayikhuthaza ukushumayela ngentshiseko. Yabonisa indlela uJehu alishisekela ngayo igama likaJehova nokuthi kubaluleke kangakanani ngathi ukuba sibonise isibindi nentshiseko efanayo ngomsebenzi kaNkulunkulu.
Izincwadi Ezakhululwa Emhlanganweni
Kwaba nezincwadi ezimbili ezivelele ezakhululwa ngesiNgisi nangesiJalimane phakathi nomhlangano. Eyokuqala yalezincwadi yethulwa enkulumweni eyayithi “Ukusindisa Ukuphila Kwakho Ngegazi—Kanjani?” Isikhulumi saqale sakhuluma ngezingozi ezihlangene nokumpontshelwa igazi. Saveza ukuthi kunokuningi okungaphendukelwa kukho ngaphandle kwegazi ukuvala indawo yegazi elilahlekile. Kodwa oFakazi BakaJehova abaliyeki igazi ngenxa yokuthi alinampilo kodwa ngenxa yokuthi ukulamukela akungcwele. Abaliyeki, ngenxa yokuthi lingase libe ngelingcolile, kodwa ngenxa yokuthi liyigugu kuNkulunkulu. Igazi elisindisa ngempela ukuphila yigazi elihlengayo likaJesu Kristu. Ekuphetheni isikhulumi sajabulisa zonke izilaleli zaso ngokuveza incwajana engangomagazini enamakhasi angu-32 ethi Igazi Lingakusindisa Kanjani Ukuphila Kwakho?
Incwadi yesibili ebalulekile yakhululwa enkulumweni eyayithi “Funani UJehova Nina-bantu.” Ngokuvamile, abantu abamfuni uNkulunkulu. Ukuba khona kwezinkolo eziningi ezehlukene kubonisa indlela ukufuna komuntu uNkulunkulu okuye kwaphambuka ngayo ngoba uye wangalinaka iZwi likaNkulunkulu. Njengoba kuboniswa imibiko yethu yeSikhumbuzo unyaka ngamunye, izigidi zidinga ukusizwa ukuba zithathe ukuma kwazo ngakuJehova. UIsaya 55:6, 7 ubonisa ukuthi ngempela uJehova unguNkulunkulu onothando nomusa, ozimisele ‘ukwenza ukuthethelela kube kukhulu.’ NjengoFakazi bakhe, siye sanikezwa ulimi oluhlanzekile ukuze sisize abanye ukuba bahlanganyele ekukhonzeni uJehova nganhliziyonye.
Namuhla, abantu bakaJehova babhekene nenselele ngenxa yemibhidlango emikhulu yezakhamuzi. Ngenxa yalokho, abantu bangase bathi bangabezinkolo zazo zonke izinhlobo ensimini yethu. Ukuze sikwazi ukusiza amaHindu, amaBuddha, amaShinto, nalabo bezinye izinkolo eziningi, iNhlangano iye yalungiselela incwadi enhle enamakhasi angu-384 ethi Ukufuna Kwesintu UNkulunkulu. Inikeza ngokunamandla izimfundiso eziyisisekelo zezinkolo eziyinhloko ezingekho kweLobukholwa. Kodwa ibuye ilandelele umlando wenkolo yamanga ngaphakathi kweLobukholwa. Lencwadi ingavula indlela yokuqalisa izifundo zeBhayibheli nabantu abathi bangabezinkolo eziningi ezihlukene.
Inkulumo Yeningi Namazwi Okuphetha
Esithi “Yibani Munye Ngolimi Oluhlanzekile” kwakuyisihloko senkulumo yeningi yangoLwesihlanu. Isikhulumi sabonisa ukuthi nakuba izilimi eziyizinkulungwane ezintathu zinjengemigoqo evimbela ubunye, ulimi oluhlanzekile lungamandla amakhulu ahlanganisayo. Luye lwalondoloza oFakazi BakaJehova emaphutheni aseBabiloni, luye lwabafundisa inhlonipho ngobungcwele bokuphila nobegazi, futhi luye lwabasiza ukuba baphile ngezimiso zeBhayibheli ezibazuzisayo ngokomoya nangokomzimba. Sonke kudingeka sikhuthalele ukufunda nokukhuluma ulimi oluhlanzekile, ngoba yilabo abenza kanjalo kuphela abayosinda eArmagedoni. Asikho isikhathi okumelwe sichithwe ekulaleleni iseluleko esikuZefaniya 2:1-3.
Ngemva kweseluleko esihle esingokomBhalo ngesidingo ‘Sokuba Ngabakuphaphamele Ukuthandaza,’ kweza amazwi okuphetha asekelwe esihlokweni esithi “Ukuhamba Ngokuvumelana Nolimi Oluhlanzekileyo.” Isibalo sabahamba ngokuvumelana nolimi oluhlanzekile manje siyanda ngempela. Futhi ukukhathalela ulimi oluhlanzekile kwaboniswa yilabo ababa khona kulemihlangano ngenhlanzeko yabo, ukuhleleka, nokuvumelana okungokwenhlangano. Izincwadi ezintsha ezinyathelisiwe ezakhululwa zizosiza bonke oFakazi BakaJehova ukuba basakaze ulimi oluhlanzekile ngokuphumelela ngokwengeziwe.
Isikhulumi sokugcina somhlangano sakhumbuza bonke ngesidingo sokukhuthazela. Sabonisa ukuthi ngenxa yalomhlangano, bonke kufanele baqiniswe ekuzimiseleni kwabo ukuqhubekela phambili. Sabe sesiphetha ngalamazwi: “Kwangathi singaqhubeka sihamba ngokuvumelana nolimi oluhlanzekile oluvela ku-Nkulunkulu ukuze sikhazimulise uBaba wethu onothando wasezulwini, uJehova uNkulunkulu, manje naphakade!”
[Ibhokisi ekhasini 6]
Inani eliphakeme lababekhona emhlanganweni eNtshonalanga Berlin lalingu-44 532, futhi kwabhapathizwa abangu-1 018. Kwathatha imizuzu engu-19 ngababezobhapathizwa ukuba baphume ngomugqa eOlympia Stadium, futhi phakathi nalesosikhathi kwakunehlombe elinganqamuki. Kwakunengxenye ekhethekile yezihambeli ezikhuluma isiNgisi. Ezingaba ngu-6 000 zalezi zasizwa sonke isimiso ngolimi lwazo. Kulomhlangano, kwakukhona futhi abangu-4 500 abavela ePoland; phakathi namahora amabili asemini, amalungu eNdikimba Ebusayo anikeza izinkulumo ezimfishane ngokwenzuzo yabo.
[Izithombe ekhasini 24, 25]
1. IOlympia Stadium, eNtshonalanga Berlin
2. Isimiso somhlangano esinyathelisiwe
3. Amabhasi angamakhulu amabili aletha izihambeli ezivela eMpumalanga Jalimane
4. Abeze emhlanganweni basePoland bakujabulela ukwamukela izincwadi ezinyathelisiwe ezakhululwa
5. Imihlobiso yezimbali yagqamisa indawo
6. UA. D. Schroeder, omunye wamalungu eNdikimba Ebusayo esesimisweni eNtshonalanga Berlin