Imibuzo Evela Kubafundi

◼ Kungani ukuhunyushwa kweyesi-2 Petru 1:19 kuyiNew World Translation of the Holy Scriptures kungafani nokwamanye amaBhayibheli?

Egcizelela ukubaluleka kwezwi likaNkulunkulu eliphefumlelwe, umphostoli uPetru wabhala: “Ngalokho sinezwi lesiprofetho elenziwe laqiniseka ngokwengeziwe; futhi nenza kahle ngokuliqaphela njengokungathi isibani esikhanya endaweni emnyama, kuze kuse nekhwezi liphume, ezinhliziyweni zenu.”—2 Petru 1:19, NW.

Phawula ukuthi umushwana othi “kuze kuse nekhwezi liphume” uhlukaniswe ngamakhefana. Izinguqulo eziningi zamaBhayibheli azikwenzi lokhu.

Ngokwesibonelo, uDkt. James Moffatt uhumusha ingxenye yokugcina yalelivesi: “. . . likhanya njengesibani endaweni emnyama; kuze Kuse nekhwezi liphume ezinhliziyweni zenu.” Ukuhumusha okunjengalokhu kuholela embonweni wokuthi ukuphuma kwekhwezi kwenzeka ngaphakathi ezinhliziyweni zabakholwayo, njengalapho beba nohlobo oluthile lokukhanyiselwa okungokomoya.

Nokho, ngisho nasemuva osukwini lukaMose, kwakunesibonakaliso sokuthi ‘kwakuyakuvela inkanyezi kuJakobe.’ (Numeri 24:17; qhathanisa neHubo 89:34-37.) UJesu wazibonakalisa ngokucacile ‘njengenzalo kaDavide, nenkanyezi yokusa ecwebezelayo.’—IsAmbulo 22:16.

Lokhu kubonakaliswa ‘kwekhwezi’ noma “inkanyezi yokusa,” kuyawufanela umongo walokho umphostoli uPetru ayekhuluma ngakho. Wayesanda kubhekisela embonweni wokuguqulwa kwesimo ayewubone cishe eminyakeni engu-30 ngaphambili. (Mathewu 16:28–17:9) Lowombono okhazimulayo wawukhomba esikhathini uJesu ‘ayeyokuza ngaso embusweni wakhe,’ noma akhazinyuliswe emandleni oMbuso. Lokho uPetru akubona kwagcizelela ukubaluleka kwezwi likaNkulunkulu; ngokufanayo, amaKristu namuhla adinga ukuliqaphela lelozwi elingokwesiprofetho.

Nakuba izinhliziyo zesintu sisonke ngalesosikhathi—futhi namanje—zazisebumnyameni, akumelwe kube njalo ngamaKristu eqiniso. Kunjengokungathi anesibani esikhanya kulokho okungabe kumnyama, izinhliziyo zawo. UPetru wayazi ukuthi ngokuqaphela izwi likaNkulunkulu lesiprofetho elikhanyisayo, amaKristu ayeyohlala eqaphile futhi ekhanyiselwe kuze kube ukuntwela kosuku olusha. Lokho kwakuyoba isikhathi lapho “ikhwezi,” noma “inkanyezi yokusa ecwebezelayo,” yayizobusa khona ngokoqobo emandleni oMbuso.

Kuyathakazelisa ukuthi uE. W. Bullinger wabhala ngeyesi-2 Petru 1:19: “Lapha, kuyakhanya ukuthi kumelwe kube nabakaki, ngoba yisiprofetho esingukukhanya okukhanyayo, futhi uKristu nokubonakala kwaKhe yiKhwezi noKusa. Ngokuqinisekile, incazelo ngeke ibe ukuthi sinxuswa ukuba silalele izwi lesiprofetho kuze kube yilapho uKristu esembuliwe ezinhliziyweni zethu! Cha; kodwa kumelwe silalele ngezinhliziyo zethu lelizwi lesiprofetho, kuze kube yilapho ukugcwaliseka kufika ngokubonakala kukaKristu—ukuphuma kwaKhe obizwa ngokuthi ‘iNkanyezi Yokusa.’”—Figures of Speech Used in the Bible, 1898.

Ngokufanelekile, izinguqulo eziningi zeBhayibheli zisebenzisa abakaki kweyesi-2 Petru 1:19.a INew World Translation of the Holy Scriptures igcina uhlelo oluyisisekelo lokuyibeka olutholakala esiGrekini sakuqala. Kodwa isebenzisa amakhefana ukuze yahlukanise umushwana othi “kuze kuse nekhwezi liphume” ekunxuseni kokuqaphela izwi ‘njengokungathi isibani esikhanya endaweni emnyama, ezinhliziyweni zenu.’

[Umbhalo waphansi]