Isizathu Sokuba Ukukhulekela KobuKristu Kube Okuphakeme
Amaphuzu Avelele Avela Encwadini YamaHeberu
UJEHOVA UNKULUNKULU waqalisa izici eziphakeme zokukhulekela lapho ethumela iNdodana yakhe, uJesu Kristu, emhlabeni. Lokho kwakunjalo ngoba uJesu, uMqalisi wobuKristu, uphakeme kunezingelosi nomprofethi uMose. Ubupristi bukaKristu buphakeme kakhulu uma buqhathaniswa nobamaLevi kuIsrayeli wasendulo. Futhi umhlatshelo kaJesu uphakeme kakhulu kunowezilwane ezazinikelwa ngaphansi koMthetho kaMose.
Lamaphuzu enziwe acaca encwadini eya kumaHeberu. Ngokusobala yabhalwa umphostoli uPawulu eRoma cishe ngo-61 C.E. futhi yathunyelwa kwabakholwayo abangamaHeberu eJudiya. Kusukela ezikhathini zangaphambili, amaKristu angamaGreki nawaseAsiya azi ukuthi nguPawulu owayengumbhali wayo, futhi lokhu kusekelwa yikho kokubili ukujwayelana kahle komlobi nemiBhalo yesiHeberu nokusebenzisa kwakhe ukuhlakanipha ekukhulumeni, okufana nokwalomphostoli. Kungenzeka ukuthi akalifakanga igama lakhe ngenxa yokuzondwa kwakhe amaJuda nangenxa yokuthi wayaziwa ‘njengomphostoli wabezizwe.’ (Roma 11:13) Manje ake sibhekisise izici eziphakeme zobuKristu, njengoba zembulwe encwadini kaPawulu eya kumaHeberu.
UKristu Uphakeme Kunezingelosi NoMose
Okuboniswe kuqala isikhundla esiphakeme seNdodana kaNkulunkulu. (1:1–3:6) Izingelosi ziyayikhothamela, futhi ukubusa kwayo kobukhosi kusezandleni zikaNkulunkulu. Ngakho-ke kufanele siqaphelisise lokho okwakhulunywa iNdodana. Ngaphezu kwalokho, kufanele sikhumbule ukuthi ngisho noma uJesu ayengaphansi kwezingelosi, waphakanyiswa waba ngaphezu kwazo futhi wanikwa ukubusa emhlabeni owakhiwe ozayo.
UJesu Kristu futhi uphakeme kunoMose. Kanjani? Phela, uMose wayeyisikhonzi endlini kaNkulunkulu yakwaIsrayeli. Nokho, uJehova wabeka uJesu phezu kwayo yonke leyondlu, noma ibandla labantu bakaNkulunkulu.
AmaKristu Angena Ekuphumuleni KukaNkulunkulu
Ngokulandelayo umphostoli uveza ukuthi kungenzeka ukungena ekuphumuleni kukaNkulunkulu. (3:7–4:13) AmaIsrayeli akhululwa ebugqilini baseGibithe ahluleka ukungena kukho ngoba ayengalaleli futhi entula ukholo. Kodwa thina singangena kulokho kuphumula uma sibonisa ukholo kuNkulunkulu futhi ngokulalela silandela uKristu. Khona-ke, kunokugcina iSabatha lamasonto onke kuphela, nsuku zonke siyojabulela isibusiso esiphakeme sokuphumula kuyo yonke imisebenzi yobugovu.
Ukungena ekuphumuleni kukaNkulunkulu kungesinye isithembiso sezwi lakhe, ‘elibukhali kunezinkemba zonke ezisika-nhlangothi zombili, elihlaba kuze kwahlukaniswe umphefumulo nomoya.’ Lenza kanjalo ngokuthi lingena lihlukanise izisusa nemicabango, lihlukanise izifiso zenyama nesimo sengqondo. (Qhathanisa namaRoma 7:25.) Uma “umphefumulo” wethu, noma ukuphila kwethu ngabanye, kuhlangene ‘nomoya’ wokwesaba uNkulunkulu, noma isimo sengqondo, singangena ekuphumuleni kukaNkulunkulu.
Ubupristi Nesivumelwano Okuphakeme
UPawulu ngokulandelayo ubonisa ukuphakama kobupristi bukaKristu nobesivumelwano esisha. (4:14–10:31) UJesu Kristu ongenasono unesihawu ngabantu abonayo, ngoba uye walingwa njengathi kuzo zonke izici. Ngaphezu kwalokho, uNkulunkulu uye wammisa waba ‘umpristi kuze kube-phakade ngokokuma kukaMelkisedeki.’ Ngokungafani nabapristi abakhulu bamaLevi, uJesu unokuphila okungabhubhi futhi akabadingi abalandeli emsebenzini wakhe wokusindisa. Akudingeki ukuba anikele imihlatshelo yezilwane, ngenxa yokuthi uye wanikela umzimba wakhe ongcono kakhulu ongenasono futhi wayongena ezulwini nenani legazi lakhe.
Isivumelwano esisha, esaqiniswa igazi likaJesu, siphakeme kunesivumelwano soMthetho. Labo abasesivumelwaneni esisha banemithetho kaNkulunkulu ezinhliziyweni zabo futhi bajabulela ukuthethelelwa izono. (Jeremiya 31:31-34) Ukubonga ngalokhu kubashukumisela ukuba bamemezele obala ngethemba labo futhi bahlangane nabakholwa kanye nabo. Ngokungafani nabo, abona ngamabomu abasenawo umhlatshelo wezono.
Ukholo Ludingekile!
Ukuze sizuze esivumelwaneni esisha esiphakeme, sidinga ukholo. (10:32–12:29) Ukukhuthazela nakho kudingekile ukuze sithole lokho okuye kwathenjiswa uJehova. Njengesikhuthazo sokukhuthazela, ‘sinefu elikhulu’ lofakazi abangamaKristu angaphambili elisihaqileyo. Nokho, ikakhulukazi kufanele sicabangele inkambo kaJesu ephelele lapho engaphansi kokuhlupheka. Noma yikuphi ukuhlupheka uNkulunkulu akuvumela ukuba kusehlele kungase kubhekwe njengesiyalo esingathela isithelo esinokuthula sokulunga. Ukwethembeka kwezithembiso zikaJehova kufanele kukhulise isifiso sethu sokunikela inkonzo engcwele kuye ‘ngokumhlonipha nangokuthuthumela.’
UPawulu uphetha ngokuncenga. (13:1-25) Ukholo kufanele lusishukumisele ekuboniseni uthando lobuzalwane, singenise izihambi, sikhumbule abahlushwayo esikholwa kanye nabo, siphathe umshado ngenhlonipho, futhi ‘saneliswe esinakho.’ Kufanele silingise ukholo lwalabo abaholayo ebandleni futhi sibalalele. Ngaphezu kwalokho, kumelwe sigweme ukuhlubuka, sithwale ihlazo elathwalwa uJesu, ‘sinikele njalonjalo kuNkulunkulu umhlatshelo wokubonga,’ futhi siqhubeke senza okuhle. Ukuziphatha okunjalo kungesinye sezici eziphakeme zobuKristu beqiniso.
[Ibhokisi/Isithombe ekhasini 24]
Ukugeza Okunhlobonhlobo: Izici zokukhulekela etabernakele lakwaIsrayeli zaziphathelene “nokudla nokuphuza nokugeza okunhlobonhlobo.” (Heberu 9:9, 10) Lokhu kwakuwukugeza okuyisiko okwakudingwa uMthetho kaMose. Izitsha ezingcolisiwe zazigezwa, futhi ukuhlanza okungokomthetho kwakuhlanganisa nokuwasha izingubo nokugeza umzimba. (Levitikusi 11:32; 14:8, 9; 15:5) Abapristi babegeza umzimba, futhi izinto eziphathelene neminikelo yokushiswa zazihlanjululwa emanzini. (Eksodusi 29:4; 30:17-21; Levitikusi 1:13; 2 IziKronike 4:6) Kodwa ‘ukugeza okunhlobonhlobo’ kwakungahlanganisi ‘ukuhlanza izinkezo, nezinkamba, nezitsha zethusi’ okuyisiko okwakwenziwa amaJuda athile ngesikhathi sokufika kukaMesiya; futhi amaHeberu 9:10 awabhekiseli ekucwilisweni emanzini okwakwenziwa uJohane uMbhapathizi noma ekubhapathizweni kwalabo ababonakalisa ukuzinikela kwabo kuNkulunkulu njengamaKristu.—Mathewu 28:19, 20; Marku 7:4; Luka 3:3.