Jabulisa UJehova Ngokubonisa Umusa
“UJehova ufunani kuwe, kungabi-ngukwenza ukulunga kuphela nokuthanda umusa, uhambe noNkulunkulu wakho ngokuthobeka, na?”—MIKA 6:8.
1. Kungani kungafanele kusimangalise ukuthi uJehova ulindele ukuba abantu bakhe babonise umusa?
UJEHOVA ulindele ukuba abantu bakhe babonise umusa. Lokhu akufanele kusimangalise. UNkulunkulu ngokwakhe unomusa kubo bonke, ngisho nakubantu ababi abangabongi. Ngokuqondene nalokhu uJesu Kristu watshela abafundi bakhe: “Thandani izitha zenu, nenze okuhle, nitsheleke, ningadikibali; nomvuzo wenu uyakuba-mkhulu, nibe-ngabantwana boPhezukonke, ngokuba [unomusa, NW] yena kwabangabongiyo nababi. Yibani-nesihawu, njengokuba uYihlo enesihawu.”—Luka 6:35, 36.
2. Yimiphi imibuzo ngokuqondene nomusa okufanele siyicabangele?
2 Njengoba uMika 6:8 esho, eqinisweni labo abahamba noNkulunkulu kumelwe ‘bathande umusa.’ Ngokusobala, uJehova uyajabula lapho izinceku zakhe zithanda umusa futhi ziwubonisa ngendlela eqotho. Kodwa uyini umusa? Yiziphi izinzuzo eziwumphumela wokuwubonisa? Futhi lemfanelo ingaboniswa kanjani?
Lokho Umusa Oyikho
3. Ubungawuchaza kanjani umusa?
3 Umusa uyimfanelo yokuba nesithakazelo esiphilayo kwabanye. Uboniswa ngezenzo zokusiza namazwi okucabangela. Ukuba nomusa kusho ukwenza okuhle esikhundleni sanoma yini elimazayo. Umuntu onomusa unobungane, umnene, futhi unozwela. Unesimo sengqondo sokuphana nokucabangela abanye. Futhi umusa uyingxenye yendwangu yesambatho esingokomfanekiso somKristu ngamunye weqiniso, ngoba uPawulu wanxusa: “Yembathani ububele benhliziyo, [nomusa, NW], nokuzithoba, nobumnene, nokubhekakade.”—Kolose 3:12.
4. UJehova uye wahola kanjani ekuboniseni umusa esintwini?
4 UJehova uyahola ekuboniseni umusa. Njengoba umphostoli uPawulu asho, ‘kwakuyilapho sekubonakaliswe [umusa, NW] kaNkulunkulu uMsindisi wethu nothando lwakhe kubantu’ lapho “asisindisa” khona “ngokwesihawu sakhe ngesigezo sokuphindukuzalwa nokwenziwa sibe-basha ngoMoya oNgcwele.” (Thithu 3:4, 5) UNkulunkulu uhlanza, noma ‘ugeza,’ amaKristu agcotshiwe egazini likaJesu, esebenzisa inzuzo yomhlatshelo kaJesu wesihlengo kuwo. Futhi enziwa abe masha ngomoya ongcwele, eba “yisidalwa esisha” njengamadodana kaNkulunkulu azelwe ngomoya. (2 Korinte 5:17) Yiqiniso, umusa kaNkulunkulu nothando ngomuntu udlulela ‘nasesixukwini esikhulu’ sezizwe zonke, esiye ‘sahlanza izingubo zaso sazenza zaba mhlophe egazini leWundlu.’ (IsAmbulo 7:9, 14; 1 Johane 2:1, 2) Ngaphezu kwalokho, abagcotshiwe nesixuku esikhulu, esinethemba lasemhlabeni, bonke bangaphansi kwejoka ‘lomusa’ likaJesu.—Mathewu 11:30, qhathanisa neNW.
5. Kungani kufanele silindele ukuba labo abaholwa umoya kaNkulunkulu babonise umusa kwabanye?
5 Umusa futhi uyingxenye yezithelo zomoya ongcwele kaNkulunkulu, noma amandla ayisiphekupheku. UPawulu wathi: “Izithelo zikaMoya ziluthando, nokujabula, nokuthula, nokubekezela, [“nomusa,” NW], nobuvi, nokukholeka, nobumnene, nokuzithiba. Akukho-mthetho omelana nokunjalo.” (Galathiya 5:22, 23) Ngakho, yini okufanele siyilindele kulabo abaholwa umoya kaNkulunkulu? Ngokuqinisekile, bayobonisa umusa kwabanye.
6. Umusa kufanele ubangele abadala namanye amaKristu ukuba basabele ngayiphi indlela?
6 Umusa ungaboniswa ngezindlela eziningi. Sibonisa umusa lapho siba nesihe. Ngokwesibonelo, abadala abangamaKristu babonisa umusa lapho beba nesihe kumenzi wobubi ophendukayo futhi bafune ukumsiza ngokomoya. Imfanelo yomusa abayinikezwe uNkulunkulu yenza ababonisi babe nesineke, bacabangele, babe nesihawu, futhi babe mnene. Ibashukumisela ukuba ‘baphathe umhlambi ngothando.’ (IzEnzo 20:28, 29, NW) Eqinisweni, isithelo somoya somusa kufanele senze wonke amaKristu abe nesihe, isineke, ukucabangela, isihawu, ubungane, kanye nokungenisa izihambi.
Gwema Umusa Oyiphutha
7. Kungani ungathi umusa oyiphutha uwubuthakathaka?
7 Abanye abantu babheka umusa njengobuthakathaka. Banomuzwa wokuthi umuntu kumelwe abe nenhliziyo elukhuni, ngezinye izikhathi abe luhlaza nokuba luhlaza, ukuze abanye bahlabeke umxhwele lapho bebona amandla akhe. Kodwa kuye kwashiwo ngokufanele ukuthi “ukuba luhlaza kuwukuzibonakalisa komuntu obuthakathaka njengokungathi unamandla.” Empeleni, kudinga amandla angempela ukuba ngonomusa ngempela futhi ugweme umusa oyiphutha. Umusa oyisithelo somoya kaNkulunkulu awusona isimo sengqondo esibuthakathaka nesokuyekelela ngasekuziphatheni okungalungile. Kunalokho, umusa oyiphutha uwubuthakathaka obubangela umuntu angakunaki ngamabomu ukona.
8. (a) UEli waba kanjani ngoyekelelayo emadodaneni akhe? (b) Kungani abadala kumelwe baqaphele ukuba bangazivumeli ukuba banqotshwe umusa oyiphutha?
8 Umpristi omkhulu wakwaIsrayeli uEli wayeyekelela ekwelulekeni amadodana akhe, uHofini noFinehasi, ayekhonza njengabapristi etabernakele. Enganelisiwe yingxenye yomhlatshelo ayeyabelwe nguMthetho kaNkulunkulu, athumela inceku ukuba ifune ngenkani inyama eluhlaza kumuntu ohlabayo ngaphambi kokuba amanoni omnikelo ashiswe ealtare. Futhi amadodana kaEli ayeba nobuhlobo bobulili bokuziphatha okubi nabesifazane ababekhonza ngasemnyango wetabernakele. Nokho, kunokuba asuse oHofini noFinehasi esikhundleni uEli wamane wabasola ngomoya ophansi, ehlonipha amadodana akhe ngaphezu kukaNkulunkulu. (1 Samuweli 2:12-29) Yingakho “izwi likaJehova lalingavamile ngalezozinsuku”! (1 Samuweli 3:1) Ngakho abadala abangamaKristu akumelwe bavumele ukunqotshwa ukucabanga okuyiphutha noma babonise umusa oyiphutha ongalifaka engozini ingokomoya lebandla. Umusa weqiniso akwenzeki ungawaboni amazwi nezenzo ezimbi okuphula izindinganiso zikaNkulunkulu.
9. (a) Yisiphi isimo sengqondo esingasisiza ukuba sigweme ukuba sivumele ukunqotshwa umusa oyiphutha? (b) UJesu wawabonisa kanjani amandla lapho esebenzelana nezazi zenkolo eziyizihlubuki?
9 Ukuze sigweme ukubonisa umusa oyiphutha, kumelwe sithandazele usizo lukaNkulunkulu ukuze sibe namandla anjengalawo abonakala emazwini omhubi: “Sukani kimi nina enenza okubi, ngokuba ngiyakugcina imiyalo kaNkulunkulu wami.” (IHubo 119:115) Sidinga futhi ukulandela isibonelo sikaJesu Kristu, ongazange abe necala lokubonisa umusa oyiphutha. Eqinisweni, uJesu wayeyikho kanye ukwenziwa samuntu komusa weqiniso. Ngokwesibonelo, ‘waba nesihe ngabantu ngoba babekhathazekile futhi behlakazeke njengezimvu ezingenamalusi.’ Ngakho-ke, abantu abanhliziyo ziqotho bazizwa bekhululekile ukuya kuJesu, beletha ngisho nabantwana babo abancane kuye. Futhi cabanga nje ngomusa nesihawu asibonisa njengoba ‘ayebagona futhi ebabusisa’! (Mathewu 9:36; Marku 10:13-16) Nakuba uJesu ayenomusa, nokho wayeqinile entweni eyayilungile emehlweni kaYise wasezulwini. UJesu akazange ake angabunaki ngamabomu ububi; wayenamandla ayewanikezwe uNkulunkulu okulahla abaholi benkolo ababengabazenzisi. KuMathewu 23:13-26, wasiphindaphinda izikhathi eziningana lesimemezelo: “Maye kinina-babhali nabaFarisi, bazenzisi.” Isikhathi ngasinye, uJesu wayenikeza isizathu sesahlulelo saphezulu.
Umusa Uhlobene Nothando
10. Abafundi bakaJesu bawubonisa kanjani umusa nothando kwabakholwa kanye nabo?
10 Ngokuqondene nabalandeli bakhe, uJesu wathi: “Ngalokho bonke bayakukwazi ukuthi ningabafundi bami, uma nithandana.” (Johane 13:35) Yisiphi-ke isici esisodwa sothando esiphawula abalandeli bakaJesu beqiniso? UPawulu wathi: “Uthando luyakhuthazela futhi lunomusa.” (1 Korinte 13:4, NW) Ukuba ngabakhuthazelayo nabanomusa kusho ukuthi sibekezelela ukungapheleli nokuhluleka kwabanye, njengoba nje noJehova ekwenza ngomusa. (IHubo 103:10-14; Roma 2:4; 2 Petru 3:9, 15) Uthando lobuKristu nomusa kuyazibonakalisa futhi lapho esikholwa kanye nabo behlelwa ubunzima endaweni ethile emhlabeni. Esabela ngendlela engaphezu kokuba ‘nomusa wobuntu,’ amaKristu akwezinye izindawo abonisa uthando lobuzalwane ngokunikela izinto ezibonakalayo ukuze asize abakhulekeli bakaJehova abanjalo.—IzEnzo 28:2, NW.
11. NgokwemiBhalo, uyini umusa wothando?
11 Umusa uhlobene nothando enkulumweni ethi “umusa wothando,” evame ukusetshenziswa emiBhalweni. Lona umusa ovela othandweni oluqotho. Ibizo lesiHeberu elihunyushwe ngokuthi “umusa wothando” (cheʹsedh) lihlanganisa okungaphezu kokukhathalela kothando. Uwumusa ozinamathelisa ngothando entweni ethile kuze kube yilapho injongo yawo ehlobene naleyonto isifezekile. Umusa wothando kaJehova, noma uthando oluqotho, uboniswa ngezindlela ezihlukahlukene. Ngokwesibonelo, uboniswa ezenzweni zakhe zokukhulula nokuvikela.—IHubo 6:4, NW; 40:11, NW; 143:12, NW.
12. Lapho izinceku zikaJehova zithandazela usizo noma ukukhululwa, yini ezingaqiniseka ngayo?
12 Yingakho nje umusa wothando kaJehova udonsela abantu kuye! (Jeremiya 31:3) Lapho izinceku zikaNkulunkulu ezithembekile zidinga ukukhululwa noma usizo, ziyazi ukuthi umusa wakhe wothando uwuthando oluqotho ngempela, ongeke usilale ekubasizeni. Ngakho, zingathandaza ngokholo, njengoba kwenza umhubi owathi: “Kepha ngiwuthembile umusa wakho [wothando, NW]; inhliziyo yami izakwethaba ngensindiso yakho.” (IHubo 13:5) Njengoba uthando lukaNkulunkulu luqotho, izinceku zakhe azethembeli ngeze emseni wakhe wothando. Lapho zithandazela usizo noma ukukhululwa, ziba nalesiqinisekiso: “UJehova akayikulahla abantu bakhe, nefa lakhe akayikulishiya.”—IHubo 94:14.
Imivuzo Yomusa
13, 14. Kungani umuntu onomusa eba nabangane abaqotho?
13 Lapho zilingisa uJehova, izinceku zakhe ‘zenza umusa [wothando, NW] nobubele, kube-yilowo nalowo kumfowabo.’ (Zakariya 7:9; Efesu 5:1) “Ukuthandwa komuntu kubangwa ngumusa wakhe [wothando, NW],” futhi umuntu obonisa lemfanelo uvuna imivuzo ecebile. (IzAga 19:22) Yimiphi eminye yalena?
14 Umusa usenza sibe namasu futhi kanjalo usisize ukuba silondoloze ubuhlobo obuhle nabanye. Umuntu onamasu usho futhi enze izinto noma abhekane nezimo ezinzima ngezindlela ezinokucabangela nezingacasuli. ‘Umuntu ononya’ ubhekana nokungathandwa, kuyilapho “umuntu [onomusa wothando, NW] wenzela okuhle umphefumulo wakhe.” (IzAga 11:17) Abantu bayamgwema umuntu ononya kodwa badonseleka kobabonisa umusa wothando. Ngakho, umuntu onomusa unabangane abaqotho.—IzAga 18:24.
15. Yimuphi umphumela umusa ongase ube nawo ekhayeni elihlukene phakathi ngokwenkolo?
15 Umfazi ongumKristu onomlingani ongakholwa angase amdonsele eqinisweni likaNkulunkulu ngemfanelo enjengomusa. Ngaphambi kokuba umfazi afunde iqiniso futhi embathe “ubuntu obusha obadalwa ngokwentando kaNkulunkulu ngokulunga nangobuqotho beqiniso,” kungenzeka ukuthi wayengenamusa, elwa nokulwa. (Efesu 4:24, NW) Uma umyeni wakhe wayezazi izaga ezithile, kungenzeka wayevuma kufanele ukuthi ‘ukuxabana komfazi kungukuconsa njalonjalo,’ nokuthi “kungcono ukuhlala ezweni lasehlane kunokuhlala nowesifazane oxabanayo nothethayo.” (IzAga 19:13; 21:19) Kodwa manje ukuziphatha okuhlanzekile komfazi ongumKristu nenhlonipho ejulile, kanye nezimfanelo ezinjengomusa, kungase kusize ekuzuzeleni umlingani wakhe okholweni lweqiniso. (1 Petru 3:1, 2) Yebo, lokhu kungase kube ngomunye umvuzo womusa wakhe.
16. Singazuza kanjani emseni esiwuboniswayo?
16 Umusa esiwuboniswayo ungaba yinzuzo ngokusenza sibe nesihawu futhi sithethelele ngokwengeziwe. Ngokwesibonelo, uma besidinga usizo olungokomoya sase siphathwa ngendlela enomusa nemnene, ingabe lokho bekungeke kusenze sithambekele ngokwengeziwe ekusebenzelaneni nabanye ngendlela efanayo? Eqinisweni, impatho enomusa nemnene ingalindelwa emadodeni afanelekayo ngokomoya, ngoba uPawulu wabhala: “Bazalwane, uma umuntu ehlelwa yisiphambeko, nina-bomoya mbuyiseni onjalo ngomoya wobumnene; uzibheke wena, funa uyengwe nawe.” (Galathiya 6:1) Abadala abamisiwe bakhuluma ngobumnene nangomusa lapho befuna ukusiza abakholwa kanye nabo abonayo. Nokho, kungakhathaliseki ukuthi thina ngokwethu silutholile usizo olunjalo lomusa noma cha, yini uNkulunkulu ayilindele kubo bonke abamkhonzayo? Wonke amaKristu kumelwe abonise umusa kwabanye futhi kufanele alalele iseluleko sikaPawulu: “Maniphathane ngobumnene, nihawukelane, nithethelelane, njengalokho noNkulunkulu wanithethelela ngoKristu.” (Efesu 4:32) Yiqiniso, uma siye sathethelelwa ngothile noma siye sasizwa ebunzimeni obungokomoya ngendlela enomusa, lokhu kufanele kwandise ikhono lethu siqu lokuthethelela, isihawu nomusa.
Yazisa Umusa KaNkulunkulu Ongasifanele
17. Njengoba siyizoni kwasekuzalweni, yimuphi umusa okufanele sibonge ngokukhethekile ngawo?
17 Njengoba sonke sazalwa siyizoni ezilahlelwe ekufeni, kunomusa esidinga ukubonga ngokukhethekile ngawo. Umusa kaJehova uNkulunkulu ongasifanele. Ukuba izoni zikhululwe ekulahlelweni ekufeni futhi kuthiwe zilungile kungumusa ongazifanele ngokuphelele. UPawulu, owakhuluma ngomusa kaNkulunkulu ongasifanele izikhathi ezingu-90 ezincwadini zakhe ezingu-14 eziphefumlelwe ngokwaphezulu, watshela amaKristu aseRoma lasendulo: “Bonke bonile, basilalelwe inkazimulo kaNkulunkulu; [futhi kunjengesipho sesihle ukuba kuthiwe balungile ngomusa wakhe ongasifanele] ngokuhlengwa okukuKristu Jesu.” (Roma 3:23, 24, qhathanisa neNW.) Yeka ukuthi kumelwe siwazise kanjani umusa ongasifanele oboniswa uJehova uNkulunkulu!
18, 19. Singakugwema kanjani ukulahlekelwa yinjongo yomusa kaNkulunkulu ongasifanele?
18 Ngokuba abangenakwazisa, singalahlekelwa yinjongo yomusa kaNkulunkulu ongasifanele. Ngalokhu, uPawulu wathi: “Ngakho singamanxusa kaKristu ngokungathi uNkulunkulu unxusa ngathi; siyanincenga esikhundleni sikaKristu, sithi: Buyisanani noNkulunkulu. Ongasazanga isono wamenza isono ngenxa yethu, ukuze kuyena senziwe sibe-ngukulunga kukaNkulunkulu. Kepha thina esisebenza kanye naye siyanincenga ukuba [ningamukeli umusa kaNkulunkulu ongasifanele bese nilahlekelwa yinjongo yawo]—ngokuba uthi [kuIsaya 49:8]: Ngesikhathi esihle ngikuzwile, nangosuku lwensindiso ngakuhlangulisa; bheka, manje kuyisikhathi esihle kakhulu; bheka, manje kulusuku lwensindiso;—asibekeli-muntu nasinye isikhubekiso nangokukodwa, funa inkonzo yethu isolwe, kepha kukho konke sizibonakalisa njengezikhonzi zikaNkulunkulu.” (2 Korinte 5:20–6:4, qhathanisa neNW.) Wayesho ukuthini uPawulu?
19 AmaKristu agcotshiwe angamanxusa anxusela uKristu, futhi isixuku esikhulu siyizithunywa zakhe. Bebonke banxusa abantu ukuba babuyisane noNkulunkulu ukuze bazuze insindiso. UPawulu wayengafuni ukuba kube khona umuntu owamukela umusa ongasifanele kaJehova uNkulunkulu ngoJesu Kristu abese elahlekelwa yinjongo yawo. Lokho kungenzeka kithi uma sihluleka ukwenza umsebenzi lowomusa ongasifanele oye wasenza sawufanelekela. Ngokuba nobuhlobo obuhle noNkulunkulu njengababuyisene naye, ngeke siwamukelele ize umusa wakhe ongasifanele uma sifeza “inkonzo yokubuyisana, ngokuba uNkulunkulu ekuKristu wenza ukuba izwe libuyisane naye.” (2 Korinte 5:18, 19) Futhi siyobe senzela abanye umusa omkhulu kunawo wonke ngokubasiza ukuba babuyisane noNkulunkulu.
20. Yini esizoyihlola ngokulandelayo?
20 Izinceku zikaJehova zisebenzisa isikhathi sazo namakhono ezenzweni zomusa lapho zifuna ukusiza abantu ngokomoya ngenkonzo yobuKristu. Kodwa yini esingayifunda ezibonelweni ezingokomBhalo zokuboniswa komusa? Ngokulandelayo ake sihlole ezinye zalezi futhi sicabangele nezinye izindlela zokujabulisa uJehova ngokubonisa umusa.
Ubungaphendula Kanjani?
◻ Uyini umusa?
◻ Singakugwema kanjani ukuvumela ukunqotshwa umusa oyiphutha?
◻ Kungani abantu bakaJehova bengathembela emseni wakhe wothando?
◻ Yimiphi eminye imivuzo yomusa?
◻ Kulapho senzani lapho singeke silahlekelwe khona yinjongo yomusa kaNkulunkulu ongasifanele?
[Isithombe ekhasini 13]
Umusa wenza ukuba abadala abangamaKristu babe nesineke, bacabangele, futhi babe nesihawu
[Isithombe ekhasini 15]
Umusa womfazi ongumKristu ungase usize ekuzuzeleni umlingani wakhe okholweni lweqiniso
[Isithombe ekhasini 17]
Singenzela abanye umusa omkhulu kunawo wonke ngokubasiza ukuba babuyisane noNkulunkulu