Ingabe Inkonzo Ongayenza?

UJEHOVA uye wabonisa ukuphana kwakhe ngokulungiselela umhlaba ngokuphelele ukuze sijabulele ukuphila. Ngokuphana wavumela lamalungiselelo ukuba ahlale ekhona ngisho nangemva kokuhlubuka kuka-Adamu noEva. Ngaphezu kwalokho, uye wabonakalisa uthando lwakhe olukhulu ngokuthumela iNdodana yakhe ukuba ikhulule abantu abakholwayo enhlekeleleni yesono.—Mathewu 5:45; Johane 3:16.

Singasabela kanjani othandweni olunjalo? UJesu wathi kumelwe sithande uJehova uNkulunkulu wethu ngayo yonke inhliziyo yethu, umphefumulo, ingqondo, namandla. Lokhu kusikisela ukuthi simkweleta ukumkhulekela nokwethembeka nokuthi kufanele siphile ukuphila kwethu ngokuvumelana nentando yakhe.—Marku 12:30; 1 Petru 4:2.

Kodwa yini ehilelekile ekwenzeni intando kaNkulunkulu? Ingabe ikhona inkonzo esingayinikela kuye—inkonzo okufanele sihlanganyele kuyo?

Indingeko Yezikhonzi

Amasonto aye abadida abantu ngokuqondene nendlela yokukhulekela nokukhonza uNkulunkulu. Nokho, iBhayibheli libonisa ukuthi kunenkolo eyodwa kuphela yeqiniso, “yinye iNkosi, yinye inkolo, munye umbhapathizo; munye uNkulunkulu, uYise wabo bonke.” UJesu wathi: “Abakhulekayo abaqinisileyo bayakukhuleka kuBaba ngomoya nangeqiniso.” Ngakho belulekwa: “Nikhulume-zwilinye nonke, kungabikho ukwahlukana phakathi kwenu.”—Efesu 4:3-6; Johane 4:23; 1 Korinte 1:10.

Ukudideka ngokuthi iyini inkolo yeqiniso kwaqala e-Edene lapho uSathane ebekela ukulunga kobubusi bukaJehova inselele ngokungabaza indlela kaNkulunkulu yokubusa. (Genesise 3:1-6, 13) USathane manje usekela lokhu kuphikisa uNkulunkulu ngezimfundiso zamanga ezisakazwa yizikhonzi zenkolo ezingabakhohlisi ‘eziziguqula izikhonzi zokulunga.’ Ngakho iBhayibheli lithi: “Bathandekayo, maningakholwa yibo bonke omoya, . . . ngokuba baningi abaprofethi bamanga abaphumele ezweni.”—2 Korinte 11:14, 15; 1 Johane 4:1.

Ngokujabulisayo, uNkulunkulu uye wathatha izinyathelo zokuxazulula lempikiswano yobubusi. Njengoba athumela iNdodana yakhe ukuba ihlenge isintu, manje useye wenza uJesu iNkosi yoMbuso kaNkulunkulu wasezulwini, enegunya lokubhubhisa uSathane nabaprofethi bakhe, noma izikhonzi. Lokhu kuyoqinisekisa ukuthi intando kaNkulunkulu iyenziwa emhlabeni, kube isibusiso saphakade kubantu abalalelayo.—Daniyeli 7:13, 14; Heberu 2:9.

USathane uye wawasitha lamaqiniso. (2 Korinte 4:4) Ngaleyondlela, kunesidingo sokuba sikhonze njengezikhonzi zikaNkulunkulu, sembule amanga kaSathane futhi sifakazele iqiniso. UJehova akasiphoqeleli ukuba singenele lenkonzo. NjengoJesu, ufuna sizinikele ngokuzithandela sishukunyiswa ukwazisa ngaye nangalokho asenzele khona.—IHubo 110:3; Heberu 12:1-3.

Inkonzo YobuKristu

UJesu ‘wahamba imizi nemizana eshumayela ememezela ivangeli lombuso kaNkulunkulu.’ (Luka 8:1) Waqeqesha nabafundi bakhe ukuba babe izikhonzi njengaye wayesebathuma ukuba bayoshumayela. (Mathewu 10:1-14, 27) Kamuva, wabathuma ukuba baqhubeke nalenkonzo kuze kube semikhawulweni yomhlaba.—Mathewu 28:19, 20; IzEnzo 1:8.

Lokhu kuthunywa kusemahlombe amaKristu eqiniso, futhi umoya kaNkulunkulu uwashukumisela ukuba ashumayele. Njengoba kwenzeka ngePentekoste lika-33 C.E., bonke labo abamukela izindaba ezinhle baba nomthwalo wemfanelo wokumemezela ukholo lwabo obala.—IzEnzo 2:1-4, 16-21; Roma 10:9, 13-15.

Nokho, abantu abaningi abaziboni bengaba yizikhonzi. UPeter, omunye woFakazi BakaJehova, uthi: “Amadoda eJalimane ngokuvamile akubheka njengokuzehlisa isithunzi ukukhuluma ngenkolo. Athi, ‘Kumelwe kwenziwe abefundisi.’” NgokukaTony, oye waba isithunywa sevangeli amashumi amaningi eminyaka, abantu eNgilandi baye bathi: “Lokho okushoyo kuhle, futhi ngicabanga ukuthi oFakazi BakaJehova bangabantu abakahle. Kodwa ukuhamba endlini ngendlu ngishumayela—ngeke ngikwenze lokho.” UBen watadisha iBhayibheli okwesikhashana nendoda yaseNigeria eyathi kuye: “Ngeke ngizibonakalise obala ngishumayela endlini ngendlu; kodwa nginganikela ngemali ebandleni lenu ukuze isize labo abathandayo ukukwenza lokho.” Yebo, abantu abaningi bantula ukholo nokuzinikela okudingekayo enkonzweni yobuKristu.

Nakuba kunjalo, ukushumayela obala kuwumthwalo wemfanelo wabo bonke ebandleni lobuKristu, kungakhathaliseki ubudala noma ubulili. Akukhona okwabadala noma izinceku ezikhonzayo kuphela, ‘abaholayo,’ kodwa futhi kungokwamaKristu ewonke. Wonke ayanxuswa: “Masinikele njalonjalo kuNkulunkulu ngaye umhlatshelo wokubonga, okungukuthi isithelo sezindebe ezivuma igama lakhe. . . . Lalelani abaniholayo.”—Heberu 13:15, 17.

Ekhuluma nesixuku sabantu abahlukahlukene eNtshumayelweni yakhe yaseNtabeni, uJesu wathi: “Asibo bonke abashoyo kimi ukuthi: Nkosi, Nkosi, abayakungena embusweni wezulu, kuphela owenza intando kaBaba osezulwini.” Kwesinye isenzakalo wabonisa ukuthi ukwenza intando kaYise kuhlanganisa nokushumayela kwabangakholwayo. Abafundi bakhe babemncenga ukuba ayeke ukushumayeza amaSamariya athile ukuze akwazi ukudla, kodwa wathi: “Ukudla kwami kungukwenza intando yongithumileyo, ngifeze umsebenzi wakhe.”—Mathewu 7:21; Johane 4:27-38.

Ingabe Kufanele Ibe Inkambo Yakho Yokuphila?

Abantu ngokuvamile bakhetha ukuphishekela ukudla nengcebo ebonakalayo. Kodwa ngaphambidlana eNtshumayelweni yaseNtabeni, uJesu weluleka izilaleli zakhe ngokuphishekela izinto ezinjalo ngokulangazela. “Kepha,” esho, “zibekeleleni ingcebo ezulwini . . . Funani kuqala umbuso kaNkulunkulu nokulunga kwakhe.”—Mathewu 6:20, 33.

Ukufuna uMbuso kuqala kusho ukungavumeli ezinye izithakazelo ukuba zisithe inkonzo yethu. Nokho, ukwenza lokhu akusho ukubekela yonke into eceleni. Ngokwesibonelo, iBhayibheli lisikhuthaza ukuba singazidebeseli izibopho zangempela zomkhaya. Sinezibopho ezinjalo njengabo bonke abantu. Ukuzidebesela kuwukwenza ngendlela ephikisanayo nokholo lobuKristu. (1 Thimothewu 5:8) Nakuba kunjalo, sonke kumelwe senze konke esingakwenza enkonzweni kuyilapho sisingatha eminye imithwalo yemfanelo ngendlela yokulinganisela.

UJesu wathi: “Lelivangeli lombuso liyakushunyayelwa . . . kube-ngubufakazi ezizweni zonke, andukuba kufike ukuphela.” (Mathewu 24:14) Umongo walesosiprofetho ugxilisa ukugcwaliseka kwaso osukwini lwethu. Kusukela ngo-1914 izindaba ezinhle ziwukuthi uMbuso unikezwe amandla okuthatha isinyathelo ngenxa yobukhosi bukaJehova nangokumelene noSathane nezwe lakhe. (IsAmbulo 11:15-18) Kufanele sikucabangele ngokungathi sína okushiwo yilokhu. Isiphelo sizofika, futhi umsebenzi wokushumayela kumelwe siwuqede ngaphambi kokuba sifike. Ukuphila kwabantu kusengozini; singasiza ukuba kusindiswe abaningi babo.

Zenze Ufanelekele Inkonzo Egcwele Ngokwengeziwe

Iningi loFakazi BakaJehova linikela amahora ayishumi noma ngaphezulu inyanga ngayinye ekuhlanganyeleni izindaba ezinhle nabanye. Izinkulungwane zichitha amahora amabili noma ngaphezulu ngosuku ekushumayeleni njengamaphayona asizayo, futhi ezinye zikhonza ngokuqhubekayo njengamaphayona avamile nakhethekile. Ziyakuqaphela ukuphuthuma kwalomsebenzi futhi zifuna ukuba nengxenye egcwele ngangokunokwenzeka ekuwufezeni ngaphambi kokuba kufike isiphelo salelizwe elingajabuli.

Ingabe usunguFakazi kaJehova okhuthele kakade? Khona-ke zenze ufanelekele ingxenye egcwele ngokwengeziwe enkonzweni. Thuthukisa ikhono lakho ekushumayeleni nasekufundiseni, uzame ukufeza okwengeziwe enkonzweni. Uma usesimweni sokuba yiphayona, yiba yilo. Uma izimo zingakuvumeli ngempela, khona-ke khuthaza labo abangase bakwazi ukuba bazenze bafanelekele lenkonzo.

Uma ungeyena uFakazi kaJehova ozinikezele, ungalokothi uthi inkonzo ayikulungele. Enye indoda ethiwa nguPeter, engunjiniyela wemishini, yaphikisana kakhulu nokuhlanganyela komkayo izindaba ezinhle nabanye. “Umkami angahamba kanjani eshumayela endlini ngendlu?” ibuza. Ngemva kweminyaka eminingi iqaphela ukuzinikela kwakhe ngokuqondene neqiniso leZwi likaNkulunkulu, nayo yanquma ukutadisha iBhayibheli. Manje, njengomkayo, isiyisikhonzi esizinikezele, esibhapathiziwe sezindaba ezinhle.

Ngakho ungazincishi ilungelo lokukhonza uJehova. Sikukhuthaza ukuba utadishe iBhayibheli futhi uhlanganyele namaKristu eqiniso emihlanganweni yawo. Lokhu kuyokusiza ukuba uvumelanise ukuphila kwakho nokulunga kukaNkulunkulu futhi wakhe ukholo oluqinile ezinjongweni zakhe. Uma uthuthuka kulokhu, nawe uyofanelekela ukuba isikhonzi sikaNkulunkulu. Khona-ke uyoba nelungelo lokuhlanganyela ekufezeni lomyalo kaJesu: “Ngalokho hambani nenze . . . abafundi . . . nibafundise konke enginiyalé ngakho.”—Mathewu 28:19, 20.

Yebo, ikhona inkonzo ongahlanganyela kuyo, futhi kuyaphuthuma kunanini ngaphambili ngawe ukuba uhlanganyele kuyo.

[Ibhokisi ekhasini 25]

Umhlengikazi onomkhaya okumelwe awunakekele uthi: “Ngihamba isikhathi esingaphezu kwehora elilodwa nsuku zonke ukuya esibhedlela lapho ngisebenza khona, ngakho ngacabanga ukuthi ngeke ngikwazi ukuba iphayona elisizayo. Kodwa ngahlela imisebenzi yami ngokucophelela ukuze ngihlanganyele njalo enkoznweni yasensimini kusesekuseni kakhulu ngaphambi kokuba ngiye emsebenzini, ngesikhathi sekhefu, nangezinsuku engingasebenzi ngazo. Ungacabanga nje ngenjabulo engaba nayo lapho ngithola ukuthi ngemva kwenyanga eyodwa kuphela, ngangichithe amahora angu-117 ekushumayeleni! Ngahambisa omagazini abangu-263, izikhokhelo ezingu-22 zomagazini futhi ngakwazi ukuqalisa izifundo zeBhayibheli ezintathu.”

[Ibhokisi ekhasini 27]

UMichael unabantwana abayisikhombisa abasebancane, futhi unomsebenzi onomthwalo wemfanelo ekolishi elithile eNigeria. Futhi ungumdala ebandleni lobuKristu. Unombono ofanayo nowezinkulungwane zoFakazi:

“Ngibheka inkonzo njengenkambo yami yokuphila futhi ngikhumbula njalo ukuthi uPawulu wathi: ‘Mina ngatshala, uApholo wanisela kodwa uNkulunkulu wakhulisa konke.’ Mina nomkami ‘siyatshala’ phakathi nokuxoxa kafushane ngezindaba ezinhle endlini ngendlu. ‘Siyanisela’ ngokuphindela kulabo ababonisa isithakazelo ukuze sibafundise ngokusuka eBhayibhelini, njengoba uJesu athi senze. Izifundo zeBhayibheli zasekhaya zamasonto onke ziye zasiza inani elikhulu—kwezinye izimo kube umkhaya wonke—ukuba lifinyelele olwazini lweqiniso.”