Ukuvuna Abakhulekeli
UMPHOSTOLI uJohane wanikezwa umbono wezenzakalo ezishukumisa izwe ezaziyokwenzeka “ngosuku lweNkosi.” Wabona iNkosi yasezulwini uJesu Kristu igibele iya empini yokulunga, efanekiselwa yihhashi elimhlophe—“engonqobayo nokuyakunqoba.” Into yokuqala ayenzayo iwukukhipha isitha esikhulu sikaNkulunkulu, uSathane, emazulwini asilahlele kulomhlaba. USathane usabela ngokuhlupha isintu ngokubulala, indlala, nezifo, okungakaze kube khona ngaphambili, okufanekiselwa abagibeli abangokomfanekiso namahhashi abo—elibomvu, elimnyama, nelimpofu. (IsAmbulo 1:10; 6:1-8; 12:9-12) Labomaye baqala ukuzwakala ngo-1914 futhi baye banda kusukela ngalesosikhathi. Ngokushesha, bayolethwa emvuthwandaba yilokho uJesu akuchaza ngokuthi “usizi olukhulu olungazange lube-khona kwasekuqaleni kwezwe kuze kube-manje nolungasayikuba-khona.”—Mathewu 24:3-8, 21.
Abakhulekeli bakaJehova bayophumelela kanjani ngalesosikhathi? Incwadi yesAmbulo isahluko 7, amavesi 1 kuya ku-10, ikhuluma ngamandla ezingelosi ‘abambe’ imimoya yembubhiso kuze kube yilapho labakhulekeli sebebuthelwe ndawonye. Phakathi nenkathi eyaqala ngo-1914, kubuthelwa ndawonye abokugcina bakaIsrayeli ongokomoya abasemhlabeni, abangu-144 000. Khona-ke ‘bheka, isixuku esikhulu ebesingenakubalwa-muntu, sivela kuzo zonke izizwe, nemindeni, nabantu, nezilimi.’ Lesixuku esikhulu kakade sesibalelwa ezigidini. Siyamukeleka phambi kwesihlalo sobukhosi sikaNkulunkulu ngoba sibonisa ukholo egazini elihlengayo likaJesu, owabulawa njengewundlu elingenacala. “[Si]memeza ngezwi elikhulu, sithi: Insindiso ngekaNkulunkulu wethu ohlezi esihlalweni sobukhosi neyeWundlu.” Labakhulekeli abashisekayo bayaqhubeka bethi “Woza!” nakwabanye, nabo ababuthelwa ndawonye ukuba basindiswe phakathi ‘nosizi olukhulu.’—IsAmbulo 7:14-17; 22:17.
“Emhlabeni Wonke”
Ngalabakhulekeli abazinikele, kungathiwa: “Izwi labo liphumele [lizwakele, NW] emhlabeni wonke, nokusho kwabo kuyé nasemikhawulweni yelakhiweyo.” (Roma 10:18) Umsebenzi wabo abawenza ngokuzikhandla uye wabusiswa ngezithelo eziphawulekayo. Ngokwesibonelo:
IMexico manje ibika abakhulekeli bakaJehova abakhuthele abangu-335 965, ukwanda cishe ngezinkulungwane eziyikhulu eminyakeni emithathu nje! Kungani kunokwanda okukhulu kangaka? Ukulandisa okulandelayo kungase kusize ekuchazeni. Insizwa ethiwa uAurelio yayinakekela impahla engcwele esontweni lamaKatolika. Njalo uma oFakazi BakaJehova beza kulelodolobhana, yayishaya izinsimbi zesonto ukuze yenze kungabikho muntu obalalelayo. Ngokuhamba kwesikhathi yathenga iJerusalem Bible yamaKatolika futhi yaqala ukuyifunda, kodwa ayizange iyiqonde. Khona-ke ngolunye usuku yabona umngane wayo egodle ikhophi yeNew World Translation ekhwapheni. UAurelio wathethisa umngane wakhe, emtshela ukuthi leliBhayibheli lakhe lalinamanga, wamyisa ekhaya lakhe ukuze ambonise iBhayibheli “langempela.” Umngane wakhe wathi: “Funda uEksodusi 20,” wayeseyahamba.
Eqala ngesahluko 1, lomuntu onakekela impahla engcwele yesonto wayifunda yonke incwadi kaEksodusi waze wafika esahlukweni 20, amavesi 4 no-5. Lokho iBhayibheli lakhe lamaKatolika elalikusho ngezithombe kwamethusa. Ngemva kweMisa ngeSonto elilandelayo, waya kumpristi nalemibhalo ekhuluma ngezithombe. Ekuqaleni lompristi wathi naye ngokwakhe wayemane nje ezihlonipha izithombe; wayengazikhulekeli. Lapho ebona ukuthi lokhu kwakungamanelisi uAurelio, lompristi wambeka icala lokufunda noFakazi BakaJehova. UAurelio wakuphika lokhu kodwa wanezela, “Manje sengizofunda nabo!”
Ngokulandelayo lapho oFakazi beza kulelidolobhana, uAurelio wathintana nabo futhi waqala ukutadisha iBhayibheli kanye nabo. Wayeka ukusebenza esontweni futhi ezinyangeni ezintathu wakufanelekela ukuhlanganyela enkonzweni yasobala noFakazi BakaJehova. Ikhaya lokuqala alihambela kwakungelalowampristi, ongakukholelwanga ayekubona lapho ebona umuntu owayenakekela impahla engcwele yesonto esengumshumayeli woMbuso. Lompristi wamsongela ngokuthi uzoxoshwa esontweni, kodwa uAurelio wamtshela ukuthi lokhu kwakungeke kudingeke njengoba kakade wayeselishiyile isonto. Inkambo yakhe yesibindi yakhuthaza abaningi kulelidolobhana abase befunda kakade noFakazi BakaJehova. UAurelio kanye nabanye abangu-21 bakulelidolobhana babhapathizwa emhlanganweni wesigodi owalandela. Ukwanda kulendawo kushesha kakhulu kangangokuba kwatholakala umdala oyedwa kuphela owayezobukeza naleliqembu imibuzo yabazobhapathizwa.
‘Izwi Labo Lizwakele’
Ayikho indlela yokubalekela ukushunyayelwa koMbuso. UmKatolika othile ongumNtaliyane wayevame ukucasuka njalo lapho oFakazi BakaJehova bemvakashela. Ngakho lapho inkampani ayeyisebenzela imthumela eSingapore, waba nomuzwa wokuthi ekugcineni babengeke besamhlupha. Kodwa wamangaliswa ukuthi oFakazi babekhona nalapho. Ngakho wathola izinja ezimbili ezinolaka ukuze zihlasele oFakazi ababezofika ngokulandelayo. Lapho oFakazi ababili befika ekhaya lakhe, kwaqhamuka lezozinja. Bethukile, laba besifazane ababili babaleka beziphephisa, bethatha izindlela ezihlukene empambanweni yemigwaqo. Njengoba enye yalezizinja yayimfica, omunye walaboFakazi eselahle ithemba wakhipha izincwajana ezimbili esikhwameni sakhe wazihlohla emlonyeni wenja owawukhamisile. Ngemva kwalokhu, yayeka ukumjaha, yajika, yaphindela ekhaya.
Ngesonto elilandelayo, bona laboFakazi ababili babenza impindelo endlini engaphesheya komgwaqo. Umnini-zinja wayesengadini, futhi, ngokumangalisayo, wabingelela laba besifazane wayesebamema ukuba bangene endlini yakhe. Wabatshela ukuthi wayengakaze akhulume noFakazi BakaJehova noma afunde noma iyiphi yezincwadi zabo. Kodwa wayemangazwe ukuthola izincwajana emlonyeni wenye yezinja zakhe. Ngalokho kuhlwa wazifunda lezincwajana futhi zazimhlabe umxhwele ngempela. Nakuba ayengumKatolika kukho konke ukuphila kwakhe, wazwakalisa isifiso sokutadisha iBhayibheli noFakazi BakaJehova.
Njengoba lendoda yayishintshelwa emuva eItaly, kwenziwa amalungiselelo okuba oFakazi BakaJehova bafunde nayo lapho. Njengoba yona nomkayo babeqala ukuba khona emihlanganweni, umfundisi ophethe isifunda weza kubo ethukuthele ezobasongela. Lapho othile ethungela ingadi yawo ngomlilo, lombhangqwana wanqamula bonke ubuhlobo bawo nesonto. Lendoda manje ithi: “Kakade sengiye ngafakaza kumalungu amaningi omkhaya wakithi ngoba ngifuna ukuwazisa ukuthi uJehova uwukuphela kukaNkulunkulu weqiniso.”
“Emikhawulweni Yelakhiweyo”
Okunye okuhlangenwe nakho okuvela emkhawulweni womhlaba kubonisa indlela isigijimi soMbuso esaziswa nesisiza ngayo ekuguquleni ukuphila. Lapho eya emakilasini angaphambi kokubeletha, uFakazi othile eAustralia wahlangana nowesifazane owayenemikhuba eminingi emibi, owayenqaba ngisho nokuyeka ukubhema phakathi nesikhathi sakhe sokukhulelwa. LoFakazi wayephazamiseke kakhulu ngesimo sengqondo salowesifazane. Kwenzeka ukuthi babelethe ngesikhathi esifanayo nasegunjini elilodwa, ngakho baba nethuba lokuxoxa. Kwacaca ukuthi lowesifazane wayebe nezinkinga eziningi ebuntwaneni, futhi manje umshado wakhe wawusuzowohloka. Ngakho, ngemva kokuphuma esibhedlela, loFakazi wavakashela lowesifazane futhi waqalisa isifundo seBhayibheli naye, esebenzisa incwadi ethi Ukwenza Ukuphila Komkhaya Wakho Kujabulise.
Umyeni walowesifazane wayelokhu ethandaza kuNkulunkulu ecela ukuba athole inkolo yeqiniso, enezela lombandela: “Uma nje kungebona oFakazi BakaJehova!” Nokho, lapho ezwa ukuthi umkakhe wayefunda noFakazi, waqala ukubuza imibuzo futhi wamenywa ukuba ahlanganyele esifundweni. Wakwenza lokhu, futhi ngokushesha waqala ukuba khona emihlanganweni yebandla. Manje, bobabili lendoda nomkayo baye babhapathizwa, futhi ngokusobala isimo sabo somshado siye sathuthuka kakhulu.
Izifundo zeBhayibheli zasekhaya ezisekelwe ezincwadini ezinjalo ziye zaphumela ekubuthelweni ndawonye kwabakhulekeli abaningi abasanda kuthakazela. Emazweni lapho oFakazi BakaJehova kuye kwadingeka khona ukuba babhekane nokuvukela, impi yangaphakathi, noma imithetho evimbelayo yohulumeni, uye wanda umsebenzi wokuqhuba izifundo zeBhayibheli zasekhaya. Impi yangaphakathi yadlanga eAngola iminyaka eminingi, futhi oFakazi babhekana noshushiso olukhulu nobunzima. Ekuqaleni konyaka odlule, imibiko ibonisa ukuthi, ngokwesilinganiso, ummemezeli ngamunye wayeqhuba cishe izifundo zeBhayibheli zasekhaya ezintathu, kodwa abamemezeli babenezincwadi zeBhayibheli ezimbalwa. Ababonisi abajikelezayo babekhonza iqembu elincane usuku ngalunye, behlela inkonzo yasensimini phakathi nosuku kanye nemihlangano kusihlwa. Yeka injabulo eyaba khona lapho iziphithiphithi ziphela futhi kufika amathani angu-42 ezincwadi zeBhayibheli ezazidingeka kakhulu evela eNingizimu Afrika! Ngokuqinisekile, uthando lwalabo bazalwane ‘luzovama kakhulu njalo ekwazini nasekuqondeni konke,’ njengoba manje sebekwazi “ukuqiniseka ngezinto ezibaluleke kakhulu.” (Filipi 1:9, 10, qhathanisa neNW.) Yeka isikhuthazo okuyiso ngalabo abanezincwadi eziningi ezisiza ekutadisheni iBhayibheli sokuba balisebenzise ngokugcwele ilungiselelo elenziwa uJehova ngomusa ongaka!—1 Thimothewu 4:15, 16.
Injabulo yalabakhulekeli abathembekile isikhumbuza amazwi kaJesu awasho eNtshumayelweni yaseNtabeni: “Bayajabula abaqaphela isidingo sabo esingokomoya, ngoba umbuso wezulu ungowabo. . . . Bayajabula abaye bashushiswa ngenxa yokulunga, ngoba umbuso wezulu ungowabo. . . . Jabulani nithokoze ngoba umvuzo wenu mkhulu ezulwini.” (Mathewu 5:3-12, NW) Yeka isivuno esesibuthiwe kakade eAngola!
Kwezinye izindawo zomhlaba, imithetho evimbelayo ebekwe emsebenzini woFakazi BakaJehova nayo iyaxegiswa noma isuswe. UJesu wathi osukwini lwakhe: “Ukuvuna kukhulu, kodwa izisebenzi ziyingcosana.” (Mathewu 9:37) Yeka indlela lokhu okuyiqiniso ngayo namuhla! Isidingo sezisebenzi ezengeziwe sihlala sikhona. Siyajabula ngokuthi ukukhulekela kwethu kuhilela ukuqoqa isivuno. Ayikho injabulo enkulu engatholakala emhlabeni namuhla kunenkonzo yethu enomvuzo eyenzelwa uJehova uNkulunkulu.
Nokho, yini lena eshukumisela abakhulekeli bakaJehova ukuba babonise injabulo enjalo nentshiseko? Sizobona.