‘Yenza Ukuthuthuka Kwakho Kuqhame’
“Kuthé sengiyindoda, ngayeka okobuntwana.”—1 KORINTE 13:11.
1. Ukukhula kukufakazela kanjani ukuba isimangaliso kwendalo?
KUSUKELA eqandeni elincane kangangokuba lingabonakala ngesibona-khulu kuphela, umkhomo ungakhula ube isidalwa esinobude obungamamitha angaphezu kwangu-30 futhi ube nesisindo esingamathani angaphezu kwangu-80. Ngokufanayo, kusukela kwenye yezimbewu ezincane kakhulu, igiant sequoia ingakhula ibe nobude obungamamitha angaphezu kwangu-90. Yiqiniso, ukukhula kungesinye sezimangaliso zokuphila. Njengoba umphostoli uPawulu akubeka, singatshala futhi sinisele, kodwa “uNkulunkulu okhulisayo.”—1 Korinte 3:7.
2. Luhlobo luni lokukhula olwabikezelwa eBhayibhelini?
2 Nokho, kukhona olunye uhlobo lokukhula nalo olumangalisa ngendlela efanayo. Yilolo olwabikezelwa umprofethi uIsaya: “Omncane uyakuba-yinkulungwane, ophansi abe-yisizwe esinamandla; mina nginguJehova, ngiyakukusheshisa ngesikhathi sakho.” (Isaya 60:22) Lesiprofetho siphathelene nokwanda kwabantu bakaNkulunkulu, futhi sithola ukugcwaliseka okukhulu osukwini lwethu.
3. Umbiko wonyaka wenkonzo ka-1991 wakubonisa kanjani ukuthi uJehova usheshisa umsebenzi wabantu bakhe?
3 Umbiko wonyaka wenkonzo ka-1991 womsebenzi womhlaba wonke woFakazi BakaJehova ubonisa ukuthi inani labamemezeli boMbuso lafinyelela inani elisha eliphakeme labangu-4 278 820, futhi kwabhapathizwa ingqikithi yabantu abangu-300 945 phakathi nalowonyaka. Njengoba kunabaningi kangaka abasha abathuthelekayo, kwamiswa amabandla amasha angu-3 191, kanye nenani elidingekayo lezifunda nezigodi ezintsha. Lokho kusho ukuthi ngosuku kwakumiswa amabandla amasha angaphezu kwayisishiyagalombili, cishe isifunda esisha esisodwa njalo ngezinsuku ezimbili. Yeka ukwanda okumangalisayo! Ngokusobala, uJehova usheshisa izinto, futhi uyayibusisa imizamo yabantu bakhe.—IHubo 127:1.
Isikhathi Sokuzihlola
4. Yimiphi imibuzo okumelwe icatshangelwe njengoba sibheka esikhathini esizayo?
4 Nakuba kujabulisa ukusibona, lesibusiso sihambisana nemithwalo ethile yemfanelo. Ingabe bayoba khona abantu abenele abavuthiwe nabazimisele abayonakekela izidingo ezingokomoya zabo bonke labantu abasha? Njengoba sibheke phambili esikhathini esizayo, kuyethusa ukucabanga ngenani lamaphayona, izinceku ezikhonzayo, abadala, nababonisi abajikelezayo abayodingeka ukuze banakekele ukwanda, kanye nenani lezisebenzi zokuzithandela ezidingekayo emahhovisi amagatsha nasemaKhaya aseBethel emhlabeni wonke ukuze zisekele lowomsebenzi. Liyotholakalaphi lelinani elikhulu labantu? Akungabazeki ukuthi isivuno sikhulu. Kodwa obani namuhla abasesimweni sokunakekela zonke izisebenzi ezidingekayo ukuba zivune lesosivuno?—Mathewu 9:37, 38.
5. Yiziphi izimo ezikhona kwezinye izindawo ezibangelwa ukwanda okusheshayo?
5 Ngokwesibonelo, kuye kwabikwa ukuthi kwezinye izingxenye zomhlaba, kunamabandla anabamemezeli boMbuso abafinyelela ekhulwini abakhonzwa umdala oyedwa kuphela kanye nenceku ekhonzayo eyodwa noma ezimbili. Ngezinye izikhathi umdala oyedwa kumelwe akhonze amabandla amabili. Kwezinye izindawo isidingo sezikhonzi ezingamaKristu ezifanelekayo ezizoqhuba izifundo zeBhayibheli zasekhaya sikhulu kangangokuba abasha kumelwe babhalwe phansi balinde. Kwezinye futhi izindawo, amabandla amasha amiswa ngezinga elishesha kangangokuba amabandla amathathu, amane, noma ngisho namahlanu kumelwe ahlanganyele iHholo LoMbuso elilodwa. Mhlawumbe uye wakubona ukwanda okunjena endaweni yakini.
6. Kungani kuyisikhathi esifanele sokuba sizihlole?
6 Kusitshelani lokhu okungenhla? Kusitshela ukuthi uma sibheka izikhathi, sonke kudingeka sihlole izimo zethu ukuze sibone ukuthi ingabe sisisebenzisa kahle yini isikhathi nempahla yethu ukuze sisabele kulendingeko. (Efesu 5:15-17) Umphostoli uPawulu wabhalela amaKristu angamaHeberu ekhulu lokuqala leminyaka: “Ngokuba noma benifanele ukuba nibe-ngabafundisi, uma kuya ngesikhathi, nisadinga futhi ukuba kube-khona onifundisa iziqalo zezifundiso zamazwi kaNkulunkulu; senaba-ngabadinga ubisi, kungesikho ukudla okuqinileyo.” (Heberu 5:12) Njengoba lawomazwi ebonisa, amaKristu ngamanye nawo kudingeka akhule. Futhi kunengozi yangempela yokuthi umuntu angase ahlale isikhathi eside ebuntwaneni obungokomoya kunokuba athuthukele ekuvuthweni kobuKristu. Ngokuvumelana nalokhu, uPawulu uyasinxusa: “Zihloleni nina, nibone ukuba nisekukholweni yini, nizivivinye nina.” (2 Korinte 13:5) Ingabe wake wazihlola ngokwakho ukuze ubone ukuthi ubulokhu ukhula yini ngokomoya kusukela ngesikhathi owabhapathizwa ngaso? Noma ingabe ubulokhu umi ndawonye? Nokho, umuntu angabona kanjani?
“Okobuntwana”
7. Ukuze intuthuko engokomoya iqhame, yini okumelwe siyenze?
7 “Lapho ngisengumntwana, ngakhulumisa okomntwana, ngaqondisa okomntwana, ngazindlisa okomntwana; kuthé sengiyindoda, ngayeka okobuntwana,” kusho umphostoli uPawulu. (1 Korinte 13:11) Ekukhuleni okungokomoya, ngesinye isikhathi sonke sasinjengabantwana ngokucabanga nangezenzo zethu. Nokho, ukuze ukuthuthuka kwethu kuqhame, kumelwe sishiye “okobuntwana,” njengoba uPawulu asho. Yiziphi ezinye zalezici?
8. Ngokwamazwi kaPawulu kumaHeberu 5:13, 14, yisiphi esinye isici somuntu ongumntwana ngokomoya?
8 Okokuqala, phawula amazwi kaPawulu kumaHeberu 5:13, 14: “Lowo odla ubisi akakaqondi-lutho lwezwi lokulunga, ngokuba uyingane. Kepha ukudla okuqinileyo kungokwabakhulileyo, abathi ngokujwayela ukuwusebenzisa umqondo, sebenawo osulungele ukwahlukanisa okuhle nokubi.” Ingabe ‘uyakuqonda okwezwi lokulunga’? Ingabe iZwi likaNkulunkulu, iBhayibheli, ulazi kahle ngokwanele kangangokuba ungalisebenzisa ‘ekuhlukaniseni okuhle nokubi’? UPawulu wathi abantu abavuthiwe bayakwazi ukwenza lokho ngoba njalo badla “ukudla okuqinileyo.” Ngakho, isifiso noma ukulangazelela komuntu ukudla okuqinile okungokomoya kuwuphawu oluhle olubonisa ukuthi umuntu usekhulile yini ngokomoya noma usalokhu engumntwana ngokomoya.
9. Ukulangazelela komuntu izinto ezingokomoya kuba kanjani uphawu olubonisa intuthuko yakhe engokomoya?
9 Khona-ke, kunjani ukulangazelela kwakho izinto ezingokomoya? Uyibheka kanjani inala yokudla okungokomoya elungiselelwa uJehova njalo ngezincwadi ezisekelwe eBhayibhelini nemihlangano yobuKristu yebandla kanye nemihlangano emikhulu? (Isaya 65:13) Ngokungangabazeki ujabula kakhulu uma kukhululwa izincwadi ezintsha emihlanganweni yesigodi yaminyaka yonke. Kodwa yini oyenzayo ngazo lapho ufika ekhaya? Yini oyenzayo lapho kufika umagazini omusha weNqabayokulinda noma iPhaphama!? Ingabe uyazinika isikhathi sokufunda lezincwadi, noma ingabe umane nje uphenye amakhasi ukuze ubone izihloko ezivelele bese uzibeka kwezinye eziseshalofini lezincwadi? Imibuzo efanayo ingaphakanyiswa ngokuqondene nemihlangano yobuKristu. Ingabe uba khona njalo kuyo yonke imihlangano? Ingabe uyayilungiselela futhi uhlanganyele kuyo? Kuyabonakala ukuthi abanye baye bawela emikhubeni yokuzondla ngokomoya engazuzisi, beshwampuluza futhi bedla ngokujaha, ngomqondo ongokomfanekiso. Yeka ukuthi kwakwehluke kanjani ngomhubi, owathi: “Ngiyawuthanda umthetho wakho kangaka. Usuku lonke ngizindla ngawo.” Futhi, iNkosi uDavide yathi: “Ngizakukubonga ebandleni elikhulu, ngikudumise phakathi kwabantu abaningi.” (IHubo 35:18; 119:97) Ngokusobala, izinga esiwazisa ngalo amalungiselelo angokomoya liwuphawu olubonisa intuthuko yethu engokomoya.
10. Yisiphi isici somuntu ongumntwana ngokomoya esiboniswe kweyabase-Efesu 4:14?
10 UPawulu waveza esinye isici somuntu onguntwana ngokomoya lapho exwayisa: “Singabe sisaba-yizingane, sishukunyiswa okwamaza, sipheshulwa yimimoya yonke yezifundiso ngenkohliso yabantu, ngobuqili obunamacebo okudukisa.” (Efesu 4:14) Njengoba abazali bazi kahle, abantwana banelukuluku lokufuna ukwazi yonke into. Ngandlela-thile lokhu kuyisici esihle ngoba kubabangela ukuba bahlole futhi bafunde futhi kancane kancane bathuthukele ekubeni abantu abavuthiwe. Nokho, ingozi isekutheni baphazanyiswa kalula izinto eziningi. Okubi nakakhulu ukuthi, ngenxa yokuntula okuhlangenwe nakho, lelilukuluku lokufuna ukwazi ngokuvamile libaholela enkingeni engathi sína, baze ngisho bazifake nasengozini bona ngokwabo kanye nabanye. Lokhu kunjalo nangabangabantwana ngokomoya.
11. (a) Yini uPawulu ayeyicabanga lapho esebenzisa inkulumo ethi “imimoya yonke yezifundiso”? (b) Yimiphi “imimoya” esibhekene nayo namuhla?
11 Nokho, yini uPawulu ayeyicabanga lapho ethi abangabantwana ngokomoya bapheshulwa “yimimoya yonke yezifundiso”? Lapha, elithi ‘imimoya’ lihunyushwe lisuselwa egameni lesiGreki elithi aʹne·mos, lelo i-International Critical Commentary ephawula ukuthi kubonakala sengathi “likhethwe njengelifanelekile ekunikezeni umqondo wokushintshashintsha.” Lokhu kuboniswa kahle amazwi kaPawulu alandelayo athi, “ngenkohliso yabantu.” Igama elithi ‘inkohliso’ olimini elisuselwa kulo ngokuyisisekelo lisho “idayisi” noma “umdlalo wamadayisi,” okusho ukuthi, umdlalo owinwa ngenhlanhla. Iphuzu liwukuthi njalo sibhekana nemiqondo emisha neminako engase ibonakale ingenangozi, ilinga, ize ibonakale izuzisa nokuzuzisa. Amazwi kaPawulu asebenza ngokuyinhloko ezindabeni eziphathelene nokholo lwethu—izinhlangano zamasonto, imigomo engokwenhlalo nengokombangazwe, nokunye okunjalo. (Qhathanisa neyoku-1 Johane 4:1.) Kodwa lesimiso siyasebenza nangokuphathelene nezimfashini zezwe ezishintsha njalo—izitayela, ukuzijabulisa, ukudla, izimiso zokuvivinya umzimba nezempilo, njalonjalo. Ngenxa yokuntula okuhlangenwe nakho kanye nokwahlulela okuhle, ongumntwana ngokomoya angase aphazanyiswe ngokweqile yizinto ezinjalo futhi zimvimbele ekubeni athuthuke ngokomoya futhi afeze izibopho zakhe zobuKristu ezibaluleke kakhulu.—Mathewu 6:22-25.
12. Izingane ezisezincane zihluke kanjani kubantu abadala ngokuphathelene nomthwalo wemfanelo?
12 Esinye isici sezingane ezisezincane ukudinga kwazo njalo usizo nokunakekelwa. Aziqapheli ukuthi kukhona imithwalo ethile yemfanelo futhi azikhathazeki ngayo; ubuntwana buyisikhathi sokuphila lapho cishe yonke into imane nje iyinjabulo. Njengoba uPawulu ekubeka, ‘zikhulumisa okomntwana, ziqondisa okomntwana, zizindlisa okomntwana.’ Zithatha kalula nje ukuthi abanye bazozinakekela. Kungashiwo okufanayo ngomuntu ongumntwana ngokomoya. Lapho umuntu osanda kuhlanganyela enikeza inkulumo yakhe yokuqala yeBhayibheli noma eqala ukuya enkonzweni yasensimini, umzali ongokomoya uyakujabulela ukwenza noma yini ukuze asize. Kuthiwani uma lona osanda kuhlanganyela eqhubeka encike kulolosizo futhi ebonakala engakwazi ukwamukela umthwalo wemfanelo wokuzinakekela? Ngokucacile lokho bekuyoba uphawu olubonisa ukuntula ukuzikhandla.
13. Kungani umuntu ngamunye kumelwe afunde ukuzithwalela owakhe umthwalo?
13 Kulokhu khumbula isixwayiso somphostoli uPawulu sokuthi nakuba kufanele ‘sithwalisane imithwalo yethu,’ kodwa “yilowo nalowo uyakuthwala owakhe umthwalo.” (Galathiya 6:2, 5) Yebo, kudinga isikhathi nomzamo ngomuntu ukufunda ukuzithwalela imithwalo yakhe yemfanelo yobuKristu, futhi kungase kusho ukuzidela ezintweni ezithile. Nokho, bekuyoba iphutha elingathi sína ukuba umuntu azivumele ukuba ahileleke ezinjabulweni zokuphila, kungaba ezokuzilibazisa, ukuthatha uhambo njalo, izinto ezingavamile zokuhloba, ngisho nokuphishekela umsebenzi wezwe okungadingekile, kangangokuba umuntu amane nje abe njengokungathi uyisibukeli, engenaso isifiso sokwandisa ukuhlanganyela kwakhe emsebenzini wokwenza abafundi noma sokulwela ukufanelekela intuthuko engokomoya kanye nomthwalo wemfanelo. “Yibani-ngabalenza izwi, ningabi-ngabalizwayo kuphela, nizikhohlisa,” kunxusa umfundi uJakobe.—Jakobe 1:22; 1 Korinte 16:13.
14. Kungani kungafanele saneliswe ukubonakalisa izici zomuntu ongumntwana ngokomoya?
14 Yebo, ziningi izici ezibonakala kalula ezihlukanisa ingane kumuntu omdala. Nokho, into ebalulekile njengoba uPawulu eyibeka, ukuthi siyaziyeka kancane kancane izici zobuntwana futhi sikhule. (1 Korinte 13:11; 14:20) Ngaphandle kwalokho, singase sibambezeleke ngomqondo ongokomoya. Kodwa umuntu uyenza kanjani intuthuko? Yini ehilelekile ekuqhubekeni ukhula ngokomoya uze ufinyelele ekuvuthweni?
Indlela Ukuthuthuka Okuqhama Ngayo
15. Iziphi izinyathelo eziyisisekelo enqubweni yokukhula?
15 Nokho, kwenzeka kanjani ukukhula ezweni elingokwemvelo? “Umuntu ngamunye uqala ukuphila eyingqamuzana eyodwa,” kuchaza iWorld Book Encyclopedia. “Lengqamuzana iyadla bese iguqula lokho ekudlayo kube izakhi ezidingayo ukuze ikhule. Kanjalo, ingqamuzana eyodwa iyakhula ngaphakathi. Lengqamuzana inganda futhi ihlukane ukuze yakhe amanye amangqamuzana. Lenqubo yokwakha, ukwanda, nokuhlukana iwukukhula.” Iphuzu eliphawulekayo lapha ukuthi ukukhula kwenzeka ngaphakathi. Lapho ukudla okufanele okunomsoco kudliwa, kugayeka emzimbeni, futhi kusetshenziswa, umphumela uba ukukhula. Lokhu kubonakala ngokucacile endabeni yosana olusanda kuzalwa. Njengoba sazi, usana ludla isilinganiso esingaguquguquki sokudla okukhethekile, ubisi, olucebile ngamafutha namaprotheni, izinto ezidingekayo ekukhuleni. Uba yini umphumela? Izinga lokukhula ngokuphathelene nesisindo kanye nobude umntwana akuzuza onyakeni wokuqala alinakufinyelelwa nanini kunoma yimuphi unyaka wokukhula okuvamile kukho konke ukuphila kwakhe.
16. Luhlobo luni lokukhula olubonakala ezifundweni zeBhayibheli eziningi ezintsha, futhi lokho kwenziwa kanjani kube nokwenzeka?
16 Kuningi esikufunda kulenqubo engokwemvelo yokukhula esingakusebenzisa entuthukweni yethu engokomoya sisuka ezintweni eziyisisekelo sithuthukela ekuvuthweni. Okokuqala ngqá, isimiso sokudla esingaguquguquki sibalulekile. Ake ucabange uhlehlele emuva esikhathini lapho wawuqala ukufunda iBhayibheli. Uma ufana nabanye abaningi, cishe wawungazi lutho ngokuphelele ngeZwi likaNkulunkulu. Kodwa isonto ngalinye wawulungiselela izifundo zakho futhi uqhutshelwa isifundo seBhayibheli, futhi esikhathini esifushane ngokuqhathaniswa, waziqonda zonke izimfundiso eziyisisekelo zemiBhalo. Kumelwe uvume ukuthi lokho kwakuwukukhula okumangalisayo, futhi konke lokho kwenzeka ngenxa yokuzondla njalo ngeZwi likaNkulunkulu!
17. Kungani isimiso sasikhathi sonke sokuzondla ngokomoya sibalulekile?
17 Nokho, kuthiwani manje? Ingabe usasilandela isimiso sasikhathi sonke sokuzondla? Umuntu akufanele acabange ukuthi ngenxa nje yokuthi usebhapathiziwe, asisekho isidingo sesifundo esihleliwe nesasikhathi sonke sokudla ukudla okungokomoya okunomsoco. Nakuba uThimothewu ayengumbonisi ongumKristu ovuthiwe, uPawulu wamnxusa: “Nakekela lezozinto, ume kuzo, ukuze [ukuthuthuka, NW] kwakho kuqhame kubo bonke.” (1 Thimothewu 4:15) Yeka ukuthi kudingeka ngamunye wethu akwenze lokho kakhulu kangakanani! Uma unesithakazelo sokwenza ukuthuthuka kwakho okungokomoya kuqhame, imizamo enjalo ibalulekile.
18. Intuthuko yomuntu engokomoya iqhama kanjani?
18 Ukwenza ukuthuthuka kwakho kuqhame akusho ukwenza umzamo okhethekile wokubukisa ngalokho okwaziyo noma ukuzama ukuhlaba abanye umxhwele. UJesu wathi: “Nina ningukukhanya kwezwe. Umuzi owakhé entabeni ungesitheke” wathi futhi, “umlomo ukhuluma ngokuchichima kwenhliziyo.” (Mathewu 5:14; 12:34) Uma izinhliziyo nezingqondo zethu zigcwele izinto ezinhle zeZwi likaNkulunkulu, siyomane nje sikubonise lokhu ngalokho esikwenzayo nesikushoyo.
19. Yini okufanele sizimisele ukuyenza ngokuphathelene nentuthuko yethu engokomoya, futhi sinombono wokuthola muphi umphumela?
19 Ngakho, umbuzo uwukuthi: Ingabe ulitadisha njalo iBhayibheli futhi ube khona emihlanganweni yobuKristu ukuze udle ukudla okunomsoco okungashukumisa ukukhula kwakho okungokomoya, kwangaphakathi? Musa ukwaneliswa ukuba nje isibukeli esingenzi lutho uma kuziwa ekuthuthukeni okungokomoya. Thatha izinyathelo eziqondile ukuze uqiniseke ukuthi ukusebenzisa ngokugcwele ukudla okungokomoya okuyinala okulungiselelwa uJehova. Uma ungumuntu “okuthokoza kwakhe kusemthethweni kaJehova, ozindla ngomthetho wakhe imini nobusuku,” khona-ke kungashiwo lokhu nangawe: “Unjengomuthi otshaliwe ngasemifuleni yamanzi, othela isithelo sawo ngesikhathi sawo, oqabunga lawo lingabuni, nakho konke akwenzayo uyakuba-nenhlanhla kukho.” (IHubo 1:2, 3) Nokho, yini ongayenza ukuze uqiniseke ukuthi uyoqhubeka uthuthuka ngokomoya? Lokhu sizoxoxa ngakho esihlokweni esilandelayo.
Ingabe Ungaphendula?
◻ Kungani kuyisikhathi esifanele sokuhlola intuthuko yethu engokomoya?
◻ Ukukhula okungokomoya kuhlobene kanjani nokulangazelela izinto ezingokomoya?
◻ Kushiwo ukuthini ngokuthi “imimoya yonke yezifundiso”?
◻ Kungani umuntu ngamunye kumelwe azithwalele owakhe umthwalo?
◻ Intuthuko engokomoya ifinyelelwa kanjani?
[Isithombe ekhasini 10]
Ingabe uyazinika isikhathi sokufunda izincwadi ezisekelwe eBhayibhelini?