Imibuzo Evela Kubafundi
KumaHeberu 11:26 (NW), ingabe uMose kuthiwa ‘unguKristu’ noma wayefanekisela uJesu Kristu?
Lapho ekhuluma ngokholo lukaMose, umphostoli uPawulu wabhala ukuthi uMose “[wabheka ukuhlanjalazwa kukaKristu njengengcebo enkulu, NW] kunengcebo yaseGibithe, ngokuba wayebheké umvuzo.” (Heberu 11:26) Kubonakala sengathi uPawulu wabiza uMose ngokuthi “uKristu,” noma ogcotshiweyo, ngomqondo othile.
Kuyavunywa, ezicini ezihlukahlukene uMose wafanekisela uMesiya owayezoza. Nakuba uMose ngokwakhe ayengumprofethi, wabikezela ngokuza komprofethi ‘onjengaye’ omkhulu nangaphezulu. AmaJuda amaningi aba nawo umuzwa wokuthi uJesu ‘wayengumProfethi,’ okuyinto abalandeli bakhe abayifakazela. (Duteronomi 18:15-19; Johane 1:21; 5:46; 6:14; 7:40; IzEnzo 3:22, 23; 7:37) Futhi uMose wayengumlamuleli wesivumelwano soMthetho, kodwa uJesu wathola “inkonzo enhle kakhulu” ‘njengomlamuleli wesivumelwano esihle kakhulu,’ isivumelwano esisha esikhazimulayo. (Heberu 8:6; 9:15; 12:24; Galathiya 3:19; 1 Thimothewu 2:5) Ngakho ezicini ezithile kungashiwo ukuthi uMose wayefanekisela uMesiya owayezoza.
Nokho, lokho akubonakali kuyincazelo eyinhloko yamaHeberu 11:26. Akukho okubonisa ukuthi uMose wayeyazi imininingwane ephathelene noMesiya, ngokwazi ebheka lokho abhekana nakho eGibithe njengokwakwenzeka ngoba esesikhundleni sikaMesiya noma engummeleli waKhe.
Abanye baye basikisela ukuthi amazwi kaPawulu akumaHeberu 11:26 asho okufanayo nenkulumo yakhe yokuthi amaKristu athola ‘izinhlupheko zikaKristu.’ (2 Korinte 1:5) AmaKristu agcotshiwe ayazi ukuthi uJesu Kristu wahlupheka nokuthi uma ‘ayehlupheka kanye naye ayeyophiwa inkazimulo kanye naye’ ezulwini. Kodwa uMose wayengazi ukuthi uMesiya owayezoza wayeyobhekana nani, futhi uMose wayengenalo ithemba lokuphila ezulwini.—Roma 8:17; Kolose 1:24.
Kunencazelo elula yendlela uMose ‘akubheka’ ngayo “ukuhlanjalazwa kukaKristu njengengcebo.”
Lapho uPawulu ebhala ukuthi ‘uKristu’ kumaHeberu 11:26, wasebenzisa igama lesiGreki elithi Khri·stouʹ, okuyigama elisho okufanayo negama lesiHeberu elithi Ma·shiʹach, noma uMesiya. Elithi “uMesiya” nelithi “uKristu” asho “ogcotshiweyo.” Ngakho uPawulu wayebhala ‘ngokubheka’ kukaMose “ukuhlanjalazwa kogcotshiweyo.” Ingabe uMose ngokwakhe wayengase abizwe ngokuthi ‘ungogcotshiweyo’?
Yebo. Ezikhathini zeBhayibheli umuntu wayengase amiswe esikhundleni esikhethekile ngokuba athelwe amafutha ekhanda. “USamuweli wayesethatha umfuma wamafutha, wawathela ekhanda [likaSawule.]” ‘USamuweli wayesethatha uphondo lwamafutha, wamgcoba [uDavide] phambi kwabafowabo; umoya kaJehova wehlela phezu kukaDavide ngamandla.’ (1 Samuweli 10:1; 16:13; qhathanisa noEksodusi 30:25, 30; Levitikusi 8:12; 2 Samuweli 22:51; IHubo 133:2.) Nokho, abanye, njengomprofethi uElisha nenkosi yaseSiriya uHazayeli, kuthiwa ‘bangabagcotshiweyo’ nakuba bungekho ubufakazi bokuthi bathelwa ngamafutha ngokoqobo. (1 AmaKhosi 19:15, 16; IHubo 105:14, 15; Isaya 45:1) Ngakho, umuntu wayengaba ‘ogcotshiweyo’ ngokuba akhethwe noma athunywe ngokukhethekile.
Ngalomqondo uMose ngokwakhe wayengogcotshiweyo kaNkulunkulu, futhi amanye amaBhayibheli ahumusha amaHeberu 11:26 ngokuthi “Ogcotshiweyo kaNkulunkulu” noma “Ogcotshiweyo.” UMose wathunywa njengommeleli kaJehova nanjengowayeyohola amaIsrayeli awakhiphe eGibithe. (Eksodusi 3:2-12, 15-17) Nakuba uMose akhulela engcebweni nasenkazimulweni yaseGibithe, wakwazisa kakhulu ukuthunywa kwakhe, akwamukela nakufeza. Ngokufanelekile, uPawulu wayengabhala ukuthi uMose ‘wabheka ukuhlanjalazwa kukaKristu njengengcebo enkulu kunengcebo yaseGibithe.’