INgqungquthela Yezinkolo Zomhlaba—Ingabe Izophumelela?
AMAKHULUKHULU abaholi benkolo abuthana eNgqungqutheleni yesibili Yezinkolo Zomhlaba eyayiseChicago, e-Illinois, e-U.S.A., ehlobo lika-1993. UbuBuddha, eLobukholwa, ubuHindu, ubuJuda, nobuSulumane konke kwakumelelwe. Abalumbi nabakhulekeli bonkulunkulukazi nabo babekhona. Babexoxa ngendima abanayo ekuqedeni impi. Usihlalo walengqungquthela wavuma ukuthi “izingxenye ezimbili kwezintathu zezingxabano ezinkulu emhlabeni namuhla zinamachaphazelo enkolo.”
Eminyakeni Eyikhulu Edlule
Ingabe lengqungquthela yaba yimpumelelo? Ake ubheke lokho okwenzeka eminyakeni eyikhulu edlule eNgqungqutheleni yokuqala Yezinkolo Zomhlaba. Nayo futhi yayiseChicago, ehlobo lika-1893, futhi izinkolo ezingaphezu kuka-40 zazimelelwe. UMkhandlu weNgqungquthela Yezinkolo Zomhlaba uyavuma ukuthi labo ababekhona ngo-1893 “babekholelwa ukuthi kwakuzoba umbuthano womhlaba wonke wokuqala kwewuchungechunge ohlanganisa zonke izinkolo owawuzoba neqhaza ekuletheni ukuzwana, ukuthula nenqubekela phambili. Akuzange kube njalo. Ukungazibekezeleli ezinye izinkolo nobudlova bekulokhu kuyingxenye yezimpi zaleminyaka eyikhulu edlule, futhi kusaqhubeka kunjalo nanamuhla.” Kungani kungaphumeleli? Kungenxa yokuthi umqondo wezinkolo ezihlangene uwonke awamukeleki kuNkulunkulu. IBhayibheli lithi: “Maningaboshelwa ejokeni linye nabangakholwayo.”—2 Korinte 6:14-17.
Ngokufanelekayo, umagazini ka-September 1893 we-Zion’s Watch Tower waqokomisa ukungayisekeli kwemiBhalo iNgqunguquthela Yezinkolo Zomhlaba lapho, ngokungabhinqi nakancane, uthi: “Baye bamba onxantathu abaningi abamangalisayo bobumba olushisiwe emanxiweni aseBabiloni nakweminye imizi yasendulo, kodwa kusekhona abangakatholakali. . . . Abakabatholi abakhuluma ngoMose noJoshuwa bebiza ‘INgqungquthela Yezinkolo,’ zabakwaMowabi nabakwa-Amoni, nabakwa-Edomi . . . Abakabatholi abakhuluma ngoSamuweli onamandla ogugile ethumela eGati nase-Ekroni ukuze kutholakale abameleli babapristi bakaDagoni ukuba beze eShilo bazobamba umhlangano nabapristi bakaJehova . . . Abakabatholi abakhuluma ngo-Eliya osekhulile ozibophe ngebhande lesikhumba esikisela ‘umhlangano’ nabapristi bakaBali noMoloki ukuze babe nengxoxo yesonto lonke mayelana nezimfundiso zezinkolelo zabo ezihlukahlukene, ngombono wokuthuthukisa ukuhloniphana phakathi kwezinkolo zabo.”
UMbuso KaNkulunkulu—Ukuphela Kwethemba
INgqungquthela Yezinkolo Zomhlaba ngeke iphumelele. Amaphephandaba nabameleli basebenzisa amagama anjengokuthi “inxushunxushu,” “isiyaluyalu” nokuthi “inhlakanhlaka” ngokuphathelene nalengqungquthela. Ngokomunye umbiko, ngisho namaphoyisa ahileleka ekuthuliseni iziphithiphithi ezimbili ezabangelwa ukwehlukana ngokwezombangazwe. Komunye umbhalo wango-1952, lengqungquthela yabeka lokhu njengomunye wemigomo yayo: “Ukumisa iNgqungquthela Yomhlaba Yezinkolo eyohlala njalo ukuze isebenze neZIZWE EZIHLANGENE ekufinyeleleni ukuthula kwezwe nokuzwana phakathi kwabo bonke abantu.” Ngokuphambene nalokho, uJesu wathi uMbuso wakhe wawungeyona ingxenye yalelizwe. IBhayibheli likhomba eMbusweni kaNkulunkulu njengowukuphela kwekhambi lezinkinga zesintu.—Daniyeli 2:44; Johane 18:36.