Abamemezeli BoMbuso Bakhuthele Emhlabeni Wonke
“[Niyoba] ngofakazi bami . . . kuze kube-sekugcineni komhlaba.”—IZENZO 1:8.
1. Yisiphi isigijimi uJesu athi abalandeli bakhe babeyosimemezela osukwini lwethu?
LAPHO echaza umsebenzi uJehova athuma iNdodana yakhe ukuba izowenza emhlabeni, uJesu wathi: “Ngimelwe ukushumayela ivangeli lombuso kaNkulunkulu.” (Luka 4:43) Ngokufanayo, lapho ekhuluma ngomsebenzi abafundi bakhe ababeyowenza emhlabeni lapho ebuya enegunya lobukhosi, uJesu wathi: “Lelivangeli lombuso liyakushunyayelwa ezweni lonke, kube-ngubufakazi ezizweni zonke, andukuba kufike ukuphela.”—Mathewu 24:14.
2. (a) Kungani kubaluleke kangaka ukuba isigijimi soMbuso simenyezelwe kabanzi? (b) Yimuphi umbuzo sonke okufanele sizibuze wona?
2 Kungani izindaba eziphathelene noMbuso kaNkulunkulu zibaluleke kangaka? Kungani loMbuso kudingeka umenyezelwe kabanzi kangaka? Ngoba unguMbuso wobuMesiya oyolwela ubukhosi bukaJehova bendawo yonke. (1 Korinte 15:24-28) Esebenzisa wona, uJehova uyokhipha isahlulelo ngokumelene nesimiso sezinto samanje sobusathane futhi agcwalise isithembiso sakhe sokubusisa yonke imindeni yomhlaba. (Genesise 22:17, 18; Daniyeli 2:44) Ngokwenza ukuba kunikezwe ubufakazi ngokuphathelene noMbuso, uJehova uye wathola labo kamuva aye wabagcoba ukuze babe izindlalifa kanye neNdodana yakhe. Ngokumenyezelwa koMbuso, umsebenzi wokuhlukanisa nawo uyafezwa namuhla. (Mathewu 25:31-33) UJehova ufuna abantu bazo zonke izizwe baziswe ngokuphathelene nenjongo yakhe. Ufuna babe nethuba lokukhetha ukuphila njengezikhonzi zoMbuso wakhe. (Johane 3:16; IzEnzo 13:47) Ingabe uhlanganyela ngokugcwele ekumemezeleni loMbuso?
Ukulindela Ukuphela Kwezikhathi Zabezizwe
3. (a) Ngokufanelekile, sasithini isihloko uC. T. Russell asiqokomisa ohambweni lokuqala lokuyohlela amaqembu atadisha iBhayibheli? (b) Yini labobaFundi BeBhayibheli bokuqala abayiqaphela ngokuphathelene nendawo uMbuso kaNkulunkulu okufanele ube nayo ekuphileni kwabo?
3 Emuva ngo-1880, uCharles Taze Russell, umhleli wokuqala kamagazini i-Watch Tower, wathatha uhambo olunqamula enyakatho-mpumalanga ye-United States ukuze akhuthaze ukumiswa kwamaqembu atadisha iBhayibheli. Ngokufanelekile, isihloko ayekhuluma ngaso sasithi “Izinto Eziphathelene NoMbuso KaNkulunkulu.” Njengoba kwakuboniswe komagazini bokuqala be-Watch Tower, abaFundi BeBhayibheli (njengoba oFakazi BakaJehova babaziwa kanjalo ngalesosikhathi) baqaphela ukuthi ukuze bazibonakalise bekufanelekela ukuba nengxenye eMbusweni kaNkulunkulu, kumelwe benze uMbuso ube into eza kuqala kubo, besebenzisa ukuphila kwabo, amakhono abo, nengcebo yabo ngenjabulo enkonzweni yabo. Konke okunye ekuphileni kwakumelwe kuze kamuva. (Mathewu 13:44-46) Umthwalo wabo wemfanelo wawuhlanganisa ukumemezela kwabanye izindaba ezinhle eziphathelene noMbuso kaNkulunkulu. (Isaya 61:1, 2) Bakwenza ngezinga elingakanani lokho ngaphambi kokuphela kweZikhathi Zabezizwe ngo-1914?
4. Ibutho elincane labaFundi BeBhayibheli lazisakaza ngezinga elingakanani izincwadi zeBhayibheli ngaphambi kuka-1914?
4 Kusukela ngawo-1870 kuze kufike ku-1914, abaFundi BeBhayibheli babembalwa uma beqhathaniswa. Ngo-1914, abangaba ngu-5 100 kuphela babehlanganyela ngenkuthalo ekunikezeni ubufakazi basobala. Kodwa yeka ukuthi kwakuwubufakazi obumangalisa kanjani! Ngo-1881, eminyakeni emibili nje ngemva kokuba i-Watch Tower iqale ukunyatheliswa, baqala ukusakaza incwadi enamakhasi angu-162 ethi Food for Thinking Christians. Phakathi nezinyanga ezimbalwa, bahambisa amakhophi angu-1 200 000. Eminyakeni embalwa, amashumi ezigidi amapheshana ayesakazwa minyaka yonke ngezilimi eziningi.
5. Ayengobani ama-colporteur, futhi ayebonisa umoya onjani?
5 Futhi kusukela ngo-1881, abanye banikela izinkonzo zabo ngokuba abashumayeli abangama-colporteur. Laba babengabanduleli bamaphayona osuku lwanamuhla (abashumayeli besikhathi esigcwele). Amanye alama-colporteur, ayehamba ngezinyawo noma ngamabhayisikili, afakaza mathupha cishe kuyo yonke ingxenye yezwe ayehlala kulo. Amanye afinyelela emasimini akwamanye amazwe futhi yiwona ayisa izindaba ezinhle kuqala ezindaweni ezinjengeFinland, iBarbados, neBurma (manje eyiMyanmar). Abonisa intshiseko yokuba izithunywa zevangeli enjengekaJesu Kristu nabaphostoli bakhe.—Luka 4:43; Roma 15:23-25.
6. (a) Lwalubanzi kangakanani uhambo lukaMfoweth’ uRussell lokusakaza iqiniso leBhayibheli? (b) Yini enye eyenziwa ukuze kuqhutshekiselwe phambili ukushunyayelwa kwezindaba ezinhle emasimini akwamanye amazwe ngaphambi kokuphela kweZikhathi Zabezizwe?
6 UMfoweth’ uRussell uqobo wahamba kakhulu esakaza iqiniso. Waya eCanada ephindelela; wabeka izinkulumo ePanama, eJamaica, naseCuba; wahamba izihlandla eziningi elibangise eYurophu; futhi wazungeza imbulunga yonke ohambweni lokushumayela. Futhi wathumela amanye amadoda ukuba aqale futhi ahole ekushumayeleni izindaba ezinhle emasimini akwamanye amazwe. U-Adolf Weber wathunyelwa eYurophu maphakathi nawo-1890, futhi waqala inkonzo yakhe eSwitzerland wadlulela eFrance, e-Italy, eJalimane, naseBelgium. U-E. J. Coward wathunyelwa endaweni yaseCaribbean. URobert Hollister wabelwa eMpumalanga ngo-1912. Lapho, kwalungiselelwa amapheshana akhethekile ngezilimi eziyishumi, futhi izigidi zamakhophi alamapheshana zasakazwa abomdabu kulo lonke elaseNdiya, eChina, eJapane, naseKorea. Ukube wawuphila ngalesosikhathi, inhliziyo yakho yayiyokushukumisela yini ekwenzeni umzamo wenkuthalo wokufinyelela abanye emphakathini wakini nakwezinye izindawo ngezindaba ezinhle?
7. (a) Amaphephandaba asetshenziswa kanjani ukwandisa ubufakazi? (b) Yayiyini i-“Photo-Drama of Creation,” futhi bangaki abantu abayibona onyakeni owodwa nje kuphela?
7 Njengoba iZikhathi Zabezizwe zazisondela ekupheleni, kwasetshenziswa amaphephandaba ukuze kusakazwe izintshumayelo zeBhayibheli ezazinikezwa uMfoweth’ uRussell. Zazingagcizeleli ngokuyinhloko unyaka ka-1914, kodwa, kunalokho, zazigcizelela injongo kaNkulunkulu nesiqinisekiso sokugcwaliseka kwayo. Amaphephandaba angaba ngu-2 000 ngesikhathi, afinyelela kubafundi abangu-15 000 000, ayeba nalezintshumayelo njalo. Khona-ke, njengoba kwakuqala unyaka ka-1914, iNhlangano yaqala ukubonisa umphakathi i-“Photo-Drama of Creation.” Ezinkulumweni ezine ezithatha amahora amabili, yayiveza amaqiniso eBhayibheli kusukela ekudaleni kuqhubeke kuze kuyofika eMinyakeni Eyinkulungwane. Phakathi nonyaka owodwa nje, yayisibukelwe izibukeli ezingaphezu kwezigidi eziyisishiyagalolunye eNyakatho Melika, eYurophu, e-Australia, naseNew Zealand.
8. Ngo-1914, mangaki amazwe abaFundi BeBhayibheli ababewafinyelele ngezindaba ezinhle?
8 Ngokwemibhalo egciniwe etholakalayo, ngasekupheleni kuka-1914, leliqembu elishisekayo labashumayeli lase limemezele uMbuso kaNkulunkulu emazweni angu-68.a Kodwa lokhu kwakumane nje kuyisiqalo!
Ukumemezela Ngentshiseko UMbuso Omisiwe
9. Emihlanganweni yaseCedar Point, umsebenzi wokushumayela ngoMbuso wanikezwa kanjani umfutho?
9 Lapho abaFundi BeBhayibheli behlangana eCedar Point, e-Ohio, ngo-1919, uJ. F. Rutherford, owayengumongameli we-Watch Tower Society ngalesosikhathi, wamemezela: “Kwakuwumsebenzi wethu ukumemezela umbuso okhazimulayo ozayo kaMesiya futhi namanje kuseyiwo.” Emhlanganweni wesibili waseCedar Point, ngo-1922, uMfoweth’ uRutherford waqokomisa iphuzu lokuthi ekupheleni kweZikhathi Zabezizwe, ngo-1914, ‘iNkosi yenkazimulo yayisithathe amandla ayo amakhulu futhi yaqala ukubusa.’ Ngemva kwalokho, wabeka lendaba ngokungagwegwesi ezilalelini zakhe, ethi: “Ingabe niyakholwa ukuthi iNkosi yenkazimulo isikuqalile ukubusa kwayo? Khona-ke buyelani ensimini, nina madodana kaNkulunkulu ophezukonke! . . . Memezelani kabanzi isigijimi. Izwe kumelwe lazi ukuthi uJehova unguNkulunkulu nokuthi uJesu Kristu uyiNkosi yamakhosi noMbusi wababusi. Lolu usuku olubaluleke kunazo zonke. Bhekani, iNkosi iyabusa! Nina ningamanxusa ayo okuyimemezela.”
10, 11. Umsakazo, izimoto ezinombhobho, nezingqwembe kwasetshenziswa kanjani ngokuphumelelayo ukuze kufinyelelwe abantu ngeqiniso loMbuso?
10 Sekudlule iminyaka engaphezu kwengu-70 kusukela kuleyomihlangano yaseCedar Point—cishe iminyaka engu-80 kusukela uJehova aqala ukubonakalisa ubukhosi bakhe ngokubusa kobuMesiya kweNdodana yakhe. Eqinisweni oFakazi BakaJehova baye bawufeza ngezinga elingakanani umsebenzi abawubekelwe eZwini likaNkulunkulu? Wena ngokwakho unayiphi ingxenye kuwo?
11 Ekuqaleni kwawo-1920, kwatholakala iziteshi zomsakazo ezazingase zisetshenziselwe ukusakaza kabanzi isigijimi soMbuso. Phakathi nawo-1930, izinkulumo zomhlangano ezaziqokomisa uMbuso njengethemba lomhlaba zazisakazwa ngeziteshi zomsakazo ezixhumene noma ngeziteshi zomsakazo ezifinyelela emazweni akude ngesikhathi esisodwa nangolayini bezingcingo ababezungeza imbulunga yonke. Izimoto ezinemibhobho nazo zazisetshenziselwa ukudlala izinkulumo zeBhayibheli eziqoshiwe ezindaweni zomphakathi. Khona-ke, ngo-1936, eGlasgow, eScotland, abafowethu baqala ukufaka izingqwembe njengoba babemasha ezindaweni zamabhizinisi ukuze bamemezele izinkulumo zeningi. Konke lokhu kwakuyizindlela eziphumelelayo zokunikeza ubufakazi kubantu abaningi ngalesosikhathi lapho sisembalwa.
12. Njengoba imiBhalo ibonisa, iyiphi enye yezindlela eziphumelela kakhulu kithi ngabanye yokunikeza ubufakazi?
12 Yebo, imiBhalo icacisa ukuthi njengamaKristu, thina ngabanye sinomthwalo wemfanelo wokunikeza ubufakazi. Asinakumane nje sishiyele emaphephandabeni noma ezinhlelweni zomsakazo ukuba zenze lomsebenzi. Izinkulungwane zamaKristu athembekile—abesilisa, abesifazane, nabasha—ziye zawamukela lowomthwalo wemfanelo. Ngenxa yalokho, ukushumayela endlini ngendlu kuye kwaba uphawu oluhlukanisayo loFakazi BakaJehova.—IzEnzo 5:42; 20:20.
Ukufinyelela Kuwo Wonke Umhlaba Owakhiwe
13, 14. (a) Kungani abanye oFakazi bethuthela kwamanye amadolobha, ngisho nakwamanye amazwe, ukuze bafeze inkonzo yabo? (b) Ukukhathalela abantu kothando ezweni lenkaba yomuntu kuye kwasiza kanjani ekusakazeni izindaba ezinhle?
13 Njengoba bazi ukuthi isigijimi soMbuso kumelwe sishunyayelwe kuwo wonke umhlaba owakhiwe, abanye boFakazi BakaJehova baye bacabangela ngokungathi sína ukuthi yini bona abangayenza ukuze bafinyelele ezindaweni ezikude.
14 Abantu abaningi baye bafunda iqiniso ngemva kokuthuthela kude namazwe enkaba yabo. Nakuba kungenzeka ukuthi baye bathutha ngenxa yezinzuzo zezinto ezingokwenyama, baye bathola okuthile okuyigugu kakhulu, futhi abanye baye bazizwa beshukunyiselwa ukuba babuyele emazweni enkaba yabo ukuze bahlanganyele iqiniso nabanye. Ngakho, ekuqaleni kwalelikhulu leminyaka ukushunyayelwa kwezindaba ezinhle kwadlulela eScandinavia, eGreece, e-Italy, emazweni aseMpumalanga Yurophu, nakwamanye amazwe amaningi. Ngisho namanje, ngawo-1990, isigijimi soMbuso sanda ngaleyondlela.
15. Phakathi nawo-1920 nawo-1930, yini eyafezwa abanye ababenesimo sengqondo esasifana naleso esivezwe ku-Isaya 6:8?
15 Njengoba besebenzisa iseluleko seZwi likaNkulunkulu ekuphileni kwabo, abanye baye bakwazi ukuzenza batholakalele inkonzo emazweni abangakaze balubhade kuwo. Omunye walaba kwakungu-W. R. Brown (ngokuvamile owayebizwa ngokuthi “uBible Brown”). Ukuze aqhubekisele phambili umsebenzi wokushumayela, ngo-1923 wathuthela eNtshonalanga Afrika esuka eTrinidad. Phakathi nawo-1930, uFrank noGray Smith, uRobert Nisbet, noDavid Norman babephakathi kwalabo abayisa isigijimi soMbuso ogwini olusempumalanga ye-Afrika. Abanye basiza ekuhlakuleni insimu yaseNingizimu Melika. Ekuqaleni kwawo-1920, uGeorge Young, waseCanada, wahlanganyela kulomsebenzi e-Argentina, eBrazil, eBolivia, eChile, nasePeru. UJuan Muñiz, owayekhonzé eSpain, walandelela isithakazelo e-Argentina, eChile, eParaguay, nase-Uruguay. Bonke laba babonisa umoya ofana nalowo ovezwe ku-Isaya 6:8: “Nangu mina; ngithume mina.”
16. Ngaphandle kwasezikhungweni eziyinhloko ezinabantu abaningi kwakwenziwa kuphi ukufakaza eminyakeni yangaphambi kwempi?
16 Ukushunyayelwa kwezindaba ezinhle kwakufinyelela ngisho nasezindaweni ezisemajukujukwini. Izikebhe ezinamatilosi angoFakazi zazihambela zonke izikhumulo ezincane zemikhumbi zaseNewfoundland, ugu lwaseNorway ukuyofika e-Arctic, iziqhingi zasePacific, nezikhumulo zaseNingizimu-mpumalanga ye-Asia.
17. (a) Ngo-1935, mangaki amazwe ayesefinyelelwe oFakazi? (b) Kungani umsebenzi wawungakapheli ngalesosikhathi?
17 Ngokumangalisayo, ngonyaka ka-1935, oFakazi BakaJehova babematasa beshumayela emazweni angu-115, futhi base befinyelele amanye amazwe angu-34 ngohambo lokufakaza noma ngezincwadi ezazithunyelwa ngeposi. Nokho, umsebenzi wawungakapheli. Ngalowonyaka uJehova wavula amehlo abo ukuze babone injongo yakhe yokubutha “isixuku esikhulu” esiyosinda singene ezweni lakhe elisha. (IsAmbulo 7:9, 10, 14) Kwakusamelwe kunikezwe ubufakazi obukhulu!
18. Emsebenzini wokumemezela uMbuso, yiziphi izindima ezifezwe iSikole saseGileyadi neSikole Sokuqeqeshela Inkonzo?
18 Ngisho nalapho iMpi Yezwe II igubuzela umhlaba futhi kuba nokuvinjelwa kwezincwadi noma umsebenzi woFakazi BakaJehova emazweni amaningi, i-Watchtower Bible School of Gilead yaqala ukuqeqesha ababezoba izithunywa zevangeli ukuze bafeze umsebenzi omkhulu nangokwengeziwe wokumenyezelwa koMbuso ezizweni zonke. Kuze kube manje, abathweswa iziqu zaseGileyadi baye bakhonza emazweni angaphezu kuka-200. Baye benza okungaphezu nje kokuhambisa izincwadi bese bedlulela phambili. Baye baqhuba izifundo zeBhayibheli, bahlela amabandla, futhi baqeqesha abantu ukuba bathwale imithwalo yemfanelo engokwasezulwini. Muva nje, abadala nezinceku ezikhonzayo abaye bathola iziqu eSikoleni Sokuqeqeshela Inkonzo nabo baye basiza ekuhlangabezaneni nezidingo ezibalulekile ngokuphathelene nalomsebenzi emazwekazini ayisithupha. Kuye kwabekwa isisekelo esiqinile sokwanda okuqhubekayo.—Qhathanisa neyesi-2 Thimothewu 2:2.
19. Izinceku zikaJehova ziye zasabela ngezinga elingakanani esimemweni sokukhonza ezindaweni ezinendingeko enkulu?
19 Ingabe abanye babengasiza ekunakekeleni amanye amasimu ayengakasetshenzwa? Ngo-1957, emihlanganweni yesigodi emhlabeni kabanzi, abantu ngabanye nemikhaya—oFakazi BakaJehova abavuthiwe—bakhuthazwa ukuba bacabangele ukuthuthela ezindaweni ezinendingeko enkulu ukuze bayohlala khona futhi baqhubeke nenkonzo yabo lapho. Lesimemo sasifana kakhulu naleso uNkulunkulu asinikeza umphostoli uPawulu, owabona embonweni indoda eyayimnxusa: “Welela eMakedoniya, usisize.” (IzEnzo 16:9, 10) Abanye bathutha phakathi nawo-1950, abanye kamuva. OFakazi abangaba yinkulungwane bathuthela e-Ireland naseColombia; amakhulu athuthela kwamanye amazwe amaningi. Amashumi ezinkulungwane athuthela ezindaweni ezinendingeko enkulu ezisemazweni akubo.—IHubo 110:3.
20. (a) Kusukela ngo-1935, yini eye yafezwa egcwalisa isiprofetho sikaJesu esikuMathewu 24:14? (b) Phakathi neminyaka embalwa edlule, kuye kwaba khona kanjani ukusheshiswa komsebenzi?
20 Ngesibusiso sikaJehova kubantu bakhe, umsebenzi wokumemezela ngoMbuso uqhubekela phambili ngejubane elimangalisayo. Kusukela ngo-1935 inani labamemezeli liye landa cishe ngokuphindwe kamashumi ayisishiyagalombili, futhi isilinganiso sokwanda ezinhlwini zamaphayona siye saba amaphesenti angu-60 ngaphezu kwesilinganiso sokwanda enanini labamemezeli. Phakathi nawo-1930 kwaqaliswa ilungiselelo lezifundo zeBhayibheli zasekhaya. Manje kunesilinganiso sezingaphezu kwezigidi ezine nengxenye eziqhutshwa inyanga ngayinye. Kusukela ngo-1935 kuye kwanikelwa ngamahora angaphezu kwezigidi eziyizinkulungwane ezingu-15 emsebenzini wokumemezela ngoMbuso. Ukushunyayelwa kwezindaba ezinhle kwasikhathi sonke manje kwenziwa emazweni angu-231. Njengoba kuye kwavuleka amasimu okushunyayelwa kwezindaba ezinhle ngokukhululekile eMpumalanga Yurophu nase-Afrika, imihlangano yezizwe iye yasetshenziswa ngokuphumelelayo ukuze kumenyezelwe isigijimi soMbuso ngokuphawulekayo emphakathini. Njengoba uJehova athembisa kudala, ku-Isaya 60:22, ngokuqinisekile ‘uyawusheshisa umsebenzi ngesikhathi sawo.’ Yeka ukuthi kuyilungelo elihle kanjani ukuba sihlanganyele kuwo!
Ukufinyelela Bonke Esingabafinyelela Ngezindaba Ezinhle
21, 22. Yini thina ngabanye esingayenza ukuze sibe oFakazi abaphumelela ngokwengeziwe kungakhathaliseki ukuthi sikhonzaphi?
21 INkosi ayikasho ukuthi umsebenzi usuphelile. Izinkulungwane eziningi zisakwamukela ukukhulekela kweqiniso. Ngakho kuphakama lombuzo, Ingabe senza konke esingakwenza ukuze sisebenzise kahle isikhathi ukubekezela kukaJehova okusinikeze sona ukuze sifeze lomsebenzi?—2 Petru 3:15.
22 Akubona bonke abangathuthela ensimini engasetshenzwa njalo. Kodwa uwasebenzisa ngokugcwele yini amathuba akuvulekelayo? Ingabe uyafakaza kubantu osebenza nabo? kothisha nofunda nabo? Uye wazifanelanisa yini nezimo eziguqukayo ensimini yakini? Uma, ngenxa yezimo zomsebenzi eziguqukayo, bembalwa abantu ababa sekhaya phakathi nosuku, uye wasishintsha yini isimiso sakho ukuze ubahambele kusihlwa? Uma kunzima ukungena ezakhiweni uma uyisivakashi esingamenyiwe, uyafakaza yini ngocingo noma ngeposi? Ingabe uyasilandelela isithakazelo esibonisiwe futhi ucele ukuqhuba izifundo zeBhayibheli zasekhaya? Ingabe ufeza inkonzo yakho ngokugcwele?—Qhathanisa nezEnzo 20:21; 2 Thimothewu 4:5.
23. Njengoba uJehova ekuqaphela lokho esikwenzayo enkonzweni yakhe, yini okufanele ibe sobala kithi?
23 Kwangathi sonke singafeza inkonzo yethu ngendlela ebonisa uJehova ngokusobala ukuthi silazisa ngempela ilungelo elihle lokuba oFakazi bakhe kulezikhathi ezibalulekile. Kwangathi singaba nelungelo lokuba ofakazi bokuzibonela lapho uJehova ekhipha isahlulelo esimisweni esidala esonakele futhi engenisa ukuBusa Kweminyaka Eyinkulungwane okukhazimulayo kukaJesu Kristu!
[Umbhalo waphansi]
a Abalwe ngokwendlela umhlaba owawuhlukaniswe ngayo ngasekuqaleni kwawo-1990.
Ukubukeza
◻ Kungani ukushumayela isigijimi soMbuso kubaluleke kangaka?
◻ Kuze kube u-1914, izindaba ezinhle zashunyayelwa ngezinga elingakanani?
◻ Kusukela ekumisweni koMbuso ubufakazi buye banikezwa kakhulu kangakanani?
◻ Yini engase yenze ukuba ukuhlanganyela kwethu enkonzweni kukhiqize kakhudlwana?
[Ibhokisi ekhasini 16, 17]
OFAKAZI BAKAJEHOVA—Abamemezeli BoMbuso KaNkulunkulu
Emakhulwini emihlangano ebisemhlabeni wonke phakathi kuka-1993-94, kwenziwa isaziso sokukhululwa kwencwadi entsha enesihloko esithi OFakazi BakaJehova—Abamemezeli BoMbuso KaNkulunkulu. Lona umlando woFakazi BakaJehova ofundisayo noningiliza kakhulu. Incwadi enamakhasi angu-752, enemifanekiso emihle, enezithombe ezingaphezu kwenkulungwane ezithathwe emazweni angu-96 ahlukene. Ngasekupheleni kuka-1993, kakade yayisikhishwé ngezilimi ezingu-25 futhi isahunyushelwa kwezengeziwe.
Yini eyenza ukuba lencwadi ibe efike ngesikhathi? Eminyakeni yamuva nje izigidi zabantu emhlabeni wonke ziye zaba oFakazi BakaJehova. Bonke kufanele bazi kahle ngomlando wenhlangano abahlanganyela nayo. Ngaphezu kwalokho, ukushumayela kwabo nendlela yabo yokukhulekela kuye kwadlulela emaqenjini ezizwe nezinhlanga emhlabeni wonke futhi kuye kwamukelwa abantu abasha nabadala, kuwo wonke amazinga angokomnotho nangokwemfundo. Ngenxa yalokho, abaningi ababona lokho okwenzekayo banemibuzo ngoFakazi—hhayi nje ngezinkolelo zabo kodwa futhi nangomsuka wabo, umlando wabo, inhlangano yabo, imigomo yabo. Abanye baye babhala izincwadi ngabo, nakuba bengabhali ngendlela engabandlululi ngaso sonke isikhathi. Nokho, akekho owazi umlando woFakazi BakaJehova wosuku lwanamuhla kangcono kunoFakazi ngokwabo. Abahleli balencwadi baye benza umzamo wokunikeza lomlando ngendlela engachemi neqotho. Ngokwenza kanjalo, baye banikeza nobufakazi bokugcwaliseka kwaso kanye isici esiphawulekayo sesibonakaliso sokuba-khona kukaKristu kuze kube manje esilotshwe kuMathewu 24:14, futhi lokhu baye bakwenza ngemininingwane engase inikezwe yilabo kuphela abahileleke ngokujulile emsebenzini owabikezelwa lapho.
Lencwadi ihlukaniswe yaba izingxenye eziyisikhombisa eziyinhloko:
Ingxenye 1: Lengxenye ihlola imisuka engokomlando yoFakazi BakaJehova. Ihlanganisa ukubukezwa okufingqiwe, okufundisayo komlando wabo wosuku lwanamuhla kusukela ngo-1870 kuya ku-1992.
Ingxenye 2: Lokhu ukubukezwa okukhanyiselayo kwentuthuko eqhubekayo yezinkolelo ezihlukanisa oFakazi BakaJehova kwamanye amaqembu enkolo.
Ingxenye 3: Lengxenye yencwadi ihlaziya ukuthuthuka kwesimo sokwakheka kwenhlangano yabo. Ilandisa amaqiniso athakazelisayo ngemihlangano yabo yebandla nemihlangano emikhulu, kanye nendlela abakha ngayo amaHholo OMbuso, amaHholo amakhulu eMihlangano, nezindawo zokunyathelisa izincwadi zeBhayibheli. Iveza intshiseko oFakazi BakaJehova abamemezela ngayo uMbuso kaNkulunkulu nothando olubonakalayo lapho benakekelana ngezikhathi zosizi.
Ingxenye 4: Lapha uzothola imininingwane ethakazelisayo ephathelene nendlela ukumemezela uMbuso kaNkulunkulu okuye kwafinyelela ngayo emazweni amakhulu naseziqhingini ezisemajukujukwini embulungeni yonke. Cabanga nje—ukushumayela emazweni angu-43 ngonyaka ka-1914, kodwa emazweni angu-229 ngonyaka ka-1992! Okuhlangenwe nakho kwalabo abaye bahlanganyela kulokhu kwanda kwembulunga yonke kujabulisa ngempela.
Ingxenye 5: Ukufeza wonke lomsebenzi wokumemezela uMbuso kuye kwadinga ukuba kwakhiwe izindawo zokunyathelisa amaBhayibheli kanye nezincwadi zeBhayibheli emhlabeni wonke ngezilimi ezingaphezu kwamakhulu amabili. Lapha uzofunda ngalesosici somsebenzi wabo.
Ingxenye 6: OFakazi baye babhekana futhi novivinyo—olunye beluthola ngenxa yokungapheleli kobuntu, olunye lubangelwa abazalwane bamanga, kanti ngaphezu kwalokho ngenxa yokushushiswa okuqondile. IZwi likaNkulunkulu laxwayisa ngokuthi lokhu kwakuyokwenzeka. (Luka 17:1; 2 Thimothewu 3:12; 1 Petru 4:12; 2 Petru 2:1, 2) Lengxenye yalencwadi ikulandisa ngokucacile okuye kwenzeka ngempela nendlela ukholo loFakazi BakaJehova oluye lwabenza ngayo ukuba banqobe.
Ingxenye 7: Ekuphetheni, lencwadi ikhuluma ngesizathu esenza oFakazi BakaJehova baqiniseke kakhulu ukuthi inhlangano abayingxenye yayo ngempela iholwa uNkulunkulu. Futhi ichaza ukuthi kungani, bebonke njengenhlangano nanjengabantu ngabanye, bezwa kunesidingo sokuhlala beqaphile.
Ngaphandle kwalokhu okungenhla, lomqulu oklanywe ngendlela ekhangayo uhlanganisa ingxenye enamakhasi angu-50 enhle nefundisa kakhulu yemifanekiso enombala ebonisa indlunkulu yomhlaba wonke kanye nezakhiwo zamagatsha ezisetshenziswa oFakazi BakaJehova emhlabeni wonke.
Uma ubungakenzi kanjalo, ngokuqinisekile uyozuza ngokuthola nangokufunda ikhophi yalencwadi ethakazelisayo.
Ukukhulumela Okuvela Kwabanye Abaye Bayifunda
Kuyini ukusabela kwalabo asebeyifundile kakade lencwadi? Nakhu okumbalwa:
“Ngisanda kuqeda nje ukufunda lencwadi ethakazelisayo, ephilayo, ethi, OFakazi BakaJehova—Abamemezeli BoMbuso KaNkulunkulu. Inhlangano ezinikele ngokwethembeka nangokuthobeka kuphela eqinisweni engabhala ngokungagunci, ngesibindi, nangokucophelela kangaka.”
“Ifundeka njengencwadi yezEnzo, ngokwethembeka nokucaca kwayo.”
“Yeka incwadi entsha evusa ilukuluku! . . . Iwubuciko obungokomlando.”
Ngemva kokufunda cishe ingxenye yalencwadi, indoda ethile yabhala: “Ngafikelwa ukwesaba, ngaphelelwa amazwi, futhi ngacishe ngakhala. . . . Kukho konke ukuphila kwami, ayikho enye incwadi eyake yashukumisa imizwelo kangaka.”
“Inhliziyo yami iyenama ngaso sonke isikhathi lapho ngicabanga ngendlela lencwadi eyoqinisa ngayo ukholo lwabasha kanye nabasanda kuhlanganyela abeza enhlanganweni namuhla.”
“Ngaso sonke isikhathi bengilokhu ngilazisa iqiniso, kodwa ukufunda lencwadi kuye kwavula amehlo ami futhi kwangisiza ukuba ngiqaphele kakhudlwana kunanini ukuthi umoya ongcwele kaJehova yiwona oqondisa konke lokhu.”
[Izithombe ekhasini 18]
Abantu abaningi bafinyelelwa ngesigijimi soMbuso ngisho nalapho oFakazi besembalwa