Sanikwa Iparele Lenani Eliphakeme Kakhulu
NJENGOBA ILANDISWA NGURICHARD GUNTHER
Kwakungu-September 1959. Sasisemkhunjini waseNtaliyane i-Julio Caesar sinqamula i-Atlantic Ocean sisuka eNew York siya eCádiz, eSpain. I-Watch Tower Society yayabele mina, nomkami uRita, kanye noPaul no-Evelyn Hundertmark, omunye umbhangqwana oyizithunywa zevangeli, kulelozwe lase-Iberia. Sasizobhekana nezinselele eziningi. Kodwa kwenzeka kanjani ukuba singenele umsebenzi wezithunywa zevangeli?
MINA noRita sabhapathizwa njengoFakazi BakaJehova ngo-1950 eNew Jersey, e-U.S.A. Ngokushesha ngemva kwalokho, senza isinqumo esasizosilethela iparele lenani eliphakeme kakhulu ngokuhamba kwesikhathi. Sasisebandleni elalinabazalwane nodade abanele ukuba bakhonze insimu. Ngakho sazizwa sibophekile ukuba sizinikele ukuze sikhonze lapho kwakunendingeko enkulu khona yabashumayeli. Emhlanganweni wezizwe woFakazi BakaJehova eNew York City ehlobo lika-1958, senza isicelo senkonzo yezithunywa zevangeli.
Ngokushesha ngemva kwalokho, samenyelwa e-Watchtower Bible School of Gilead, futhi esikhathini esingangonyaka sase sisendleleni eya eSpain njengezithunywa zevangeli. Njengoba sasihileleke emalungiselelweni amaningi futhi sigcwele injabulo, asizange sikuqaphele ngalesosikhathi lokho esasikunikiwe. UJesu wayekhulume ngeparele lenani eliphakeme kakhulu. (Mathewu 13:45, 46) Nakuba lelo kwakungelona iphuzu lomfanekiso wakhe, ilungelo lethu lokukhonza njengezithunywa zevangeli kithi lalifana naleloparele. Uma sibheka emuva, manje sisazisa kakhulu lesisipho esiyigugu senkonzo enhlanganweni kaJehova.
Okuhlangenwe Nakho Okukhumbulekayo
Ngalesosikhathi imfundo yaseGileyadi yezithunywa zevangeli yayiqhutshelwa endaweni enhle yasemaphandleni esifundeni saseFinger Lakes eNew York State. Lapho, sasebenzisa izinyanga eziyisithupha ezimangalisayo sigxile ngokugcwele esifundweni seBhayibheli nasebudlelwaneni bangempela bobuKristu, sihlukanisiwe nezindaba kanye nezinkinga zalelizwe. Abafundi esasikanye nabo babevela ezingxenyeni eziningi zomhlaba, kuhlanganise ne-Australia, iBolivia, iBrithani, iGreece, neNew Zealand. Nokho, ngokushesha kwase kuwusuku lokuthweswa iziqu. Ngo-August 1959, savalelisana amehlo ethu egcwele izinyembezi njengoba sasigibela imikhumbi siya ezabelweni zethu ezihlukahlukene zezithunywa zevangeli. Esikhathini esingangenyanga kamuva safika eSpain.
Umphakathi Omusha
Safikela esikhumulweni esiseningizimu ye-Algeciras, eduze kukadedangendlale weDwala LaseGibraltar. Ngalobobusuku thina sobane, mina noRita nabakwaHundertmark, sagibela isitimela esiya eMadrid. Saya eHhotela iMercador, ukuze silinde kuze kube yilapho sithintwa amalungu ehhovisi legatsha leNhlangano lomshoshaphansi. ISpain yayingaphansi kombuso wobushiqela kaJenene Francisco Franco. Lokhu kwakusho ukuthi okuwukuphela kwenkolo eyayiqashelwa ngokomthetho kulelozwe kwakuyiSonto LamaRoma Katolika. Kwakungekho emthethweni ukuqhuba noma iyiphi enye inkolo obala, futhi umsebenzi wokushumayela endlini ngendlu woFakazi BakaJehova wawuvinjelwe. Ngisho nemihlangano engokwenkolo yayenqatshelwe, kangangokuthi, oFakazi BakaJehova ababengaba ngu-1 200 emabandleni angu-30 eSpain ngalesosikhathi, babengenakuhlangana emaHholo OMbuso njengakwamanye amazwe. Kwakudingeka sihlangane ngasese emakhaya abantu.
Ukufunda iSpanishi Nokuqala Enkonzweni
Inselele yethu yokuqala kwakuwukufunda ulimi. Enyangeni yokuqala sasisebenzisa amahora angu-11 ngosuku sifunda iSpanishi—amahora amane sisekilasini njalo ekuseni, bese kuba namahora angu-7 sizifundela ngokwethu. Enyangeni yesibili kwakungokufanayo ekuseni, kodwa izikhathi zantambama sasizinikela ekushumayeleni endlini ngendlu. Ungacabanga yini ngakho? Nakuba sasingakalwazi ulimi futhi sinesingeniso esisibambe ngekhanda esibhalwe ekhadini, mina noRita saya emsebenzini wendlu ngendlu sisodwa!
Ngikhumbula singqongqoza emnyango eVallecas, indawo yabantu besigaba esisebenzayo eMadrid. Ngiphethe ikhadi lami esandleni, ukuze ngizikhumbuze okumelwe ngikusho, ngathi ngeSpanishi: “Sawubona. Senza umsebenzi wamaKristu. IBhayibheli lithi (bese sifunda umbhalo). Singathanda ukuba uzitholele lencwajana.” Nokho, lentokazi yamane yasibheka, yase ithatha incwajana. Lapho senza impindelo, yasingenisa, futhi njengoba sasikhuluma, yamane yasibheka. Sazama ngangokusemandleni ethu ukuqala nayo isifundo seBhayibheli, futhi phakathi nezifundo, yayimane ilalele futhi isibheke nje. Ekugcineni, ngemva kwesikhathi esithile yasitshela ukuthi yayingazange ikuqonde lokho esasikushilo ekuhambeleni kwethu kokuqala kodwa yayizwe igama elithi Dios (uNkulunkulu), futhi lokho kwakwanele ngayo ukuba yazi ukuthi kwakungokuthile okuhle. Ngokuhamba kwesikhathi, yangenisa ulwazi oluningi lweBhayibheli futhi yabhapathizwa iba omunye woFakazi BakaJehova.
Ukufunda iSpanishi kwakunzima kakhulu kimi. Lapho ngihamba edolobheni, ngangivame ukuzikhumbuza indlela yokuhlelwa kwezenzo. Lokho engangikubambe ngekhanda isonto elilodwa ngangikukhohlwa kwelilandelayo! Kwakudumaza kakhulu. Izikhathi eziningi ngacishe ngayeka. Njengoba ngangikhuluma iSpanishi esisezingeni eliphansi kakhulu, kwakudingeka ukuba abazalwane baseSpain babe nomusa bangibekezelele kakhulu njengoba ngangihola phakathi kwabo. Komunye umhlangano wesigodi, umzalwane othile wanginika isaziso esibhalwe ngesandla ukuba ngisifunde endaweni yesikhulumi. Njengoba nganginobunzima bokufunda lapho ebhale khona, ngamemezela: “Nize nama-muleta (izinduku zokuhamba) enu enkundleni kusasa.” Isaziso kwakumelwe sithi, “Nize nama-maleta (imithwalo) enu enkundleni kusasa.” Yiqiniso, isixuku sahleka, futhi njengokulindelekile ngadumazeka.
Uvivinyo Lokuqala EMadrid
Leyominyaka yokuqala embalwa eMadrid yayinzima kakhulu ngokomzwelo kimi noRita. Sasikhumbula kakhulu ekhaya nabangane. Ngaso sonke isikhathi lapho sithola incwadi evela e-United States, sasikhumbula kakhulu ekhaya. Lezozikhathi zokukhumbula ekhaya zazikhungathekisa, kodwa zadlula. Kakade, sase silishiyile ikhaya, umkhaya, nabangane ukuze esikhundleni sakho samukele iparele lenani eliphakeme kakhulu. Kwakudingeka sizivumelanise nezimo.
Lapho siqala ukuhlala eMadrid, sasihlala endlini eqashisayo engabukeki kahle. Sasinekamelo lethu futhi sidla kathathu ngosuku. Kwakuyikamelo elincane elimnyama, futhi omatilasi babenziwe ngotshani. Imali esasiyikhokha ngenyanga yayiyishaqa yonke imadlana yethu yanyanga zonke. Ngokuvamile ukudla kwasemini sasikudlela kuleyondlu phakathi nosuku, futhi owesifazane owayengumninindlu wayevame ukushiya ukudla kwethu kwakusihlwa kuhhavini ukuze kuhlale kufudumele ukuze ebusuku sibe nokuthile kokukudla. Nokho, njengoba sasihamba emigwaqweni phakathi nosuku nakusihlwa, sasilamba kakhulu. Lapho singenamali esele, sasisebenzisa imadlana yethu siqu elinganiselwe sithenge ushokoledi obiza kancane ukudlula bonke owawungatholakala. Nokho, lesisimo sashintsha ngokushesha lapho sivakashelwa umbonisi weNhlangano ohambela amagatsha. Walubona usizi lwethu wayesethi singafuna isakhiwo esincane ukuze sisisebenzise njengekhaya lezithunywa zevangeli. Nokho, lokhu kwakuzoba ngcono kakhulu kunokugezela kubhavu odilingene ekhishini. Manje sase sizoba ne-shower, isiqandisi esasizogcina ukudla kwethu kuso, nesitofu sikagesi esasizopheka ngaso ukudla kwethu. Sabonga kakhulu ngalokho kucatshangelwa.
Okuhlangenwe Nakho Okumangalisayo EMadrid
Ukushumayela endlini ngendlu kwakuqhutshwa ngokuqapha okukhulu. Isiphithiphithi sansuku zonke saseMadrid sasisizuzisa, sisivimbela ukuba singaphawuleki kakhulu. Sazama ukugqoka nokwenza njengabanye ukuze singaphawuleki njengezihambi. Indlela yethu yokushumayela endlini ngendlu yayiwukungena endlini esesakhiweni, singqongqoze emnyango, sikhulume nomuntu, bese sisishiya lesosakhiwo, umgwaqo, nendawo. Ngaso sonke isikhathi kwakungenzeka ukuthi umninikhaya abize amaphoyisa, ngakho-ke kwakungahlakaniphile ukuya kwamakhelwane. Eqinisweni, ngisho noma babeqaphe ngangokusemandleni abo ekusebenziseni lendlela, uPaul no-Evelyn Hundertmark babanjwa futhi baxoshwa kulelozwe ngo-1960. Baya ePortugal engumakhelwane, bakhonza lapho iminyaka eminingana, uPaul enakekela ihhovisi legatsha elalisebenza ngomshoshaphansi. Namuhla ungumbonisi wedolobha eSan Diego, eCalifornia.
Nokho, kwaba khona ukulinganisa kithi. Ezinyangeni ezimbalwa nje kamuva, izithunywa zevangeli eziyisithupha ezazabelwe ePortugal zayalwa ukuba zilishiye lelozwe! Lokhu kwaletha isenzakalo esijabulisayo ngoba u-Eric noHazel Beveridge, nabo ababesekilasini lethu eGileyadi, manje banikezwa isiqondiso sokuba bashiye iPortugal futhi beze eSpain. Ngakho ngo-February 1962, sasiseHhotela iMercador futhi—kulokhu sizokwamukela u-Eric noHazel lapho befika.
Kwakuphakathi nalezizinsuku zokuqala eMadrid lapho mina noRita sahlangabezana nobuzenzisi benkolo. Sasifunda iBhayibheli nombhangqwana othile, uBernardo noMaria, ababehlala emjondolo owawakhiwe nganoma iziphi izingcezu zezinto zokwakha uBernardo ayengazithola. Sasifunda nawo ebusuku kakhulu, futhi ngemva kwesifundo, wawuvame ukusipha isinkwa, iwayini, noshizi nanoma yini owawunayo. Ngaphawula ukuthi loshizi wawufana ncimishí noshizi waseMelika. Ngobunye ubusuku ngemva kwesifundo, lombhangqwana wakhipha ithini okwakuphuma kulo loshizi. Lalibhalwe ngamagama amakhulu, ngesiNgisi ukuthi, “Kuvela kubantu baseMelika kuya kubantu baseSpain—akumelwe kuthengiswe.” Lomkhaya ompofu wawuthola kanjani loshizi? ISonto LamaKatolika lalisetshenziswa uhulumeni ukuba liwunikeze abampofu. Kodwa umpristi wayewuthengisa!
Inkonzo Enezithelo Nebutho Lezempi
Ngokushesha kwenzeka okuthile okumangalisayo okwakuzoba isibusiso esicebile kithi nakwabanye abaningi. Sathola isaziso esivela ehhovisi legatsha sisicela ukuba sivakashele insizwa okuthiwa uWalter Kiedaisch, eyayihlala esikhungweni seButho Lasemoyeni Lase-United States eTorrejón, eqhele ngamakhilomitha ambalwa eMadrid. Savakashela yona nomkayo, saqala isifundo seBhayibheli nabo kanye nomunye umbhangqwana owawungamalungu eButho Lasemoyeni lapho.
Phakathi nalesosikhathi, cishe ngangiqhuba izifundo zeBhayibheli ezinhlanu nezisebenzi zeButho Lasemoyeni Lase-United States, empeleni zonke ngiziqhuba ngesiNgisi. Phakathi kwalabo, abangu-7 babhapathizwa kamuva, futhi ngemva kokuphindela e-United States, amane alamadoda aba abadala bebandla.
Lesi kwakuyisikhathi lapho kwakunezindlela ezimbalwa kakhulu zokungenisa izincwadi, omagazini, namaBhayibheli kulelizwe ngenxa yokuvinjelwa komsebenzi wethu. Nokho, izincwadi ezithile zazilethwa izihambi ezibuka izwe nabantu abathile esibaziyo baseMelika. Igatsha langabela ukuba nginakekele idepho yangasese yezincwadi. Yayisekamelweni lokugcina impahla ngemuva kwesitolo esithengisa izincwadi nezinto zokubhala eVallecas. Umkamninisitolo wayengomunye woFakazi BakaJehova. Nakuba ayengeyena uFakazi, umninisitolo wayewuhlonipha umsebenzi wethu, ngisho noma ayezifaka yena nebhizinisi lakhe engozini enkulu, wangivumela ukuba ngisebenzise lendawo engemuva ukuze ngilungiselele amaphakethe ezincwadi ezazizothunyelwa emadolobheni akulo lonke lelozwe. Njengoba ukubukeka kwalelikamelo kwakufanele ngaso sonke isikhathi kufanelane nalokho elalikuhloselwe—ikamelo elinezintuli, eligcwele imfuhlumfuhlu yamabhokisi—kwadingeka ukuba ngakhe ibhentshi lokusebenzela namashalofu ezincwadi ayengase amiswe futhi alungele ukuba kusetshenzelwe kuwo ngokushesha futhi akwazi ukufihleka ngemizuzwana nje. Ekupheleni kosuku, ngangilinda kuze kube yilapho kungasenamuntu esitolo ukuze ngiphume ngokushesha namaphakethe ami.
Kwakuyilungelo langempela ukuhlanganyela ekusakazeni ukwaziswa okungokomoya, njengomagazini INqabayokulinda ne-Phaphama! nezinye izincwadi, emabandleni akulo lonke lelozwe. Lezo kwakuyizikhathi ezijabulisayo.
URita wayejabulela ukuqhuba izifundo zeBhayibheli ezingu-16, cishe ingxenye yazo eyaba oFakazi BakaJehova ababhapathiziwe. UDolores wayengowesifazane oshadile osemusha owachitha bonke ubusika obubandayo elele ngenxa yenkinga yenhliziyo. Entwasahlobo wayevuka futhi asebesebenze ngandlela-thile. Ukholo lukaDolores lwaluqinile, ngakho lapho kufika isikhathi somhlangano wethu wesigodi eToulouse, eFrance, wayefuna kakhulu ukuya kuwo. Udokotela wamxwayisa ngokuthi kwakuzoba okungahlakaniphile ngenxa yesimo senhliziyo yakhe. Ezigqokele ingubo yakhe yasekhaya namahliphasi futhi engaphethe mthwalo, wehlela esiteshini sesitimela ukuze avalelise umyeni wakhe, unina, nabanye ababehamba. Wagcwala izinyembezi emehlweni, wayengenakukubekezelela ukubabona behamba yena esala, ngakho wagibela esitimeleni, futhi nguye lowaya eselibangise eFrance! URita wayengazi lutho ngalokhu okwakwenzekile. Kodwa emhlanganweni, yeka indlela amangala ngayo lapho ebona uDolores, emamatheka kuvele nelomhlathi!
Isifundo SeBhayibheli Esingavamile
Asinakukuphetha lokhukulandisa ngesabelo sethu saseMadrid ngaphandle kokuhlanganisa uDon Benigno Franco, “el profesor.” UFakazi wendawo wahamba nami ukuyovakashela umnumzane othile osekhulile owayehlala nomkakhe esakhiweni sabantu abampofu kakhulu. Ngaqala isifundo seBhayibheli naye. Ngemva kokufunda naye isikhathi esingaba unyaka nengxenye, wacela ukubhapathizwa futhi abe omunye woFakazi BakaJehova.
Lomnumzane osekhulile, uDon Benigno Franco, wayengumzala kaFrancisco Franco, umashiqela waseSpain ngalesosikhathi. Kubonakala sengathi uDon Benigno wayengumuntu othanda inkululeko ngaso sonke isikhathi. Phakathi neMpi Yombango YaseSpain, wazwelana neRepublic futhi emelene nomzala wakhe—ujenene owanqoba empini futhi wasungula ubushiqela bamaKatolika. Kusukela ngo-1939, uDon Benigno wayenqatshelwe ukusebenza, futhi ukuphila kwakhe kulinganiselwe ezintweni ezincane kakhulu. Ngakho ngaleyondlela umzala kaJenene Francisco Franco, umashiqela waseSpain kwezempi, waba ngomunye woFakazi BakaJehova.
Isimemo Esimangalisayo
Ngo-1965 ihhovisi legatsha laseSpain lasimemela ukuba siyoqala umsebenzi wesifunda eBarcelona. Lokhu kwakusho ukushiya bonke abazalwane abanothando esase sisondelene kakhulu nabo eMadrid. Manje kwakungesona isiqalo sokuhlangenwe nakho okusha nje kuphela kodwa, kimi kwakuwuvivinyo. Lokhu okuhlangenwe nakho kwakwethusa ngenxa yokuthi ngangilingabaza njalo ikhono lami. Ngazi kahle ukuthi uJehova owangenza ngaphumelela kulomkhakha wenkonzo.
Ukuvakashela ibandla isonto ngalinye kwakusho ukuhlala emizini yabazalwane. Kwadingeka sihlale imithwalo isobhokweni, futhi cishe njalo emasontweni amabili, sasithuthela komunye umuzi. Lokhu kunzima ikakhulukazi ngowesifazane. Kodwa ngokushesha uJosé noRoser Escudé, ababehlala eBarcelona, basimema ukuba sihlale nabo izinsuku eziningana. Lokhu kwakuwukubonakalisa uthando ngabo, ngoba kwasho ukuthi sesizoba nendawo eyodwa esasizogcina kuyo njalo izimpahla zethu nendawo enjengekhaya esasingeza kuyo ngamaSonto kusihlwa.
Mina noRita sasebenzisa iminyaka emine eyalandela emsebenzini wesifunda esifundazweni saseCatalonia, esiseMediterranean Coast. Yonke imihlangano yethu yeBhayibheli yayiqhutshwa ngasese emakhaya abantu, futhi ukushumayela kwethu endlini ngendlu nakho kwakwenziwa ngokuqapha ukuze singadonsi ukunaka kwabantu. Ngezinye izikhathi sasihlanganisa lonke ibandla ngeSonto ukuze sibe ‘nepikiniki’ ehlathini, ikakhulukazi lapho siqhuba umhlangano wesifunda.
Siyohlala sibazisa abazalwane abaningi abangokomoya abazinikele abazifaka engozini yokulahlekelwa imisebenzi nenkululeko yabo, bezikhandla ukuze bagcine amabandla enobunye futhi eshiseka. Iningi labo lalihola ekwandiseni lomsebenzi emadolobheni amancane angaphandle kwalelidolobha. Lokhu kwabeka isisekelo sokwanda okukhulu eSpain ngemva kokuba ukuvinjelwa kususiwe futhi kwanikezwa inkululeko engokwenkolo ngo-1970.
Lapho Kudingeka Sishiye Isabelo Sethu Sakwamanye Amazwe
Phakathi neminyaka eyishumi siseSpain, ukujabulela kwethu lesisibusiso esikhethekile sokukhonza uJehova konakaliswa isimo sabazali bethu. Ezikhathini eziningi, cishe kwakudingeka ukuba sishiye isabelo sethu siphindele ekhaya ukuze sinakekele umama nobaba. Nokho, ngenxa yabazalwane nodade abanothando emabandleni akhelene nabazali bami, sakwazi ukuqhubeka eSpain. Yebo, ngaleyominyaka ilungelo lokukhonza emsebenzini wezithunywa zevangeli ngokwengxenye laliphumelela ngenxa yabathile ababehlanganyela nathi ekubekeni izithakazelo zoMbuso kaNkulunkulu kuqala.
Ekugcineni, ngo-December 1968, saya ekhaya ukuze siyonakekela umama. Ngayo kanye leyonyanga ubaba washona, futhi umama manje wayesesele yedwa. Njengoba sasisakhululekile ngezinga elithile ukukhonza isikhathi esigcwele, sathola isabelo sokuyokhonza emsebenzini wesifunda kodwa kulokhu e-United States. Eminyakeni engu-20 eyalandela, sakhonza izifunda zabantu abakhuluma iSpanishi. Nakuba sasilahlekelwe iparele lethu lenani eliphakeme kakhulu lokuba izithunywa zevangeli, kwabekwa elinye ezandleni zethu.
Ukushumayela Phakathi Kwezidakamizwa Nobudlova
Manje sasikhonza kanye nabazalwane nodade abaningi ababephila ezingxenyeni zamadolobha ezikhungethwe ubugebengu. Phela, ngalo kanye isonto lokuqala emsebenzini wesifunda eBrooklyn, eNew York, uRita wahlwithwa isikhwama sakhe esigaxwayo.
Ngesinye isikhathi mina noRita sasinelinye iqembu elalihlanganyela emsebenzini wokushumayela endlini ngendlu kwenye ingxenye yeNew York City. Lapho sijika nje ekhoneni, sabona abantu abathile ababemi bewuhide phambi kwembobo esodongeni lwesakhiwo esasingasasetshenziswa. Njengoba sasithatha amagxathu ambalwa sinyuka ngomgwaqo, sabona osemusha othile owayemi endleleni yabahamba ngezinyawo esibhekile. Kwakunomunye kwelinye ikhona eliqhelile egade izimoto zamaphoyisa. Sasingene endaweni okuthengiswa kuyo izidakamizwa! Owokuqala owayegadile wayethukile, kodwa wabe esebona umagazini INqabayokulinda futhi wakhululeka. Kakade, kwakungenzeka ngibe iphoyisa! Khona-ke wamemeza ngeSpanishi, “¡Los Atalayas! ¡Los Atalayas!” (Ama-Watchtower! Ama-Watchtower!) Babazi ukuthi singobani, besibiza ngomagazini futhi konke kwakuhamba kahle. Njengoba ngangidlula eduze kwakhe, ngathi, “¿Buenos dias, como está?” (Sawubona, unjani?) Waphendula ngokungicela ukuba ngimthandazele!
Isinqumo Esinzima
Ngo-1990 kwacaca ukuthi kwakuzomelwe ngibe nomama nsuku zonke. Sasizame kanzima ukuhlala emsebenzini wokujikeleza, kodwa ukuhlakanipha kwakwenza kwakhanya ukuthi kwakungenakwenzeka ukuba sizifeze zombili lezizibopho. Empeleni sasifuna ukuqiniseka ukuthi umama wayenakekelwa ngothando. Kodwa kwase kudingeka ukuba siphinde silahle iparele lenani eliphakeme kakhulu, okuthile okwakuyigugu kakhulu kithi. Wonke amagugu angokoqobo asezweni nakho konke angakwenzela umuntu kuncane kakhulu uma kuqhathaniswa namagugu okukhonza njengesithunywa sevangeli noma njengombonisi ojikelezayo enhlanganweni kaJehova.
Manje mina noRita siseminyakeni yawo-60. Saneliseke ngempela futhi siyakujabulela ukukhonza nebandla lendawo elikhuluma iSpanishi. Njengoba sikhumbula iminyaka yethu sisenkonzweni kaJehova, siyambonga ngokusiphathisa amaparele athile enani eliphakeme kakhulu.
[Isithombe ekhasini 23]
NginoRita kanye noPaul no-Evelyn Hundertmark (kwesokudla) ngaphandle kwenkundla yaseMadrid okulwela kuyo izinkabi
[Isithombe ekhasini 24]
Ukukhonza ibandla “epikinikini” ehlathini