Ingabe Kufanelekile Ukungabaza UJesu?

INGABE uJesu waseNazaretha wazenza ngempela izimangaliso? Ingabe wavuswa kwabafileyo, njengoba kwamemezela abafundi bakhe? Ingabe khona wake waphila nje? Enkathini yethu yesimanje, abaningi babonakala behluleka ukuphendula imibuzo enjalo ngokuqiniseka. Ngani? Ngoba banokungabaza ngoJesu, futhi ukungabaza kuyimizwa yokungaqiniseki, ukungazi ukuthi okuthile kuyiqiniso noma kungenzeka. Kodwa ingabe imizwa yokungaqiniseki ngokuphathelene noJesu ifanelekile? Ake sibone.

Indlela Okwahlwanyelwa Ngayo Ukungabaza UJesu

Izazi ezithile zemfundiso yenkolo zaseJalimane zasekupheleni kwekhulu le-19 nasekuqaleni kwelama-20 zachaza uJesu ‘njengomuntu oqanjiwe weSonto lasendulo.’ Ukuphikisa kwazo ukuba ngokomlando kukaJesu kwaholela empikiswaneni phakathi kwezazi ekuqaleni kwaleli khulu leminyaka eyafinyelela emphakathini ngaleso sikhathi futhi esenethonya nanamuhla. Ngokwesibonelo, ukuhlola kwamuva eJalimane kwembule ukuthi amaphesenti amathathu alabo okwaxoxwa nabo akholelwa ukuthi uJesu “akakaze aphile” nokuthi “abaphostoli bamsungula.” Yebo, imbewu yokungabaza uJesu eyahlwanyelwa ekuqaleni kwaleli khulu leminyaka iyachuma ezinhliziyweni zabantu ngisho namanje.

Kungani isiphetho sokuthi uJesu ‘wasungulwa’ simane nje singafanelekile? Isazi seBhayibheli uWolfgang Trilling siyaphawula: “Impikiswano yokuthi uJesu wake waphila yini, ngamanye amazwi ukuthi wayengumuntu ongokomlando noma insumansumane, yaxazululwa. Lendaba yaxazululwa ngendlela enobuhlakani, okungenani ngendlela yokuthi abantu abanengqondo ehluzekile abasayibheki lenkinga njengendaba ecatshangelwayo.” Noma kunjalo, abanye basakungabaza ukuthi uJesu wake waba khona. Ngenxa yalokho, ake sihlole indlela umuntu angakuqinisekisa ngayo ukuthi uJesu ungokomlando futhi asuse nokunye ukungabaza ngokuphathelene naye.

Ubufakazi Obuchitha Ukungabaza

Ukubulawa kukaJesu okuyihlazo njengeselelesi esidelelekile kunikeza “iphuzu eligculisa kunawo wonke elimelene nabaphikisi bokuba ngokomlando kukaJesu,” kusho uTrilling. Ngani? Ngoba lokhu kubulawa “kwaphazamisa, kwabambezela ngisho nokubambezela, ukusabalaliswa kokholo olusha phakathi kwamaJuda nabangemaJuda.” (Qhathanisa neyoku-1 Korinte 1:23.) Uma ukubulawa kukaJesu uMesiya kwakuwukuhlambalaza okunjalo kumaJuda nakwabeZizwe, ngokuqinisekile kwakungenakuba okusungulwe abaphostoli! Ngaphezu kwalokho, ukufa kukaJesu akuqinisekiswa neze amaVangeli amane kuphela njengesenzakalo esingokomlando kodwa kuqinisekiswa nawumlobi ongumRoma uTacitus kanye nayiTalmud yamaJuda.a

Ezinye izenzakalo phakathi nokuphila kukaJesu nazo zibhekwa njengobufakazi bangaphakathi obunikeza izizathu zokukholelwa emaVangelini, ngakho-ke ziwubufakazi balezo zinto asitshela zona ngaye. Ngokwesibonelo, ingabe abalandeli bakaJesu babengazisungulela ukuza kwakhe evela eNazaretha, indawo okubonakala sengathi yayingabalulekile? Noma kungenzeka yini ukuthi babengazisungulela bona ukukhashelwa kwakhe uJuda, umngane owayethenjwa? Ingabe kubonakala kuyinto engokoqobo ukucabanga ukuthi babengaqamba indaba yokushiywa kukaJesu yibo bonke abafundi ngendlela ewubugwala kanjena? Ngokuqinisekile akunangqondo ukuthi abafundi babengakha imininingwane elimaza kangaka bese beyimemezela kuyo yonke indawo! Ngaphezu kwalokho, ubuciko bokufundisa obabusetshenziswa uJesu babuyingqayizivele. Izincwadi zamaJuda zekhulu lokuqala azinalutho olungaqhathaniswa nemifanekiso yakhe. Imuphi lomuntu mumbe ‘owayengasungula’ umsebenzi owubuciko kanjena njengeNtshumayelo Yasentabeni? Wonke lamaphuzu aqinisekisa ukuba nokwethenjelwa kwamaVangeli njengayimibiko yokuphila kukaJesu.

Kukhona futhi nobufakazi bangaphandle bokuba ngokomlando kukaJesu. AmaVangeli amane amveza njengonesizinda esithile, esinemininingwane enembile, esingokomlando. Izindawo, njengeBetlehema neGalile; abantu namaqembu avelele, njengoPontiyu Pilatu nabaFarisi; kanye namasiko amaJuda nezinye izinto ezimangalisayo akuzange kumane kuqanjwe nje. Kwakuyingxenye yesimo sokuphila ekhulwini lokuqala, futhi kuye kwaqinisekiswa yimithombo engeyona engokweBhayibheli nayizinto ezitholiwe eziyimivubukulo.

Ngakho, kunobufakazi obuqand’ ikhanda, kokubili bangaphakathi nobangaphandle, bokuthi uJesu ungumuntu ongokomlando.

Nokho, abantu abaningi impela bangabaza izimangaliso ayehileleke kuzo. Eqinisweni, ngokokuhlola okucashunwe ngenhla, bayingcosana kuphela abantu baseJalimane abasontayo abakholelwa ngokuqinile ukuthi izimangaliso zikaJesu nokuvuka kwakhe “kwenzeka ngempela.” Ingabe kufanelekile ukungabaza izimangaliso nokuvuka kukaJesu?

Okwenza Abanye Bangabaze Izimangaliso ZikaJesu

UMathewu 9:18-36 ubika ukuthi uJesu waphulukisa ngokuyisimangaliso abagulayo, wavusa abafileyo, futhi waxosha amademoni. UProfesa Hugo Staudinger, isazi-mlando, uyaphawula: “Kumane nje akukholeleki, futhi ngokombono ongokomlando akunakwenzeka, ukuthi lemibiko engavamile iwumkhiqizo womcabango obukhali.” Ngani? Ngoba kubonakala sengathi amaVangeli okuqala ngqá alotshwa ngesikhathi lapho iningi lofakazi bokuzibonela lezi zimangaliso lisaphila! Ukuqinisekisa okwengeziwe kutholakala ekutheni, njengoba uStaudinger eqhubeka esho, abaphikisi abangamaJuda “abazange nanini baphike ukuthi uJesu wenza imisebenzi engavamile.” Lapho singabunaki bonke obunye ubufakazi futhi simane sisekele umbono wethu kulobu bufakazi bangaphandle, sithola ukuthi ngokuqinisekile izimangaliso zikaJesu zikufanele ukuba sizikholelwe.—2 Thimothewu 3:16.

Nakuba “iningi labantu baseJalimane liqiniseka ukuthi uJesu waphulukisa abantu abagulayo,” abaningi banokungabaza ngokuphathelene namandla ayebangela lokhu kuphulukisa. Ngokwesibonelo, isazi semfundiso yenkolo esidumile saseJalimane sasho obala ukuthi ukuphulukisa okwakwenziwa uJesu kwakuwumphumela wamandla okuluthwa kwengqondo okwakuthonya abantu ababecindezelekile ngokwengqondo. Ingabe lena incazelo enengqondo?

Ake ucabangele lokhu. UMarku 3:3-5 ubika ukuthi uJesu welapha isandla sendoda ethile esasishwabene. Kodwa ingabe isandla esishwabene siwumphumela wokucindezeleka kwengqondo? Ngokuqinisekile akunjalo. Ngenxa yalokho, lokhu kuphulukisa akunakuthiwa kwabangelwa amandla okuluthwa kwengqondo. Ngakho yini eyenza uJesu wakwazi ukwenza izimangaliso? UProfesa Staudinger uyavuma: “Uma kungekho mithetho esebenza ngokugcwele, futhi uma umuntu engamphiki ngokuphelele uNkulunkulu, khona-ke ngokuyisisekelo umuntu akanakukususa ukuba nokwenzeka kokuthi uNkulunkulu, omandla akhe angaphezu kwawomuntu, uyakwazi ukwenza izinto ezingavamile.” Yebo, ngempela, ngosizo ‘lwamandla kaNkulunkulu,’ uJesu wabaphulukisa ngokoqobo abantu ababegula. Ngakho akukho sizathu sokungabaza ubuqiniso bezimangaliso zakhe.—Luka 9:43; Mathewu 12:28.

Njengoba i-American Peoples Encyclopedia ikubeka, uma isimangaliso esikhulu kunazo zonke—ukuvuka kukaJesu—senzeka, zonke ezinye izimangaliso ezibikwe emaVangelini “zingenzeka.” Ingabe uJesu wavuswa ngempela kwabafileyo?

Ingabe Kufanelekile Ukungabaza Ukuvuka KukaJesu?

Okokuqala cabangela isici sobufakazi obunamandla obuphathelene nalendaba obusekela ukuba yiqiniso kokuvuka kukaJesu—ithuna lakhe elingenalutho. Iqiniso lokuthi ithuna likaJesu latholakala lingenalutho alizange liphikiswe abantu ababephila ngesikhathi sakhe, ngisho nayilabo ababengabaphikisi bakhe. (Mathewu 28:11-15) Ukukhohlisa kwakungase kudalulwe kalula! Incwadi okubhekiselwa kuyo ephawulwe ngenhla iphetha ngokufanele ngokuthi: “Akukho ncazelo ezwakalayo yethuna elingenalutho eyake yasikiselwa ngaphandle kwalamazwi aseBhayibhelini, ‘Akekho lapha; ngoba uvukile’ (Math. 28:6).”

Abanye bayakuphikisa lokhu, bethi kwakungabafundi bakaJesu uqobo kuphela abamemezela yonke indawo ukuthi wayenguMesiya ovusiwe. Kuyiqiniso lokhu. Kodwa ingabe ukuba yiqiniso kwesigijimi sabo kwakungasekelwe yini ngokuqinile eqinisweni elingokomlando, ikakhulukazi ukufa nokuvuka kukaJesu? Yebo. Umphostoli uPawulu wayekuqaphela lokhu kuhlangana lapho ebhala: “Uma uKristu engavuswanga, ukushumayela kwethu ngokuqinisekile kuyize, nokholo lwethu luyize. Ngaphezu kwalokho, sitholakala singofakazi bakaNkulunkulu bamanga, ngoba sifakazile ngokumelene noNkulunkulu ukuthi wamvusa uKristu.”—1 Korinte 15:14, 15; qhathanisa noJohane 19:35; 21:24; Heberu 2:3.

Ekhulwini lokuqala, kwakunabantu abaningi ababaziwa kahle futhi ababengakufakazela ukubonakala kukaJesu ngemva kokufa kwakhe. Phakathi kwabo kwakungabaphostoli abangu-12 noPawulu, kanye nabanye ofakazi bokuzibonela abangaphezu kuka-500.b (1 Korinte 15:6) Khumbula futhi isizathu esenza ukuba uMathiya akwazi ukufinyelela izimfuneko zokuba alandele umphostoli ongakholekanga uJuda. IzEnzo 1:21-23 zibika ukuthi uMathiya wayengakufakazela ukuvuka kukaJesu nezinye izenzakalo zangaphambili ezaziphathelene naYe. Uma ukuphila nokuvuka kukaJesu kwakuyindaba eqanjiwe kunokuba kube iqiniso, imfuneko enjalo ngalowo owayezomiswa ngokuqinisekile yayiyoba engenangqondo ngokuphelele.

Ngenxa yokuthi ofakazi bokuzibonela abaningi kakhulu bekhulu lokuqala babengakufakazela ukuphila, izimangaliso, ukufa, nokuvuka kukaJesu, ubuKristu basakazeka ngokushesha ngokwezinga elithile kuwo wonke uMbuso WaseRoma, naphezu kwezithiyo eziphawulwe ngenhla. Abalandeli bakhe babezimisele ukubekezelela ubunzima, ushushiso, ngisho nokufa ukuze bamemezele kuyo yonke indawo uvuko neqiniso eliyisisekelo elivela kulo. Liphi iqiniso? Lokuthi ukuvuka kwakhe kwakwenzeke kuphela ngenxa yamandla kaNkulunkulu. Futhi kungani uJehova uNkulunkulu ayevuse uJesu kwabafileyo? Impendulo yalowo mbuzo ibonisa ukuthi ungubani loJesu ongokomlando.

Ngosuku lwePentekoste, ngokukhululekile umphostoli uPetru wamemezela kumaJuda ayemangele eJerusalema: “LoJesu uNkulunkulu wamvusa, okuyiqiniso esingofakazi balo sonke. Ngakho-ke ngenxa yokuthi waphakanyiselwa esandleni sokunene sikaNkulunkulu futhi wamukela kuBaba umoya ongcwele othenjisiwe, uthululé lokhu enikubonayo nenikuzwayo. Empeleni uDavide akazange anyukele emazulwini, kodwa yena ngokwakhe uthi, ‘UJehova wathi eNkosini yami: “Hlala kwesokunene sami, ngize ngibeke izitha zakho njengesenabelo sezinyawo zakho.”’ Ngakho-ke yonke indlu ka-Israyeli mayazi ngokuqinisekile ukuthi uNkulunkulu wamenza kokubili iNkosi noKristu, loJesu enambethela.” (IzEnzo 2:32-36) Yebo, uJehova uNkulunkulu wenza uJesu waseNazaretha “kokubili iNkosi noKristu.” Ingabe kufanelekile ukungabaza indima yakhe kulengxenye yenjongo kaNkulunkulu?

Kungani Ungabaza Indima KaJesu Yamanje?

Kungasuswa kanjani konke ukungabaza ngokuphathelene nokuthi ungubani uJesu kanye nendima yakhe? Ngeqiniso lokuthi ngokucacile wayengumprofethi weqiniso. Wabikezela izimpi, indlala, ukuzamazama komhlaba, ubugebengu, nokuntuleka kothando esikubonayo namuhla. Ngaphezu kwalokho, wabikezela: “Lezizindaba ezinhle zombuso ziyoshunyayelwa emhlabeni wonke owakhiweyo ngenjongo yobufakazi ezizweni zonke; khona-ke ukuphela kuyofika.” (Mathewu 24:3-14) Ukugcwaliseka kwalezi ziprofetho kufakazela ukuthi uJesu unguKristu ovusiwe, obusa ngokungabonakali ‘phakathi kwezitha zakhe,’ futhi ngokushesha uzokwethula izwe elisha likaNkulunkulu.—IHubo 110:1, 2; Daniyeli 2:44; IsAmbulo 21:1-5.

Manje kunanini ngaphambili, isintu simdinga ngokuphuthumayo uMsindisi onokuhlakanipha okungaphezu kokomuntu. Kungani singabaza ukuthi uJesu nguye okhethwe ngokufanele ukuba asindise isintu? UJohane, owayengufakazi wokuzibonela izimangaliso ezishukumisayo nokuvuka kukaJesu, wamemezela: “Ngaphezu kwalokho, nathi ngokwethu sibonile futhi siyafakaza ukuthi uBaba uthumele iNdodana yakhe njengoMsindisi wezwe.” (1 Johane 4:14; qhathanisa noJohane 4:42.) Njengoba nje singenaso isisekelo esinengqondo sokungabaza ukuba khona kukaJesu, izimangaliso, ukufa, nokuvuka, asinasizathu sokungabaza ukuthi uye wabekwa esihlalweni sobukhosi uJehova uNkulunkulu njengeNkosi engokomthetho esandleni saKhe sokunene. Ngokungangabazeki, uJesu waseNazaretha uyiNkosi yoMbuso kaNkulunkulu ‘noMsindisi wezwe.’—Mathewu 6:10.

[Imibhalo yaphansi]