Thembela KuJehova NeZwi Lakhe
“Abalaziyo igama lakho bayakwethemba wena.”—IHUBO 9:10.
1. Kungani singaqhubeka sithembela kuJehova neZwi lakhe osukwini lwethu lwanamuhla?
KULELIZWE lesimanje, isimemo sokuthembela kuNkulunkulu neZwi lakhe, iBhayibheli, singase sibonakale singahlakaniphile futhi singekhona ukubhekana namaqiniso. Nokho, ukuhlakanipha kukaNkulunkulu kuye kwazibonakalisa kungashayi phansi. UMdali wendoda nowesifazane unguMsunguli womshado nomkhaya, futhi uzazi kangcono izidingo zethu kunanoma ubani omunye. Njengoba nje izidingo zomuntu eziyisisekelo zingazange zishintshe, kanjalo nezindlela eziyinhloko zokuhlangabezana nalezo zidingo zisalokhu zinjalo. Iseluleko seBhayibheli esihlakaniphile, nakuba salotshwa emakhulwini eminyaka adlule, sisanikeza isiqondiso esihle kakhulu ukuze siphumelele ekuphileni nasekuxazululeni izinkinga. Ukusilalela kuphumela enjabulweni enkulu—ngisho nakulelizwe elithuthukile, lezesayensi esiphila kulo!
2. (a) Ukulalela imiyalo kaNkulunkulu kuye kwaba naziphi izithelo ezinhle ekuphileni kwabantu bakaJehova? (b) Yikuphi okunye uJehova akuthembisa labo abalalela yena neZwi lakhe?
2 Ukuthembela kuJehova nokusebenzisa izimiso zeBhayibheli kuletha izinzuzo eziwusizo nsuku zonke. Ubufakazi balokhu bubonakala ekuphileni kwezigidi zoFakazi BakaJehova emhlabeni wonke abaye baba nokuqiniseka nesibindi sokusebenzisa iseluleko seBhayibheli. Kubo, ukuthembela kuMdali neZwi lakhe kuye kwaba yinto efanelekile. (IHubo 9:9, 10) Ukulalela imiyalo kaNkulunkulu kuye kwabenza baba abantu abangcono uma kuziwa ekuhlanzekeni, ukuthembeka, ukukhuthala, ukuhlonipha ukuphila nezinto zabanye, nokulinganisela ekudleni nasophuzweni. Kuye kwaholela othandweni olufanele nasekuqeqeshekeni emkhayeni—baba abangenisa izihambi, abanesineke, abanesihe, nabathethelelayo—kanye nakwezinye izinto eziningi. Ngokwezinga elikhulu baye bakwazi ukugwema izithelo ezimbi zentukuthelo, inzondo, ukubulala, umona, ukwesaba, ubuvila, ukuqhosha, ukuqamba amanga, ukunyundela, ukuziphatha okuxekethile nokuziphatha okubi. (IHubo 32:10) Kodwa uNkulunkulu wenza okungaphezu kokuthembisa isiphetho esihle kulabo abagcina imithetho yakhe. UJesu wathi labo abalandela indlela yobuKristu babeyokwamukela “ngokuphindwe ngekhulu manje kulenkathi yesikhathi, . . . onina nabantwana namasimu, kanye nokushushiswa, futhi esimisweni sezinto esizayo ukuphila okumi phakade.”—Marku 10:29, 30.
Gwema Ukuthembela Ekuhlakanipheni Kwezwe
3. Njengoba eqhubeka ethembela kuJehova neZwi lakhe, yiziphi izinkinga amaKristu abhekana nazo ngezinye izikhathi?
3 Inkinga yabantu abangaphelele iwukuthi bathambekele ekukuthatheni kalula noma bakukhohlwe lokho uNkulunkulu akufunayo. Kalula nje baqala ukucabanga ukuthi bazi kangcono noma ukuthi ukuhlakanipha kwezihlakaniphi zalelizwe kungaphezu kokukaNkulunkulu, ukuthi yikhona okuhambisana nesikhathi. Izinceku zikaNkulunkulu nazo zingaba nalesi simo sengqondo, njengoba ziphila kulelizwe. Ngakho, lapho edlulisela isimemo sothando sokuba kulalelwe iseluleko sakhe, uBaba wethu wasezulwini uhlanganisa nalezi zixwayiso ezifanelekile: “Ndodana yami, ungakhohlwa umthetho wami, kepha inhliziyo yakho mayigcine imiyalo yami, ngokuba iyakwenezela kuwe ubude bezinsuku, neminyaka yokuphila, nokuthula. Themba kuJehova ngayo yonke inhliziyo yakho, ungenciki kokwakho ukuqonda. Mazise yena ezindleleni zakho zonke, uyakuqondisa imikhondo yakho. Ungabi-ngohlakaniphileyo emehlweni akho; mesabe uJehova, udede ebubini.”—IzAga 3:1, 2, 5-7.
4. Kusabalele kangakanani “ukuhlakanipha kwalelizwe,” futhi kungani “kuwubuwula kuNkulunkulu”?
4 Ukuhlakanipha kwalelizwe kuyinala futhi kutholakala emithonjeni eminingi. Kunezikhungo eziningi zokufunda, futhi “ukwenza izincwadi eziningi akunakuphela.” (UmShumayeli 12:12) Manje lokho okuthiwa umgwaqo omkhulu wokwaziswa wezama-computer kuthembisa ukunikeza ukwaziswa okungapheli cishe nganoma yini. Kodwa ukuba nalo lonke lolu lwazi akwenzi izwe lihlakaniphe kangcono noma lixazulule izinkinga zalo. Kunalokho, isimo sezwe siya siba sibi nsuku zonke. Kuyaqondakala ukuthi kungani iBhayibheli lisitshela ukuthi “ukuhlakanipha kwalelizwe kuwubuwula kuNkulunkulu.”—1 Korinte 3:19, 20.
5. Yiziphi izixwayiso ezinikezwa yiBhayibheli mayelana ‘nokuhlakanipha kwalelizwe’?
5 Phakathi nalengxenye yokugcina yezinsuku zokugcina, kumelwe kulindelwe ukuthi umkhohlisi omkhulu, uSathane uDeveli, uyosungula amanga amaningi ezama ukululaza ukuthembela ekubeni iqiniso kweBhayibheli. Abacusumbuli baye bakhiqiza inqwaba yezincwadi ezinemibono ecatshangelwayo, ezikubekela inselele ukuba yiqiniso nokuba nokwethenjelwa kweBhayibheli. UPawulu waxwayisa umKristu ayekanye naye: “O Thimothewu, kuqaphe lokho ophathiswe khona, uzifulathela izinkulumo ezingenangqondo ezingcolisa okungcwele nokuphikisana okubizwa ngokungeyikho ngokuthi ‘ulwazi.’ Ngokugabisa ngolwazi olunjalo abanye baye baphambuka okholweni.” (1 Thimothewu 6:20, 21) IBhayibheli liqhubeka lixwayise: “Xwayani: mhlawumbe kungase kube khona othile oyomuka nani njengezisulu zakhe ngefilosofi nenkohliso eyize ngokwesiko labantu, ngokwezinto zokucathula zezwe futhi hhayi ngokukaKristu.”—Kolose 2:8.
Yilwa Nokuthambekela Kokungabaza
6. Kungani kudingeka ukuqapha ukuze kuvinjelwe ukungabaza ukuba kugxile enhliziyweni?
6 Elinye isu lobuqili likaDeveli ukuhlwanyela ukungabaza engqondweni. Uhlale ekuphaphamele ukubona ubuthakathaka obuthile okholweni futhi asizakale ngabo. Noma ubani onokungabaza kufanele akhumbule ukuthi obangela lokho kungabaza yilowo owathi ku-Eva: “Ngempela uNkulunkulu ushilo yini ukuthi: Ningadli emithini yasensimini, na?” Lapho nje uMlingi esefake ukungabaza engqondweni yakhe, isinyathelo esilandelayo kwaba ukumtshela amanga, awakholelwa. (Genesise 3:1, 4, 5) Ukuze sigweme ukuba ukholo lwethu lonakaliswe ukungabaza njengoluka-Eva, kudingeka sibe abaqaphile. Lapho inhlansi yokungabaza ngoJehova, iZwi lakhe, noma inhlangano yakhe isiqale ukwakhela enhliziyweni yakho, thatha izinyathelo ngokushesha zokuyisusa ngaphambi kokuba ikhule ibe yinto engonakalisa ukholo lwakho.—Qhathanisa neyoku-1 Korinte 10:12.
7. Yini engase yenziwe ukuze kuqedwe ukungabaza?
7 Yini engase yenziwe? Impendulo isewukuthi thembela kuJehova neZwi lakhe. “Uma noma ubani kini entula ukuhlakanipha, makaqhubeke ecela kuNkulunkulu, ngoba unika bonke ngokuphana ngaphandle kokusola; futhi uyonikwa kona. Kodwa makaqhubeke ecela ngokholo, engangabazi nhlobo, ngoba lowo ongabazayo ufana negagasi lolwandle eliqhutshwa umoya lipheshulwa liyiswa ngapha nangapha.” (Jakobe 1:5, 6; 2 Petru 3:17, 18) Ngakho umthandazo oqotho kuJehova uyisinyathelo sokuqala. (IHubo 62:8) Khona-ke, unganqikazi ukucela usizo kubabonisi abanothando ebandleni. (IzEnzo 20:28; Jakobe 5:14, 15; Jude 22) Bayokusiza ukuba uthole umsuka wokungabaza kwakho, okungenzeka kubangelwa ukuqhosha noma ukucabanga okungafanele.
8. Ngokuvamile ukucabanga kwezihlubuki kuqala kanjani, futhi liyini ikhambi?
8 Ingabe ukufunda noma ukulalela imibono yezihlubuki noma ifilosofi yezwe kubangele ukungabaza okunjengobuthi? Ngokuhlakanipha, iBhayibheli liyaluleka: “Yenza konke okusemandleni akho ukuba uzethule wamukeleka kuNkulunkulu, isisebenzi okungekho lutho esingaba namahloni ngakho, esiphatha izwi leqiniso ngokufanele. Kodwa xwaya izinkulumo ezingenangqondo ezingcolisa okungcwele; ngoba bayoqhubekela ekungamhloniphini uNkulunkulu okwandayo, futhi izwi labo liyosakazeka njengesilonda esibhibhayo.” (2 Thimothewu 2:15-17) Kuyathakazelisa ukuthi abaningi abaye baba izisulu zokuhlubuka baqala ukunhlanhlatha ngokuqale bakhononde ngendlela ababenomuzwa wokuthi baphathwa ngayo enhlanganweni kaJehova. (Jude 16) Ukubona amaphutha ezinkolelweni kweza kamuva. Njengoba nje udokotela ohlinzayo ethatha isinyathelo ngokushesha ukuze ahlinze isilonda esibhibhayo, thatha isinyathelo ngokushesha ukhiphe engqondweni noma yikuphi ukuthambekela kokukhononda, ukunganeliseki ngendlela izinto ezenziwa ngayo ebandleni lobuKristu. (Kolose 3:13, 14) Susa noma yini ebangela ukungabaza okunjalo.—Marku 9:43.
9. Isimiso esihle esingokwasezulwini siyosisiza kanjani ukuba sihlale siphilile okholweni?
9 Namathela kuJehova nenhlangano yakhe. Lingisa uPetru ngokwethembeka, ngokuqiniseka owathi: “Nkosi, ubani esiyoya kuye? Nguwe onamazwi okuphila okumi phakade.” (Johane 6:52, 60, 66-68) Yiba nesimiso esihle sokutadisha iZwi likaJehova ukuze ugcine ukholo lwakho luqinile, njengehawu elikhulu, elikwazi “ukucima zonke izikhali ezijikijelwayo ezivuthayo zomubi.” (Efesu 6:16) Hlala ukhuthele enkonzweni yobuKristu, uhlanganyela isigijimi soMbuso nabanye ngothando. Nsuku zonke, zindla ngokwazisa ngendlela uJehova aye wakubusisa ngayo. Bonga ngokuthi uyalazi iqiniso. Ukwenza zonke lezi zinto ngesimiso esihle sobuKristu kuyokusiza ukuba ujabule, ukhuthazele, futhi uhlale ungenakho ukungabaza.—IHubo 40:4; Filipi 3:15, 16; Heberu 6:10-12.
Ukulandela Isiqondiso SikaJehova Emshadweni
10. Kungani kubaluleke ngokukhethekile ukuba sibheke kuJehova ukuze sithole isiqondiso emshadweni wobuKristu?
10 Lapho ehlela ukuba indoda nomfazi bahlale ndawonye njengombhangqwana oshadile, uJehova wayengahlosile nje ukugcwalisa umhlaba ngesilinganiso esihle kuphela kodwa nokuba akhulise injabulo yabo. Nokho, isono nokungapheleli kuye kwaletha izinkinga ezingathi sína ebuhlotsheni bomshado. AmaKristu awagonyiwe kulokhu, njengoba nawo engaphelele futhi ebhekana nezinto ezicindezelayo zokuphila kwanamuhla. Noma kunjalo, ngezinga athembela ngalo kuJehova neZwi lakhe, amaKristu angaphumelela kahle emshadweni nasekukhuliseni izingane zawo. Emshadweni wobuKristu ayifuneki imikhuba nokuziphatha kwezwe. IZwi likaNkulunkulu liyasiyala: “Umshado mawudunyiswe phakathi kwabo bonke, nombhede womshado ungabi nakungcola, ngoba uNkulunkulu uyokwahlulela izifebe neziphingi.”—Heberu 13:4.
11. Ekuxazululeni izinkinga zomshado, yini okufanele iqashelwe yibo bobabili abangane bomshado?
11 Umshado ophathwa ngokweseluleko seBhayibheli uba nothando, ukuzibophezela, nokulondeka. Kokubili indoda nomkayo bayasiqonda futhi bayasihlonipha isimiso sobunhloko. Lapho kuvela izinkinga, ngokuvamile zibangelwa ukudebesela ukusebenzisa iseluleko seBhayibheli. Ekuxazululeni inkinga ephikelelayo, kubalulekile ukuba bobabili abangane bomshado bagxile ngokwethembeka ekutheni inkinga iyini ngempela bese besingatha izimbangela kunezimpawu zayo. Uma izingxoxo zamuva ziye zangaba nakuvumelana, umbhangqwana ungase ucele usizo olungavuni muntu kumbonisi onothando.
12. (a) Yiziphi izinkinga ezivamile emshadweni iBhayibheli elinikeza kuzo iseluleko? (b) Kungani kudingeka ukuba bobabili abangane bomshado benze izinto ngendlela kaJehova?
12 Ingabe inkinga ihilela ukukhulumisana, inhlonipho ngemizwa yomunye nomunye, inhlonipho ngobunhloko, noma indlela izinqumo ezenziwa ngayo? Ingabe iphathelene nokukhulisa izingane, noma ukulinganisela izidingo zobulili? Noma ingabe isimiso somkhaya sokusebenzisa imali, ukuzilibazisa, abangane, ukuthi ingabe inkosikazi kufanele isebenze, noma ukuthi kumelwe nihlalephi? Kungakhathaliseki ukuthi iyini inkinga, iBhayibheli linikeza iseluleko esiwusizo, kungaba ngokuqondile ngemithetho noma ngendlela esikiselayo ngezimiso. (Mathewu 19:4, 5, 9; 1 Korinte 7:1-40; Efesu 5:21-23, 28-33; 6:1-4; Kolose 3:18-21; Thithu 2:4, 5; 1 Petru 3:1-7) Lapho bobabili abangane bomshado bekugwema ukufuna izinto ngobugovu futhi bavumele uthando luzibonakalise ngokugcwele emshadweni wabo, kuba nenjabulo enkulu kakhulu. Kufanele bobabili abangane bomshado babe nesifiso esikhulu sokwenza izinguquko ezidingekayo, ukuba benze izinto ngendlela kaJehova. “Onakekela izwi uyakufumana okuhle, nowethembayo kuJehova ubusisiwe.”—IzAga 16:20.
Basha—Lalelani IZwi LikaNkulunkulu
13. Kungani kungelula ukuba intsha engamaKristu ikhule inokholo oluqinile kuJehova neZwi lakhe?
13 Akulula ukuba intsha engamaKristu ikhule iqinile okholweni lapho izungezwe izwe elibi. Esinye isizathu siwukuthi “lonke izwe lisemandleni omubi,” uSathane uDeveli. (1 Johane 5:19) Intsha ihlaselwa yilesi sitha esinonya esingenza okubi kubonakale kukuhle. Isimo sengqondo sokuthi yimi-yimi, izifiso zobugovu, ukulangazelela izinto eziwukuziphatha okubi nezinonya, nokuphishekela izinjabulo okungenangqondo—konke lokhu kugcina endleleni eyodwa yokucabanga evamile, nevelele, echazwe eBhayibhelini ngokuthi “umoya manje osebenza emadodaneni okungalaleli.” (Efesu 2:1-3) Ngobuqili uSathane uye wakhuthaza ‘lomoya’ ezincwadini zesikole, emculweni omningi okhona, kwezemidlalo, nakwezinye izindlela zokuzijabulisa. Abazali kudingeka baqaphe ukuze bakhiphe amathonya anjalo ngokusiza izingane zabo ukuba zikhule zithembela kuJehova neZwi lakhe.
14. Abasha ‘bangazibalekela kanjani izifiso ezihambisana nobusha’?
14 UPawulu wanikeza umngane wakhe osemusha uThimothewu iseluleko esinjengesikababa: “Balekela izifiso ezihambisana nobusha, kodwa phishekela ukulunga, ukholo, uthando, ukuthula, kanye nalabo ababiza iNkosi ngenhliziyo ehlanzekile.” (2 Thimothewu 2:22) Nakuba kungekhona ukuthi zonke “izifiso ezihambisana nobusha” zimbi zona ngokwazo, intsha kufanele ‘izibalekele’ ngomqondo wokuthi akufanele ivumele lezi zinto ziyibambe, ziyishiye ingenasikhathi semisebenzi yokuzinikela kokuhlonipha uNkulunkulu. Ukuzivivinyela ukuba usozinyama, ezemidlalo, umculo, ukuzijabulisa, imisebenzi yokuzilibazisa, nokuhamba, nakuba kungekhona ukuthi akulungile, kungaba ugibe uma kuba yizinto ezibalulekile ekuphileni. Yibalekele ngokuphelele ingxoxo engenanjongo, ukuchitha isikhathi ngokuzula, isithakazelo sobulili esingafanele, ukuhlala nje ungenzi lutho futhi ube nesithukuthezi, nokukhononda ngokuthi abazali bakho abakuqondi.
15. Yiziphi izinto ezingenzeka ekhaya ezingaba nengxenye ekubeni intsha iphile ukuphila okumbaxa-mbili?
15 Ngisho nasekhaya, intsha ingase inyonyobelwe ingozi. Uma kubukelwa imidlalo ye-TV nama-video anokuziphatha okubi noma ubudlova, isifiso sokwenza izinto ezimbi singahlakuleleka. (Jakobe 1:14, 15) IBhayibheli liyaluleka: “Nina enithanda uJehova zondani okubi.” (IHubo 97:10; 115:11) UJehova uyazi uma umuntu ezama ukuphila ukuphila okumbaxa-mbili. (IzAga 15:3) Basha abangamaKristu, bhekani emakamelweni enu. Ingabe nihlobise ngezithombe zezihlabani eziziphethe kabi zezemidlalo noma zezomculo, noma ingabe nihlobisa ngezinto ezakhayo eziyizikhumbuzo ezinhle? (IHubo 101:3) Ekhabetheni lenu lezingubo, ingabe ninezingubo ezinesizotha, noma ingabe ezinye zezingubo zenu zibonisa izitayela zokugqoka ezeqisayo zalelizwe? Ngezindlela ezicashile uDeveli anganifaka ogibeni uma nivumela ukunqotshwa isilingo sokunambitha okubi. Ngokuhlakanipha iBhayibheli liyaluleka: “Hlalani nisangulukile, lindani. Isitha senu, uDeveli, sihambahamba njengengonyama ebhongayo, efuna ukushwabadela othile.”—1 Petru 5:8.
16. Iseluleko seBhayibheli singamsiza kanjani osemusha ukuba enze bonke ababalulekile kuye baziqhenye ngaye?
16 IBhayibheli likutshela ukuba uqaphele abangane bakho. (1 Korinte 15:33) Abangane bakho kufanele kube yilabo abesaba uJehova. Unganqotshwa ukucindezela kontanga. (IHubo 56:11; IzAga 29:25) Lalela abazali bakho abesaba uNkulunkulu. (IzAga 6:20-22; Efesu 6:1-3) Yiya kubadala uma ufuna isiqondiso nesikhuthazo. (Isaya 32:1, 2) Gcina ingqondo namehlo akho esezintweni nasemigomweni engokomoya. Funa amathuba okwenza intuthuko engokomoya nokuhlanganyela emisebenzini yebandla. Funda ukwenza izinto ngezandla zakho. Khula uqinile futhi uphilile okholweni, khona-ke uyobonisa ukuthi ungumuntu obaluleke ngempela—umuntu ofanele ukuphila ezweni elisha likaJehova! UBaba wethu wasezulwini uyoziqhenya ngawe, abazali bakho basemhlabeni bayojabula ngawe, futhi abafowenu nodadewenu abangamaKristu bayokhuthazeka ngenxa yakho. Yilokho okubalulekile!—IzAga 4:1, 2, 7, 8.
17. Yiziphi izinzuzo ezitholwa yilabo abathembela kuJehova neZwi lakhe?
17 Ngolimi olusankondlo umhubi waphefumulelwa ukuba abhale: “[UJehova] akayikubenqabela okuhle abahamba ngobuqotho. Jehova-Sebawoti, ubusisiwe umuntu okwethembayo.” (IHubo 84:11, 12) Yebo, injabulo nempumelelo, hhayi indumalo nokuhluleka, iyotholwa yibo bonke labo abathembela kuJehova neZwi lakhe, iBhayibheli.—2 Thimothewu 3:14, 16, 17.
Ubungaphendula Kanjani?
◻ Kungani amaKristu kungafanele athembele ‘ekuhlakanipheni kwalelizwe’?
◻ Kufanele kwenziweni uma umuntu eba nokungabaza?
◻ Ukwenza izinto ngendlela kaJehova kuyiletha kanjani impumelelo nenjabulo emshadweni?
◻ IBhayibheli liyisiza kanjani intsha ukuba ‘ibalekele izifiso ezihambisana nobusha’?
[Isithombe ekhasini 23]
AmaKristu aphendukela kuJehova neZwi lakhe, kuyilapho enqaba “ukuhlakanipha kwalelizwe” njengokuwubuwula
[Isithombe ekhasini 25]
Imikhaya ethembela kuJehova neZwi lakhe iyaphumelela futhi iyajabula