Imibuzo Evela Kubafundi

UJesu wathi: “Uma nithethelela izono zanoma ibaphi abantu, bahlala bethethelelwe zona; uma nigcina ezanoma ibaphi abantu, zihlala zigciniwe.” Ingabe lamazwi asho ukuthi amaKristu angazithethelela izono?

Asikho isisekelo esingokomBhalo sokuphetha ngokuthi amaKristu ewonke, noma ngisho nabadala abamisiwe ebandleni, banegunya laphezulu lokuthethelela izono. Nokho, lokho uJesu akusho kubafundi bakhe kuJohane 20:23, ocashunwe ngenhla, kubonisa ukuthi uNkulunkulu wanikeza abaphostoli amandla akhethekile ngokuqondene nalokhu. Futhi amazwi kaJesu lapho angase ahlobane nalokho akusho kuMathewu 18:18 ngokuphathelene nezinqumo zasezulwini.

AmaKristu angazithethelela izono ezithile, ngokuvumelana neseluleko somphostoli uPawulu esilotshwe kweyabase-Efesu 4:32: “Yibani nomusa komunye nomunye, ninobubele besisa, nithethelelane ngokukhululekile njengoba nje noNkulunkulu anithethelela ngokukhululekile ngoKristu.” Lapha uPawulu wayekhuluma ngezinkinga zomuntu siqu phakathi kwamaKristu, njengokukhuluma ngokunganaki. Kufanele azame ukulungisa lezi zindaba, athethelelane. Khumbula amazwi kaJesu: “Khona-ke, uma uletha isipho sakho e-altare bese ukhumbula lapho ukuthi umfowenu unokuthile ngawe, shiya isipho sakho lapho phambi kwe-altare, uhambe; okokuqala yenza ukuthula nomfowenu, khona-ke, lapho usubuyile, unikele ngesipho sakho.”—Mathewu 5:23, 24; 1 Petru 4:8.

Nokho, umongo kaJohane 20:23 usikisela ukuthi uJesu wayebhekisela ezonweni ezingathi sína kakhudlwana, njengoba kuboniswa okunye abe esekusho kulezi zilaleli ezikhethekile. Ake sibone isizathu salokhu.

Ngosuku avuswa ngalo, uJesu wabonakala kubafundi ekamelweni elalihluthulelwe eJerusalema. Ukulandisa kuthi: “Ngakho-ke, uJesu waphinda wathi kubo: ‘Kwangathi ningaba nokuthula. Njengoba nje uBaba engithumile, nami ngiyanithuma.’ Futhi ngemva kokuba esho lokhu wabaphephetha futhi wathi kubo: ‘Yamukelani umoya ongcwele. Uma nithethelela izono zanoma ibaphi abantu, bahlala bethethelelwe zona; uma nigcina ezanoma ibaphi abantu, zihlala zigciniwe.’”—Johane 20:21-23.

Kungenzeka ukuthi abafundi abaphawulwe lapha kwakungabaphostoli abakholekile ngokuyinhloko. (Qhathanisa nevesi 24.) Ngokubaphephetha futhi athi, “Yamukelani umoya ongcwele,” uJesu wabazisa ngendlela engokomfanekiso ukuthi ngokushesha umoya ongcwele wawuzothululelwa kubo. UJesu waqhubeka wathi babezoba negunya ngokuqondene nokuthethelela izono. Ngokunengqondo singaphetha ngokuthi izinkulumo zakhe ezimbili zihlobene, enye iholela kwenye.

Ngemva kwezinsuku ezingu-50 evusiwe, ngosuku lwePentekoste, uJesu wathulula umoya ongcwele. Kwafezani lokho? Phakathi kokunye, labo abamukela umoya baphinde bazalwa njengamadodana kaNkulunkulu angokomoya anethemba lokuba ababusi abakanye noKristu ezulwini. (Johane 3:3-5; Roma 8:15-17; 2 Korinte 1:22) Kodwa lokho kuthululwa komoya kwenza okwengeziwe. Abathile abawamukela bathola amandla okwenza izimangaliso. Ngalowo moya abanye babengakhuluma ngezinye izilimi ababengazazi. Abanye babengaprofetha. Futhi abanye babengaphulukisa abagulayo noma bavuse abafile babuye baphile.—1 Korinte 12:4-11.

Njengoba amazwi kaJesu kuJohane 20:22 ayebhekisela kulokhu kuthululwa komoya ongcwele kubafundi, amazwi akhe ahlobene nawo amayelana nokuthethelela izono kubonakala esho ukuthi abaphostoli babenikezwe igunya eliyingqayizivele lokuthethelela izono noma ukuzigcina ngokusebenza komoya.—Bheka INqabayokulinda (yesiNgisi), March 1, 1949, ikhasi 78.

IBhayibheli alisinikezi ukulandisa okuphelele kwesikhathi ngasinye abaphostoli abasebenzisa ngaso lelo gunya, kodwa futhi alivezi isikhathi ngasinye lapho basebenzisa khona isipho esiyisimangaliso sokukhuluma ngezilimi, ukuprofetha, noma ukuphulukisa.—2 Korinte 12:12; Galathiya 3:5; Heberu 2:4.

Indaba ethile eyahilela igunya labaphostoli lokuthethelela noma lokugcina izono yayihilela u-Ananiya noSafira, abakhohlisa umoya. UPetru, owezwa uJesu esho lokho esikufunda kuJohane 20:22, 23, wadalula u-Ananiya noSafira. UPetru waqale wakhuluma no-Ananiya, owafa ujuqu. Kamuva lapho uSafira efika futhi eqhubeka ekhohlisa, uPetru wamahlulela. UPetru akazange asithethelele isono sakhe kodwa wathi: “Bheka! Izinyawo zalabo abangcwabe umyeni wakho zisemnyango, futhi bazokhiphela wena ngaphandle.” Naye wafa ujuqu.—IzEnzo 5:1-11.

Kulesi simo umphostoli uPetru wasebenzisa igunya elikhethekile lokubonisa ukugcinwa okuphelele kwesono, ulwazi oluyisimangaliso lokuthi uNkulunkulu wayengeke athethelele isono sika-Ananiya noSafira. Futhi kubonakala sengathi abaphostoli babenokuqonda okungaphezu kokwabantu ezindabeni ababeqiniseka kuzo ukuthi izono zazithethelelwe ngesisekelo somhlatshelo kaKristu. Ngakho labo baphostoli ababenikezwe amandla ngomoya babengamemezela ukuthethelelwa noma ukugcinwa kwezono.a

Lokhu akusho ukuthi bonke abadala ababegcotshwe ngomoya emuva ngaleso sikhathi babenegunya elinjalo eliyisimangaliso. Lokho singakubona kulokho umphostoli uPawulu akusho ngomuntu owayesusiwe ekuhlanganyeleni ebandleni laseKorinte. UPawulu akazange athi, ‘Ngiyazithethelela izono zalowo muntu’ noma aze athi, ‘Ngiyazi ukuthi lomuntu uthethelelwe ezulwini, ngakho mamukeleni.’ Kunalokho, uPawulu wanxusa lonke ibandla ukuba lithethelele lomKristu obuyiselwe ekuhlanganyeleni futhi limbonise uthando. UPawulu wanezela: “Noma yini eniyithethelela noma ubani ngomusa, ngiyamthethelela yona nami.”—2 Korinte 2:5-11.

Lapho lomuntu esebuyiselwe ebandleni, bonke abazalwane nodade abangamaKristu babengathethelela ngomqondo wokungambambeli igqubu ngalokho ayekwenzile. Nokho, okokuqala kwakuyodingeka aphenduke abese ebuyiselwa ekuhlanganyeleni. Kwakuyokwenzeka kanjani lokho?

Kunezono ezingathi sína abadala bebandla okufanele bazisingathe, njengokweba, ukuqamba amanga, noma ukuziphatha okubi okungathi sína. Bazama ukuqondisa nokusola abenzi bobubi abanjalo, babashukumisele ukuba baphenduke. Kodwa uma othile enza isono esingathi sína ngokungaphenduki, abadala basebenzisa isiqondiso saphezulu sokususa umenzi wobubi ekuhlanganyeleni. (1 Korinte 5:1-5, 11-13) Lokho uJesu akusho kuJohane 20:23 akusebenzi ezimweni ezinjalo. Laba badala abanazo izipho zomoya eziyisimangaliso, njengekhono lokuphulukisa abantu abagula ngokomzimba noma ukuvusa abafile; lezo zipho zayifeza injongo yazo ekhulwini lokuqala zase ziyaphela. (1 Korinte 13:8-10) Ngaphezu kwalokho, abadala namuhla abanalo igunya laphezulu lokuthethelela ububi obungathi sína ngomqondo wokumemezela umenzi wesono esingathi sína njengohlanzekile emehlweni kaJehova. Lolu hlobo lokuthethelela kumelwe lwenziwe ngesisekelo somhlatshelo wesihlengo, futhi uJehova kuphela ongathethelela ngaleso sisekelo.—IHubo 32:5; Mathewu 6:9, 12; 1 Johane 1:9.

Njengasendabeni yomuntu waseKorinte yasendulo, lapho umenzi wesono esingathi sína enqaba ukuphenduka, kumelwe asuswe ekuhlanganyeleni. Uma kamuva ephenduka futhi ekhiqiza imisebenzi efanele ukuphenduka, ukuthethelela kwaphezulu kungenzeka. (IzEnzo 26:20) Esimweni esinjalo, imiBhalo inikeza abadala isizathu sokukholelwa ukuthi uJehova uye wamthethelela ngempela umenzi wobubi. Khona-ke, lapho umuntu esebuyiselwe ekuhlanganyeleni, abadala bangamsiza ngokomoya ukuba aqine okholweni. Abanye ebandleni bangathethelela ngendlela amaKristu aseKorinte athethelela ngayo umuntu osusiwe ekuhlanganyeleni owayesebuyiselwa emuva ngaleso sikhathi.

Lapho besingatha izindaba ngalendlela, abadala abazibekeli izindinganiso zabo siqu zokwahlulela. Basebenzisa izimiso zeBhayibheli futhi balandele izimiso ezingokomBhalo uJehova azibekayo. Ngakho, konke ukuthethelela noma ukungathetheleli okwenziwa abadala kuyoba ngomqondo wamazwi kaJesu akuMathewu 18:18: “Ngiqinisile ngithi kini madoda, Noma iziphi izinto eningase nizibophe emhlabeni ziyobe ziyizinto eziboshiwe ezulwini, futhi noma iziphi izinto eningase nizithukulule emhlabeni ziyobe ziyizinto ezithukululiwe ezulwini.” Izenzo zabo ziyomane zibonise indlela uJehova abheka ngayo izindaba njengoba ivezwe eBhayibhelini.

Ngakho-ke, lokho uJesu akusho, njengoba kulotshwe kuJohane 20:23, akuphikisani neminye imiBhalo, kodwa kubonisa ukuthi abaphostoli babenegunya elikhethekile ngokuqondene nokuthethelela, ngokuvumelana nendima yabo ekhethekile lapho ibandla lobuKristu lisafufusa.

[Umbhalo waphansi]