Ingabe Unombono Wokuhlonipha UNkulunkulu Ngophuzo Oludakayo?

EMINYAKENI engaba ngu-20 edlule, abavubukuli bavubukula isakhiwo esidala esenziwe ngezitini zodaka eduze nedolobha lase-Urmia, e-Iran. Kuso bathola ukhamba, ososayensi abathi lunezinkulungwane zeminyaka lukhona, luhlehlela emuva enkathini yakudala lapho kuqalwa ukwakhiwa izindawo zokuhlala zabantu bakuqala. Muva nje, kuye kwasetshenziswa ubuchwepheshe bamuva ukuze kuhlolisiswe lolu khamba. Ososayensi bamangala ukuthola phakathi kwalo ubufakazi obudala kakhulu bokusetshenziswa kwamakhemikhali ekwenzeni iwayini.

IBhayibheli nalo libonisa ngokusobala ukuthi kusukela ezikhathini zasendulo laliphuzwa iwayini, ubhiya, nolunye uphuzo oludakayo. (Genesise 27:25; UmShumayeli 9:7; Nahume 1:10) Njengakokunye ukudla, uJehova usinika ngabanye ilungelo lokukhetha—ukuba siphuze uphuzo oludakayo noma singaluphuzi. UJesu wayevame ukuphuza iwayini lapho edla. UJohane uMbhapathizi wabugwema utshwala.—Mathewu 11:18, 19.

IBhayibheli liyakwenqabela ukuzitika ngokweqile ngophuzo. Ukudakwa kuyisono kuNkulunkulu. (1 Korinte 6:9-11) Ngokuvumelana nalokhu, oFakazi BakaJehova abavumeli noma yibaphi ababa yizidakwa ezingaphenduki ukuba baqhubeke besebandleni lobuKristu. Labo ebandleni abakhetha ukuphuza uphuzo oludakayo kumelwe benze kanjalo ngokulinganisela.—Thithu 2:2, 3.

Umbono Wokungamhloniphi UNkulunkulu

Abantu abaningi namuhla abanawo umbono wokuhlonipha uNkulunkulu ngophuzo oludakayo. Kulula ukubona ukuthi uSathane ukhuthaza ukusetshenziswa kabi kwalomkhiqizo wasendulo. Ngokwesibonelo, kwezinye iziqhingi zaseNingizimu Pacific, kuvamile ukuba abesilisa babuthane ukuze bazitike ngotshwala obenziwe ekhaya. Lemibuthano ingase ithathe amahora amaningi futhi iba khona izikhathi eziningi—abesilisa abaningi bazitika ngalomkhuba nsuku zonke. Abanye bawubheka njengengxenye yesiko. Ngezinye izikhathi kuphuzwa ubhiya nogologo esikhundleni—noma ngaphezu—kotshwala bendawo obenziwe ekhaya. Ngokuvamile umphumela uba ukudakwa.

Kwelinye izwe lasePacific, ukuphuza kwabesilisa utshwala ngokulinganisela cishe akukhulunywa nhlobo ngakho. Ngokuvamile, lapho bephuza baphuzela ukudakwa. Ngosuku lokuhola kuvame ukuba iqembu labesilisa lihlangane ndawonye bese lithenga amabhokisi amaningana kabhiya, ngalinye elinamabhodlela angu-24. Liyeka ukuphuza kuphela lapho ubhiya usuphelile. Ngenxa yalokho, ukudakwa obala kuvame kakhulu.

Utshwala, njengewayini elenziwe ngesundu nobunye utshwala obuphiswe kuleyo ndawo, busetshenziswa njengesiko emazweni ase-Afrika. Ngokwesiko lemiphakathi ethile izivakashi kumelwe zinikwe utshwala lapho zibungazwa. Kuvame ukuba umuntu obonisa umoya wokungenisa izihambi alungiselele obungaphezu kwalobo isivakashi sakhe esingabuphuza. Kwenye indawo isiko liwukuba ubeke amabhodlela kabhiya angu-12 phambi kwesivakashi ngasinye.

Izinkampani eziningi zaseJapane zihlelela izisebenzi zazo uhambo ngamabhasi. Kuhanjwa notshwala obuningi, futhi kukhuthazwa ukudakwa. Olunye lwalolu hambo lokungcebeleka lwezinkampani luthatha izinsuku ezimbili noma ezintathu. Ngokukamagazini i-Asiaweek, eJapane, “kusukela kubalimi belayisi kuya kuzazi zezombangazwe ezicebile, ubudoda bomuntu bubonakala ngesilinganiso sotshwala angabuphuza.” Kuqashelwa ukuthambekela okufanayo kwamanye amazwe ase-Asia. I-Asiaweek ithi “abantu baseNingizimu Korea manje baphuza utshwala obuningi umuntu emunye ukwedlula abaphuzayo bakunoma iyiphi enye indawo emhlabeni.”

Ukuphuza ngokweqile kuye kwaba umkhuba osakazekile emakolishi ase-United States. Ngokwe-Journal of the American Medical Association, “iningi labaphuza ngokweqile alizibheki njengabantu abaphuzayo abanenkinga.”a Lokhu akufanele kumangaze ngoba emazweni amaningi umthombo wezindaba uveza ukuphuza njengento ejabulisayo, esemfashinini, newukuhlakanipha. Ngokuvamile izisulu ezinkulu zalenkulumo-ze yintsha.

EBrithani, ukuphuzwa kukabhiya kuye kwaphindwa kabili phakathi nenkathi yeminyaka engu-20, futhi ukuphuzwa kotshwala obunamandla kuye kwaphindwa kathathu. Abantu abaphuzayo baqala besebancane, futhi sebebaningi kakhulu abesifazane abaphuzayo. Kuqashelwa isimo esifanayo eMpumalanga Yurophu nasemazweni aseLatin America. Lokhu kwenziwa kube sobala amazinga akhula ngendlela efanayo abantu ababa yimilutha yotshwala nabafa ezingozini zemigwaqo ezihlobene notshwala. Ngokusobala, kunokwanda okuphawulekayo kokusetshenziswa kabi kotshwala emhlabeni wonke.

Ukuphuza Kangakanani Okuwukuphuza Ngokweqile?

Umbono weBhayibheli ngophuzo oludakayo uyalinganisela. Kolunye uhlangothi, imiBhalo ithi iwayini liyisipho esivela kuJehova uNkulunkulu ‘esijabulisa inhliziyo yomuntu.’ (IHubo 104:1, 15) Kanti ngakolunye, lapho lilahla ukuzitika ngokweqile iBhayibheli lisebenzisa amazwi athi ‘ukuphuza kakhulu,’ “ukweqisa ewayinini, imibuthano exokozelayo, imincintiswano yokuphuza,” ‘ukuzinikela ewayinini eliningi,’ ‘nokugqilazwa iwayini eliningi.’ (Luka 21:34; 1 Petru 4:3; 1 Thimothewu 3:8; Thithu 2:3) Kodwa lingakanani ‘iwayini eliningi’? UmKristu anganquma kanjani ukuthi umbono wokuhlonipha uNkulunkulu ngophuzo oludakayo uhlanganisani?

Akunzima ukubona ukudakwa. Imiphumela yako ichazwe ngalamazwi eBhayibhelini: “Ngubani othi: Maye! Ngubani othi: Wo! Ngubani oxabanayo? Ngubani okhalayo, ngubani onezilonda ngeze, na? Ngubani onamehlo aklwelayo na? Yibo abalibala ngasewayinini, abaya ukunambitha iwayini elixutshanisiweyo. . . . Amehlo akho ayakubona imihlola, inhliziyo yakho ikhulume okuphambeneyo.”—IzAga 23:29-33.

Utshwala obuningi kakhulu bungabangela ukudideka, ukubona izinto ezingekho, nokuba sesimweni sokungezwa lutho, nokunye ukuphazamiseka kwengqondo nokomzimba. Ngaphansi kwethonya lotshwala, umuntu angase ahluleke ukulawula ukuziphatha kwakhe, azilimaze noma alimaze abanye. Izidakwa zaziwa ngokuhileleka ekuziphatheni kobuwula, okucasulayo, noma okubi.

Ukuphuza kuze kube sezingeni lokudakwa, nemiphumela yako ephawulwe ngenhla, ngokuqinisekile kuwukuphuza ngokweqile. Nokho, umuntu angabonisa ukuntula ukulinganisela ngaphandle kokubonisa zonke izimpawu ezivamile zokudakwa. Ngalokho, indaba yokuthi othile uye waphuza kakhulu yini ivame ukuba impikiswano. Uyini umehluko phakathi kokulinganisela nokuzitika ngokweqile?

Londoloza Ikhono Lakho Lokucabanga

IBhayibheli alibeki mingcele ngokunikeza isilinganiso samaphesenti otshwala obungaba segazini noma enye indlela yokulinganisa. Abantu abadakwa ngesilinganiso sotshwala esifanayo. Nokho, izimiso zeBhayibheli zisebenza kuwo wonke amaKristu futhi zingasisiza ukuba sihlakulele umbono wokuhlonipha uNkulunkulu ngophuzo oludakayo.

UJesu wathi umyalo wokuqala, ‘ukuthanda uJehova uNkulunkulu wakho ngenhliziyo yakho yonke nangomphefumulo wakho wonke nangengqondo yakho yonke.’ (Mathewu 22:37, 38) Utshwala bunethonya eliqondile engqondweni, futhi ukuzitika ngokweqile kuyophazamisa ukulalela kwakho lomyalo omkhulu kunayo yonke. Kungaphazamisa ngezinga elikhulu ukwahlulela okuhle, ikhono lokuxazulula izinkinga, ukuzithiba, neminye imisebenzi ebalulekile eyenziwa ingqondo. ImiBhalo iyasiyala: ‘Gcina ukuhlakanipha [nekhono lokucabanga, NW] kube-ngukuphila emphefumulweni wakho nomusa entanyeni yakho.’—IzAga 3:21, 22.

Umphostoli uPawulu unxusa amaKristu: “Nethule imizimba yenu ingumhlatshelo ophilayo, ongcwele, owamukelekayo kuNkulunkulu, uyinkonzo engcwele ngamandla enu okucabanga.” (Roma 12:1) Ingabe umKristu ‘angamukeleka kuNkulunkulu’ uma ephuza utshwala kuze kube sezingeni lokulahlekelwa ‘amandla akhe okucabanga’? Ngokuvamile, umuntu ophuza ngokungalinganiseli uya ngokuya ephuza utshwala obuningi ngokwengeziwe ngaphambi kokuba adakwe. Angase abe nomuzwa wokuthi ukuphuza kwakhe kakhulu—kuye—kungaphansi kwesilinganiso esidakayo. Nokho, angase ngokufanayo aqale ukuncika ngokuyingozi otshwaleni. Ingabe umuntu onjalo angethula umzimba wakhe ‘ungumhlatshelo ophilayo, ongcwele’?

Noma isiphi isilinganiso sotshwala esithuntubeza ‘ukuhlakanipha nekhono lakho lokucabanga’ njengomKristu siwutshwala obuningi kuwe.

Yini Eqondisa Umbono Wakho Ngotshwala?

UmKristu kufanele ahlole ukuthi isimo sakhe sengqondo ngotshwala sithonywa ukuthambekela noma amasiko anamuhla yini. Lapho kuziwa ophuzweni oludakayo, ngokuqinisekile ngeke ufune ukwenza ukuba ukukhetha kwakho kusekelwe ekuthambekeleni okungokwesiko noma kuyinkulumo-ze yomthombo wezindaba. Lapho uhlola isimo sakho sengqondo, zibuze, ‘Ingabe sithonywa yilokho okwamukelekayo emphakathini? Noma ingabe ukuphuza kwami kubuswa izimiso zeBhayibheli?’

Nakuba oFakazi BakaJehova bengamelene namasiko, bayaqaphela ukuthi uJehova uyayizonda imikhuba eminingi eyamukeleka kabanzi namuhla. Eminye imiphakathi iyakuvuna ukukhishwa kwesisu, ukumpontshelwa igazi, ubungqingili, noma isithembu. Nokho, amaKristu enza ngokuvumelana nombono kaNkulunkulu ngalezi zinto. Yebo, umbono wokuhlonipha uNkulunkulu uyoshukumisela umKristu ukuba azonde imikhuba enjalo kungakhathaliseki ukuthi iyamukeleka ngokwesiko noma cha.—IHubo 97:10.

IBhayibheli likhuluma ‘ngentando yezizwe,’ ehlanganisa “ukweqisa ewayinini” ‘nemincintiswano yokuphuza.’ Amazwi athi “imincintiswano yokuphuza” adlulisela umqondo wemibuthano eyayihlelwa ngenjongo yokuphuza utshwala obuningi. Kubonakala sengathi ezikhathini zeBhayibheli abathile ababeziqhenya ngalokho ababethi ikhono lokungadakwa babezama ukuphuza kakhulu ukwedlula abanye, noma babezama ukubona ukuthi ngubani owayengaphuza kakhulu kunabanye. Umphostoli uPetru ubhekisela kulolu hlobo lokuziphatha ngokuthi ‘ichibi eliphansi lokuzitika ngamanyala’ amaKristu aphendukile angasahlanganyeli kulo.—1 Petru 4:3, 4.

Ingabe kungaba okunengqondo ngomKristu ukuba amukele umbono wokuthi uma nje engazange adakwe, akunandaba ngempela ukuthi uphuze kuphi, nini, noma kangakanani? Singazibuza, Ingabe lowo umbono wokuhlonipha uNkulunkulu? IBhayibheli lithi: “Kungakhathaliseki ukuthi niyadla noma niyaphuza noma nenza noma yini enye, zonke izinto zenzeleni inkazimulo kaNkulunkulu.” (1 Korinte 10:31) Iqembu labesilisa elibuthanele ukuphuza utshwala obuningi obala lingase lingadakwa lonke, kodwa ingabe ukuziphatha kwalo kuyoletha inkazimulo kuJehova? IBhayibheli liyayala: “Niyeke ukulolongwa nifane nalesisimiso sezinto, kodwa maniguqulwe ngokushintsha ingqondo yenu, ukuze nizitholele ngokwenu intando kaNkulunkulu enhle neyamukelekayo nepheleleyo.”—Roma 12:2.

Gwema Ukukhubekisa Abanye

Kuyathakazelisa ukuthi ngokuvamile wona kanye lamasiko abekezelela ukuzitika ngokweqile ayakulahla lapho umuntu ophuza kakhulu ethi ungumuntu kaNkulunkulu. Komunye umphakathi omncane waseNingizimu Pacific, ingqapheli yathi: “Ngiyanincoma nina. Nishumayela iqiniso. Kodwa inkinga esiyibonayo ukuthi abesilisa benu baphuza kakhulu utshwala.” Ngokombiko, labo besilisa abazange badakwe, kodwa lelo qiniso alizange libe sobala kangako kwabaningi kulowo mphakathi. Izingqapheli zazingaphetha kalula ngokuthi njengeningi labanye besilisa elihileleka emibuthanweni yokuphuza, oFakazi nabo bayadakwa. Ingabe isikhonzi esingumKristu esihileleka emibuthanweni yokuphuza ethatha isikhathi eside singalondoloza idumela elihle futhi sifeze inkonzo yaso yasobala ngenkululeko yokukhuluma?—IzEnzo 28:31.

Umbiko ovela kwelinye izwe laseYurophu ubonisa ukuthi ngezinye izikhathi abafowethu nodadewethu bafika eHholo LoMbuso benuka phú utshwala emilonyeni. Lokhu kuye kwaphazamisa onembeza babanye. IBhayibheli liyayala: “Kuhle ukungayidli inyama noma ukungaliphuzi iwayini noma ukungenzi noma yini umfowenu akhubeka ngayo.” (Roma 14:21) Umbono wokuhlonipha uNkulunkulu ngophuzo oludakayo uyoshukumisela umKristu ovuthiwe ukuba acabangele unembeza wabanye, ngisho noma kusho ukugwema utshwala ngaphansi kwezimo ezithile.

AmaKristu Ahluke Ngokuphawulekayo

Ngokudabukisayo lelizwe liye lenza okuningi ukuze licasule uJehova ngokusebenzisa kabi izinto ezinhle aye wazinika isintu, kuhlanganise nophuzo oludakayo. UmKristu ngamunye ozinikezele kufanele alwele ukugwema imibono esakazekile yokungamhloniphi uNkulunkulu. Ngaleyo ndlela abantu bayokwazi ‘ukubona umehluko phakathi kolungileyo nomubi‚ phakathi kwalowo okhonza uNkulunkulu nalowo ongamkhonziyo.’—Malaki 3:18.

Lapho kuziwa ophuzweni oludakayo, “umehluko” phakathi koFakazi BakaJehova nezwe kufanele uphawuleke. Ukuphuza uphuzo oludakayo akuyona into eyinhloko ekuphileni kwamaKristu eqiniso. Awahloli ukuthi angaphuza kangakanani ngaphambi kokuba adakwe, esondela ngokuyingozi ekudakweni; futhi awavumeli ukuba uphuzo oludakayo lonakalise noma luphazamise nganoma iyiphi indlela ukukhonza kwawo uNkulunkulu ngomphefumulo wonke nangengqondo esangulukile.

Njengeqembu, oFakazi BakaJehova banombono wokuhlonipha uNkulunkulu ngophuzo oludakayo. Kuthiwani ngawe? Ngamunye wethu angaqiniseka ngezibusiso zikaJehova njengoba silandela umyalo weBhayibheli ‘wokuba silahle ukungamhloniphi uNkulunkulu nezifiso zezwe nokuba siphile ngokuhluzeka kwengqondo nokulunga nangokuzinikela kokuhlonipha uNkulunkulu phakathi nalesisimiso samanje sezinto.’—Thithu 2:12.

[Umbhalo waphansi]

[Ibhokisi/Isithombe ekhasini 28]

Lalela Labo Obathandayo

Umuntu ophuza ngokungalinganiseli uvame ukuba owokugcina ukuqaphela ukuthi unenkinga. Izihlobo, abangane, nabadala abangamaKristu akufanele banqikaze ukusiza abathandekayo abantula ukulinganisela. Ngakolunye uhlangothi, uma labo obathandayo bezwakalisa ukukhathazeka ngemikhuba yakho yokuphuza utshwala, cishe banesizathu esihle salokho. Kucabangele lokho abakushoyo.—IzAga 19:20; 27:6.