Ukudela Okuningi Ngenxa Yokukhulu

NJENGOBA ILANDISWA NGUJULIUS OWO BELLO

Iminyaka engu-32 ngangiyi-Aladura.a Ngangikholelwa ukuthi ukuphulukisa nemithandazo kwakuzoxazulula zonke izinkinga zami futhi kwelaphe konke ukugula. Ngangingathengi mithi yokwelapha, ngisho neyokudambisa izinhlungu. Phakathi naleyo minyaka, akukho muntu kwami owalaliswa esibhedlela. Lapho nje ingane yami igula, ngangiyithandazela imini nobusuku ize ilulame. Ngangikholelwa ukuthi uNkulunkulu wayeyiphendula imithandazo yami futhi engibusisa.

NGANGIYILUNGU le-Egbe Jolly, iqembu likaqed’isizungu elivelele kakhulu e-Akure, idolobha elisentshonalanga yeNigeria. Abangane bami kwakungabantu abacebe kakhulu nabanezwi kakhulu emphakathini. I-Deji, inkosi yase-Akure, yayivamile ukungivakashela kwami.

Nganginanesithembu, nginabafazi abayisithupha nenqwaba yezancinza. Ibhizinisi lami lalichuma. Konke kwakungihambela kahle. Kodwa, njengomthengisi ohambahambayo wasemfanekisweni kaJesu weparele, ngathola okuthile okuyigugu kangangokuthi ngadela amakhosikazi ami amahlanu, izancinza zami, isonto, iqembu likaqed’isizungu, nokuvelela ezweni ukuze ngithole kona.—Mathewu 13:45, 46.

Indlela Engaba Ngayo Yi-Aladura

Ngaqala ukuzwa ngama-Aladura ngo-1936, lapho ngineminyaka engu-13 ubudala. Umngane wami okuthiwa uGabriel wathi kimi: “Uma uvakashela eChrist Apostolic Church, uzozwa uNkulunkulu ekhuluma.”

“Ukhuluma kanjani uNkulunkulu?” ngimbuza.

Wathi: “Woza, uzobona.”

Ngangikulangazelela ukulalela uNkulunkulu. Ngakho ngalobo busuku, ngahamba noGabriel saya esontweni. Isakhiwo esincane sasigcwele abakhulekeli. Ibandla laqala ukuhlabelela: “Wozani! UJesu ulapha!”

Kusahlatshelelwa, othile waklabalasa: “Yehla moya ongcwele!” Omunye washaya insimbi, ibandla lathula. Owesifazane othile wabe eseqala ukukwitiza ngomdlandla ngolimi olungaziwa. Kungazelelwe wadazuluka: “Lalelani umyalezo kaNkulunkulu bo! Nakhu uNkulunkulu akushoyo: ‘Thandazelani abazingeli ukuze bangababulali abantu!’” Wonke umuntu wavukwa usinga.

Ngakukholelwa ukuthi uNkulunkulu wayekhulume ngaye, ngakho ngonyaka olandelayo ngabhapathizwa njengelungu leChrist Apostolic Church.

Ukuhlangana NoFakazi BakaJehova Ngokokuqala

Ngo-1951, ngamukela ikhophi kamagazini INqabayokulinda kuFakazi okuthiwa ngu-Adedeji Boboye. Lomagazini wawuthakazelisa, ngakho ngenza isikhokhelo sawo futhi ngawufunda njalo. Ngo-1952, ngaya emhlanganweni wesigodi wezinsuku ezine woFakazi BakaJehova e-Ado Ekiti.

Engakubona kulowo mhlangano kwangihlaba umxhwele. Ngacabanga ngokungathi sína ngokuba omunye woFakazi BakaJehova kodwa ngawuphebeza lomcabango. Inkinga yami yayiwukuthi nganginamakhosikazi amathathu nesancinza ngaleso sikhathi. Ngangicabanga ukuthi ngangingeke ngikwazi ukuhlala nomfazi oyedwa vó.

Lapho ngibuyela e-Akure, ngatshela u-Adedeji ukuba angabe eseza, ngangasivuselela nesikhokhelo sami se-Nqabayokulinda. Ngakhuthala kakhudlwana esontweni lethu. Ngangicabanga ukuthi kakade uNkulunkulu wayengibusisile kusukela ngangena eChrist Apostolic Church. Ngangiye ngaganwa abafazi abathathu futhi ngaba nezingane eziningi. Ngangakhe umuzi othi mina. Ngangingakaze ngilaliswe esibhedlela. Njengoba kwakubonakala sengathi uNkulunkulu uyayiphendula imithandazo yami, ngangizoyishintshelani inkolo yami?

Ukuqhubeka Ngivelela Nokukhungatheka

Ngaqala ukunikela ngezimali ezinkulu esontweni. Ngokushesha bangenza umdala wesonto, isikhundla esangenza ngakwazi ukubona imisebenzi yangaphakathi esontweni. Engakubona kwangiphazamisa. Umfundisi ‘nabaprofethi’ babeyithanda imali; ukuhaha kwabo kwangishaqisa.

Ngokwesibonelo, ngo-March 1967 abafazi bami abahlukahlukene bangizalela izingane ezintathu. Kwakuyisiko lesonto ukuba kube nomkhosi wokwethiwa kwengane igama. Ngakho ngahambisa izipho—inhlanzi, i-lemonade, neziphuzo ezisemabhodleleni—kumfundisi ukuze kulungiselelwe umkhosi.

Ngosuku lwenkonzo yesonto, phambi kwebandla lonke umfundisi wathi: “Abantu abacebile kuleli sonto bangimangazile. Bafuna ukuba nomkhosi wokwetha igama, kodwa baletha iziphuzo nenhlanzi nje kuphela. Akukho nyama! Akukho mbuzi! Cabanga nje! UKayini wanikela kuNkulunkulu umhlatshelo wama-yam amakhulu, kodwa uNkulunkulu akazange awamukele lowo mhlatshelo ngoba wawungenagazi. UNkulunkulu ufuna izinto ezinegazi. U-Abela waletha isilwane, futhi umhlatshelo wakhe wamukelwa.”

Kulokhu, ngasukuma ngaphuma ngithukuthele. Nokho, ngaqhubeka ngiya esontweni. Ngachitha isikhathi esiningi ngokwandayo nginabangane futhi ngiya emihlanganweni yeqembu lethu. Ngezinye izikhathi ngangiya emihlanganweni eHholo LoMbuso, futhi ngavuselela isikhokhelo sami se-Nqabayokulinda. Nokho, ngangingakakulungeli ukuba omunye woFakazi BakaJehova.

Isinqumo Sokukhonza UJehova

U-1968 waba inkathi yoshintsho kimi. Ngolunye usuku ngaqala ukufunda isihloko se-Nqabayokulinda esasichaza ukushushiswa koFakazi BakaJehova ngonya eMalawi. Salandisa ngentombazane eneminyaka engu-15 ubudala eyaboshelwa emthini futhi yadlwengulwa kasithupha ngoba yenqaba ukuhlehla okholweni lwayo. Ngethuke kakhulu, ngawuyeka lomagazini, kodwa ngangilokhu ngicabanga ngawo. Ngangiqaphela ukuthi akukho ntombazane esontweni lethu engabonisa ukholo olunjalo. Kamuva kusihlwa, ngawuthatha futhi lomagazini, ngaphinde ngafunda lelo khasi.

Ngaqala ukutadisha iBhayibheli ngokuzimisela. Njengoba ngikhula olwazini, ngaqala ukubona izinga isonto elalisidukise ngalo. Njengoba kwakunjalo ezikhathini zasendulo, abapristi bethu ‘babenza okunengekayo.’ (Hoseya 6:9) Labo bantu babephakathi kwabaprofethi bamanga uJesu axwayisa ngabo! (Mathewu 24:24) Ngangingasenalo ukholo emibonweni nasemisebenzini yabo yamandla. Nganquma ukugqashula enkolweni yamanga futhi ngisize abanye benze okufanayo.

Imizamo Yokungigcina Ngisesontweni

Lapho abadala besonto beqaphela ukuthi ngangizimisele ukushiya isonto, bathumela amanxusa ukuzongincenga. Babengafuni ukulahlekelwa umthombo obalulekile wemali. Bafuna ukungenza u-Baba Egbe, umvikeli welinye isonto laseChrist Apostolic e-Akure.

Ngenqaba futhi ngabatshela ukuthi kungani. Ngathi: “Isonto belilokhu lisikhohlisa. Lithi bonke abantu abalungile baya ezulwini. Kodwa ngiye ngalifunda iBhayibheli, futhi ngiyaqiniseka ukuthi bangu-144 000 kuphela abantu abaya ezulwini. Abanye abantu abalungile bayophila emhlabeni oyipharadesi.”—Mathewu 5:5; IsAmbulo 14:1, 3.

Umfundisi wesonto wazama ukwenza amakhosikazi ami ukuba angijikele. Wawatshela ukuthi angabavumeli oFakazi BakaJehova ukuba beze emzini wethu. Enye yamakhosikazi ami yangifakela ushevu ekudleni. Amabili angixwayisa ngombono ayewubone esontweni. Umbono wawubonisa ukuthi ngangizofa uma ngishiya isonto. Naphezu kwalokho, ngaqhubeka ngifakaza emakhosikazini ami, ngiwamema ukuba aye nami emihlanganweni. “Nizothola abanye abayeni khona,” ngiwatshela. Nokho, akekho kuwo owabonisa isithakazelo, futhi aqhubeka ezama ukungiyekisa.

Ekugcineni, ngo-February 2, 1970, lapho ngibuyela ekhaya ngemva kohambo oluya edolobhaneni elingumakhelwane, ngathola umuzi ukhala ibhungane. Wonke amakhosikazi ami ayebaleke nezingane.

Ukunamathela ENkosikazini Eyodwa

‘Sengizokwazi ukulungisa isimo somshado wami manje,’ ngicabanga. Ngacela inkosikazi yami yokuqala, uJanet, ukuba ibuyele ekhaya. Yavuma. Nokho, umndeni wakubo wala waphetha. Lapho lawa amanye amakhosikazi ami ethola ukuthi ngangicele uJanet ukuba abuye, aya emzini kayise afike azama ukumshaya uJanet. Umndeni wakubo wabe usungibizela umhlangano.

Kwakunabantu abangaba ngu-80 kulomhlangano. Uyise omncane kaJanet, owayeyinhloko yomndeni, wathi: “Uma ufuna ukuphinde uganwe yindodakazi yethu, kumelwe ubuyise nalawa amanye amakhosikazi. Kodwa uma ufuna ukuqhuba inkolo yakho entsha futhi uhlale nenkosikazi eyodwa, kumelwe uthole enye inkosikazi. Uma umbuyisa uJanet, lawa amanye amakhosikazi akho azombulala, asifuni-ke ukuba indodakazi yethu ife.”

Ngemva kwenkulumo ende, umndeni waqaphela ukuthi ngangizimisele ngokuba nenkosikazi eyodwa kuphela. Ekugcineni bangivumela. Uyise omncane wathi: “Ngeke sikuphuce umkakho. Ungamthatha uhambe naye.”

Ngo-May 21, 1970, mina noJanet sashada ngokomthetho. Ezinsukwini ezingu-9 kamuva ngabhapathizwa njengomunye woFakazi BakaJehova. Ngo-December ngalowo nyaka, noJanet wabhapathizwa.

Ukujabulela Isibusiso SikaJehova

Amalungu esonto lethu lesikhathi esidlule ayeprofethe ukuthi uma siba oFakazi sasizofa. Lokho akusho eminyakeni ecishe ibe ngu-30 edlule. Ngisho noma ngingafa manje, ingabe kuyobe kungenxa yokuthi ngaba omunye woFakazi BakaJehova? Uma umkami efa manje, ukhona ongathi kungenxa yokuthi waba omunye woFakazi BakaJehova?

Ngiye ngashikashikeka ukuze ngibonise abantwana bami abangu-17 indlela yeqiniso. Nakuba abaningi babo base bebadala ngesikhathi ngiba uFakazi, ngabakhuthaza ukuba batadishe iBhayibheli futhi ngaya nabo emihlanganweni yebandla nakwemikhulu. Kuyinjabulo kimi ukuthi abahlanu babo bakhonza uJehova kanye nami. Omunye ukhonza kanye nami njengomdala ebandleni. Omunye uyinceku ekhonzayo ebandleni eliseduze. Ababili kubantwana bami bakhonza njengamaphayona esikhathi esigcwele.

Lapho ngibheka emuva, uyangimangaza umusa kaJehova ongafanelwe wokungisiza ukuba ngibe yinceku yakhe. Yeka indlela ayiqiniso ngayo amazwi kaJesu: “Akekho umuntu ongeza kimi ngaphandle kokuba uBaba ongithumile, emdonsa”!—Johane 6:44.

[Umbhalo waphansi]