Imishado Edumisa UJehova

Isihloko Esilandelayo Esiphathelene Nemishado Yobukristu Salungiselelwa Okokuqala Etopiya Ukuze Kunikezwe Isiqondiso Esiwusizo Ngolimi Lwesi-amharic Kubantu Abaningi Bakulelozwe Abaye Baba Ofakazi Bakajehova Muva Nje. Sikhuluma Ngamasiko Nemikhuba Ethile Yendawo Okungase Kuhluke Kokwalapho Uhlala Khona. Cishe Uyothola Umehluko Uthakazelisa Ngempela. Ngesikhathi Esifanayo, Lesi Sihloko Sinikeza Iseluleko Sebhayibheli Esilinganiselayo Ozophawula Ukuthi Siyasebenza Ngisho Noma Imikhuba Yemishado Ihlukile Endaweni Yakini.

INQABAYOKULINDA ka-October 15, 1984, yayinesihloko esihle esifundwayo esithi “Imishado YobuKristu Eletha Injabulo.” Isihloko esilandelayo kulowo magazini sasithi “Thola Injabulo Elinganiselwe Emadilini Omshado.” (Kunoma ubani ocabangela ukushada, kunezeluleko ezengeziwe ezihlakaniphile encwadini ethi Ukwenza Ukuphila Komkhaya Wakho Kujabulise, isahluko 2, nethi Ubusha bakho—Ukuthola Okungcono Kakhulu Kubo, izahluko 19 no-20.)a Kunabaningi abaye baba oFakazi BakaJehova kusukela ekuphumeni kwalezo zihloko, ngakho sithanda ukubukeza amaphuzu athile asebenza ngokukhethekile endaweni yakithi, kanye namanye amaphuzu afanelekayo ayosisiza ukuba senze imishado ibe edumisa uJehova, uMsunguli womshado.

Umbuzo ongase ucatshangelwe kuqala othi, Kufanele ube nini umshado? Ingabe usuku kufanele luqondiswe isikhathi esingokwesiko semishado yendawo? Inkolelo yendawo iwukuthi noma imuphi umshado owenziwa nganoma isiphi esinye isikhathi sonyaka ngeke uphumelele. Lena inkolelo-ze engenasisekelo, ngoba imibhangqwana eminingi eshadile ekhonza uJehova ngenjabulo nangobunye ayizange ishade ngesikhathi esingokwesiko. Asikholelwa enhlanhleni naseshweni. (Isaya 65:11; Kolose 2:8) Ngeke sizisize izihlobo ezingakholwa ukuba zibone umehluko phakathi kweqiniso namanga uma sibeka usuku lomshado ngokuvumelana nezinkolelo-ze zazo. Iqiniso liwukuthi, amaKristu angashada nganoma iyiphi inyanga.

Lapho inkulumo yomshado ihlelelwa ukuba ibe ngemva kwemininingwane engokomthetho edingekayo, kungaba ukuhlakanipha ukungashiyi igebe lezinsuku eziningi phakathi kwalezi zenzakalo ezimbili. Uma umbhangqwana ungathanda ukuba inkulumo yomshado ibe seHholo LoMbuso, kufanele uthintane nabadala bebandla kusasele isikhathi esanele ukuze ucele ukusebenzisa ihholo. Abadala bakulelo bandla bayonikeza isiqinisekiso sokuthi amalungiselelo omshado ayobashiya benonembeza ohlanzekile. Isikhathi esibekiwe kufanele singangqubuzani nanoma imuphi umsebenzi webandla. Umzalwane okhethelwe ukuba anikeze inkulumo yomshado uyohlangana kusengaphambili nomkhwenyana nomakoti besikhathi esizayo ukuze anikeze iseluleko esiwusizo futhi aqiniseke ukuthi azikho izinto ezingokokuziphatha nezingokomthetho ezingavimbela umshado nokuthi uyavumelana namalungiselelo anoma iliphi idili eliyolandela. Inkulumo yomshado kufanele ithathe isikhathi esingaba ingxenye yehora futhi inikezwe ngendlela enesizotha, igcizelela izici ezingokomoya. Inkulumo yomshado ngokuqinisekile ibaluleke ngaphezu kwanoma iliphi idili elingase lilandele.

Umshado wobuKristu uyithuba elihle lokubonisa ukuthi ‘asiyona ingxenye yezwe.’ (Johane 17:14; Jakobe 1:27) Ukuhleleka kwethu kufanele kugqame. Lokho kuyosho ukuthi siyofika ngesikhathi kunokuba silindise abantu, okungenzeka kuphazamise imisebenzi yebandla. Lokhu kungokuthile okufanele umakoti akuqaphele ngokukhethekile, ngoba izihlobo zezwe zingase zimcele ukuba ephuze—kube sengathi bagcizelela ukubaluleka kwakhe. Ngokugcina isikhathi udade ongumKristu angabonisa ukuthi izimfanelo ezingokomoya, ezinjengokuthobeka nokucabangela, zibalulekile kuye! Futhi, lapho kumenywe umthwebuli wezithombe ukuba azoqopha leso senzakalo, ukuhleleka kubalulekile. Senza kahle ukucela ukuba umthwebuli wezithombe eze egqoke ibhantshi, uthayi nebhulukwe elihloniphekile futhi angaphazamisi inkulumo lapho ethwebula izithombe. Akufanele kuthwetshulwe izithombe phakathi nomthandazo. Ukuhleleka kwethu kuyodumisa uJehova futhi kunikeze ubufakazi obuhle. Asikho isidingo sokuzama ukwenza ngokuvumelana nemikhuba yendawo eyofiphaza injongo yangempela yesenzakalo.

Idili aliyona imfuneko yomshado ophumelelayo, kodwa isenzakalo esinjalo esijabulisayo asenqatshelwe ngokomBhalo. Nokho, kumaKristu eqiniso umbuthano onjalo kufanele uhluke emadilini ezwe aphawuleka ngokweqisa, ukudakwa, ukudla ngokweqile, umculo oklabalasayo, umdanso osikisela ukuziphatha okungafanele, ngisho nokulwa. IBhayibheli lihlanganisa “imibuthano exokozelayo” nemisebenzi yenyama. (Galathiya 5:21) Kuba lula kakhudlwana ukulawula ngendlela efanele lapho umbuthano ungemkhulu kakhulu. Asikho isidingo sokufaka ithende ukuze uvumelane nemikhuba evamile. Uma abanye benquma ukusebenzisa ithende ngenxa yendawo noma isimo sezulu, lokhu kuyindaba yomuntu siqu.

Okuhlangenwe nakho kuye kwabonisa ukuthi indlela enhle yokulinganisela inani lezihambeli ukusebenzisa izimemo eziqondile ezilotshiwe. Kuwukuhlakanipha kakhudlwana ukumema abantu ngabanye kunokumema wonke amabandla, futhi njengamaKristu ahlelekile, kufanele sikuhloniphe lokho kulinganisela. Izimemo ezilotshiwe zisisiza nokuba sigweme ukuphoxeka kokuba kufike umuntu osusiwe ekuhlanganyeleni edilini, ngoba uma lokho kwenzeka, abafowethu nodadewethu abaningi bangase bekhethe ukuhamba. (1 Korinte 5:9-11) Uma umbhangqwana umema izihlobo noma labo ojwayelene nabo abangakholwa, ngokungangabazeki uyolilinganisela inani labo, unika ukubaluleka okwengeziwe kulabo “abahlobene nathi okholweni.” (Galathiya 6:10) Abanye baye bakhetha ukumema abantu bezwe abajwayelene nabo noma izihlobo ezingakholwa enkulumweni yomshado kunasedilini. Ngani? Ngoba kuye kwaba nezenzakalo lapho izihlobo zezwe zabangela isimo esidumazayo edilini lomshado kangangokuba abafowethu nodadewethu abaningi baba nomuzwa wokuthi babengenakuhlala. Eminye imibhangqwana iye yahlela ukuba nesidlo sasemini esincane nje namalungu aseduze omkhaya nabangane abangamaKristu.

Ngokuvumelana nencwadi kaJohane 2:8, 9, kuwusizo ukukhetha ‘umqondisi wedili.’ Umkhwenyana uyothanda ukukhetha umKristu othembekile oyoqikelela ukuthi kugcinwa ukuhleleka nezindinganiso eziphakeme. Lapho abangane beletha izipho, lokhu kufanele kwenziwe ngaphandle ‘kokugabisa.’ (1 Johane 2:16) Umculo ungaba ojabulisayo ngaphandle kokuba ungcoliswe izosha ezingabazekayo, umsindo oweqile, noma isigqi esinamandla. Abaningi baye bakuthola kungcono kakhulu ukucela umdala othile ukuba awulalele kusengaphambili umculo ozodlalwa. Ukudansa kungase kube nezingibe, njengoba imidanso eminingi engokwesiko ithathelwa emdansweni ophathelene nenzalo futhi ibonisa inkanuko engafanele. “Isikhathi sekhekhe ne-champagne” ngezinye izikhathi siye saba uphawu lwabantu bezwe lokuvukwa amadlingozi. Eqinisweni, imibhangqwana eminingi engamaKristu iye yanquma ukungabi nabo utshwala emadilini emishado, ngaleyo ndlela igwema izinkinga.

Njengoba sifuna ukudumisa uJehova, siyokugwema ukubukisa ukuze sidonsele ukunakekela ngokweqile kithi. Ngisho nezincwadi zezwe ziye zawugxeka umoya ovamile wokweqisa. Yeka ukuthi kungaba okungahlakaniphile kangakanani ngombhangqwana ukuba ungene ezikweletini ngenxa yomshado omuhle ngokweqile bese uswela iminyaka eminingi ukuze ukhokhele izindleko zalolo suku olulodwa! Yiqiniso, noma iyiphi ingubo egqokwa kulesi senzakalo kufanele ibe nesizotha futhi ilungiswe kahle, ifanele umuntu othi uhlonipha uNkulunkulu. (1 Thimothewu 2:9, 10) Isihloko esithi “Imishado YamaKristu Kufanele Ibe Ngelinganiselayo” (INqabayokulinda ka-December 1, 1975) sasho lamazwi athakazelisayo ngezingubo:

“Umshado womuntu uyisenzakalo esikhethekile, ngakho ngokuvamile umuntu unakekela ukuba abukeke ejabulile futhi ekhanga. Kodwa lokhu akusho ukuthi umuntu kufanele agqoke inhlobo ethile yengubo noma isudi. Umuntu wenza kahle ngokucabangela izitayela zasendaweni akuyo, izindleko nalokho umuntu akuthandayo. . . . Nokho, ingabe kungaba okunengqondo yini ukuthenga ingubo ebiza kakhulu bese kubangela umthwalo wezindleko kubo noma kwabanye? . . . Abanye omakoti baye bakujabulela ukusebenzisa ingubo yomngane oseduze noma isihlobo. Abanye baye baneliseka kakhulu ngokuzenzela ngokwabo ingubo yomshado, cishe ngaleyo ndlela bakwazi ukuba nengubo engase isetshenziswe kwezinye izenzakalo esikhathini esizayo. Futhi kuhle impela ukuba umbhangqwana ushade ngezingubo zawo ezinhle kakhulu ezijwayelekile . . . Abanye abangase bakwazi ukuba nomshado onemicikilisho bangase bafise ukuba ‘nomshado othulile’ ngenxa yokuba bucayi kwezikhathi.”

Ngokufanayo, izimpelesi (abangane bomkhwenyana nomakoti) akudingekile ukuba zibe ziningi. Nazo ngeke zithande ukudonsela ukunakekela okungafanele kuzo ngokugqoka nangezenzo zazo. Nakuba umuntu osusiwe ekuhlanganyeleni engase avunyelwe ukuba khona enkulumweni yomshado eHholo LoMbuso, INqabayokulinda ka-October 15, 1984, yathi: “Bekungaba okungafanelekile ukuba nezimpelesi ezisusiwe ekuhlanganyeleni noma ezinemikhuba yokuphila engqubuzana ngokungathi sína nezimiso zeBhayibheli.”

Nakuba uJesu aya emshadweni, asinakucabanga ukuthi wayengawuvumela umkhuba ovamile wokuba kube nodwendwe lwezimoto ezijikeleza edolobheni zibanga umsindo omkhulu; amaphoyisa aze ahlawulisa abashayeli ngokuhutha odwendweni lomshado. (Bheka uMathewu 22:21.) Kukho konke lokhu, kunokuba alingise izenzo zokubukisa noma ezivame kubantu bezwe, amaKristu abonakalisa ukuhlakanipha kwabathobekileyo.—IzAga 11:2.

Kodwa kuthiwani ngokuya emishadweni yomakhelwane, abantu bezwe esisebenza nabo, noma izihlobo ezikude noma esibajwayele? UmKristu ngamunye kumelwe azinqumele kulokhu. Kuhle ukukhumbula ukuthi isikhathi sethu siyigugu, njengoba sidinga isikhathi senkonzo yethu, isifundo somuntu siqu neminye imisebenzi yomkhaya neyebandla. (Efesu 5:15, 16) Ngezimpelasonto, sinemihlangano nenkonzo yasensimini esingafuni kusiphuthele. (Heberu 10:24, 25) Izikhathi zemishado eminingi zingqubuzana nezemihlangano noma inkonzo ekhethekile yasensimini ehlobene neSidlo SeNkosi Sakusihlwa. Akufanele sizivumele ukuba siphazanyiswe ekwenzeni imizamo ekhethekile efana naleyo eyenziwa abafowethu emhlabeni wonke ukuze babe khona eSidlweni SeNkosi Sakusihlwa. Ngaphambi kokwazi iqiniso, sachitha isikhathi esiningi nabantu bezwe, mhlawumbe ezimweni ezazihlazisa uNkulunkulu. (1 Petru 4:3, 4) Manje izinto eziza kuqala kithi sezihlukile. Kuyenzeka ngaso sonke isikhathi ukufisela umbhangqwana wezwe izilokotho ezinhle ngokuwuthumelela ikhadi noma ukuwuvakashela isikhashana ngolunye usuku. Abanye baye basebenzisa izikhathi ezinjalo ukuze banikeze ubufakazi, behlanganyela imibhalo ethile efanelekayo kwabasanda kushada.

Umshado oqondiswa izici ezingokomoya kunezindlela zezwe uyomdumisa ngempela uJehova. Ngokuqiniseka ukuthi azigcina ehlukile ezweni, kuzinkolelo-ze kanye nokweqisa kwalo, ukungavumeli ukuba umshado uphazamise imisebenzi yasikhathi sonke engokwasezulwini nangokubonisa ukuthobeka kunokubukisa, amaKristu ayosijabulela leso senzakalo. Ngaphezu kwalokho, ayokwazi ukukhumbula leso senzakalo ngonembeza omuhle nezinkumbulo ezijabulisayo. Ngokubonisa ukuhlakanipha nokulinganisela, kwangathi yonke imishado yethu yobuKristu inganikeza ubufakazi ezibukelini ezinezinhliziyo eziqotho.

[Umbhalo waphansi]

[Isithombe ekhasini 24, 25]

AmaKristu awayilandeli ngendlela yobugqila yonke imikhuba yomshado yendawo