Ingabe Uyakhumbula?

Ingabe uye wabacabangela ngokucophelela omagazini bamuva be-Nqabayokulinda? Uma kunjalo, uyokuthola kuthakazelisa ukukhumbula okulandelayo:

◻ Imibhangqwana Eminingi Eshadile Namuhla Iye Yasilandela Kanjani Isibonelo Esihle Esashiywa U-Akwila NoPrisila?

U-Akwila noPrisila bakhonza emabandleni amaningana ahlukahlukene. Njengabo, amaKristu amaningi osuku lwanamuhla aye azenza atholakala ukuze athuthele lapho indingeko inkudlwana khona. Futhi aye athola injabulo nokwaneliseka ngokubona izithakazelo zoMbuso zikhula nangokukwazi ukuhlakulela ubungane bobuKristu obuyigugu.—12/15, ikhasi 24.

◻ Uyini Umbono WeBhayibheli Ngophuzo Oludakayo?

Umbono weBhayibheli ngophuzo oludakayo uyalinganisela. Kolunye uhlangothi, iBhayibheli lithi iwayini liyisipho esivela kuNkulunkulu. (IHubo 104:1, 15) Ngakolunye, liyakulahla ukuzitika ngokweqile. (Luka 21:34; 1 Thimothewu 3:8; Thithu 2:3; 1 Petru 4:3)—12/15, ikhasi 27.

◻ Yisiphi Isici Esibalulekile Sencwadi YeBhayibheli KaHagayi?

Nakuba incwadi kaHagayi inamavesi angu-38 kuphela, igama likaNkulunkulu lisetshenziswe izikhathi ezingu-35. Isiprofetho esinjalo asizwakali lapho kufakwa isiqu esithi “Nkosi” esikhundleni segama likaJehova.—1/1, ikhasi 6.

◻ Isiphi Isifundo Esingafundwa Esonweni SikaDavide NesikaManase?

Nakuba uJehova amthethelela uDavide noManase, lamadoda—ekanye no-Israyeli—kwadingeka abhekane nemiphumela yezenzo zawo zokona. (2 Samuweli 12:11, 12; Jeremiya 15:3-5) Ngokufanayo, nakuba uJehova ezithethelela izoni eziphendukayo namuhla, kungase kube nemiphumela yezenzo zazo engenakugwenywa.—1/1, ikhasi 27.

◻ Kukanjani ‘Izinyawo Zalabo Abamemezela Izindaba Ezinhle’ ZoMbuso KaNkulunkulu “Zibukeka Kahle”? (Isaya 52:7, NW)

Yizinyawo ngokuvamile umuntu ahamba ngazo lapho eyoshumayela kwabanye. Lezo zinyawo empeleni zimelela umuntu. Ngakho kwabaningi abezwa futhi basabele kahle ezindabeni ezinhle zoMbuso, izinyawo ezinjalo zezithunywa zinhle ngempela.—1/15, ikhasi 13.

◻ Yimuphi Umsebenzi Okabili Ohileleke ‘Ekumemezeleni Izindaba Ezinhle’? (1 Korinte 9:16)

Okokuqala, kumelwe simemezele izindaba ezinhle zoMbuso. Isici sesibili salomsebenzi sihilela ukufundisa labo abasabela kahle ekumenyezelweni koMbuso.—1/15, ikhasi 23.

◻ Yiziphi Izinzuzo Zomuntu Siqu Eziwumphumela Wokuhlabelela Izingoma ZoMbuso Emihlanganweni Yebandla?

Ukuhlabelela kusinika ithuba lokuzwakalisa imizwa yethu ngoMdali wethu. (IHubo 149:1, 3) Lapho sihlabelela ngenhliziyo yonke uma ibandla lihlabelela, lokho kungasibeka esimweni sengqondo nesenhliziyo esifanelekela isimiso esizolandela. Kungasishukumisela ekubeni nengxenye eyengeziwe ekukhulekeleni uJehova.—2/1, ikhasi 28.

◻ Kunini Lapho Usuku Lokufa Lungcono Kunosuku Lokuzalwa? (UmShumayeli 7:1)

Usuku lokufa lungaba ngcono kunosuku lokuzalwa komuntu uma ngaleso sikhathi lowo muntu eyobe eselakhile igama elihle noJehova, ongabavusa abakholekile abafayo. (Johane 11:25)—2/15, ikhasi 12.

◻ Kungani Kufanele Incwadi YomShumayeli Isisize Ngokomuntu Siqu?

Ingasiza ngamunye wethu ukuba aqondise umbono wakhe ngokuphila nalokho agxila kukho. (UmShumayeli 7:2; 2 Thimothewu 3:16, 17)—2/15, ikhasi 16.

◻ Ingabe OFakazi BakaJehova Bangabalandeli Bobufandamentali?

Cha. Nakuba benezinkolelo ezingokwenkolo eziqinile, ababona abalandeli bobufandamentali ngomqondo leli gama elisetshenziswa ngawo. Abaphendukeli ekubhikisheni nasebudloveni bephikisa labo abangavumelani nabo. Balingisa uMholi wabo, uJesu Kristu.—3/1, ikhasi 6.

◻ Ukungazi Isikhathi Esiqondile Sokuza KukaJesu Ezoletha Impindiselo KaNkulunkulu Kunamuphi Umphumela KumaKristu?

Lokhu kubonakala kwenza amaKristu ahlale eqaphile futhi kuwanika ithuba lokuba nsuku zonke abonise ukuthi uJehova awamkhonzi ngezisusa zobugovu.—3/1, ikhasi 13.

◻ Yini Okufanele Siyicabangele Ngaphambi Kokumthathela Isinyathelo Esingokomthetho Umfowethu Okungase Kwenzeke Ukuthi Usiphambile?

Kufanele sicabangele imiphumela okungase kube nayo kithi, kwabanye abahilelekile, ebandleni nakwabangaphandle. (1 Korinte 6:7)—3/15, ikhasi 22.

◻ Ingatholakala Kanjani Injabulo Yangempela?

Injabulo yangempela iyisimo senhliziyo, esisekelwe okholweni lwangempela nasebuhlotsheni obuhle noJehova. (Mathewu 5:3)—3/15, ikhasi 23.

◻ Yini UmKristu Okufanele Ayenze Uma Ebizelwa Isabelo Sokuba Umsizi Wejaji?

UmKristu ngamunye obhekana nesabelo sokuba umsizi wejaji kumelwe anqume ukuthi iyiphi inkambo ayoyilandela, ngokusekelwe ekuqondeni kwakhe iBhayibheli nakunembeza wakhe. (Galathiya 6:5)—4/1, ikhasi 29.