Indlela Ongathola Ngayo Ithemba Esikhathini Esidangalisayo

AKE uzicabange ubhekene nalokhu okulandelayo: Kushatshalaliswe zonke izinto zakho ezibonakalayo, wasala ungenalutho. Izingane zakho—ezikulethela injabulo ekuphileni kwakho—zishonile. Umngane wakho womshado akakusekeli. Impilo yakho iye yawohloka ngokoqobo. Usuku ngalunye lungokuhlangenwe nakho okubuhlungu.

Uma lesi bekuyisimo obhekene naso, ingabe ubungasibona isizathu sokuqhubeka uphila? Noma ubuyonqotshwa ukudangala?

Lesi simo esidabukisayo esisanda kuchazwa siyilokho uJobe, indoda eyayiphila ngesikhathi seBhayibheli, abhekana nakho ngokoqobo ekuphileni. (Jobe, izahluko 1, 2) Ecindezelekile, uJobe wabubula: “Umphefumulo wami ukhathele ukuhamba kwami.” Wayengakwamukela ukuphunyuzwa ukufa. (Jobe 10:1; 14:13) Nokho, naphezu kokuhlupheka kwakhe okukhulu, uJobe wagcina ubuqotho bakhe kuNkulunkulu. Ngakho-ke uJehova “wabusisa ukugcina kukaJobe kunokuqala kwakhe.” Ngenxa yalokho wafa ngokuthula, “esemdala, esanelisiwe yizinsuku.”—Jobe 42:12, 17.

UJobe wabeka isibonelo sokukhuthazela esisabatshazwa kuze kube namuhla. Ukulingwa kwakhe kwathuthukisa ubuntu bakhe futhi kwashukumisela abanye emisebenzini emihle. (Jakobe 5:10, 11) Okubaluleke kunakho konke, ubuqotho bukaJobe obungenasici bathokozisa inhliziyo kaJehova. (IzAga 27:11) Ngakho ubuhlungu obesabekayo ekugcineni baba ukunqoba okukhulu kokuhlonipha uNkulunkulu, kokholo nobuqotho okwaletha izibusiso kuJobe nakubo bonke abaye bashukunyiswa isibonelo sakhe.

Ithemba Naphezu Kokulingwa Okuhlukahlukene

Ungase ubhekane nokulingwa okufana nokukaJobe. Ukushona kothandekayo kungenzeka kuye kwakushiya ukhungathekile ngokomzwelo. Ukugula kakhulu kungenzeka kuye kwenza ukuphila kwakho kwaba okuhlangenwe nakho okubuhlungu. Yonke indlela yakho yokuphila ingase ibonakale iwohlokile ngenxa yesehlukaniso esizwisa ubuhlungu. Ukuwa ngokwezomnotho kungenzeka ukuthi kukushiye untula. Kungenzeka uyisisulu soshushiso olunonya lwabaphikisi bokukhulekela kweqiniso abanenzondo. Kungenzeka umzabalazo wokubhekana nokulingwa kwakho uye wakushiya uzizwa ungenalo ithemba ngekusasa lakho.—1 Petru 1:6.

Kunokuba uvumele ukunqotshwa ukudangala, zibuze, ‘Kungani ngihlupheka?’ Uhlupheka ngoba uphila ezweni ‘elisemandleni omubi,’ uSathane uDeveli. (1 Johane 5:19) Ngenxa yalokho, wonke umuntu uyahlupheka. Ngandlela-thile sonke iyasithinta inzondo yesigijimi soMbuso ephefumulelwe uDeveli, amazwi abanye angenaluthando, noma izenzo ezihlasimulisayo zokungamesabi uNkulunkulu ezivame kakhulu kulezi “zikhathi ezibucayi.”—2 Thimothewu 3:1-5.

Uma uye wehlelwa okuthile okubuhlungu ekuphileni kwakho, kungenzeka ukuthi uye waba isisulu ‘sokuhlangabezana nesikhathi nethuba.’ (UmShumayeli 9:11) Ngakolunye uhlangothi, ngezinye izikhathi izinto azihambi kahle ekuphileni ngenxa yesono esasizuza njengefa. (Roma 5:12) Ngisho noma uye wona ngokungathi sína kodwa waphenduka futhi wafuna usizo olungokomoya, ungabi nomuzwa wokuthi uNkulunkulu ukulahlile. (IHubo 103:10-14; Jakobe 5:13-15) Usikhathalela ngaphezu kwanoma ubani omunye. (1 Petru 5:6, 7) Ungaqiniseka ukuthi “uJehova useduze nabo abanenhliziyo eyaphukileyo; uyabasindisa abanomoya odabukileyo.” (IHubo 34:18) Kungakhathaliseki ukuthi kwesabeka noma kukhulu kangakanani ukulingwa kwakho, uJehova angakunika ukuhlakanipha kokubhekana nakho. (Jakobe 1:5-8) Ungalokothi ukhohlwe ukuthi uJehova angelapha wonke amanxeba. Uma wamukeleka kuye, akukho okungakuvimbela ukuba uthole umklomelo wokuphila.—Roma 8:38, 39.

Ingabe Kukhona Okuhle Okungazuzwa Ekulingweni?

Kunesisho esidala esithi, “Akulahlwa mbeleko ngakufelwa.” Leyo indlela elula yokuthi kungakhathaliseki ukuthi izinto ziba zimbi kangakanani, sihlala sikhona isizathu sethemba. Injongo yakho konke okubhalwe eZwini likaNkulunkulu iwukuba “sibe nethemba.” (Roma 15:4) Kungakhathaliseki ukuthi isimo sakho sinzima kangakanani, izithembiso nezimiso eziseBhayibhelini zingakulethela injabulo nethemba elivuselelwe.

ImiBhalo ibonisa ukuthi “usizi lungolomzuzwana futhi lulula” lapho luqhathaniswa nezibusiso zaphakade ezibekwe phambi kwalabo abathanda uNkulunkulu. (2 Korinte 4:16-18) IBhayibheli libonisa nokuthi izimfanelo zokuhlonipha uNkulunkulu ezakheka phakathi nokulingwa ziyigugu kakhulu kunodumo noma ingcebo yezinto ezibonakalayo. (1 Johane 2:15-17) Ngakho, ngisho nokuhlupheka kungafeza injongo enhle. (Heberu 5:8) Empeleni, ukusebenzisa lokho okufunde phakathi nokulingwa kungakulethela izibusiso ezingalindelekile.

Ukulingwa okunzima kungase kukwenze ube nomusa ngokwengeziwe. Ungase uvume ukuthi ngaphambili wawunobuntu obabucasula abanye futhi buze buphazamisa nentuthuko yakho engokomoya. Mhlawumbe kwakuwukuzethemba ngokweqile. Ngemva kokubhekana nosizi, ungase uqaphele ngokushesha indlela obuthaka ngayo nokuthi ubadinga kangakanani abanye. Uma ukulingwa kwakho kuye kwakufundisa leso sifundo futhi uye wenza izinguquko ezidingekayo, kuye kwakuzuzisa.

Kuthiwani uma esikhathini esidlule, abanye bebekuthola kunzima ukusebenzelana nawe ngenxa yokuthi wawunobunzima bokulawula intukuthelo yakho? Lokho kungenzeka kuye kwakubangela ukucindezeleka okuthile ngokwempilo. (IzAga 14:29, 30) Nokho, kungenzeka ukuthi manje isimo sesingcono kakhulu ngoba uthembela emoyeni kaNkulunkulu ukuba ukusize uzithibe.—Galathiya 5:22, 23.

Njengabanye, kungenzeka ukuthi esikhathini esithile ubuntula isihawu ukuze ube nesihe kulabo abonayo. Kodwa uma wena ngokwakho uye waba sesimweni lapho uzizwa usidinga kakhulu isihe, cishe manje uthambekele kakhudlwana ekubeni nesihe kwabanye. Uzwela, ukukhathalela nesihe okuthinta inhliziyo owakuboniswa kuye kwakwenza waqaphela ukuthi kufanele ubonise izimfanelo ezinjalo kubenzi bokubi abaphendukayo. Uma ubuhlungu owabuzwa buye bakushukumisela ukuba ulungise lobo buthakathaka ebuntwini bakho, lena ngenye inzuzo oyithole kulokho oye wabhekana nakho. Uye wafunda ukuthi “isihe sethaba ngokunqobayo phezu kwesahlulelo.”—Jakobe 2:13; Mathewu 5:7.

Kuthiwani uma isiyalo osithole ebandleni lobuKristu siye saphumela ekubeni ulahlekelwe amalungelo owazisayo nokuhlonishwa abanye? Ungavumi ukunqotshwa ukudangala. Isenzo sokuyala sisiza ekugcineni ibandla lihlanzekile, kodwa izinjongo zaso zihlanganisa ukubuyiselwa komenzi wobubi esimweni esingokomoya. Kuyavunywa, “asikho isiyalo esibonakala okwamanje sengathi siyajabulisa, kodwa sibanga usizi; nokho kamuva labo abaqeqeshwe yiso sibathelela isithelo esinokuthula, okuwukuthi, ukulunga.” (Heberu 12:11) Nakuba isiyalo singaba negalelo elibuhlungu, asimshiyi engenathemba umuntu ophenduke ngokuzithoba. Inkosi yakwa-Israyeli wasendulo uDavide yayalwa kanzima ngokwenza okubi, kodwa yaphenduka futhi ekugcineni yanconywa ngokukhethekile njengendoda yokholo oluphawulekayo.—2 Samuweli 12:7-12; IHubo 32:5; Heberu 11:32-34.

Ukulingwa kungaba nethonya elinamandla embonweni wakho. Ngaphambili, kungenzeka ingqondo yakho yayigxile emigomweni nasekutholeni izinto ezibonakalayo ezakulethela ukuqashelwa nokuvelela kulelizwe. Mhlawumbe ukulingwa okuhlobene nokuwa ngokwezimali noma ukulahlekelwa izinto ezibonakalayo kuye kwagxilisa ingqondo yakho ezintweni ezibaluleke ngokwengeziwe. (Qhathanisa neyabaseFilipi 1:10.) Manje uyaqaphela ukuthi ukuphela kwezinto eziletha injabulo yeqiniso nokwaneliseka okuhlala njalo izindinganiso nemigomo engokomoya enkonzweni engcwele.

Thembela KuJehova

Ukunikela inkonzo engcwele kuJehova kungase kuphumele ekushushisweni nasekuhluphekeni ezandleni zalabo abaphikisa izinkolelo zakho zobuKristu. Ungase uzizwe ucindezelekile ngenxa yalokhu kulingwa, kodwa kukhona ongakuzuza kukho. Lolu vivinyo lungase luqinise ukholo lwakho. Ngaphezu kwalokho, abanye ababhekene noshushiso bangase bakhuthazwe futhi baqiniswe ukubona ukukhuthazela kwakho. Labo ababona ukuziphatha kwakho okuhle bangase bashukunyiselwe ukuba bakhazimulise uNkulunkulu. Ngisho nabaphikisi bakho bangase bahlazeke futhi bavume imisebenzi yakho emihle!—1 Petru 2:12; 3:16.

Ukuze ugweme ukudangala lapho ushushiswa, kudingeka uthembele kuJehova. IZwi lakhe libonisa ukuthi ukukhululeka ekulingweni kuyofika nakanjani, kodwa kungase kungafiki ngokushesha njengoba ungathanda. Okwamanje, ‘ungayeki ukwenza ngokufanele.’ (2 Thesalonika 3:13) Qhubeka ufuna izindlela zokubhekana nokulingwa nezokukhuthazela. Ngisho nalapho izinto zibonakala zingalethi ithemba, “phonsa phezu kukaJehova umthwalo wakho, uzakukuphasa; akayikuvuma naphakade ukuba olungileyo azanyazanyiswe.” (IHubo 55:22) Kunokuba uqhathe umunyu, cabanga ngendlela obusiseke ngayo ngokwazi uJehova, ukuba nendawo phakathi kwabantu bakhe, nokuba nethemba lokuphila okuphakade.—Johane 3:16, 36.

Gcina ingqondo yakho igxile ezintweni ezibalulekile. Iya kuJehova nsuku zonke ngomthandazo, ucele amandla okukhuthazela. (Filipi 4:6, 7, 13) Susa noma imuphi umcabango wokuphindisela kulabo ababangele ukuba uhlupheke. Shiya konke ezandleni zikaJehova. (Roma 12:19) Qhubeka ufuna izindlela zokuthuthukisa ubuntu bakho, uhlakulele izimfanelo zobuKristu. (2 Petru 1:5-8) Kwazise konke okwenzelwa abanye, kuhlanganise nabadala abazinakekela ngothando izidingo zakho ezingokomoya. (Heberu 13:7, 17) Thembeka kuNkulunkulu futhi ugcine iso lakho emklomelweni wokuphila, uqiniseka ukuthi ngisho nokufa ngeke kukuphuce wona.—Johane 5:28, 29; 17:3.

Uma manje ubhekene nokudabuka okukhulu noma ukulingwa okunzima, “themba kuJehova ngayo yonke inhliziyo yakho,” futhi ekugcineni usizi nobunzima onakho kuyothathelwa indawo injabulo enkulu. (IzAga 3:5, 6; Johane 16:20) Usizi luyophenduka injabulo lapho uNkulunkulu ekubusisa njengoba enza kuJobe. Izinhlupheko zosuku lwanamuhla azilutho uma ziqhathaniswa nomvuzo wakho. (Qhathanisa namaRoma 8:18.) Ukukhuthazela kwakho ngokuthembeka kungakhuthaza abanye futhi kukusize ukuba uhlakulele izimfanelo ezinhle zobuKristu ezihambisana ‘nobuntu obusha.’ (Efesu 4:23, 24; Kolose 3:10, 12-14) Khona-ke, thola isibindi eselulekweni esihlakaniphile somphostoli uPetru: “Labo abahlupheka ngokuvumelana nentando kaNkulunkulu mabaqhubeke bebeka imiphefumulo yabo kuMdali okholekileyo kuyilapho benza okuhle.”—1 Petru 4:19.

[Isithombe ekhasini 23]

Yiba njengoJobe. Ungalokothi ulahle ithemba

[Isithombe ekhasini 24]

Themba kuJehova ngayo yonke inhliziyo yakho