Phishekela Ukuthula Kokuhlonipha UNkulunkulu Ekuphileni Komkhaya
“Mnikeni uJehova nina-mindeni yabantu, mnikeni uJehova inkazimulo namandla.”—IHUBO 96:7.
1. UJehova waqala ukuphila komkhaya ngohlobo olunjani lwesiqalo?
UJEHOVA waqala ukuphila komkhaya ngesiqalo esinokuthula nesijabulisayo lapho ehlanganisa owesilisa nowesifazane bokuqala ngomshado. Eqinisweni, u-Adamu wajabula kangangokuba waveza injabulo yakhe enkondlweni yokuqala elotshiwe: “Lo useyithambo lamathambo ami nenyama yenyama yami; uyakubizwa ngokuthi indodakazi, ngokuba uthathwé endodeni.”—Genesise 2:23.
2. UNkulunkulu wayecabangani ngomshado ngaphandle kokunikeza izingane zakhe ezingabantu injabulo?
2 Lapho uNkulunkulu esungula umshado nelungiselelo lomkhaya, wayecabanga ngokungaphezu nje kokunikeza izingane zakhe ezingabantu injabulo. Wayefuna zenze intando yakhe. UNkulunkulu watshela umbhangqwana wokuqala: “Zalani, nande, nigcwalise umhlaba, niwunqobe, nibuse phezu kwezinhlanzi zolwandle, nezinyoni zezulu, nezilwanyana ezinwabuzelayo emhlabeni.” (Genesise 1:28) Isabelo esinomvuzo ngempela. Yeka ukuthi u-Adamu, u-Eva, nezingane ababezoba nazo babeyojabula kanjani ukube lowo mbhangqwana wokuqala oshadile wawenzé intando kaJehova ngokulalela!
3. Yini edingekayo ukuze imikhaya iphile ngokuzinikela kokuhlonipha uNkulunkulu?
3 Nokho, ngisho nanamuhla, imikhaya ijabula kakhulu lapho ibambisana ekwenzeni intando kaNkulunkulu. Futhi yeka ukuthi leyo mikhaya elalelayo inamathemba amahle kanjani! Umphostoli uPawulu wabhala: “Ukuzinikela kokuhlonipha uNkulunkulu kunenzuzo ezintweni zonke, njengoba kunesithembiso sokuphila kwamanje nalokho okuzayo.” (1 Thimothewu 4:8) Imikhaya ephila ngokuzinikela kokuhlonipha uNkulunkulu kwangempela ilandela izimiso zeZwi likaJehova futhi yenze intando yakhe. Iphishekela ukuthula kokuhlonipha uNkulunkulu, ngaleyo ndlela ithole injabulo ‘ekuphileni kwamanje.’
Ukuphila Komkhaya Kusengozini
4, 5. Kungani kungase kuthiwe manje ukuphila komkhaya kusengozini emhlabeni wonke?
4 Empeleni asikutholi ukuthula nenjabulo kuyo yonke imikhaya. Icaphuna umbiko owenziwa inhlangano ecwaninga ngamanani abantu ebizwa ngokuthi i-Population Council, i-New York Times ithi: “Emazweni acebile nampofu ngokufanayo, isimo sokuphila komkhaya sishintsha kakhulu.” Kuthiwa umlobi walombiko wathi: “Umqondo wokuthi umkhaya uyinto ezinzile nebumbene lapho ubaba enakekela khona ezezimali nomama enakekela imizwelo uyinganekwane. Iqiniso liwukuthi ukuthambekela kokuba khona komama abangashadile, amanani andayo ezehlukaniso, [kanye] nemikhaya emincane . . . kukhona emhlabeni wonke.” Ngenxa yalokhu kuthambekela, izigidi zemikhaya zintula ukuzinza, ukuthula nenjabulo, futhi imikhaya eminingi iyahlukana. ESpain izinga lezehlukaniso lanyuka laba umshado owodwa kweyisishiyagalombili ekuqaleni kweshumi leminyaka elidlule lekhulu lama-20—okuyigxathu elikhulu ukusuka kowodwa kweyikhulu eminyakeni engu-25 ngaphambili. Kubikwa ukuthi iNgilandi inezinga lezehlukaniso eliphakeme kunawo wonke eYurophu—imishado emine kweyishumi iyachitheka. Futhi iye yanda imikhaya enomzali oyedwa kulelozwe.
5 Kubonakala sengathi abanye abantu basha amashushu ngokuhlukanisa. Abaningi bathutheleka kuyi-“Tie Severing Shrine” (Indawo Engcwele Yokunqamula Ifindo) ngaseTokyo, eJapane. Leli thempeli lobuShinto lamukela izicelo zesehlukaniso nezokunqamula obunye ubuhlobo obungathandeki. Umkhulekeli ngamunye ubhala isicelo sakhe oqwembeni lwepulangwe olulula, alugaxe ekhosombeni lalendawo engcwele, abese ethandazela impendulo. Iphephandaba laseTokyo lithi lapho lendawo engcwele isungulwa cishe ekhulwini leminyaka elidlule, “amakhosikazi abahwebi bendawo abacebile ayebhala imithandazo ecela ukuba abayeni bawo bashiye omakhwapheni babo babuyele kuwo.” Nokho, namuhla izicelo eziningi ezesehlukaniso, hhayi ezokubuyisana. Ngokungangabazeki, ukuphila komkhaya kusengozini emhlabeni wonke. Ingabe lokhu kufanele kuwamangaze amaKristu? Cha, ngoba iBhayibheli lisinikeza izizathu zosizi emikhayeni namuhla.
Kungani Kunosizi Emikhayeni?
6. Eyoku-1 Johane 5:19 ihlobene kanjani nosizi lomkhaya namuhla?
6 Esinye isizathu sosizi emikhayeni namuhla yilesi: “Lonke izwe lisemandleni omubi.” (1 Johane 5:19) Yini esingayilindela komubi, uSathane uDeveli? Ungumqambimanga omubi, okhohlakele. (Johane 8:44) Akumangalisi ukuthi izwe lakhe lingene shí ekukhohliseni nasekuziphatheni okubi, okonakalisa ukuphila komkhaya kangaka! Ngaphandle kwenhlangano kaNkulunkulu, ithonya lobusathane lisongela ukubhubhisa ilungiselelo likaJehova lomshado futhi liqede ukuphila komkhaya okunokuthula.
7. Imikhaya ingathintwa kanjani izici eziboniswa abantu abaningi kulezi zinsuku zokugcina?
7 Esinye isizathu sezinkinga zomkhaya ezihlupha isintu manje siboniswe kweyesi-2 Thimothewu 3:1-5. Isiprofetho sikaPawulu esilotshwe lapho sibonisa ukuthi siphila “ezinsukwini zokugcina.” Imikhaya ayinakuba nokuthula futhi ijabule uma amalungu ayo engabantu “abazithandayo, abathandi bemali, abazazisayo, abazidlayo, abahlambalazi, abangalaleli abazali, abangabongiyo, abangathembekile, abangenakho ukusondelana ngokomzwelo okungokwemvelo, abangafuni sivumelwano, abanyundeli, abangenakho ukuzithiba, abanolaka, abangenalo uthando ngobuhle, abakhapheli, abanenkani, abakhukhumele ngokuziqhenya, abathandi bezinjabulo kunokuba abathandi bakaNkulunkulu, benesimo sokuzinikela kokuhlonipha uNkulunkulu kodwa bezibonakalisa bengathembekile emandleni ako.” Umkhaya awunakujabula ngokuphelele uma ngisho nelungu elilodwa lawo lingenalo uthando lwemvelo noma lingathembekile. Ukuphila komkhaya kungaba kanjani nokuthula uma othile ekhaya enolaka futhi engafuni sivumelwano? Okubi nakakhulu, kungaba khona kanjani ukuthula nenjabulo lapho amalungu omkhaya engabathandi benjabulo kunokuba abathandi bakaNkulunkulu? Lezi izici ezitholakala kubantu balelizwe elibuswa uSathane. Akumangalisi ukuthi injabulo yomkhaya ayitholakali kulezi zinsuku zokugcina!
8, 9. Ukuziphatha kwezingane kungaba namuphi umphumela enjabulweni yomkhaya?
8 Esinye isizathu sokuba imikhaya eminingi intule ukuthula nenjabulo ukuziphatha kabi kwezingane. Lapho uPawulu ebikezela izimo ezinsukwini zokugcina, waprofetha ukuthi izingane eziningi zaziyoba ezingabalaleli abazali. Uma usemusha, ingabe ukuziphatha kwakho kuyasiza ekwenzeni umkhaya wakini ube nokuthula futhi ujabule?
9 Ezinye izingane azinakho ukuziphatha okuyisibonelo. Ngokwesibonelo, omunye umfanyana wabhalela uyise lencwadi yokwedelela: “Uma ungeke uhambe nami ukuya e-Alexandria ngeke ngikubhalele incwadi, noma ngikukhulumise, noma ngikuvalelise, futhi uma uhamba wedwa uya e-Alexandria ngeke ngiphinde ngibambe isandla sakho noma ngikubingelele. Yilokho okuzokwenzeka uma ungahambi nami . . . Kodwa ngithumelele [ihabhu], ngiyakuncenga. Uma ungalithumeli, ngeke ngidle futhi ngeke ngiphuze. Yilokho nje!” Ingabe lokho kuzwakala kuyisimo samanje? Nokho, leyo ncwadi eyayivela kumfana iya kuyise yabhalwa eGibithe lasendulo eminyakeni engaphezu kuka-2 000 edlule.
10. Intsha ingayisiza kanjani imikhaya yakubo ukuba iphishekele ukuthula kokuhlonipha uNkulunkulu?
10 Isimo sengqondo salowo mfana waseGibithe asizange sikukhuthaze ukuthula komkhaya. Yebo, kwenzeka izinto ezimbi nakakhulu emikhayeni kulezi zinsuku zokugcina. Nokho, nina enisebancane ningawusiza umkhaya wakini ukuba uphishekele ukuthula kokuhlonipha uNkulunkulu. Kanjani? Ngokulalela lesi seluleko seBhayibheli: “Nina bantwana, lalelani abazali benu kukho konke, ngoba lokhu kuyajabulisa kakhulu eNkosini.”—Kolose 3:20.
11. Abazali bangazisiza kanjani izingane zabo ukuba zibe izinceku zikaJehova ezikholekile?
11 Kuthiwani ngani bazali? Ngothando sizani izingane zenu ukuba zibe izinceku zikaJehova ezikholekile. “Khulisa umntwana ngendlela eyakuba-ngeyakhe,” kusho izAga 22:6. “Kuyakuthi lapho esekhulile, angasuki kuyo.” Ngemfundiso enhle engokomBhalo nezibonelo ezinhle zabazali, abafana abaningi namantombazane abachezuki endleleni efanele lapho beba badala. Kodwa okuningi kuxhomeke ohlotsheni nasezingeni lokuqeqeshwa ngeBhayibheli nasenhliziyweni yengane.
12. Kungani ikhaya lomKristu kufanele libe nokuthula?
12 Uma wonke amalungu omkhaya wethu ezama ukwenza intando kaJehova, kufanele sijabulele ukuthula kokuhlonipha uNkulunkulu. Ikhaya lamaKristu kufanele ligcwale ‘abangane bokuthula.’ ULuka 10:1-6 ubonisa ukuthi uJesu wayecabanga ngabantu abanjalo lapho ethuma abafundi abangu-70 njengezikhonzi futhi ebatshela: “Nomaphi lapho ningena khona endlini nithi kuqala, ‘Kwangathi lendlu ingaba nokuthula.’ Futhi uma umngane wokuthula ekhona, ukuthula kwenu kuyohlala kuye.” Njengoba izinceku zikaJehova zingena indlu ngendlu ngokuthula ziphethe “izindaba ezinhle zokuthula,” zifuna abangane bokuthula. (IzEnzo 10:34-36; Efesu 2:13-18) Ngokuqinisekile, umkhaya wamaKristu owakhiwa abangane bokuthula kufanele ube nokuthula.
13, 14. (a) Yini uNawomi ayeyifisela uRuthe no-Orpa? (b) Ikhaya lomKristu kufanele libe indawo yokuphumula enhloboni?
13 Ikhaya kufanele libe indawo yokuthula nokuphumula. Umfelokazi okhulile uNawomi wayenethemba lokuthi uNkulunkulu uyonikeza abafelokazi abasebasha ababengomalokazana bakhe, uRuthe no-Orpa, impumuzo nenduduzo ewumphumela wokuba nomyeni okahle nekhaya elithokomele. UNawomi wathi: “UJehova makaninike ukuba nifumane ukuphumula; kube-yilowo nalowo endlini yomyeni wakhe.” (Ruthe 1:9) Ngokuqondene nesifiso sikaNawomi, esinye isazi sabhala ukuthi emakhaya anjalo uRuthe no-Orpa “babengeke babe nokukhathazeka nexhala. Babeyothola ukuphumula. Kwakuyoba indawo ababengase bakwazi ukuhlala kuyo, nalapho imizwa yabo yothando nezifiso zabo ezinhle kunazo zonke zaziyothola khona ukwaneliseka nokuthula. Amandla angavamile olimi lwesiHeberu . . . aboniswa kahle izinkulumo ezihlobene [ku-Isaya 32:17, 18].”
14 Siza uphawule lomBhalo ka-Isaya 32:17, 18. Lapho siyafunda: “Umsebenzi wokulunga uyakuba-ngukuthula, impumelelo yokulunga ibe-ngukulondeka kuze kube-phakade. Abantu bami bayakuhlala ematendeni okuthula, nasezindlini ezilondekayo, nasezindaweni zokuphumula ezinokuthula.” Ikhaya lomKristu kufanele libe indawo yokuphumula enokulunga, ukuzola, ukulondeka, nokuthula kokuhlonipha uNkulunkulu. Kodwa kuthiwani uma izilingo, ukungezwani, noma ezinye izinkinga ziphakama? Khona-ke sikudinga ngokukhethekile ukwazi imfihlo yenjabulo yomkhaya.
Izimiso Ezine Ezibalulekile
15. Ungayichaza kanjani imfihlo yenjabulo yomkhaya?
15 Yonke imikhaya emhlabeni iqanjwe ngoJehova uNkulunkulu, uMdali wemikhaya. (Efesu 3:14, 15) Ngakho labo abafisa injabulo yomkhaya kufanele bafune isiqondiso sakhe futhi bamdumise, njengoba kwenza umhubi: “Mnikeni uJehova nina-mindeni yabantu, mnikeni uJehova inkazimulo namandla.” (IHubo 96:7) Imfihlo yenjabulo yomkhaya isemakhasini eZwi likaNkulunkulu, iBhayibheli, nasekusebenziseni izimiso zalo. Umkhaya osebenzisa lezi zimiso uyojabula futhi ube nokuthula kokuhlonipha uNkulunkulu. Ngakho-ke ake sibheke ezine zalezi zimiso ezibalulekile.
16. Ukuzithiba kufanele kufeze yiphi ingxenye ekuphileni komkhaya?
16 Esinye salezi zimiso sigxile ekutheni: Ukuzithiba kubalulekile ukuze kube nokuthula kokuhlonipha uNkulunkulu ekuphileni komkhaya. INkosi uSolomoni yathi: “Njengomuzi odiliziweyo ungenalugange, unjalo umuntu omoya wakhe ungenakubanjwa.” (IzAga 25:28) Ukubamba umoya wethu—ukuzithiba—kubalulekile uma sifuna ukuba nomkhaya onokuthula nojabulayo. Nakuba singaphelele, kudingeka sibonise ukuzithiba, okuyisithelo somoya ongcwele kaNkulunkulu. (Roma 7:21, 22; Galathiya 5:22, 23) Umoya uyosenza sibe nokuzithiba uma siyithandazela lemfanelo, sisebenzisa iseluleko seBhayibheli esimayelana nayo, futhi sizihlanganisa nabanye abayibonisayo. Lenkambo iyosisiza ukuba ‘sibalekele ubufebe.’ (1 Korinte 6:18) Ukuzithiba kuyosisiza futhi ukuba silahle ubudlova, sigweme noma sinqobe ukuba umlutha wotshwala, futhi sibhekane nezimo ezinzima ngokuthula.
17, 18. (a) Eyoku-1 Korinte 11:3 isebenza kanjani ekuphileni komkhaya wamaKristu? (b) Ukuqaphela ubunhloko kukukhuthaza kanjani ukuthula kokuhlonipha uNkulunkulu ekhaya?
17 Esinye isimiso esidingekile singabekwa ngalendlela: Ukuqaphela ubunhloko kuyosisiza ukuba siphishekele ukuthula kokuhlonipha uNkulunkulu emikhayeni yethu. UPawulu wabhala: “Ngifuna ukuba nazi ukuthi inhloko yawo wonke amadoda uKristu; nenhloko yowesifazane indoda; nenhloko kaKristu uNkulunkulu.” (1 Korinte 11:3) Lokhu kusho ukuthi indoda iyahola ekhaya, umkayo uyisekela ngokwethembeka, nezingane ziyalalela. (Efesu 5:22-25, 28-33; 6:1-4) Ukuziphatha okunjalo kuyokhuthaza ukuthula kokuhlonipha uNkulunkulu ekuphileni komkhaya.
18 Indoda engumKristu kudingeka ikhumbule ukuthi ubunhloko obungokomBhalo abusho ukuba umashiqela. Kumelwe ilingise uJesu, iNhloko yayo. Nakuba ayezoba “inhloko phezu kwazo zonke izinto,” uJesu ‘akezelanga ukukhonzwa, kodwa ukukhonza.’ (Efesu 1:22; Mathewu 20:28) Ngendlela efanayo, indoda engumKristu isebenzisa ubunhloko ngendlela yothando eyenza ikwazi ukuzinakekela kahle izithakazelo zomkhaya wayo. Futhi ngokuqinisekile inkosikazi engumKristu ifuna ukubambisana nomyeni wayo. ‘Njengomsizi’ ‘nomphelelisi’ wakhe iveza izimfanelo ezintulwa umyeni wayo, ngaleyo ndlela imnikeze ukusekelwa akudingayo. (Genesise 2:20, qhathanisa ne-NW; IzAga 31:10-31.) Ukusetshenziswa okufanele kobunhloko kusiza amadoda nomkawo ukuba baphathane ngenhlonipho futhi kushukumise izingane ukuba zilalele. Yebo, ukuqaphela ubunhloko kukhuthaza ukuthula kokuhlonipha uNkulunkulu ekuphileni komkhaya.
19. Kungani ukukhulumisana okuhle kubalulekile ukuze kube nokuthula nenjabulo emkhayeni?
19 Isimiso sesithathu esibalulekile singavezwa ngalamazwi: Ukukhulumisana okuhle kubalulekile ukuze umkhaya ube nokuthula nenjabulo. UJakobe 1:19 uyasitshela: “Wonke umuntu kumelwe asheshe ngokuphathelene nokuzwa, ephuze ngokuphathelene nokukhuluma, ephuze ngokuphathelene nolaka.” Amalungu omkhaya kudingeka alalelane futhi axoxe ngoba ukukhulumisana komkhaya kuwumgwaqo onezindlela ezimbili eziphambanayo. Nokho, ngisho nalapho esikushoyo kuqondile, cishe kungenza umonakalo omkhulu kunokuhle uma kushiwo ngonya, ngokuzazisa, noma ngokungabi naluzwela. Inkulumo yethu kufanele inambitheke, ‘iyoliswe ngosawoti.’ (Kolose 4:6) Imikhaya elandela izimiso ezingokomBhalo futhi ikhulumisane kahle iphishekela ukuthula kokuhlonipha uNkulunkulu.
20. Kungani ungathi uthando lubalulekile ukuze kube nokuthula komkhaya?
20 Isimiso sesine yilesi: Uthando ludingekile ekuthuleni nasenjabulweni yomkhaya. Uthando lokukhangana ngokobulili lungase lube nengxenye ebalulekile emshadweni, futhi uthando lomzwelo olujulile lungaba khona phakathi kwamalungu omkhaya. Kodwa okubaluleke nakakhulu, uthando oluchazwa igama lesiGreki elithi a·gaʹpe. Lolu uthando esiluhlakulela ngoJehova, uJesu, nangomakhelwane bethu. (Mathewu 22:37-39) UNkulunkulu wabonisa lolu thando ngesintu ‘ngokunikela ngeNdodana yakhe ezelwe yodwa, ukuze wonke umuntu obonisa ukholo kuyo angabhujiswa kodwa abe nokuphila okumi phakade.’ (Johane 3:16) Yeka ukuthi kuhle kanjani ukuthi singabonisa uthando olufanayo ngamalungu emikhaya yethu! Lolu thando oluphakeme “luyisibopho esiphelele sobunye.” (Kolose 3:14) Luhlanganisa umbhangqwana oshadile futhi luwushukumisele ukuba ufune ukwenzelana okuhle, wona nezingane zawo. Lapho kuba nezinkinga, uthando luwusiza ukuba usingathe izindaba ngokubambisana. Singaqiniseka ngalokhu ngoba “uthando . . . aluzifuneli izinzuzo zalo siqu . . . Lubekezelela zonke izinto, lukholelwa yizo zonke izinto, luthemba zonke izinto, lukhuthazelela zonke izinto. Uthando alupheli nanini.” (1 Korinte 13:4-8) Ngempela iyajabula imikhaya lapho uthando ngomunye nomunye luqiniswa khona uthando ngoJehova!
Qhubeka Uphishekela Ukuthula Kokuhlonipha UNkulunkulu
21. Yini engandisa ukuthula nenjabulo yomkhaya wakho?
21 Izimiso ezandulelayo nezinye ezithathwe eBhayibhelini zichazwe ezincwadini uJehova aye wazilungiselela ngomusa ‘ngesigqila esikholekile nesiqondayo.’ (Mathewu 24:45) Ngokwesibonelo, ukwaziswa okunjalo kutholakala encwadini enamakhasi angu-192 ethi Imfihlo Yenjabulo Yomkhaya, eyakhululwa eMihlanganweni Yesigodi YoFakazi BakaJehova “Yezithunywa Zokuthula KukaNkulunkulu” eyaqhutshwa kuwo wonke umhlaba ngo-1996/97. Ukutadisha imiBhalo ngokomuntu siqu nanjengomkhaya ngosizo lwalencwadi kungaphumela ezinzuzweni eziningi. (Isaya 48:17, 18) Yebo, ukusebenzisa iseluleko esingokomBhalo kungandisa ukuthula nenjabulo yomkhaya wakho.
22. Kufanele sikugxilise kuphi ukuphila kwemikhaya yethu?
22 UJehova unezinto ezimangalisayo azigcinele imikhaya eyenza intando yakhe, futhi ufanelwe ukuba simdumise futhi simkhonze. (IsAmbulo 21:1-4) Ngakho-ke kwangathi umkhaya wakho ungagxilisa ukuphila kwawo ekukhulekeleni uNkulunkulu weqiniso. Futhi kwangathi uBaba wethu wasezulwini onothando, uJehova, angakubusisa ngenjabulo njengoba uphishekela ukuthula kokuhlonipha uNkulunkulu ekuphileni komkhaya wakho!
Ungaphendula Kanjani?
◻ Yini edingekayo ukuze imikhaya iphile ngokuzinikela kokuhlonipha uNkulunkulu?
◻ Kungani kunosizi emkhayeni namuhla?
◻ Iyini imfihlo yenjabulo yomkhaya?
◻ Yiziphi ezinye izimiso eziyosisiza ukuba sithuthukise ukuthula nenjabulo ekuphileni komkhaya?
[Isithombe ekhasini 24]
Ukukhulumisana okuhle kusisiza ukuba siphishekele ukuthula kukaNkulunkulu ekuphileni komkhaya