Imibuzo Evela Kubafundi

Sakujabulela ukufunda ngomfanekiso kaJesu wezimvu nezimbuzi. Ngenxa yokuqonda okusha okuvezwe kuyi-“Nqabayokulinda” ka-October 15, 1995, ingabe sisengasho ukuthi oFakazi BakaJehova namuhla bahlanganyela emsebenzini wokuhlukanisa?

Yebo. Kuyaqondakala ukuthi abaningi baye bazibuza ngalokhu ngoba uMathewu 25:31, 32 uthi: “Lapho iNdodana yomuntu ifika enkazimulweni yayo, nazo zonke izingelosi kanye nayo, khona-ke iyohlala phansi esihlalweni sayo esikhazimulayo. Futhi zonke izizwe ziyobuthelwa phambi kwayo, futhi iyohlukanisa abantu omunye komunye, njengoba nje umalusi ehlukanisa izimvu ezimbuzini.” INqabayokulinda ka-October 15, 1995, yabonisa ukuthi kungani lamavesi esebenza ngemva kokuqala kosizi olukhulu. UJesu uyofika enkazimulweni yakhe nezingelosi zakhe futhi ahlale esihlalweni sakhe sobukhosi sokwahlulela. Khona-ke, uyohlukanisa abantu. Ngamuphi umqondo? Uyokhipha izinqumo ezisekelwe kulokho abantu abakwenza noma abangazange bakwenze ngaphambi kwaleso sikhathi.

Lokhu singakufanisa nenqubo engokomthetho eholela ecaleni lasenkantolo. Ubufakazi bunqwabelana esikhathini eside ngaphambi kokuba inkantolo ikhiphe isinqumo nesigwebo. Sekuyisikhathi eside bunqwabelana ubufakazi bokuthi abantu abaphila manje bayoba izimvu noma izimbuzi yini. Futhi busanqwabelana. Kodwa lapho uJesu ehlala esihlalweni sakhe sobukhosi, liyobe seliqulwe laqedwa icala. Uyobe eselungele ukukhipha isahlulelo. Abantu bayohlukaniswa ukuba baye ekubhujisweni kwaphakade noma ekuphileni okumi phakade.

Nokho, iqiniso lokuthi ukuhlukaniswa kwabantu ukuba baye ekuphileni noma ekufeni okukhulunywe ngakho kuMathewu 25:32 kusengokwesikhathi esizayo akusho ukuthi akukho ukuhlukanisa okwenzeka ngaphambi kwalokho. IBhayibheli, kuMathewu isahluko 13, likhuluma ngomunye umsebenzi wokuhlukanisa owenzeka kusengaphambili. Ngokuthakazelisayo, incwadi ethi Ubunye Ekukhulekeleni Okuwukuphela KukaNkulunkulu Weqiniso, emakhasini 179-80, ikhuluma ngalokhu ngaphansi kwesihloko esithi “Ukwehlukaniswa Kwabantu.”a Lencwadi ithi: “Kukhona futhi izenzakalo ezibalulekile uJesu azihlanganisa nokuphela kwesimiso sezinto. Esinye salezi siwukwehlukaniswa ‘kwabantwana bombuso’ ‘nabantwana bomubi.’ UJesu wakhuluma ngalokhu emfanekisweni wakhe wensimu yembewu enhle isitha esayihlwanyela ngokhula.”

Lencwadi yayibhekisela emfanekisweni kaJesu okuMathewu 13:24-30 futhi ochazwe emavesini 36-43. Evesini 38 phawula ukuthi imbewu enhle kakolweni imelela amadodana oMbuso, kodwa ukhula lumelela amadodana omubi. Amavesi 39 no-40 abonisa ukuthi “esiphelweni sesimiso sezinto”—esikhathini esiphila kuso manje—kuqoqwa ukhula. Luyahlukaniswa futhi ekugcineni lushiswe, lubhujiswe.

Lomfanekiso ukhuluma ngamaKristu agcotshiwe (emfanekisweni wezimvu nezimbuzi abizwa ngokuthi abafowabo bakaJesu). Nokho, kusobala ukuthi umsebenzi obalulekile wokuhlukanisa uyenzeka esikhathini sethu, njengoba abagcotshiwe behlukaniswa kulabo abathi bangamaKristu kodwa bebe bezibonakalisa ‘bengamadodana omubi.’

UJesu wanikeza ezinye izibonelo zokuhlukaniswa kwabantu. Khumbula ukuthi ngomgwaqo obanzi oholela ekubhujisweni wathi: “Baningi abangena ngawo.” (Mathewu 7:13) Wayengakhulumeli umphumela wokugcina nje kuphela. Wayekhuluma ngento eyenzeka ngokuqhubekayo, njengoba nje kunjalo manje ngabambalwa abathola umgwaqo onyinyekile oholela ekuphileni. Futhi khumbula ukuthi lapho ethuma abaphostoli, uJesu wathi babeyothola abathile abafanelekayo. Abanye babengeke babe abafanelekayo, futhi abaphostoli kwakufanele bathuntuthe uthuli ezinyaweni zabo “ukuze kube ubufakazi ngokumelene” nabantu abanjalo. (Luka 9:5) Akulona yini iqiniso ukuthi kwenzeka okufanayo namuhla njengoba amaKristu efeza inkonzo yawo yasobala? Abanye basabela kahle, kanti abanye bayasenqaba isigijimi saphezulu esisilethayo.

Lezi zihloko ze-Nqabayokulinda ezikhuluma ngezimvu nezimbuzi zathi: “Nakuba ukwahlulela okuchazwe emfanekisweni kuzokwenzeka esikhathini esizayo esiseduze, ngisho namanje kunokuthile okubalulekile okwenzekayo. Thina maKristu senza umsebenzi osindisa ukuphila, wokumemezela isigijimi esihlukanisa abantu. (Mathewu 10:32-39).” Kuleyo ndima kaMathewu isahluko 10, sifunda ukuthi uJesu wathi ukumlandela kwakuyobangela ukuhlukana—kwendodana noyise, indodakazi nonina.

Okokugcina, abafowabo bakaKristu abagcotshwe ngomoya baye bahola ekushunyayelweni kwesigijimi soMbuso emhlabeni wonke. Njengoba abantu besizwa futhi besabela kahle noma kabi, bayazibonakalisa. Thina bantu asinakusho, futhi akufanele, sithi, ‘Lomuntu uyimvu; lowaya uyimbuzi,’ ngomqondo ovezwe kuMathewu isahluko 25. Noma kunjalo, ukwenza kwethu abantu bezwe ngezindaba ezinhle kubenza bakwazi ukubonisa ukuthi bami kuphi—baluhlobo luni lwabantu nokuthi basabela kanjani kubafowabo bakaJesu. Ngakho, njengobufakazi obunqwabelana ecaleni lasenkantolo, umehluko phakathi kwalabo abasekela abafowabo bakaJesu nalabo abenqaba ukubasekela uba sobala. (Malaki 3:18) Njengoba INqabayokulinda yabonisa, maduze nje uJesu uzohlala esihlalweni sakhe sobukhosi futhi akhiphe isigwebo, ehlukanisa abantu ngokubahlulela ngomqondo wokugcina ukuba baye ekuphileni noma ekubhujisweni.

[Umbhalo waphansi]