Ingabe Uyakhumbula?

Ingabe uye wabathola bewusizo kuwe omagazini bamuva be-Nqabayokulinda? Khona-ke kungani ungahloli inkumbulo yakho ngemibuzo elandelayo?

◻ Uyini umehluko phakathi ‘kosuku lweNkosi’ ‘nosuku lukaJehova’? (IsAmbulo 1:10; Joweli 2:11)

‘Usuku lweNkosi’ luhlanganisa ukugcwaliseka kwemibono engu-16 echazwe kusAmbulo izahluko 1 kuya ku-22 nezenzakalo eziyinhloko uJesu azibikezela ekuphenduleni umbuzo wabafundi bakhe omayelana nesibonakaliso sokuba khona kwakhe. Njengomvuthwandaba wosuku lweNkosi, usuku lukaJehova olwesabekayo luyogqashuka lapho ekhipha isahlulelo ezweni likaSathane elonakele. (Mathewu 24:3-14; Luka 21:11)—12/15, ikhasi 11.

◻ Yiziphi ezinye zezici ezivelele zeBhayibheli likaMakarios?

Igama elithi Jehova livela izikhathi ezingaphezu kuka-3 500 eBhayibhelini likaMakarios. Esinye isazi sezincwadi zenkolo zesiRussia sathi: “Le nguqulo inamathela embhalweni wesiHeberu, futhi ulimi lwenguqulo luhlanzekile futhi luyayifanela indaba.”—12/15, ikhasi 27.

◻ Liyini “iqiniso” uJesu athi laliyosikhulula? (Johane 8:32)

Lapho ekhuluma ‘ngeqiniso,’ uJesu wayesho ukwaziswa okuphefumulelwe ngokwaphezulu—ikakhulukazi ukwaziswa okuphathelene nentando kaNkulunkulu—esikugcinelwe eBhayibhelini.—1/1, ikhasi 3.

◻ Ungubani uJehu noJehonadaba bosuku lwanamuhla?

UJehu umelela uJesu Kristu, yena omelelwa emhlabeni ‘u-Israyeli kaNkulunkulu,’ amaKristu agcotshiwe. (Galathiya 6:16; IsAmbulo 12:17) Njengoba nje uJehonadaba aphuma eyohlangabeza uJehu, “isixuku esikhulu” esivela ezizweni siye saphuma ukuze sisekele abameleli bakaJesu basemhlabeni. (IsAmbulo 7:9, 10; 2 AmaKhosi 10:15)—1/1, ikhasi 13.

◻ Kusho ukuthini ‘ukuhamba noNkulunkulu’? (Genesise 5:24; 6:9)

Lokhu kusho ukuthi labo abenza kanjalo, njengo-Enoke noNowa, baziphatha ngendlela eyayinikeza ubufakazi bokuba nokholo oluqinile kuNkulunkulu. Benza lokho uJehova abayala ngakho futhi baqondisa ukuphila kwabo ngokuvumelana nalokho ababekwazi ngaye endleleni ayesebenzelana ngayo nabantu.—1/15, ikhasi 13.

◻ Kungani umuntu kufanele akulungiselele kusengaphambili ukufa okungase kumehlele?

Ngomqondo othile, ukwenza amalungiselelo anjalo kuyisipho umuntu asinika umkhaya wakhe. Kubonisa uthando. Kufakazela ukuthi umuntu ufuna ‘ukondla labo abangamalungu endlu yakhe,’ ngisho nalapho engasekho phakathi kwabo. (1 Thimothewu 5:8)—1/15, ikhasi 22.

◻ Safezani “isivumelwano esidala”? (2 Korinte 3:14)

Sasiqukethe izici ezazifanekisela isivumelwano esisha, futhi, ngemihlatshelo yaso eyayiphindwaphindwa, sabonisa isidingo somuntu esikhulu sokukhululwa esonweni nasekufeni. ‘Sasingumfundisi oholela kuKristu.’ (Galathiya 3:24)—2/1, ikhasi 14.

◻ Kungaziphi izindlela isivumelwano esisha simi phakade? (Heberu 13:20)

Okokuqala, ngokungafani nesivumelwano soMthetho, akusoze kufakwe esinye esikhundleni saso. Okwesibili, imiphumela yokusebenza kwaso ihlala phakade. Futhi okwesithathu, izikhonzi ezikholekile zoMbuso kaNkulunkulu emhlabeni ziyoqhubeka zizuza elungiselelweni lesivumelwano esisha phakathi neMinyaka Eyinkulungwane.—2/1, ikhasi 22.

◻ Yiziphi izinzuzo ezilethwa ukubonisa ukwazisa?

Imfudumalo umuntu aba nayo ngenxa yokwazisa okusuka enhliziyweni imsiza ukuba abe nenjabulo nokuthula. (Qhathanisa nezAga 15:13, 15.) Njengoba kuyimfanelo enhle, ukwazisa kuvikela umuntu emizweni engafanele enjengentukuthelo, umhawu nokucasuka.—2/15, ikhasi 4.

◻ Abazelwe ngomoya baye bangeniswa kuziphi izivumelwano?

Isivumelwano esisha, uJehova asenza namalungu ka-Israyeli ongokomoya, nesivumelwano soMbuso, uJesu asenza nabalandeli bezinyathelo zakhe abagcotshiwe. (Luka 22:20, 28-30)—2/15, ikhasi 16.

◻ Yimiphi imikhosi emikhulu emithathu ama-Israyeli ayalwa ukuba abe khona kuyo?

UMkhosi Wesinkwa Esingenamvubelo, owawuba ngemva nje kwePhasika lika-Nisan 14; uMkhosi Wamasonto, ngosuku lwama-50 kusuka ku-Nisan 16; noMkhosi Wokuvuna, noma uMkhosi Wamadokodo, ngenyanga yesikhombisa. (Duteronomi 16:1-15)—3/1, amakhasi 8, 9.

◻ Kungani kuyilungelo ukuba semibuthanweni yobuKristu?

UJesu wathi: “Lapho kukhona khona ababili noma abathathu bebuthene ndawonye egameni lami, ngikhona lapho phakathi kwabo.” (Mathewu 18:20; 28:20) Futhi, indlela ebalulekile lokho kondliwa okungokomoya okwenzeka ngayo ingemihlangano yebandla kanye nemibuthano emikhulu. (Mathewu 24:45)—3/1, ikhasi 14.

◻ Lavelaphi igama elithi Nimrode?

Izazi eziningana ziyavumelana ngokuthi igama elithi Nimrode kwakungelona igama alethiwa lapho ezalwa. Kunalokho, zilibheka njengegama alethiwa kamuva ukuze lifanelane nenkambo yakhe yokuvukela ngemva kokuba isivele obala.—3/15, ikhasi 25.

◻ Ubaluleke kangakanani umkhaya emphakathini wesintu?

Isintu siyawudinga umkhaya. Umlando ubonisa ukuthi lapho ilungiselelo lomkhaya liwohloka, imiphakathi nezizwe kuyantengantenga. Ngakho umkhaya unethonya ngokuqondile ekuzinzeni komphakathi nasenhlalakahleni yezingane neyezizukulwane ezizayo.—4/1, ikhasi 6.

◻ Yiziphi izizathu ezintathu ezifakazela ukuthi iBhayibheli liyiZwi likaNkulunkulu?

(1) Linembile ngokwesayensi; (2) liqukethe izimiso ezingaphelelwa isikhathi eziwusizo ekuphileni kwanamuhla; (3) liqukethe iziprofetho ezicacile eziye zagcwaliseka, njengoba amaqiniso angokomlando ekufakazela lokho.—4/1, ikhasi 15.