Umhlaba—Kungani Ukhona?
Kunombuzo okufanele uwucabangele: Ingabe iplanethi yethu enhle yenziwa uMdali ohlakaniphile onenjongo ngomhlaba nangabantu abakuwo? Ukuxazulula le ndaba ngendlela eyanelisayo kungakusiza ukuba ubone ukuthi liyini ikusasa le planethi yethu.
OSOSAYENSI abaningi abaye bafunda kanzulu ngendawo yonke nangomhlaba wethu baye babona ubufakazi obukhomba ekubeni khona koMdali, bokuthi nguNkulunkulu owakudala. Cabangela okuphawulwe oyedwa nje:
UProfesa uPaul Davies kwethi The Mind of God uyabhala: “Ukuba khona kwendawo yonke ehlelekile nevumelanayo enezakhiwo ezigxilile, ezihlelekile neziyinkimbinkimbi kudinga imithetho nezimo kohlobo olukhetheke kakhulu.”
Ngemva kokukhuluma ngezinto eziningana “eziqondanayo” eziye zaphawulwa izazi zesayensi yomumo nokwakheka kwezinto ezisemkhathini kanye nezinye izazi, uProfesa uDavies uyenezela: “Kukonke, kunikeza ubufakazi obuhlaba umxhwele bokuthi ukuphila njengoba sikwazi kuxhomeke kakhulu ohlotsheni oluthile lwemithetho yesayensi yezinto eziphilayo, nasezintweni ezibonakala zenzeka ngengozi ezilinganisweni ezingokoqobo zezisindo ezihlukahlukene zezakhi, ubungako bamandla, njalonjalo, indalo eye yazikhetha. . . . Singasho ukuthi, uma singazenza uNkulunkulu, futhi simane sizikhethele izilinganiso zalokhu ngokusonta nje izinkinobho ezithile, singathola ukuthi cishe zonke izilinganiso esizikhethile ezinkinobhweni zenza kungabi nalutho olungahlala endaweni yonke. Ezimweni ezithile kubonakala sengathi izilinganiso ezihlukahlukene kufanele zikhethwe ngokunemba okukhulu ezinkinobhweni ukuze indawo yonke isebenze ngendlela ezokwenza ukuphila kuchume. . . . Iqiniso lokuthi ngisho noshintsho oluncane endleleni izinto ezingayo lungase lwenze indawo yonke ingabonwa ngokuqinisekile liyiqiniso elibaluleke kakhulu.”
Kwabaningi lokhu kusho ukuthi umhlaba wethu, kanye nendawo yonke, kwenziwa uMdali onenjongo. Uma kunjalo, kudingeka sithole ukuthi wawakhelani umhlaba kwasekuqaleni. Futhi kudingeka siqiniseke, uma singakwazi, ukuthi iyini injongo yakhe ngomhlaba. Kunokuthile okungavamile okuyindida maqondana nalokhu. Naphezu kokusakazeka kabanzi kokungakholelwa ebukhoneni bukaNkulunkulu, kunenani elimangalisayo labantu abasakholelwa kuMdali ohlakaniphile. Amasonto amaningi eLobukholwa ayakhuluma ngoNkulunkulu umninimandla onke noMdali wendawo yonke. Nokho, kuyaqabukela ukuba noma iyiphi kulezi zinkolo ikhulume ngokuqiniseka ngekusasa lomhlaba enjongweni kaNkulunkulu.
Lithini IBhayibheli?
Kunengqondo ukubheka emthonjeni wokwaziswa owamukelwa kabanzi njengovela kuMdali. Lowo mthombo iBhayibheli. Amanye amazwi alula nacace kunawo wonke kulo ngokuphathelene nekusasa lomhlaba wethu atholakala kumShumayeli 1:4. Siyafunda: “Isizukulwane siyamuka, isizukulwane siyeza, kepha umhlaba umi phakade.” IBhayibheli aligwegwesi ekuchazeni ukuthi kungani uJehova uNkulunkulu adala umhlaba. Libonisa nokuthi wawubeka endaweni okuyiyonayona nefanelekayo ukuze ilanga likwazi ukusekela ukuphila okukuwo. UNkulunkulu umninimandla onke waphefumulela umprofethi wasendulo u-Isaya ukuba abhale: “Usho kanje uJehova, owalidala izulu, onguNkulunkulu, owawubumba umhlaba, wawenza, wawumisa, engawudalelanga ize, wawubumba ukuba kuhlalwe kuwo, uthi: NginguJehova, akakho omunye.”—Isaya 45:18.
Kodwa kuthiwani ngokusungula komuntu izindlela zokubhubhisa konke ukuphila okusemhlabeni? Ngokuhlakanipha kwakhe okungenakuqhathaniswa, uNkulunkulu uthi uyongenela ngaphambi kokuba isintu sibhubhise konke ukuphila okukule planethi yethu. Phawula lesi sithembiso esiqinisekisayo esisencwadini yokugcina yeBhayibheli, isAmbulo: “Izizwe zaba nolaka, nolaka lwakho siqu lwafika, nesikhathi esimisiwe sokwahlulela abafileyo, nokuzinika umvuzo wazo izigqila zakho abaprofethi nabangcwele nalabo abesaba igama lakho, abancane nabakhulu, nokuchitha labo abachitha umhlaba.”—IsAmbulo 11:18.
UJehova usambulela ukuthi yayiyini injongo yakhe yasekuqaleni lapho edala umhlaba, leli gugu elisemkhathini, njengoba umuntu ohamba emkhathini owayejikeleza umhlaba awuchaza kanjalo. Injongo kaNkulunkulu yayiwukuthi imbulunga yonke ibe ipharadesi, elinabantu abanele—abesilisa nabesifazane—bonke abahlala ngokuthula nangobunye. Ngokuvumela umbhangqwana wokuqala ongabantu ukuba ube nenzalo, wayehlele ukuba kancane kancane le planethi igcwale abantu. Ukuze umbhangqwana wokuqala ongabantu ujabule, uJehova wayenze ingxenye encane yomhlaba yaba sesimweni sepharadesi. Njengoba imikhaya yabantu yayiyoqhubeka izala phakathi neminyaka namakhulu eminyaka, insimu yase-Edene yayiyonwetshwa kancane kancane kuze kube yilapho kugcwaliseka uGenesise 1:28 othi: “UNkulunkulu wathi kubo: Zalani, nande, nigcwalise umhlaba, niwunqobe.”
Njengoba manje sibona isimo esidabukisayo somhlaba nezakhamuzi zawo, ingabe lokho kusho ukuthi injongo kaNkulunkulu yasekuqaleni ngomhlaba iye yahluleka? Noma ingabe ngenxa yobubi bomuntu, uye washintsha injongo yakhe, wanquma ukuthi ayivumele le planethi ukuba yonakaliswe ngokuphelele aqale kabusha? Cha, singaqiniseka ukuthi akukho kulezi zimo okuyiqiniso. IBhayibheli lisitshela ukuthi noma yini uJehova ahlela ukuyenza kumelwe yenzeke ekugcineni, noma yini ayinqumayo ayinakubhuntshiswa yinoma imuphi umuntu noma ngisho nayizinto ezingalindelekile ezenzekayo. Uyasiqinisekisa: “Liyakuba-njalo izwi lami eliphuma emlonyeni wami: aliyikubuyela-ze kimi, lingakafezi lokhu engikufunayo, liphumelele kulokhu engilithumele kukho.”—Isaya 55:11.
Injongo KaNkulunkulu Yaphazamiseka, Ayishintshanga
Ngokuhlubuka kuka-Adamu no-Eva nokuxoshwa kwabo ensimini yase-Edene, kwaba sobala ukuthi injongo kaNkulunkulu yomhlaba oyipharadesi iyofezeka ngaphandle kwabo. Nokho, uJehova wabonisa khona lapho ukuthi enye yenzalo yabo yayiyofeza umyalo wakhe wasekuqaleni. Yiqiniso, lokhu kwakuyothatha isikhathi, empeleni amakhulu eminyaka, kodwa akukho okubonisa ukuthi singakanani isikhathi esasiyohileleka ekufezeni umyalo wasekuqaleni ngisho noma bobabili u-Adamu no-Eva babeqhubeke bephila ngokuphelela. Iqiniso liwukuthi ekupheleni kokuBusa KweMinyaka Eyinkulungwane kukaKristu Jesu—eminyakeni engaphezudlwana kweyinkulungwane ukusuka manje—izimo zePharadesi lase-Edene ziyosabalala emhlabeni kabanzi futhi iplanethi ewuMhlaba iyogcwala inzalo enokuthula nejabulayo yombhangqwana wokuqala ongabantu. Yebo, ikhono likaJehova njengoMsunguli Wezinjongo ongenaphutha liyolwelwa phakade!
Kuyobe sekugcwaliseka iziprofetho ezithakazelisayo uNkulunkulu aziphefumulela kudala. Imibhalo enjengo-Isaya 11:6-9 iyogcwaliseka ngendlela enhle ngokumangalisayo: “Impisi iyakuhlala newundlu, ingwe ibuthise ndawonye nezinyane lembuzi, ithole nebhongo lengonyama kukhuluphaliswe kanyekanye, nomntwana omncane uyakukuqhuba. Inkomo nebhere kuyakuklaba, amazinyane akho abuthise ndawonye, ingonyama idle utshani njengenkabi. Umntwana oncelayo uyakudlala ngasemgodini webululu, olunyuliweyo elulele isandla sakhe esiseleni sikamantshingeyana. Abayikwenza okubi, bangachithi entabeni yonke yami engcwele, ngokuba umhlaba uyakugcwala ukumazi uJehova njengamanzi asibekela ulwandle.”
Impilo ebuthakathaka nezifo ezibulalayo kuyoba izinto zangesikhathi esidlule, njengoba nje kuyoba njalo nangokufa ngokwakho. Ingabe kukhona okungaba okucace ukwedlula la mazwi alula atholakala encwadini yokugcina yeBhayibheli? “Itende likaNkulunkulu likanye nesintu, uyohlala naso, futhi siyoba abantu bakhe. Futhi uNkulunkulu ngokwakhe uyoba naso. Futhi uyosula zonke izinyembezi emehlweni aso, futhi ukufa ngeke kusaba khona, noma ukulila noma ukukhala noma ubuhlungu ngeke kusaba khona. Izinto zangaphambili zidlulile.”—IsAmbulo 21:3, 4.
Yebo, singakhuthazeka—iplanethi yethu enhle ewuMhlaba izoba khona phakade. Kwangathi ungaba nelungelo lokusinda esiphelweni salesi simiso esibi sezinto, nayo yonke imikhuba yaso eyonakalisa umhlaba. Izwe elisha elihlanzwe uNkulunkulu seliseduze. Futhi abaningi abathandekayo bethu bayovuswa ekufeni ngesimangaliso sovuko. (Johane 5:28, 29) Ngempela, umhlaba wethu uzohlala phakade, nathi singahlala kuwo phakade futhi siwujabulele.