Inhlangano KaJehova Iyayisekela Inkonzo Yakho

“Ngabona enye ingelosi indiza emkhathini, futhi yayinezindaba ezinhle ezimi phakade ukuba izimemezele njengezindaba ezithokozisayo.”—ISAMBULO 14:6.

1. OFakazi BakaJehova baye bavivinywa kanjani, futhi kungani beye basinda?

KUNGANI kubaluleke kangaka ukuqaphela indima yenhlangano kaJehova yasezulwini ekusekeleni inkonzo yamaKristu? OFakazi BakaJehova bebengakufeza yini ukushunyayelwa kwezindaba ezinhle zoMbuso kaNkulunkulu kulo lonke izwe elinobutha ngaphandle kokusekela kwamabutho kaJehova asezulwini? OFakazi baye bashumayela phakathi nekhulu leminyaka lokushisekela izwe okwedlulele, izimiso zombangazwe zobushiqela, izimpi zezwe nezinhlupheko ezihlukahlukene. Ukube bebengasizwa uJehova, ingabe oFakazi bebengasinda ezikhukhuleni zobandlululo, imibono ephambene, noshushiso olunobudlova abaye babhekana nazo emhlabeni wonke?—IHubo 34:7.

Sisekhona Naphezu Kokuphikiswa Emhlabeni Wonke

2. Kunakuphi ukufana phakathi kwamaKristu eqiniso ekhulu lokuqala nawanamuhla?

² Kuleli khulu lama-20, izitha, kokubili ezenkolo nezezombangazwe, ziye zabeka zonke izinhlobo zezithiyo, ezingokomthetho nezolunye uhlobo, zizama ukuvimbela noma zimise umsebenzi kaJehova. Abafowethu nodadewethu abangamaKristu baye bashushiswa, kwahlanekezelwa abayikho, bahlanjalazwa futhi banyundelwa—abaningi baye babulawa—ezikhathini eziningi ngenxa yokushoshozela kwabefundisi beBabiloni Elikhulu. Kungashiwo njengoba kwashiwo ngamaKristu okuqala, ukuthi “ngempela ngokuqondene nalelihlelo siyazi ukuthi kukhulunywa ngokumelene nalo kuyo yonke indawo.” Njengoba nje abefundisi abangamaJuda bangesikhathi sikaKristu balwa kakhulu ukuze bamise inkonzo yakhe, ngokufanayo abefundisi nezihlubuki, bekanye namashende abo angabezombangazwe, baye bazama ukuvimbela umsebenzi omkhulu wokufakaza ofundisayo wabantu bakaJehova.—IzE 28:22; Mathewu 26:59, 65-67.

3. Yini esingayifunda ebuqothweni bukaHenryka Żur?

³ Ngokwesibonelo, cabanga ngalokho okwenzeka ePoland ngo-March 1, 1946. UHenryka Żur, intombazane enguFakazi eneminyaka engu-15 ubudala yangaseChełm, wayehamba nomunye uFakazi, ongumzalwane, beyovakashela abantu abathakazelayo edolobhaneni eliseduze. Babanjwa amalungu eqembu lempi lamaKatolika elibizwa ngokuthi i-Narodowe Siły Zbrojne (IButho Lesizwe Elihlomile). Umzalwane washaywa kanzima kodwa wasinda. Akubanga njalo ngoHenryka. Wahlukunyezwa ngendlela esabekayo amahora amaningi njengoba babezama ukumphoqa ukuba enze uphawu lwesiphambano lwamaKatolika. Omunye wababemhlukumeza wathi: “Ungacabanga noma yini othanda ukuyicabanga ngaphakathi, kodwa uma nje wenzé uphawu lwesiphambano lwamaKatolika. Ngalé kwalokho ulindelwe yinhlamvu!” Ingabe wahlehla ebuqothweni bakhe? Cha. La magwala enkolo amhudulela ehlathini eliseduze afike amdubula. Nakuba kunjalo, wayenqobile! Ayehlulekile ukwephula ubuqotho bakhe.a—Roma 8:35-39.

4. Amaqembu ezombangazwe nawenkolo aye azama kanjani ukuvimbela umsebenzi wokushumayela ngoMbuso?

⁴ Iminyaka engaphezu kwekhulu, izinceku zikaNkulunkulu zanamuhla bezilokhu ziphethwe ngokhahlo futhi zingahlonishwa. Ngenxa yokuthi oFakazi BakaJehova abayona ingxenye yezinkolo zikaSathane ezivamile, futhi abafisi ukuba yiyo, babhekwa njengezisulu ezikahle yinoma yimuphi umgxeki onombono ongamanga noma umphikisi oshiseka ngokweqile. Baye bahlaselwa ngonya amaqembu ezombangazwe. OFakazi abaningi baye babulawelwa ukholo lwabo. Ngisho nohulumeni okuthiwa babusa ngentando yeningi baye bazama ukuthiya ukushunyayelwa kwezindaba ezinhle. Kusukela emuva ngo-1917 eCanada nase-United States, abefundisi babeshoshozela ukuba ama-Bible Student, njengoba babaziwa kanjalo oFakazi ngaleso sikhathi, abekwe amacala okuvukela. Izikhulu ze-Watch Tower Society zaboshwa ngokungafanele, kamuva zakhululwa.—IsAmbulo 11:7-9; 12:17.

5. Yimaphi amazwi aye akhuthaza izinceku zikaJehova?

⁵ USathane uye wasebenzisa zonke izindlela angazisebenzisa ukuze azame ukumisa umsebenzi wokufakaza wabafowabo bakaKristu nabangane babo abathembekile. Nokho, njengoba okuhlangenwe nakho okuningi kubonisa, ukusongelwa, ukwesatshiswa, ubudlova obungokomzimba, amajele, amakamu okuhlushwa ngisho nokufa akuzange kubathulise oFakazi BakaJehova. Futhi kuye kwaba njalo kuwo wonke umlando. Ngokuphindaphindiwe, amazwi ka-Elisha aye aba yisikhuthazo: “Ungesabi, ngokuba abanathi baningi kunabanabo.” Esinye sezizathu siwukuthi izingelosi ezithembekile ziningi kunamabutho kaDeveli!—2 AmaKhosi 6:16; IzEnzo 5:27-32, 41, 42.

UJehova Uyakubusisa Ukushumayela Ngentshiseko

6, 7. (a) Yimiphi imizamo yokushumayela izindaba ezinhle eyenziwa esikhathini esingaphambili? (b) Yiluphi ushintsho oluzuzisayo olwenzeka kusukela ngo-1943?

⁶ Phakathi nekhulu lama-20, oFakazi BakaJehova baye basebenzisa izinhlobo eziningi zentuthuko yezobuchwepheshe ukuze bandise futhi basheshise umsebenzi omkhulu wokufakaza ngaphambi kokuba kufike ukuphela. Emuva ngo-1914, uPastor Russell, umongameli wokuqala we-Watch Tower Bible and Tract Society, wathuthukisa ukusetshenziswa kokuqala kwama-slide nezithombe ezinyakazayo, okwakuhambisana nenkulumo esekelwe eBhayibhelini ekumarekhodi egilamafoni, kulokho okwakuwuhlelo olungamahora angu-8 olubizwa ngokuthi i-“Photo-Drama of Creation.” Lwamangaza izethameli emazweni amaningi ngaleso sikhathi. Kamuva, ngawo-1930 nawo-1940, oFakazi baziwa ngomsebenzi wabo wokushumayela endlini ngendlu ngamagilamafoni aphathwayo, besebenzisa izinkulumo zeBhayibheli eziqoshiwe ezazinikezwa uJ. F. Rutherford, umongameli wesibili weNhlangano.

⁷ Ngo-1943, ngaphansi kokuqondisa kukaNathan H. Knorr, umongameli wesithathu weNhlangano, kwathathwa isinyathelo esidinga isibindi lapho kunqunywa ukuba kumiswe isikole sezikhonzi kuwo wonke amabandla. OFakazi babezoqeqeshelwa ukushumayela nokufundisa endlini ngendlu ngaphandle kokusebenzisa inkulumo eqoshwe kuyigilamafoni. Kusukela ngaleso sikhathi, kuye kwahlelwa ezinye izikole zokuqeqesha izithunywa zevangeli, izikhonzi ezingamaphayona esikhathi esigcwele, abadala bebandla, nababonisi abanomthwalo wemfanelo emagatsheni e-Watch Tower Society. Uye waba yini umphumela?

8. OFakazi balubonisa kanjani ukholo olukhulu ngo-1943?

⁸ Emuva ngo-1943, phakathi neMpi Yezwe II, kwakunoFakazi abakhuthele abangu-129 000 kuphela emazweni angu-54. Nokho, babenokholo nokuzimisela ngokuthi uMathewu 24:14 wayeyogcwaliseka ngaphambi kokuba kufike ukuphela. Babeqiniseka ukuthi uJehova wayeyokwenza ukuba umyalezo obalulekile oyisixwayiso umenyezelwe kuqala ngaphambi kwezenzakalo ezaziyoqeda lesi simiso sezinto esonakele. (Mathewu 24:21; IsAmbulo 16:16; 19:11-16, 19-21; 20:1-3) Ingabe imizamo yabo iye yavuzwa?

9. Yimaphi amaqiniso abonisa ukuthi umsebenzi wokushumayela uye wachuma?

⁹ Manje kunamazwe okungenani angu-13 anoFakazi abakhuthele abangaphezu kuka-100 000 ezweni ngalinye. Amaningana ala mazwe ayizizinda zeSonto LamaKatolika. Nokho, ake ubheke isimo. EBrazil kunabamemezeli bezindaba ezinhle abangaba ngu-450 000, futhi kwakunabangaphezu kuka-1 200 000 eSikhumbuzweni sokufa kukaKristu ngo-1997. Esinye isibonelo iMexico, enoFakazi abacishe babe ngu-500 000 futhi yaba nabangaphezu kuka-1 600 000 emkhosini weSikhumbuzo. Amanye amazwe obuKatolika yi-Italy (enoFakazi abangaba ngu-225 000), iFrance (enabangaba ngu-125 000), iSpain (enabangaphezu kuka-105 000) ne-Argentina (enabangaphezu kuka-115 000). E-United States, lapho kwande khona izinkolo zobuProthestani, ubuKatolika nezamaJuda, kunoFakazi abangaba ngu-975 000 futhi eSikhumbuzweni kwakukhona abangaphezu kuka-2 000 000. Ngokuqinisekile, izixuku ezinkulu ziyaphuma eBabiloni Elikhulu, umbuso wezwe wenkolo yamanga, nezimfundiso zalo eziyindida, futhi ziphendukela ezithembisweni zikaNkulunkulu ezicacile neziqinisekile ‘zamazulu amasha nomhlaba omusha.’—2 Petru 3:13; Isaya 2:3, 4; 65:17; IsAmbulo 18:4, 5; 21:1-4.

Ukuvumelana Nezidingo Zabantu

10. Izimo ziye zashintsha kanjani kwezinye izindawo?

¹⁰ Abaningi balabo abaye baphendukela kuJehova ngoKristu Jesu batholakala endlini ngendlu. (Johane 3:16; IzEnzo 20:20) Kodwa kuye kwasetshenziswa nezinye izindlela. Izikhathi zishintshile, futhi izimo zomnotho manje zenza abesifazane abaningi baphume bayosebenza. Ngokuvamile, phakathi nesonto, bambalwa abantu abatholakalayo emakhaya. Ngakho, oFakazi BakaJehova baye bazivumelanisa naleso simo. NjengoJesu nabafundi bokuqala, baya lapho abantu betholakala khona nangezikhathi abatholakala ngazo.—Mathewu 5:1, 2; 9:35; Marku 6:34; 10:1; IzEnzo 2:14; 17:16, 17.

11. OFakazi BakaJehova bashumayela kuphi namuhla, futhi kuba namuphi umphumela?

¹¹ OFakazi bathatha isinyathelo kuqala futhi ngokuhlakanipha bashumayela kubantu abasezindaweni zokupaka ezinkulu, ezikhungweni zezitolo, emafemini, emahhovisi nasezindaweni zamabhizinisi, ezikoleni, eziteshini zamaphoyisa, emagalaji kaphethiloli, emahhotela nasezitolo zokudlela nasemigwaqweni. Eqinisweni, bashumayela noma kuphi lapho kutholakala khona abantu. Futhi lapho abantu besemakhaya, oFakazi bayaqhubeka bebavakashela lapho. Le ndlela evumelana nezimo futhi ebhekana nazo njengoba zinjalo ibangela ukuba kuhanjiswe izincwadi zeBhayibheli ezengeziwe. Kutholakala abanjengezimvu. Kuqalwa izifundo zeBhayibheli ezintsha. Umsebenzi wokufundisa omkhulu kunayo yonke emlandweni wabantu ufezwa ngentshiseko yizikhonzi zokuzithandela ezingaphezu kwezigidi ezinhlanu nengxenye! Ingabe unelungelo lokuba omunye wazo?—2 Korinte 2:14-17; 3:5, 6.

Yini Eshukumisa OFakazi BakaJehova?

12. (a) UJehova ubafundisa kanjani abantu bakhe? (b) Kunamuphi umphumela lokhu kufundisa?

¹² Inhlangano yasezulwini ihlobene kanjani nakho konke lokhu? U-Isaya waprofetha: “Bonke abantwana bakho bayakuba-ngabafundi bakaJehova, nokuthula kwabantwana bakho kuyakuba-kukhulu.” (Isaya 54:13) UJehova ufundisa lobu buzalwane bomhlaba wonke obunobunye ngenhlangano yakhe ebonakalayo esemhlabeni—emaHholo OMbuso, emihlanganweni emikhulu nakwemincane. Umphumela uba ubunye nokuthula. Ukufundisa kukaJehova kuye kwaveza abantu abahlukile, abafundiswe ukuba bathandane futhi bathande omakhelwane babo njengoba bezithanda bona, bangabazondi, kungakhathaliseki ukuthi bahlala kuphi kuleli lizwe elihlukanisayo nelihlukene.—Mathewu 22:36-40.

13. Kungani singaqiniseka ukuthi ukuqondisa kwezingelosi kuhilelekile emsebenzini wokushumayela?

¹³ OFakazi BakaJehova bashukunyiswa uthando ukuba baqhubeke beshumayela naphezu kokunganakwa noma ukushushiswa. (1 Korinte 13:1-8) Bayazi ukuthi umsebenzi wabo osindisa ukuphila uqondiswa ezulwini, njengoba kusho isAmbulo 14:6. Uthini umyalezo omenyezelwa ngokuqondisa kwengelosi? “Mesabeni uNkulunkulu nimnike inkazimulo, ngoba ihora lokwahlulelwa nguye selifikile, ngakho khulekelani Lowo owenza izulu nomhlaba nolwandle nemithombo yamanzi.” Ukushunyayelwa kwezindaba ezinhle zoMbuso kuphakamisa igama likaJehova. Abantu bamenywa ukuba banike uMdali, uNkulunkulu, udumo bangaluniki izidalwa nenkolelo yokuziphendukela kwemvelo engenangqondo. Futhi kungani umsebenzi wokushumayela uphuthuma kangaka? Yingoba ihora lokwahlulelwa selifikile—lokwahlulelwa kweBabiloni Elikhulu nazo zonke ezinye izici zesimiso sezinto sikaSathane esibonakalayo.—IsAmbulo 14:7; 18:8-10.

14. Obani abahilelekile kulo mkhankaso omkhulu wokufundisa?

¹⁴ Akukho mKristu ozinikezele okungadingekile enze lo msebenzi wokushumayela. Abadala abangokomoya bayahola ekushumayeleni nebandla. Amaphayona aqeqeshiwe amatasa ngokugcwele kulo msebenzi. Abamemezeli abashisekayo besigijimi soMbuso, kungakhathaliseki ukuthi bakwazi ukushumayela amahora ambalwa kuphela ngenyanga noma amaningi, basakaza lesi sigijimi kuwo wonke amagumbi omhlaba.—Mathewu 28:19, 20; Heberu 13:7, 17.

15. Yini ebonisa ithonya lokushumayela koFakazi BakaJehova?

¹⁵ Ingabe wonke lo mzamo uye waba nethonya ezweni? Ubufakazi obucacile bokuthi uye waba nalo ukuthi oFakazi BakaJehova baye bavezwa kaningi ezinhlelweni ze-TV nasezingosini zamaphephandaba. Ngokuvamile ziqokomisa ukuphikelela nokuzimisela kwethu ukuba sifinyelele wonke umuntu. Yebo, intshiseko yethu nokuba khona njalo kuthinta abantu ngokujulile, ngisho noma iningi labantu lenqaba isigijimi nabasilethayo!

Ukushisekela Kwethu Ukuphothula Ukufakaza

16. Yisiphi isimo sengqondo okufanele sisibonise manje kulesi sikhathi esincane esisasele?

¹⁶ Asazi ukuthi lesi simiso sezinto sisasalelwe isikhathi eside kangakanani, futhi akudingeki sazi uma nje isisusa sethu sokukhonza uJehova sihlanzekile. (Mathewu 24:36; 1 Korinte 13:1-3) Kodwa siyazi ukuthi ukuze uthando lukaJehova, amandla nobulungisa bakhe kubonakaliswe, izindaba ezinhle kumelwe zishunyayelwe “kuqala.” (Marku 13:10) Ngakho-ke, kungakhathaliseki ukuthi sekuyiminyaka emingaki sikulindele ngokulangazela ukuphela kwaleli lizwe elibi, elingenabulungisa nelinobudlova, kumelwe siphile ngentshiseko ngokuvumelana nokuzinikezela kwethu ezimweni esikuzo. Kungenzeka sikhulile ngeminyaka noma siyagula, kodwa sisengamkhonza uJehova ngentshiseko esasinayo sisebasha noma sisenempilo enhle. Mhlawumbe asisakwazi ukusebenza isikhathi eside enkonzweni njengoba sasenza ngaphambili, kodwa ngokuqinisekile singalilondoloza izinga lomhlatshelo wethu wokudumisa uJehova.—Heberu 13:15.

17. Landisa okuhlangenwe nakho okungase kusisize sonke.

¹⁷ Ngakho-ke, sibancane noma sibadala, masibonise intshiseko futhi sihlanganyele isigijimi sethu esihle sezwe elisha nabo bonke esihlangana nabo. Masibe njengentombazane yase-Australia eneminyaka engu-7 ubudala enamahloni eyahamba nonina beya esitolo. Yayizwile eHholo LoMbuso ukuthi kubaluleke kangakanani ukuba sonke sishumayele, ngakho yafaka izincwajana ezimbili ezingangomagazini ezisekelwe eBhayibhelini esikhwameni sayo. Lapho unina esesendaweni yokukhokha, lentombazanyana yanyamalala. Lapho unina eyifuna, wayithola ihambisela owesifazane othile incwajana! Unina waya kulona wesifazane eyoxolisa ngokuphazamisa kwendodakazi yakhe. Kodwa lona wesifazane wayeyamukele ngomusa incwajana. Lapho unina eseyedwa nendodakazi yakhe, wayibuza ukuthi yayisithathephi isibindi sokuya kumuntu engamazi. “Ngivele ngathi, Ready, Set, Go! Ngahamba!”

18. Singawubonisa kanjani umoya otusekayo?

¹⁸ Sonke siyawudinga umoya onjengowale ntombazane yase-Australia, ikakhulukazi ukuze siyise izindaba ezinhle kubantu esingabazi noma ezikhulwini imbala. Singase sesabe ukuthi bazokwenqaba. Masingakukhohlwa lokho uJesu akusho: “Ningakhathazeki ngokuthi niyokhuluma kanjani noma ngokuthi yini eniyoyikhuluma nizivikela noma ngokuthi niyothini; ngoba umoya ongcwele uyonifundisa ngalo kanye lelohora izinto okufanele nizisho.”—Luka 12:11, 12.

19. Uzizwa kanjani ngenkonzo yakho?

¹⁹ Ngakho thembela osizweni lomoya kaNkulunkulu njengoba uyisa izindaba ezinhle kubantu ngomusa. Izigidi zithembela emadodeni nabesifazane ngokuvamile abangakufanelekeli ukwethenjwa, abakuphila kwabo kungokwesikhashana. Thina sithembela kuJehova nasenhlanganweni yakhe yasezulwini—uKristu Jesu, izingelosi ezingcwele namaKristu agcotshiwe avusiwe—abaphila phakade! Ngakho-ke, khumbula: “Abanathi baningi kunabanabo”!—2 AmaKhosi 6:16.

[Umbhalo waphansi]

Ungaphendula Kanjani?

◻ Iyiphi indima eye yafezwa yinhlangano kaNkulunkulu yasezulwini ekusindeni kwabantu bakaJehova?

◻ Yimaphi amaqembu ezombangazwe nawenkolo aye ahlasela oFakazi BakaJehova ekhulwini lama-20?

◻ OFakazi BakaJehova baye bayivumelanisa kanjani inkonzo yabo nezidingo zalezi zikhathi?

◻ Yini ekushukumisela ukuba ushumayele?

[Isithombe ekhasini 17]

UHenryka Żur

[Izithombe ekhasini 18]

Japan

Martinique

United States

Kenya

United States

OFakazi BakaJehova bashumayela noma kuphi noma nini lapho abantu betholakala khona

[Isithombe ekhasini 20]

Ngasekuqaleni kwaleli khulu leminyaka, kwakusetshenziswa amagilamafoni ukuze kusakazwe isigijimi soMbuso