Indlela Izingelosi Ezingakusiza Ngayo

IZWI likaNkulunkulu liyavuma ukuthi zikhona izingelosi. Lisitshela ukuthi kunezigidi zalezi zidalwa zomoya. Inceku kaJehova uNkulunkulu uDaniyeli yabona umbono wezinto zasezulwini eyabhala yathi ngazo: “Izinkulungwane zenkulungwane zazimkhonza [uNkulunkulu], nezinkulungwane eziyishumi zezinkulungwane eziyishumi zazimi ngaphambi kwakhe.”—Daniyeli 7:10.

Phawula ukuthi amazwi kaDaniyeli awasitsheli nje kuphela ukuthi kunezingelosi eziningi. Abonisa nokuthi lezi zingelosi zikhonza uNkulunkulu. Ziyizinceku zakhe. Ngokuvumelana nalokhu, umhubi wahlabelela: “Bongani uJehova nina-zingelosi zakhe, nina-maqhawe anamandla enenza okwezwi lakhe nilalela ukukhuluma kwezwi lakhe. Bongani uJehova nina-mabandla onke akhe, nina-zinceku zakhe enenza intando yakhe.”—IHubo 103:20, 21.

IBhayibheli lichaza nokuthi izingelosi aziqalanga ukuphila kwazo zingabantu emhlabeni. UJehova wadala izingelosi ezulwini ngisho nangaphambi kokuba adale umhlaba. Lapho uNkulunkulu ‘esekela umhlaba, amadodana kaNkulunkulu ayizingelosi ajabula.’—Jobe 38:4-7.

Izingelosi ziyizidalwa zomoya—azibonakali, zinamandla futhi zihlakaniphile. EBhayibhelini, igama lesiHeberu elithi mal·ʼakhʹ nelesiGreki elithi agʹge·los ahunyushwa ngokuthi “ingelosi” lapho kubhekiselwa esidalweni somoya. La magama avela cishe izikhathi ezingu-400 eBhayibhelini. Womabili anencazelo efanayo, okungukuthi, “isithunywa.”

Ukubonana Nezingelosi

Ngokuqinisekile, izingelosi ziyizithunywa. Kungenzeka ukuthi ujwayelene nokulandisa kweBhayibheli kwangesikhathi lapho ingelosi uGabriyeli ibonakala kuMariya. Yamtshela ukuthi nakuba ayeyincasakazi, wayezozala indodana okwakufanele iqanjwe ngokuthi uJesu. (Luka 1:26-33) Ingelosi yabonakala nakubelusi abathile ababesemadlelweni. Yamemezela: “Nizalelwe namuhla uMsindisi, onguKristu iNkosi.” (Luka 2:8-11) Ngokufanayo, izingelosi zaletha imiyalezo kuHagari, u-Abrahama, uLoti, uJakobe, uMose, uGideyoni, uJesu nabanye abasembhalweni weBhayibheli.—Genesise 16:7-12; 18:1-5, 10; 19:1-3; 32:24-30; Eksodusi 3:1, 2; AbAhluleli 6:11-22; Luka 22:39-43; Heberu 13:2.

Kuyaphawuleka ukuthi yonke le miyalezo eyalethwa izingelosi yayivumelana nokufezeka kwezinjongo zikaNkulunkulu hhayi ngempela zalabo bantu ababehilelekile. Izingelosi zavela zingabameleli bakaNkulunkulu, ngokwentando nohlelo lwakhe lwesikhathi. Azizange zibizwe abantu.

Ingabe Singalucela Usizo Ezingelosini?

Ingabe kuyafaneleka ukuba sicele usizo ezingelosini ngezikhathi zokucindezeleka? Uma kunjalo, singathanda ukwazi igama lengelosi engakwazi kangcono ukusisiza. Ngenxa yalokho, ezinye izincwadi ezithengiswayo zinohlu lwamagama ezingelosi eziningi, kuhlanganise nezikhundla zazo, iziqu nemisebenzi yazo. Enye incwadi inohlu lwalokho ekubiza ngokuthi “izingqalabutho eziyishumi zasezulwini,” “izingelosi ezaziwa kakhulu ezweni laseNtshonalanga.” Lolo luhlu luhambisana neseluleko sokuthi uvale amehlo, ubize igama lengelosi ngokunensa izikhathi eziningana, udonsa umoya izikhathi ezithile, uphefumule ngokungasheshi, “uzibeke ethubeni lokuthintana nazo.”

Ngokuphambene, iBhayibheli lisinikeza amagama amabili kuphela ezingelosi ezithembekile zikaNkulunkulu, okunguMikayeli noGabriyeli. (Daniyeli 12:1; Luka 1:26) Kungenzeka ukuthi isizathu sokunikeza la magama kwakuwukubonisa ukuthi ingelosi ngayinye ingumuntu womoya ohlukile onegama, hhayi amandla athile nje angewona umuntu.

Kungokuphawulekayo ukuthi ezinye izingelosi zenqaba ukutshela abantu amagama azo. Lapho uJakobe ecela ukuba ingelosi isho igama layo, ayizange yenze njalo. (Genesise 32:29) Lapho ingelosi eyaya kuJoshuwa icelwa ukuba izisho ukuthi ingubani, yamane yathi ‘iyisikhulu sebandla likaJehova.’ (Joshuwa 5:14) Lapho abazali bakaSamsoni bebuza ingelosi igama layo, yathi: “Ubuzelani igama lami, lokhu [lingelimangalisayo, NW]?” (AbAhluleli 13:17, 18) Ngokunganikezi luhlu lwamagama ezingelosi, iBhayibheli lisivikela ekudumiseni nasekukhulekeleni izingelosi ngokungafanele. Njengoba sizobona, alisiyali nokuba sicele usizo kuzo.

Ukucela Usizo KuNkulunkulu

IBhayibheli lisitshela konke okudingeka sikwazi ngokuphathelene nezindaba zasendaweni yomoya. Umphostoli uPawulu wabhala: “Yonke imibhalo iphefumulelwe uNkulunkulu futhi inenzuzo yokufundisa . . . ukuze umuntu kaNkulunkulu afaneleke ngokugcwele‚ ayihlomele ngokuphelele yonke imisebenzi emihle.” (2 Thimothewu 3:16, 17) Ukube uNkulunkulu ubefuna sazi amagama ezingelosi eziningi, ubeyowembula eZwini lakhe, iBhayibheli. Futhi ukube uNkulunkulu ubefuna ukusifundisa indlela esingaxhumana ngayo futhi sikhulume nezingelosi ngomthandazo, ubeyosinika ukwaziswa okunjalo emiBhalweni.

Kunalokho, uJesu Kristu wafundisa: “Lapho uthandaza, ngena ekamelweni lakho, futhi ngemva kokuvala umnyango wakho, uthandaze kuYihlo osekusithekeni . . . Khona-ke, kumelwe nithandaze ngalendlela: ‘Baba wethu osemazulwini, malingcweliswe igama lakho.’” (Mathewu 6:6, 9) Umbono ongokomBhalo yilona: Akumelwe sicele usizo noma sithandaze ezingelosini, kodwa kufanele sisondele ngomthandazo kuMdali wezingelosi, uNkulunkulu ngokwakhe. Igama lakhe aliyona imfihlakalo, futhi asikho isidingo sokuba kube nomboni wemibono ozoliveza. Nakuba kuye kwenziwa imizamo yokusithibeza igama laphezulu, livela izikhathi ezingaphezu kuka-7 000 embhalweni weBhayibheli. Ngokwesibonelo, umhubi wayebhekisela kuBaba wasezulwini lapho ehlabelela ethi: “Nguwe wedwa ogama lakho linguJehova; ungoPhezukonke emhlabeni wonke.”—IHubo 83:18.

Akwenzeki nanini ukuba uJehova abe matasa kakhulu ukuba angakwazi ukusilalela lapho sisondela kuye ngomthandazo ngendlela efanele. IBhayibheli liyasiqinisekisa: “Amehlo kaJehova aqalaza emhlabeni wonke ukuba abe-namandla kwabanhliziyo yabo iphelele kuye.”—2 IziKronike 16:9.

Izingelosi Nokuziphatha

Ngokuphambene nalokho okuvame ukushiwo imithombo yezindaba, izingelosi azibahluleli abantu. Lokho kuyafaneleka ngoba izingelosi azigunyazwanga ukuba zahlulele abantu. UJehova ‘nguMahluleli wabo bonke,’ nakuba ‘ekuphathise iNdodana [uJesu Kristu] konke ukwahlulela.’ (Heberu 12:23; Johane 5:22) Nokho, kungaba iphutha ukucabanga ukuthi izingelosi azinandaba nendlela esiphila ngayo. UJesu wathi: “Kuba khona injabulo phakathi kwezingelosi zikaNkulunkulu ngesoni esisodwa esiphendukayo.”—Luka 15:10.

Nokho, izingelosi azizona izibukeli nje. Ezikhathini ezidlule, zazingabakhiphi bezahlulelo, zikhipha izahlulelo zikaNkulunkulu. Ngokwesibonelo, uNkulunkulu wasebenzisa izingelosi lapho emelana nabaseGibithe lasendulo. NgokweHubo 78:49, “waphonsa kubo ukuvutha kwentukuthelo yakhe, nolaka, nokufutheka, nokuhlupheka, ngokuthuma izithunywa zobubi.” Ngokufanayo, iBhayibheli libika ukuthi ngobusuku obubodwa ingelosi eyodwa yabulala amasosha angu-185 000 ase-Asiriya.—2 AmaKhosi 19:35.

Ngokufanayo, ngesikhathi esizayo, izingelosi zizobhubhisa labo abasongela inhlalakahle yabanye ngokwenqaba ukwenza ngokuvumelana nezindinganiso zokulunga zikaNkulunkulu. UJesu uyoza ‘ekanye nezingelosi zakhe ezinamandla emlilweni ovutha amalangabi, njengoba eletha impindiselo phezu kwalabo abangamazi uNkulunkulu nakulabo abangazilaleli izindaba ezinhle.’—2 Thesalonika 1:7, 8.

Ngakho imiBhalo ibonisa ukuthi izingelosi zikaNkulunkulu ezithembekile zenza intando yakhe ngaso sonke isikhathi ngokufeza lokho ayale ukuba zikwenze nangokusekela izindinganiso zakhe zokulunga. Ngokusobala, uma sifuna ukuba izingelosi zikaNkulunkulu zisisize, kudingeka sazi ukuthi iyini intando kaNkulunkulu futhi sikulwele kanzima ukuyenza.

Izingelosi Ezisinakekelayo

Ingabe izingelosi ziyabanakekela futhi zibavikele abantu? Umphostoli uPawulu wabuza: “[Izingelosi] aziyona yini zonke imimoya enikela inkonzo yasobala, ethunyelwe ukukhonza ngenxa yalabo abayozuza insindiso njengefa?” (Heberu 1:14) Ngokusobala, impendulo yalo mbuzo kaPawulu inguyebo.

Ngenxa yokwenqaba kwawo ukukhothamela isithombe segolide esasimiswe inkosi yaseBabiloni uNebukadinesari, amaHeberu amathathu, uShadiraki, uMeshaki no-Abedi-Nego aphonswa esithandweni somlilo esasenziwe sashisa kakhulu. Nokho, umlilo awuzange uzithinte lezo zinceku zikaNkulunkulu ezithembekile. Lapho inkosi ibheka esithandweni somlilo, yabona ‘amadoda amane,’ futhi yathi “ukubonakala kweyesine kunjengendodana yawonkulunkulu.” (Daniyeli 3:25) Eminyakeni ethile kamuva, uDaniyeli wazithola esemphandwini wezingonyama ngenxa yokwethembeka kwakhe. Naye waphuma engenamyocu futhi wathi: “UNkulunkulu uthumile ingelosi yakhe, wavimba imilomo yezingonyama.”—Daniyeli 6:22.

Lapho kumiswa ibandla labalandeli bakaKristu ekhulwini lokuqala C.E., izingelosi zaphinde zabonakala, zakhulula abaphostoli ejele. (IzEnzo 5:17-24; 12:6-12) Futhi lapho ukuphila kukaPawulu kusengozini olwandle, ingelosi yamqinisekisa ukuthi wayeyofika ephephile eRoma.—IzEnzo 27:13-24.

Izinceku zikaJehova uNkulunkulu zanamuhla ziqiniseka ngokuphelele ukuthi amabutho kaNkulunkulu ezingelosi angabonakali angokoqobo futhi ayakwazi ukuvikela, njengoba enza ku-Elisha nasencekwini yakhe. (2 AmaKhosi 6:15-17) Ngokuqinisekile, “ingelosi kaJehova iyamisa nxazonke kubo abamesabayo, ibakhulule.”—IHubo 34:7; 91:11.

Umyalezo Ophathwa Izingelosi

Nakuba izingelosi zikhathalela inhlalakahle yalabo abakhonza uJehova uNkulunkulu, zihilelekile nasekuqinisekiseni ukuthi abantu bafunda ngaye nangenjongo yakhe. Umphostoli uJohane wabhala: “Ngabona enye ingelosi indiza emkhathini, futhi yayinezindaba ezinhle ezimi phakade ukuba izimemezele njengezindaba ezithokozisayo kulabo abahlala emhlabeni, nakuzo zonke izizwe nezizwana nezilimi nabantu, ithi ngezwi elikhulu: ‘Mesabeni uNkulunkulu nimnike inkazimulo.’”—IsAmbulo 14:6, 7.

Ingabe ungathanda ukwazi lokho okuqukethwe yilezi “zindaba ezinhle”? Uma kunjalo, buza oFakazi BakaJehova. Bazokujabulela ukukutshela zona.

[Izithombe ekhasini 7]

Ingelosi emkhathini imemezela izindaba ezinhle ezimi phakade. Ingabe uyafuna ukwazi ngazo?