Ukuhamba NoNkulunkulu—Izinyathelo Zokuqala
“Sondelani kuNkulunkulu, naye uyosondela kini.”—JAKOBE 4:8.
1, 2. Ungathi kungani kuyilungelo elikhulu ukukhonza uJehova?
LE NDODA yayihlupheke iminyaka ejele. Ngemva kwalokho yabizwa ukuba izovela phambi kombusi wezwe. Izinto zenzeka ngokushesha. Singazelele, lesi siboshwa sazithola sikhonza umbusi owayenamandla kunabo bonke emhlabeni ngaleso sikhathi. Lona owayekade eyisiboshwa wabekwa esikhundleni aphathiswa okuningi kuso futhi waba nodumo olungavamile. UJosefa—indoda eyayikade iboshwe izinyawo ngamaketanga—wayesehamba nenkosi!—Genesise 41:14, 39-43; IHubo 105:17, 18.
2 Namuhla, abantu banethuba lokukhonza umuntu omkhulu kakhulu kunoFaro waseGibithe. OPhakeme Kunabo Bonke endaweni yonke usimema sonke ukuba simkhonze. Yeka ukuthi kuyilungelo elesabeka kangakanani ukwenza kanjalo nokuhlakulela ubuhlobo obuseduze noJehova, uNkulunkulu ongumninimandla onke! EmiBhalweni, uhlotshaniswa namandla amakhulu nobuhle kanye nokuthula nobumnandi. (Hezekeli 1:26-28; IsAmbulo 4:1-3) Uthando lubonakala kukho konke akwenzayo. (1 Johane 4:8) Akalokothi aqambe amanga. (Numeri 23:19) Futhi uJehova akabadumazi nanini labo abathembekile kuye. (IHubo 18:25) Ngokuvumelana nezimfuneko zakhe ezilungileyo, singaba nokuphila okujabulisayo nokunenjongo manje, sinombono wokuphila okumi phakade. (Johane 17:3) Akukho mbusi ongumuntu onikeza noma yini esondelayo nokusondela ezibusisweni namalungelo anjalo.
3. Kungayiphi indlela uNowa “ayehamba noNkulunkulu”?
3 Kudala, inzalamizi uNowa yanquma ukuphila ngokuvumelana nentando nenjongo kaNkulunkulu. Likhuluma ngayo, iBhayibheli lithi: “UNowa wayeyindoda eqotho, engenacala esizukulwaneni sakhe; uNowa wayehamba noNkulunkulu.” (Genesise 6:9) Yiqiniso, uNowa wayengahambi noJehova ngokoqobo, ngoba akekho ngisho nomuntu oye “wabona uNkulunkulu nganoma isiphi isikhathi.” (Johane 1:18) Kunalokho, uNowa wayehamba noNkulunkulu ngomqondo wokuthi wayenza lokho uNkulunkulu ayemtshela kona. Ngenxa yokuthi uNowa wanikela ukuphila kwakhe ekwenzeni intando kaJehova, wayejabulela ubuhlobo obufudumele nobuseduze noNkulunkulu onguMninimandla onke. NjengoNowa, izigidi namuhla ‘zihamba noNkulunkulu’ ngokuphila ngokuvumelana neseluleko nokufundisa kukaJehova. Umuntu uyiqala kanjani inkambo enjalo?
Ulwazi Olunembile Lubalulekile
4. UJehova ubafundisa kanjani abantu bakhe?
4 Ukuze sihambe noJehova, kumelwe siqale simazi. Umprofethi u-Isaya wabikezela: “Kuyakuthi ngezinsuku ezizayo intaba yendlu kaJehova iqiniswe esiqongweni sezintaba, iphakame kunamagquma, nezizwe zonke ziyakugobhozela khona. Abantu abaningi bayakuhamba, bathi: Wozani sikhuphukele entabeni kaJehova endlini kaNkulunkulu kaJakobe; uyakusifundisa izindlela zakhe, sihambe emikhondweni yakhe, ngokuba umthetho uyakuvela eSiyoni, nezwi likaJehova eJerusalema.” (Isaya 2:2, 3) Yebo, singaqiniseka ukuthi uJehova uyobafundisa bonke abafuna ukuhamba ezindleleni zakhe. UJehova uye walungiselela iZwi lakhe, iBhayibheli, futhi uyasisiza ukuba siliqonde. Enye indlela akwenza ngayo lokhu iwukusebenzisa “isigqila esikholekile nesiqondayo.” (Mathewu 24:45-47) UJehova usebenzisa “isigqila esikholekile” ukuze anikeze imfundo engokomoya ngezincwadi ezisekelwe eBhayibhelini, imihlangano yamaKristu nelungiselelo lesifundo seBhayibheli sasekhaya samahhala. UNkulunkulu usiza abantu bakhe nangomoya wakhe ongcwele ukuba baqonde iZwi lakhe.—1 Korinte 2:10-16.
5. Kungani iqiniso lemiBhalo liyigugu kangaka?
5 Nakuba singalikhipheli mali iqiniso leBhayibheli, liyigugu. Njengoba sitadisha iZwi likaNkulunkulu, sifunda ngoNkulunkulu uqobo—igama lakhe, ubuntu bakhe, injongo yakhe nendlela asebenzelana ngayo nabantu. Sithola nezimpendulo ezikhululayo zemibuzo ebalulekile yokuphila: Kungani silapha? Kungani uNkulunkulu evumela ukuhlupheka? Liphetheni ikusasa? Kungani siguga futhi sifa? Ingabe kukhona ukuphila ngemva kokufa? Ngaphezu kwalokhu, sifunda ukuthi iyini intando kaNkulunkulu ngathi, okuwukuthi, kufanele sihambe kanjani ukuze simjabulise ngokugcwele. Sifunda ukuthi izimfuneko zakhe zinokucabangela futhi zizuzisa ngendlela emangalisayo lapho siphila ngokuvumelana nazo. Ngaphandle kokufundiswa uNkulunkulu, besingasoze saziqonda izinto ezinjalo.
6. Iyiphi inkambo ulwazi olunembile lweBhayibheli olusenza sikwazi ukuyiphishekela?
6 Iqiniso leBhayibheli linamandla futhi lisishukumisela ukuba senze izinguquko ekuphileni kwethu. (Heberu 4:12) Ngaphambi kokungenisa ulwazi lwemiBhalo, esasikwazi kwakuwukuhamba “ngokwesimiso sezinto salelizwe” kuphela. (Efesu 2:2) Kodwa ulwazi olunembile lweZwi likaNkulunkulu lusibonisa indlela ehlukile ukuze ‘sihambe ngokufanele uJehova ngenjongo yokumjabulisa ngokugcwele.’ (Kolose 1:10) Yeka ukuthi kujabulisa kanjani lapho sithatha izinyathelo zokuqala zokuhamba noJehova, uMuntu omkhulu kunabo bonke endaweni yonke!—Luka 11:28.
Izinyathelo Ezimbili Ezibalulekile—Ukuzinikezela Nobhapathizo
7. Njengoba sitadisha iZwi likaNkulunkulu, yiliphi iqiniso eliba sobala mayelana nabaholi abangabantu?
7 Lapho sikhula ezingeni esiliqonda ngalo iBhayibheli, siqala ukuhlola izindaba zesintu nokuphila kwethu uqobo ngombono ongokomoya weZwi likaNkulunkulu. Kanjalo kuhlaluka iqiniso elibalulekile. Lelo qiniso lashiwo umprofethi uJeremiya kudala, owabhala: “Ngiyazi, Jehova, ukuthi indlela yomuntu ayikuye uqobo; akukuyo indoda ukuba ihambe, iqondise izinyathelo zayo.” (Jeremiya 10:23) Abantu—bonke kuhlanganise nathi—badinga isiqondiso sikaNkulunkulu.
8. (a) Yini eshukumisela abantu ukuba bazinikezele kuNkulunkulu? (b) Kuyini ukuzinikezela kwamaKristu?
8 Ukuqonda leli qiniso elibalulekile kusishukumisela ukuba sifune isiqondiso kuJehova. Futhi uthando ngoNkulunkulu lusishukumisela ukuba sinikezele ukuphila kwethu kuye. Ukuzinikezela kuNkulunkulu kusho ukuya kuye ngomthandazo sithembise ngobuqotho ukusebenzisa ukuphila kwethu ekumkhonzeni futhi sihambe ezindleleni zakhe ngokwethembeka. Ngokwenza lokhu, silandela isibonelo sikaJesu, owaziletha kuJehova ezimisele ngokungaguquki ukufeza intando yaphezulu.—Heberu 10:7.
9. Kungani abantu benikezela ukuphila kwabo kuJehova?
9 UJehova uNkulunkulu akalokothi acindezele noma aphoqe umuntu ukuba azinikezele kuye. (Qhathanisa neyesi-2 Korinte 9:7.) Ngaphezu kwalokho, uNkulunkulu akalindele muntu ukuba anikezele ukuphila kwakhe kuYe ngenxa nje yomuzwa othile odlulayo. Ngaphambi kokuba abhapathizwe, umuntu kumelwe abe esengumfundi kakade, futhi lokho kudinga umzamo oqotho wokungenisa ulwazi. (Mathewu 28:19, 20) UPawulu wanxusa labo abase bebhapathiziwe kakade ukuba ‘bethule imizimba yabo ingumhlatshelo ophilayo, ongcwele, owamukelekayo kuNkulunkulu, uyinkonzo engcwele ngamandla abo okucabanga.’ (Roma 12:1) Lapho sizinikezela kuJehova uNkulunkulu sisebenzisa amandla ethu okucabanga ngendlela efanayo. Ngemva kokwazi ukuthi yini ehilelekile nokucabangisisa ngale ndaba, sinikezela ukuphila kwethu kuNkulunkulu ngokuzithandela nangenjabulo.—IHubo 110:3.
10. Ukuzinikezela kuhlobene kanjani nobhapathizo?
10 Ngemva kokuthandaza kuNkulunkulu ngasese, simazisa ngokuzimisela kwethu ukuhamba ezindleleni zakhe, sithatha isinyathelo esilandelayo. Senza ukuzinikezela kwethu kwaziwe obala ngokuba sibhapathizwe emanzini. Lokhu kuwukuvuma obala ukuthi siye sathembisa ukwenza intando kaNkulunkulu. Lapho eqala inkonzo yakhe yasemhlabeni, uJesu wabhapathizwa uJohane, kanjalo esibekela isibonelo. (Mathewu 3:13-17) Kamuva, uJesu wathuma abalandeli bakhe ukuba bayokwenza abafundi bese bebabhapathiza. Ngakho-ke, ukuzinikezela nobhapathizo kuyizinyathelo ezibalulekile nganoma ubani ofisa ukuhamba noJehova.
11, 12. (a) Ubhapathizo lungafaniswa kanjani nomshado? (b) Yikuphi ukufana okungabonakala phakathi kobuhlobo bethu noJehova nobuhlobo bendoda nomkayo?
11 Ukuba umfundi kaJesu Kristu ozinikezele wabhapathizwa kuthi akufane nokushada. Emazweni amaningi, usuku lomshado lwandulelwa yizinyathelo eziningi. Indoda nowesifazane bayahlangana, bazane futhi bathandane. Babe sebethembisana umshado. Umshado ukwenza kubonakale obala lokho abakunqume ngasese—ukushada bese bephila ndawonye njengendoda nenkosikazi. Umshado yiwona owuphawu lwasobala lokuqala kwalobo buhlobo obukhethekile. Lolo suku luphawula ukuqala komshado. Ngokufanayo, ubhapathizo luphawula ukuqala kokuphila okuhlukaniselwe ukuhamba noJehova sizinikezele kuye.
12 Cabanga nangokunye ukufana. Ngemva kosuku lomshado, uthando phakathi kwendoda nomkayo kufanele lujule futhi luvuthwe. Ukuze basondelane nakakhulu, bobabili laba abashadile kumelwe bazame ngokungenabugovu ukulondoloza nokuqinisa umshado wabo. Nakuba singangeneli umshado noNkulunkulu, ngemva kokubhapathizwa kumelwe sisebenzele ukulondoloza ubuhlobo obuseduze noJehova. Uyayiqaphela futhi ayazise imizamo yethu yokwenza intando yakhe abese esondela kithi. Umfundi uJakobe wabhala: “Sondelani kuNkulunkulu, naye uyosondela kini.”—Jakobe 4:8.
Ukuhamba Ezinyathelweni ZikaJesu
13. Lapho sihamba noNkulunkulu, esikabani isibonelo okufanele sisilandele?
13 Ukuze sihambe noJehova, kumelwe senze ngokuvumelana nesibonelo esabekwa uJesu Kristu. Umphostoli uPetru wabhala: “Nabizelwa kulenkambo, ngoba ngisho noKristu wahlupheka ngenxa yenu, enishiyela isibonelo sokuba nilandele izinyathelo zakhe eduze.” (1 Petru 2:21) Njengoba uJesu ayephelele kuyilapho thina singaphelele, asinakusilandela isibonelo asibeka singenzi phutha. Noma kunjalo, uJehova ulindele ukuba senze konke esingakwenza. Ake sicabangele izici ezinhlanu zokuphila kukaJesu nenkonzo yakhe, okufanele amaKristu azinikezele azame ukuzilingisa.
14. Yini ehilelekile ekwazini iZwi likaNkulunkulu?
14 UJesu wayenolwazi olunembile nolunzulu lweZwi likaNkulunkulu. Phakathi nenkonzo yakhe, uJesu wayecaphuna kaningi emiBhalweni YesiHeberu. (Luka 4:4, 8) Yiqiniso, nabaholi benkolo ababi bangalezo zinsuku babecaphuna kuyo imiBhalo. (Mathewu 22:23, 24) Umehluko wawuwukuthi uJesu wayekuqonda okushiwo yimiBhalo, futhi wayeyisebenzisa ekuphileni kwakhe. Wayengazi nje kuphela okushiwo uMthetho kodwa wayazi nesisusa sako. Njengoba silandela isibonelo sikaKristu, nathi kufanele sizame ukuliqonda iZwi likaNkulunkulu, sithole umqondo walo, noma isisusa salokho elikushoyo. Ngokwenza kanjalo, singase sibe yizisebenzi ezamukelwe ngokwaphezulu ezikwazi ‘ukuphatha izwi leqiniso ngokufanele.’—2 Thimothewu 2:15.
15. UJesu wasibeka kanjani isibonelo mayelana nokukhuluma ngoNkulunkulu?
15 UKristu Jesu wakhuluma nabanye ngoYise wasezulwini. UJesu wayengalugodli ulwazi lweZwi likaNkulunkulu. Ngisho nezitha zakhe zazimbiza ngokuthi “Mfundisi,” ngoba yonke indawo lapho ayehamba khona wayekhuluma nabanye ngoJehova nangezinjongo zaKhe. (Mathewu 12:38) UJesu washumayela obala endaweni yethempeli, emasinagogeni, emizini nasemaphandleni. (Marku 1:39; Luka 8:1; Johane 18:20) Wayefundisa ngobubele nangomusa, ebabonisa uthando labo ayebasiza. (Mathewu 4:23) Labo abalandela isibonelo sikaJesu nabo bathola izindawo nezindlela eziningi zokufundisa abanye ngoJehova uNkulunkulu nangezinjongo zakhe ezimangalisayo.
16. UJesu wayenobuhlobo obuseduze kangakanani nabakhulekeli bakaJehova abakanye naye?
16 UJesu wayezizwa esondelene nabanye ababekhulekela uJehova. Ngenkathi uJesu esakhuluma nezixuku kwesinye isenzakalo, unina nabafowabo abangakholwa beza bezokhuluma naye. Ukulandisa kweBhayibheli kuthi: “Othile wathi kuye: ‘Bheka! Unyoko nabafowenu bemi ngaphandle, bafuna ukukhuluma nawe.’ Ephendula wathi kulowo owayemtshela: ‘Ungubani umama, futhi bangobani abafowethu?’ Futhi elulela isandla ngakubafundi bakhe, wathi: ‘Bhekani! Umama nabafowethu! Ngoba noma ubani owenza intando kaBaba osezulwini, nguye lowo ongumfowethu, nodadewethu, nomama.’” (Mathewu 12:47-50) Lokhu akusho ukuthi uJesu wawulahla umkhaya wakubo, ngoba izenzakalo zakamuva zifakazela ukuthi akenzanga kanjalo. (Johane 19:25-27) Nokho, lokhu kulandisa kugcizelela uthando uJesu ayenalo ngamakholwa ayekanye naye. Ngokufanayo nanamuhla, labo abahamba noNkulunkulu bafuna ukuba nobudlelwane nezinye izinceku zikaJehova futhi bazithande nakakhulu.—1 Petru 4:8.
17. UJesu wayezizwa kanjani ngokwenza intando kaYise wasezulwini, futhi lokho kufanele kusithinte kanjani?
17 Ngokwenza intando yaphezulu, uJesu wabonisa uthando ngoYise wasezulwini. UJesu walalela uJehova kukho konke. Wathi: “Ukudla kwami kuwukuba ngenze intando yalowo ongithumile nokuba ngiqede umsebenzi wakhe.” (Johane 4:34) UKristu wathi futhi: “Ngaso sonke isikhathi ngenza izinto ezimjabulisayo [uNkulunkulu].” (Johane 8:29) UJesu wayemthanda uYise wasezulwini kangangokuthi “wazithoba futhi walalela kwaze kwaba sekufeni, yebo, ekufeni esigxotsheni sokuhlushwa.” (Filipi 2:8) UJehova wabe esembusisa uJesu, wamnika isikhundla esiphakeme, sokuba negunya nodumo esingaphansi kwesikaJehova kuphela. (Filipi 2:9-11) NjengoJesu, sibonisa uthando lwethu ngoNkulunkulu ngokugcina imiyalo yakhe nangokwenza intando yakhe.—1 Johane 5:3.
18. Kungayiphi indlela uJesu abeka isibonelo endabeni yomthandazo?
18 UJesu wayeyindoda ethandazayo. Wathandaza lapho ebhapathizwa. (Luka 3:21) Ngaphambi kokukhetha abaphostoli bakhe abangu-12, wathandaza ubusuku bonke. (Luka 6:12, 13) UJesu wafundisa abafundi bakhe indlela yokuthandaza. (Luka 11:1-4) Ngobusuku bangaphambi kokufa kwakhe, wathandazela abafundi bakhe futhi wathandaza nabo. (Johane 17:1-26) Umthandazo wawuyingxenye ebalulekile yokuphila kukaJesu, njengoba kufanele ube njalo nakokwethu ukuphila, kwazise singabalandeli bakhe. Yeka ilungelo okuyilo ukukhuluma noMbusi Wendawo Yonke ngomthandazo! Ngaphezu kwalokho, uJehova uyayiphendula imithandazo, ngoba uJohane wabhala: “Yilokhu ukuqiniseka esinakho kuye, ukuthi, kungakhathaliseki ukuthi yini esiyicelayo ngokwentando yakhe, uyasizwa. Futhi, uma sazi ukuthi uyasizwa ngokuqondene nanoma yini esiyicelayo, siyazi ukuthi sizozithola lezizinto eziceliwe njengoba sizicele kuye.”—1 Johane 5:14, 15.
19. (a) Yiziphi izimfanelo zikaJesu okufanele sizilingise? (b) Sizuza ngaziphi izindlela ekutadisheni ukuphila nenkonzo kaJesu?
19 Kuningi kakhulu esingakufunda ngokuhlolisisa ukuphila nenkonzo kaJesu Kristu esemhlabeni! Cabanga ngezimfanelo ayezibonisa: uthando, ububele, umusa, amandla, ukulinganisela, ukucabangela, ukuthobeka, isibindi nokungabi nabugovu. Lapho sifunda okwengeziwe ngoJesu, isifiso sethu sokuba abalandeli bakhe abathembekile siyakhula. Futhi ulwazi ngoJesu lusisondeza kuJehova. Kakade, uJesu wambonakalisa ngokuphelele uYise wasezulwini. Wayesondelene kakhulu noJehova kangangokuthi wathi: “Lowo ongibonile mina umbonile noBaba futhi.”—Johane 14:9.
Thembela KuNkulunkulu Ukuthi Uyokusekela
20. Singakuzuza kanjani ukuqiniseka ekuhambeni noJehova?
20 Lapho izingane zisafunda ukuhamba, izinyathelo zazo zinokungaqiniseki. Zifunda kanjani ukuhamba ngokuqiniseka? Ngokuzijwayeza nangokukhuthazela. Labo abahamba noJehova bazama ukuthatha amagxathu okuqiniseka futhi angashintshashintshi. Nalokhu kudinga isikhathi nokukhuthazela. UPawulu waveza ukubaluleka kokukhuthazela ekuhambeni noNkulunkulu lapho ebhala: “Ekugcineni, bafowethu, siyanicela futhi siyanikhuthaza ngeNkosi uJesu, njengoba nje namukela isiyalezo esivela kithi mayelana nendlela okufanele nihambe ngayo futhi nijabulise uNkulunkulu, njengoba nje eqinisweni nihamba, ukuba niqhubeke nikwenza ngokugcwele ngokwengeziwe.”—1 Thesalonika 4:1.
21. Njengoba sihamba noJehova, yiziphi izibusiso esingazijabulela?
21 Uma sizinikele ngokugcwele kuNkulunkulu, uyosisiza ukuba siqhubeke sihamba naye. (Isaya 40:29-31) Akukho lutho olunganikezwa yileli lizwe olungaqhathaniswa nezibusiso azinika labo abahamba ezindleleni zakhe. ‘Usifundisa okusisizayo, asihole ngendlela esimelwe ukuhamba ngayo. Uma silalela imiyalo yakhe, khona ukuthula kwethu kuyakuba-njengomfula, nokulunga kwethu njengamaza olwandle.’ (Isaya 48:17, 18) Ngokwamukela isimemo sokuhamba noNkulunkulu, nangokwenza kanjalo ngokwethembeka, singajabulela ukuthula naye phakade.
Ungaphendula Kanjani?
◻ Kungani kuyilungelo ukuhamba noNkulunkulu weqiniso?
◻ Kungani ukutadisha, ukuzinikezela nobhapathizo kuyizinyathelo zokuqala ekuhambeni noJehova?
◻ Singalandela kanjani ezinyathelweni zikaJesu?
◻ Sazi kanjani ukuthi uJehova uyosisekela njengoba sihamba naye?
[Izithombe ekhasini 13]
Ukutadisha, ukuzinikezela nobhapathizo kuyizinyathelo zokuqala ekuhambeni noNkulunkulu