Litadisheni Njalo IZwi LikaNkulunkulu Njengomkhaya
“Umuntu akumelwe aphile ngesinkwa sodwa, kodwa ngawo wonke amazwi aphuma emlonyeni kaJehova.”—MATHEWU 4:4.
1. Lithini iBhayibheli ngomthwalo wemfanelo wezinhloko zemikhaya wokufundisa izingane izindlela zikaJehova?
UJEHOVA UNKULUNKULU wayezikhumbuza kaningi izinhloko zemikhaya ngomthwalo wazo wokufundisa izingane zazo. Lokhu kufundisa kwakuzohlomisela izingane ukuphila kwangaleso sikhathi futhi kuzilungiselele ukuphila okuzayo. Ingelosi eyayimelele uNkulunkulu yatshela u-Abrahama ngomthwalo wakhe wokufundisa abendlu yakhe ukuze ‘bagcine indlela kaJehova.’ (Genesise 18:19) Abazali abangama-Israyeli batshelwa ukuba bachazele izingane zabo ukuthi uNkulunkulu wayemkhulule kanjani u-Israyeli eGibithe futhi wamnika kanjani uMthetho wakhe eNtabeni yaseSinayi, eHorebe. (Eksodusi 13:8, 9; Duteronomi 4:9, 10; 11:18-21) Izinhloko zemikhaya ezingamaKristu ziyalwa ukuba zikhulise izingane zazo “ngesiyalo nangokuqondisa umqondo kukaJehova.” (Efesu 6:4) Ngisho noma kungumzali oyedwa kuphela okhonza uJehova, kufanele azame ukufundisa izingane izindlela zikaJehova.—2 Thimothewu 1:5; 3:14, 15.
2. Siyadingeka yini isifundo somkhaya uma kungekho zingane ekhaya? Chaza.
2 Lokhu akusho ukuthi yimikhaya enezingane kuphela okufanele ibe nesifundo somkhaya seZwi likaNkulunkulu. Lapho indoda nomfazi beba nesifundo somkhaya ngisho noma kungenazingane ekhaya, lokhu kubonisa ukwazisa izinto ezingokomoya, okuyinto enhle.—Efesu 5:25, 26.
3. Kungani kubalulekile ukuba isifundo somkhaya siqhutshwe njalo?
3 Ukuze kube nemiphumela emihle kakhulu, imfundo kudingeka inikezwe njalo, ngokuvumelana nesifundo uJehova asifundisa u-Israyeli ehlane: “Umuntu akaphili ngesinkwa sodwa; kepha ngakho konke okuphuma emlonyeni kaJehova, yikho umuntu aphila ngakho.” (Duteronomi 8:3) Eminye imikhaya ingase ihlele ukuba nesifundo njalo ngeviki; eminye ingase ibe nesifundo esifushane nsuku zonke, kuye ngokwezimo zomkhaya. Kungakhathaliseki ukuthi yiliphi ilungiselelo enilikhethayo, makungabi ukuthi siyoba khona uma kuvela ithuba. ‘Thengisisani isikhathi’ saso. Kunengqondo ukudela izinto okudingeka zidelwe ukuze kutholakale lesi sikhathi. Kuhileleke ukuphila kwamalungu omkhaya wakho.—Efesu 5:15-17; Filipi 3:16.
Imigomo Okufanele Icatshangelwe
4, 5. (a) Esebenzisa uMose, uJehova wababekela muphi umgomo abazali ekufundiseni izingane zabo? (b) Kuhilelani lokho namuhla?
4 Lapho niqhuba isifundo somkhaya, kuyoba nemiphumela emihle kakhulu uma ninemigomo ecacile engqondweni. Cabangani ngembalwa eningase nizibekele yona.
5 Esifundweni ngasinye, zamani ukwakha uthando ngoJehova uNkulunkulu. Lapho ama-Israyeli ayebuthene emathafeni akwaMowabi, ngaphambi kokuba angene eZweni Lesithembiso, uMose wawaqaphelisa lokho uJesu Kristu kamuva athi ‘kungumyalo omkhulu kunayo yonke eMthethweni.’ Wawuthini? “Wothanda uJehova uNkulunkulu wakho ngayo yonke inhliziyo yakho, nangawo wonke umphefumulo wakho, nangawo onke amandla akho.” (Mathewu 22:36, 37; Duteronomi 6:5) UMose wanxusa ama-Israyeli ukuba akugxilise ezinhliziyweni zawo lokhu futhi akufundise nezingane zawo. Lokho kwakuyodinga ukuba aphindaphinde, aqokomise izizathu zokuthanda uJehova, asingathe izimo zengqondo nokuziphatha okwakungathikameza ukuboniswa kwalolo thando, futhi abonise ukuthi ayamthanda uJehova ekuphileni kwawo uqobo. Ingabe nezethu izingane zidinga ukufundiswa ngendlela efanayo? Yebo! Nazo zidinga ukusizwa ukuze ‘zisoke izinhliziyo zazo,’ okungukuthi, zisuse noma yini engase ithiye uthando lwazo ngoNkulunkulu. (Duteronomi 10:12, 16; Jeremiya 4:4) Ezinye zalezo zithiyo kungase kube ukufisa izinto zezwe namathuba okungena shí ezintweni elizenzayo. (1 Johane 2:15, 16) Uthando ngoJehova kumelwe lusishukumisele ezenzweni, lubonakale, lusenze senze izinto ezimjabulisayo uBaba wethu osezulwini. (1 Johane 5:3) Ukuze isifundo senu somkhaya sizuzise ngokuqhubekayo nasesikhathini esizayo, kufanele njalo siqhutshwe ngendlela eluqinisayo lolu thando.
6. (a) Yini edingekayo ukuze umuntu anikeze ulwazi olunembile? (b) ImiBhalo ikugcizelela kanjani ukubaluleka kolwazi olunembile?
6 Nikezani ulwazi olunembile lwezimfuneko zikaNkulunkulu. Kuhilelani lokho? Kuhilela okungaphezu kokukwazi ukufunda impendulo kumagazini noma incwadi. Ngokuvamile kudingeka kuxoxwe ukuze kuqinisekwe ukuthi amazwi ayisihluthulelo nemiqondo eyinhloko kuqondakala ngokucacile. Ulwazi olunembile luyisici esibalulekile ekugqokeni ubuntu obusha, ekwenzeni izinto ezibaluleke ngempela zihlale zicacile lapho umuntu esingatha izinkinga ekuphileni, kanjalo, enze lokho okumjabulisa ngempela uNkulunkulu.—Filipi 1:9-11; Kolose 1:9, 10; 3:10.
7. (a) Yimiphi imibuzo engasetshenziselwa ukusiza umkhaya ukuba ubonise indlela lokho okufundwayo okusebenza ngayo? (b) ImiBhalo ikugcizelela kanjani ukubaluleka komgomo onjalo?
7 Sizani ngokubonisa ukuthi okufundwayo kusebenza kanjani esimweni esingokoqobo. Njengoba ninalo mgomo, esifundweni somkhaya ngasinye buzani: ‘Lokhu kwaziswa kufanele kukuthinte kanjani ukuphila kwethu? Ingabe kufuna senze ushintsho oluthile kulokho esikwenzayo manje? Kungani kufanele sifune ukulungisa?’ (IzAga 2:10-15; 9:10; Isaya 48:17, 18) Ukugxila ngokwanele endleleni eningazisebenzisa ngayo izinto enizifundayo kungaba yisici esibalulekile ekukhuleni kwamalungu omkhaya ngokomoya.
Wasebenziseni Ngokuhlakanipha Amathuluzi Okufundisa
8. Yimaphi amathuluzi okutadisha iBhayibheli alungiselelwe yisigaba sesigqila?
8 “Isigqila esikholekile nesiqondayo” siye salungiselela inqwaba yamathuluzi angasetshenziselwa ukutadisha. Umagazini INqabayokulinda, osetshenziswa kanye neBhayibheli, utholakala ngezilimi ezingu-131. Kunezincwadi zokutadisha iBhayibheli ngezilimi ezingu-153, izincwajana ngezilimi ezingu-284, amakhasethi alalelwayo ngezingu-61, awe-video ngezingu-41, ngisho nohlelo lwe-computer lokucwaninga iBhayibheli ngezilimi ezingu-9!—Mathewu 24:45-47.
9. Singasisebenzisa kanjani iseluleko esisemibhalweni ekhonjwe kulesi sigaba lapho sinesifundo se-Nqabayokulinda somkhaya?
9 Amakhaya amaningi asebenzisa isikhathi sesifundo somkhaya ukuze alungiselele iSifundo Se-Nqabayokulinda sebandla. Yeka indlela okungazuzisa ngayo lokho! INqabayokulinda iqukethe ukudla okungokomoya okuyinhloko okwenzelwe ukwakha abantu bakaJehova emhlabeni wonke. Lapho nitadisha INqabayokulinda njengomkhaya, yenzani okungaphezu kokufunda izigaba bese niphendula imibuzo ekulo magazini. Zamani ngobuqotho ukuqonda. Zinikeni isikhathi sokubheka imibhalo ekhonjiwe kodwa engacashuniwe. Vumelani amalungu omkhaya asho indlela leyo mibhalo ehlobene ngayo nalokho okushiwo esigabeni esifundwayo. Enikwenzayo makufinyelele inhliziyo.—IzAga 4:7, 23; IzEnzo 17:11.
10. Yini engenziwa ukuze kwenziwe izingane zihileleke esifundweni futhi zisijabulele?
10 Uma kunezingane ekhaya lenu, yini eningayenza ukuze nenze isifundo senu singabi yisiko nje lomkhaya kodwa sibe yisikhathi esakhayo, esithakazelisayo nesijabulisayo? Zamani ukwenza ngayinye ihlale ihilelekile kokwenzekayo ukuze igxilise ukunaka kwayo ekwazisweni okufundwayo. Lapho kungenzeka khona, hlelani ukuba ingane ngayinye ibe neBhayibheli nomagazini wayo ofundwayo. Umzali angase alingise imfudumalo eyaboniswa nguJesu ngokuhlalisa ingane encane eduze kwakhe, mhlawumbe ayigaxe. (Qhathanisa noMarku 10:13-16.) Inhloko yomkhaya ingase ithi ingane encane mayichaze okwenzeka esithombeni esihambisana nalokho okufundwayo. Omncane angase abelwe kusengaphambili ukufunda umbhalo othile. Osekhulakhulile angase abelwe ukuba asho lapho kudingeka kuboniswe indlela lokho okufundwayo okungase kusetshenziswe ngayo ngokoqobo.
11. Yimaphi amanye amathuluzi aye alungiselelwa, futhi uma etholakala, angasetshenziswa kanjani ngendlela ezuzisayo esifundweni somkhaya?
11 Nakuba kungase kwenzeke ukuthi nisebenzisa INqabayokulinda njengesisekelo sengxoxo yenu, ningawakhohlwa amanye amathuluzi okutadisha atholakala ngezilimi eziningi. Uma kudingeka ukwaziswa okuyisizinda sendaba noma incazelo yamazwi aseBhayibhelini, i-Insight on the Scriptures ingase isize. Eminye imibuzo ingase iphenduleke ngokuhlola i-Watch Tower Publications Index noma ngokusebenzisa uhlelo lwe-computer lokucwaninga olwenziwe yiNhlangano. Uma etholakala la mathuluzi ngolimi lwenu, ukufunda ukuwasebenzisa kungaba yingxenye ebalulekile yesifundo somkhaya. Ukuze nishukumise isithakazelo sezingane zenu, ningase futhi nisebenzise esinye sesikhathi sesifundo senu ukuze nibukele ingxenye yenye yama-video eNhlangano afundisayo noma nilalele ingxenye yedrama esekhasethini bese nixoxa ngayo. Ukuwasebenzisa kahle la mathuluzi okutadisha kungasiza ekwenzeni isifundo senu somkhaya sithakazelise futhi sizuzise kuwo wonke umkhaya.
Vumelanani Nezidingo Zomkhaya Wenu
12. Isifundo somkhaya singaba kanjani nendima ekubhekaneni nezidingo zomkhaya eziphuthumayo?
12 Kungenzeka ukuthi umkhaya wenu uvame ukutadisha INqabayokulinda yangalelo sonto. Kodwa hlalani niqaphele ukuthi kwenzekani emkhayeni. Uma umama engasebenzi, angase akwazi ukuba kanye nezingane nsuku zonke lapho zibuya esikoleni. Ezinye izimo zingase zisingathwe ngaleso sikhathi; ezinye zingase zidinge ukubuye zihlolisiswe. Lapho kunezidingo zomkhaya eziphuthumayo, ningazishalazeli. (IzAga 27:12) Lezo zidingo zingase zingabi yizinkinga zasesikoleni kuphela, kodwa kungaba futhi ezinye izimo. Khethani ukwaziswa okufanelekayo, nazise umkhaya kusengaphambili ukuthi kuzofundwa ngani.
13. Kungazuzisa kanjani ukuxoxa njengomkhaya ngokuthi ningabhekana kanjani nobumpofu?
13 Ngokwesibonelo, amazwe amaningi emhlabeni akhungethwe ubumpofu; ngakho ezindaweni eziningi, kungase kudingeke ukuba kuxoxwe ngokuthi kungabhekwana kanjani nabo. Ingabe isifundo somkhaya esigxile ezimweni ezingokoqobo nasezimisweni zeBhayibheli singawuzuzisa umkhaya wakho?—IzAga 21:5; UmShumayeli 9:11; Heberu 13:5, 6, 18.
14. Yiziphi izimo ezingase zenze kufaneleke ukuba umkhaya uxoxe ngombono kaJehova ngobudlova, impi nokungathathi hlangothi kwamaKristu?
14 Enye indaba okudingeka kuxoxwe ngayo ubudlova. Umbono kaJehova kudingeka ugxile ngokuqinile ezingqondweni nasezinhliziyweni zethu sonke. (Genesise 6:13; IHubo 11:5) Ukufunda ngale ndaba njengomkhaya kunganikeza ithuba lokuxoxa ngendlela yokubhekana neziqhwaga esikoleni, ukuthi kulungile yini ukufunda ubuciko bokulwa, nendlela yokukhetha ukuzilibazisa okufanele. Izimpi ezinobudlova ziye zanda; cishe wonke amazwe agcwele izimpi zemibango, noma izimpi zezombangazwe noma zobuhlanga, noma ezamaqembu ezigilamkhuba. Ngenxa yalokho, umkhaya wakho ungase udinge ukuba nixoxe ngokulondoloza ukuziphatha kobuKristu phakathi kwamaqembu alwayo.—Isaya 2:2-4; Johane 17:16.
15. Kufanelwe zifundiswe kanjani izingane ngobulili nomshado?
15 Njengoba izingane zikhula, zidinga ukufundiswa ngobulili nomshado, kuye ngobudala bazo. Kwamanye amasiko iningi labazali alilokothi lixoxe ngobulili nezingane zabo. Izingane ezingenalwazi zingase zithole imibono esontekile kwenye intsha, futhi imiphumela ingaba yinhlekelele. Ngeke yini kube ngcono ukulingisa uJehova, onikeza iseluleko esingagwegwesi kodwa esinambithekayo ngale ndaba eBhayibhelini? Iseluleko esifuze esikaNkulunkulu siyosiza izingane zethu ukuba zilondoloze ukuzihlonipha futhi zibaphathe ngenhlonipho abobulili obuhlukile. (IzAga 5:18-20; Kolose 3:5; 1 Thesalonika 4:3-8) Ngisho noma senike naxoxa ngalezi zinto, ningangabazi ukuphinda nixoxe ngazo. Lapho kuvela izimo ezintsha, ukuphindaphinda kuba okubalulekile.
16. (a) Siqhutshwa nini isifundo somkhaya emakhaya ahlukahlukene? (b) Niye nazisingatha kanjani izithiyo ukuze nibe nesifundo somkhaya sasikhathi sonke?
16 Singaqhutshwa nini isifundo somkhaya? Imikhaya eminingi ilingisa imikhaya yaseBethel emhlabeni wonke ngokuqhuba isifundo sayo somkhaya ngoMsombuluko kusihlwa. Eminye yenza ngokuhlukile. E-Argentina umkhaya onamalungu angu-11, kuhlanganise nezingane ezingu-9, wawuvuka njalo ekuseni ngo-5 ukuze uqhube isifundo sawo somkhaya. Ngenxa yokuthi amalungu awo ayenezikhathi ezingafani zomsebenzi, asikho esinye isikhathi esasingalunga. Kwakungelula, kodwa kwagxilisa ezingqondweni nasezinhliziyweni zezingane ukuthi isifundo somkhaya sibaluleke kangakanani. EPhilippines umdala wayesiqhuba njalo isifundo somkhaya nomkakhe nezingane zabo ezintathu lapho zisakhula. Phakathi nesonto abazali babeqhubela ingane ngayinye isifundo sayo ukuze ngayinye yenze iqiniso libe ngelayo. E-United States, udade onomyeni ongeyena uFakazi uhamba nezingane zakhe njalo ekuseni beya ebhasini lesikole. Lapho besalinde ibhasi, basebenzisa imizuzu engaba yishumi befunda futhi bexoxa ngokwaziswa okungokomBhalo okufanelekayo, bese umama enza umthandazo omfushane ngaphambi kokuba izingane zigibele ibhasi. EDemocratic Republic of Congo, owesifazane onomyeni ongakholwa nowashiya umkhaya kudingeka azikhandle ukuze aqhube isifundo ngenxa yemfundo yakhe engatheni. Indodana yakhe esikhulile iyasiza ngokuvakashela ekhaya masonto onke ukuze ihole esifundweni esihlanganisa unina nabafowabo abancane. Umama ubeka isibonelo esihle ngokulungiselela ngenkuthalo. Ingabe kukhona isimo esithile esenza ukuqhuba isifundo somkhaya njalo kube nzima emkhayeni wenu? Ningapheli amandla. Funani isibusiso sikaJehova ngobuqotho emizamweni yenu yokuba nesifundo seBhayibheli esiqhutshwa njalo.—Marku 11:23, 24.
Imivuzo Yokukhuthazela
17. (a) Yini edingekayo ukuze nibe nesifundo somkhaya sasikhathi sonke? (b) Yisiphi isenzakalo esibonisa ukuthi kubalulekile ukufundisa umkhaya njalo izindlela zikaJehova?
17 Ukuhlela kuyadingeka. Nokukhuthazela kuyadingeka. Kodwa izinzuzo ezilethwa ukuba nesifundo somkhaya sasikhathi sonke ziwufanele umzamo. (IzAga 22:6; 3 Johane 4) UFranz noHilda, baseJalimane, bakhulisa umkhaya onezingane ezingu-11. Ngemva kweminyaka, indodakazi yabo uMagdalena yathi: “Engicabanga ukuthi yikona okubaluleke kakhulu namuhla ukuthi kwakungabi nanolulodwa usuku olwaluphela singatholanga mfundo ethile engokomoya.” Lapho umoya wobuzwe udlanga ngenkathi kuphethe u-Adolf Hitler, uyise kaMagdalena wayesebenzisa iBhayibheli ukuze alungiselele umkhaya wakhe ukuvivinywa ayekubona kuza. Ngokuhamba kwesikhathi, amalungu asemancane omkhaya athathwa ayiswa esikoleni sokuqondisa izigwegwe; abanye emkhayeni baboshwa bavalelwa emajele nasemakamu okuhlushwa. Abanye babulawa. Bonke babelokhu benokholo oluqinile—hhayi nje ngaleso sikhathi soshushiso olunzima kuphela, kodwa futhi naseminyakeni eyalandela, kulabo abasinda.
18. Imizamo yabazali abangabodwa iye yavuzwa kanjani?
18 Abazali abaningi abangabodwa, kanye nalabo abashade nabantu abangekho enkolweni yabo, nabo baye bakwazi ukufundisa izingane zabo iBhayibheli njalo. Umama ongashadile, ongumfelokazi, eNdiya wayesebenza kanzima ukuze agxilise uthando ngoJehova ezinganeni zakhe ezimbili. Nokho, wezwa ubuhlungu obukhulu lapho indodana yakhe iyeka ukuhlanganyela nabantu bakaJehova. Wanxusa uJehova ukuba amthethelele nganoma yikuphi ukushiyeka ayebe nakho ekuqeqesheni indodana yakhe. Kodwa indodana yakhe yayingakukhohliwe ngempela lokho eyayikufundile. Ngemva kweminyaka engaphezu kweyishumi, yabuya, yathuthuka kahle ngokomoya, futhi yaba umdala webandla. Manje yona nomkayo bakhonza njengezikhonzi zesikhathi esigcwele ezingamaphayona. Yeka indlela ababonga ngayo abazali abaye basilalela iseluleko sikaJehova nenhlangano yakhe sokufundisa umkhaya iBhayibheli njalo! Ingabe nina niyasisebenzisa leso seluleko emkhayeni wenu?
Ungachaza?
◻ Kungani sibalulekile isifundo somkhaya sasikhathi sonke?
◻ Kufanele ibe yini imigomo yethu esifundweni ngasinye somkhaya?
◻ Yimaphi amathuluzi okufundisa esiye salungiselelwa wona?
◻ Isifundo somkhaya singenziwa kanjani ukuba sihambisane nezidingo zomkhaya?
[Isithombe ekhasini 15]
Ukuba nemigomo ecacile kuyosithuthukisa isifundo somkhaya