Yenza Ukuphila Kwakho Kuphumelele!
“Ubusisiwe umuntu ongahambi ngeziluleko zababi . . . Konke akwenzayo [“kuyophumelela,” NW].”—IHUBO 1:1, 3.
1. (a) Intsha eningi ezweni iyibheka kanjani impumelelo? (b) IBhayibheli limchaza kanjani umuntu ophumelelayo?
IMPUMELELO—lisho ukuthini kuwena lelo gama? “Umgomo wami obaluleke kunayo yonke ukuba ngiphumelele kwezebhizinisi,” kusho insizwa ethile. Intokazi ethile yathi: “Isifiso sami esikhulu ukuba nomkhaya ojabulayo.” Kodwa enye ithi: “Esami isifiso esokuba nendlu enhle, imoto kanokusho . . . Ngifuna ukuba nezinto ezithi mina.” Inkinga iwukuthi imali, umkhaya, ngisho nomsebenzi onemali akuzona izinto zokuthola impumelelo yangempela. KumaHubo 1:1-3, siyafunda: “Ubusisiwe umuntu ongahambi ngeziluleko zababi, ongemi endleleni yezoni . . . okuthokoza kwakhe kusemthethweni kaJehova . . . Konke akwenzayo [“kuyophumelela,” NW].”
2. Itholakalaphi impumelelo yangempela, futhi iyiphi okuwukuphela kwendlela yokuyithola?
2 IBhayibheli lapha lithembisa into okungekho muntu ongayinikeza—impumelelo yangempela! Kodwa alikhulumi ngokuzuza imali. IBhayibheli ngokwalo liyaxwayisa: “Uthando lwemali luyimpande yazo zonke izinhlobo zezinto ezilimazayo.” (1 Thimothewu 6:10) Impumelelo yangempela itholakala ngokujabulisa uNkulunkulu—kuhlanganise nokulalela umthetho kaJehova. Yilokhu kuphela okungaletha ukwaneliseka kweqiniso nempumelelo yangempela! Mhlawumbe umqondo wokuba ngaphansi komthetho kaJehova nokutshelwa okumelwe ukwenze awuthandeki kahle. Kodwa uJesu wathi: “Bayajabula abaqaphela isidingo sabo esingokomoya.” (Mathewu 5:3) Kungakhathaliseki ukuthi uyaqaphela yini noma cha, wadalwa unezidingo ezingokomoya—kuhlanganise nesidingo esijulile sokwazi uNkulunkulu nokuqonda izinjongo zakhe. Khona-ke, injabulo yeqiniso ungayithola kuphela uma uzanelisa lezo zidingo futhi ulalela ‘umthetho kaJehova.’
Okwenza Sidinge Imithetho KaNkulunkulu
3. Kungani kufanele sikujabulele ukuvumela uJehova ‘aqondise izinyathelo zethu’?
3 Umprofethi uJeremiya wabhala: “Ngiyazi, Jehova, ukuthi indlela yomuntu ayikuye uqobo; akukuyo indoda ukuba ihambe, iqondise izinyathelo zayo.” (Jeremiya 10:23) Kunjalo ngabo bonke abantu, abancane nabadala. Akukhona nje ukuthi sintula ukuhlakanipha, okuhlangenwe nakho nolwazi lokuqondisa izinyathelo zethu; simane nje asinalo ilungelo lokwenza kanjalo. KusAmbulo 4:11, iBhayibheli lithi: “Uyakufanelekela, Jehova, yebo Nkulunkulu wethu, ukwamukela inkazimulo nodumo namandla, ngoba wadala zonke izinto, nangenxa yentando yakho zaba khona futhi zadalwa.” NjengoMdali wethu, uJehova ‘ungumthombo wokuphila.’ (IHubo 36:9) Ngenxa yalokho, wazi kangcono ngaphezu kwanoma ubani ukuthi kufanele sikusebenzise kanjani ukuphila kwethu. Ngakho wenza imithetho ukuze asisize sizizuzise, hhayi ngenjongo yokusephuca injabulo. (Isaya 48:17) Wushaye indiva nje umthetho kaNkulunkulu, uzoba isehluleki.
4. Kungani intsha eningi kangaka yona ukuphila kwayo?
4 Ngokwesibonelo, wake wazibuza ukuthi kungani intsha eningi kangaka yona ukuphila kwayo ngezidakamizwa, ukuziphatha okuxekethile neminye imikhuba emibi? IHubo 36:1, 2 liyachaza: “Inkulumo yesiphambeko komubi, isekujuleni kwenhliziyo yami, ithi: Akukho ukumesaba uNkulunkulu phambi kwamehlo akhe. Ngokuba ukonakala kwakhe kuyamthopha emehlweni akhe, ukuze kungafunyanwa, azondeke ngakho.” Ngenxa yokuthi intula “ukumesaba uNkulunkulu” okunempilo, intsha eningi izikhohlisa ngokukholelwa ukuthi ukuziphatha kwayo okuyingozi ngeke kube nemiphumela. Kodwa ekugcineni, kuye kudingeke ibhekane nalesi simiso esingashintshi: “Noma yini umuntu ayihlwanyelayo, uyovuna yona futhi; ngoba lowo ohlwanyela enombono wenyama yakhe uyovuna ukonakala enyameni yakhe, kodwa lowo ohlwanyela enombono womoya uyovuna ukuphila okumi phakade okuvela emoyeni.”—Galathiya 6:7, 8.
“Ukubala Izinsuku”
5, 6. (a) Kungani intsha kufanele ‘ibale izinsuku zayo,’ futhi kusho ukuthini ukwenza kanjalo? (b) Kusho ukuthini ‘ukukhumbula uMdali wethu’?
5 Ungakwenza kanjani ukuphila kwakho kuphumelele futhi ‘uvune ukuphila okumi phakade’? UMose wabhala: “Izinsuku zeminyaka yethu zineminyaka engamashumi ayisikhombisa; kuthi uma ziziningi, zineminyaka engamashumi ayisishiyagalombili . . . zidlula masinyane, thina siyandiza, simuke.” (IHubo 90:10) Kuyaqabukela ucabange ngokufa, uma kuke kwenzeke. Eqinisweni, intsha eningi yenza sengathi ayinakubhubhiseka. Kodwa uMose usenza siqaphele iqiniso elibuhlungu lokuthi ukuphila kufushane. Asikho nesiqinisekiso sokuthi siyophila size sibe neminyaka engu-70 noma engu-80. ‘Isikhathi nethuba’ kungabhubhisa ngisho nabancane abayimiqemane. (UmShumayeli 9:11) Uzokusebenzisa kanjani-ke lokhu kuphila okuyigugu onakho? UMose wathandaza: “Sifundise, Nkosi, ukubala izinsuku zethu, sizuze inhliziyo enokuhlakanipha.”—IHubo 90:12.
6 Kusho ukuthini ukubala izinsuku zakho? Akusho ukuthi kufanele ukhathazeke ngokweqile ngokuthi ungaphila isikhathi eside kangakanani. UMose wayethandazela ukuba uJehova afundise abantu baKhe ukuthi bangazisebenzisa kanjani izinsuku zabo ezisele ngendlela eletha udumo kuYe. Ingabe wena uyazibala izinsuku zokuphila kwakho—usuku ngalunye ulubheke njengento eyigugu okumelwe isetshenziselwe ukuyisa udumo kuNkulunkulu? IBhayibheli linikeza intsha lesi sikhuthazo: “Khipha usizi enhliziyweni yakho, udlulise okubi emzimbeni wakho, ngokuba ubusha nobunsizwa buyize. Futhi khumbula uMdali wakho emihleni yobusha bakho.” (UmShumayeli 11:10–12:1) Ukukhumbula uMdali wethu kusho okungaphezu kokumane singakhohlwa ukuthi ukhona. Lapho iselelesi sinxusa uJesu, “Ngikhumbule lapho ungena embusweni wakho,” sasifuna uJesu enze okungaphezu kokukhumbula igama laso. Sasifuna ukuba uJesu enze isenzo esithile, asivuse! (Luka 23:42; qhathanisa noGenesise 40:14, 23; Jobe 14:13.) Ngendlela efanayo, ukukhumbula uJehova kuhilela isenzo, ukwenza lokho okumthokozisayo. Kungashiwo yini ukuthi wena uyamkhumbula uJehova?
Gwema Ukuba Nomhawu Ngabenzi Bokubi
7. Kungani enye intsha imkhohlwa ngamabomu uMdali wayo? Nikeza isibonelo.
7 Intsha eningi imkhohlwa ngamabomu uJehova ngoba inomuzwa wokuthi ukuba uFakazi kunemingcele eminingi kakhulu. Umzalwane waseSpain ukhumbula indlela ayezizwa ngayo esemusha: “Izwe langikhanga ngoba iqiniso lalibonakala linzima futhi linesicefe. Kwakusho ukuhlala phansi, ukutadisha, ukuya emihlanganweni, ukufaka uthayi, futhi ngangingakujabuleli ukwenza lezo zinto.” Ingabe ngezinye izikhathi uye ube nomuzwa wokuthi kukhona okukuphuthelayo njengoba ukhonza uNkulunkulu? Mhlawumbe uzomangala ukwazi ukuthi omunye wabalobi beBhayibheli waba nemizwa enjalo. Siza uvule iBhayibheli lakho ufunde iHubo 73.
8. Kungani u-Asafa ‘ayenomhawu ngabazidlayo’?
8 Ake silihlolisise ngokuningiliziwe leli hubo. Amavesi no-3 athi: “Kepha mina, izinyawo zami zicishe zakhubeka; kwaba kancane ukuba izinyathelo zami zishelele. Ngokuba ngaba nomhawu ngabazidlayo, lapho ngibona ukubusa kwababi.” Leli hubo, ngokombhalo ongenhla kulo, labhalwa u-Asafa. Wayengumhlabeleli ongumLevi futhi ephila ngasikhathi sinye neNkosi uDavide. (1 IziKronike 25:1, 2; 2 IziKronike 29:30) Nakuba ayenelungelo elihle lokukhonza ethempelini likaNkulunkulu, ‘waba nomhawu’ ngabantu ababezishaya isifuba ngokungabi namthetho kwabo. Izinto zazibonakala zibahambela kahle; kubonakala sengathi babejabulela ukuthula nokulondeka. Eqinisweni, impumelelo ababebonakala benayo ‘yayidlulele ngalé kwemicabango yezinhliziyo zabo.’ (Amavesi 5 no-7, qhathanisa ne-NW.) Babekhuluma ngezenzo ezimbi “ngendlela ephakeme,” okusho ukuthi ngokuqhosha. (Ivesi 8, NW) ‘Umlomo wabo babewuphakamisela ezulwini; ulimi lwabo luhambela emhlabeni,’ bebonisa ukungagqizi qakala noma ubani—osezulwini noma emhlabeni.—Ivesi 9.
9. Kungenzeka kanjani ukuba intsha ethile engamaKristu namuhla izizwe njengo-Asafa?
9 Mhlawumbe kungashiwo okufanayo nangontanga yakho esikoleni. Ungase ubezwe beziqhayisa bengenamahloni ngokuganga abakwenzayo ngokobulili, amaphathi abo angalawuleki nangokuzitika kwabo ngotshwala nezidakamizwa. Uma uqhathanisa ukuphila kwabo okuthiwa okwentokozo nendlela eyingcingo okumelwe uhambe ngayo njengomKristu, ngezinye izikhathi ungase uzizwe ‘unomhawu ngabazidlayo.’ (Mathewu 7:13, 14) U-Asafa ngokwakhe wafinyelela lapho athi khona: “Impela ngiyihlanzele ize inhliziyo yami, ngahlamba izandla zami ngingenacala, ngokuba ngahlushwa usuku lonke.” (Amavesi 13, 14) Yebo, waqala ukungabaza ukubaluleka kokukhonza uNkulunkulu nokuphila ukuphila okuqotho.
10, 11. (a) Yini eyenza u-Asafa washintsha isimo sakhe sengqondo? (b) Kukanjani abenzi bokubi ‘besendaweni ebushelezi’? Nikeza isibonelo.
10 Ngenhlanhla, u-Asafa akahlalanga isikhathi eside ekulesi simo sokuphelelwa yithemba. Washeshe waqaphela ukuthi lokhu kuthula ababebonakala benakho ababi kwakungekhona okwangempela kodwa kwakuwukuzikhohlisa—futhi okuthatha isikhashana! Wathi: “Impela ubabeka ezindaweni ezibushelezi; ubawisa babe yincithakalo. Maye, bachithwa ngokuphazima kweso! Bashona, babhubha benovalo.” (Amavesi 18, 19) Cishe ontanga yenu abaningi nabo ‘basezindaweni ezibushelezi.’ Kungakabiphi, bazowukhomba umuzi onotshwala ngokuziphatha kwabo kokungamhloniphi uNkulunkulu, okungase kuphumele ekukhulelweni okungafunwa, esifweni esithathelwana ngobulili, ngisho nasekugqunyweni ejele noma ekufeni! Okubi nakakhulu, bayahlukana noNkulunkulu.—Jakobe 4:4.
11 UFakazi osemusha waseSpain wazibonela ngawakhe leli qiniso. Esemusha, wayephila ukuphila okumbaxambili, engamathe nolimi neqembu lentsha engenaNkulunkulu. Kungakapheli sikhathi, waqoma omunye wayo—umlutha wezidakamizwa. Nakuba yena ayengazisebenzisi izidakamizwa, wayewuthengela lo mlutha izidakamizwa. “Ngangimsiza ngisho ezijova ngenaliti,” evuma. Ngenhlanhla, lo dade wasanguluka futhi wabuyiselwa empilweni engokomoya. Kodwa yeka indlela ashaqeka ngayo lapho ngemva kwesikhathi ezwa ukuthi isoka lakhe elalidla izidakamizwa lalibulawe ingculaza. Yebo, njengoba nje umhubi asho, abantu abangenaNkulunkulu ‘basezindaweni ezibushelezi.’ Abanye bangase bafe ngokuzumayo ngenxa yendlela yabo yokuphila exekethile. Kanti abanye, ngaphandle kokuba bashintshe izindlela zabo, esikhathini esiseduze esizayo bayobhekana ‘nokwambulwa kweNkosi uJesu ivela ezulwini ikanye nezingelosi zayo ezinamandla emlilweni ovutha amalangabi, njengoba iletha impindiselo phezu kwalabo abangamazi uNkulunkulu nakulabo abangazilaleli izindaba ezinhle ezimayelana neNkosi yethu uJesu.’—2 Thesalonika 1:7, 8.
12. Kwenzeka kanjani ukuba osemusha waseJapane abone ubuwula bokuba nomhawu ngabenzi bokubi?
12 Khona-ke, yeka indlela okuwubuwula ngayo ukuba nomhawu ‘ngalabo abangamazi uNkulunkulu’! Ngempela, yilabo abamaziyo uJehova nabanethemba lokuphila phakade okufanele sibe nomhawu ngabo. Umzalwane osemusha eJapane wakuqaphela lokho. Esemusha, naye “wayefuna inkululeko enkudlwana.” Uyachaza: “Ngangicabanga ukuthi kukhona okungiphuthelayo. Ngabe sengiyaqaphela ukuthi ukuphila kwami kungaba yini ngaphandle kweqiniso. Ngangizibona ngiphila iminyaka engu-70 noma engu-80 bese ngifa. Kodwa uJehova usinika ithemba lokuphila okumi phakade! Ukuqaphela lokhu kwangisiza ngakwazisa enganginakho.” Noma kunjalo, akulula ukuhlala uthembekile ube uzungezwe abantu abangayilandeli imithetho kaNkulunkulu. Yiziphi ezinye zezinto ongazenza ukuze ulwe nalezo zingcindezi?
Qaphela Abangane Bakho!
13, 14. Kungani kubalulekile ukuba ngokhethayo endabeni yabangane?
13 Ake siphinde sibheke incazelo yomuntu ophumelelayo, elotshwe kumaHubo 1:1-3: “Ubusisiwe umuntu ongahambi ngeziluleko zababi, ongemi endleleni yezoni, ongahlali enkundleni yabaklolodayo, kepha okuthokoza kwakhe kusemthethweni kaJehova, ozindla ngomthetho wakhe imini nobusuku. Unjengomuthi otshaliwe ngasemifuleni yamanzi, othela isithelo sawo ngesikhathi sawo, oqabunga lawo lingabuni, nakho konke akwenzayo [“kuyophumelela,” NW].”
14 Okokuqala, phawula ukuthi abangane bakho bafeza indima enkulu. IzAga 13:20 zithi: “Ohamba nabahlakaniphileyo uyakuhlakanipha, kepha umngane weziwula uyakushoshozelwa yizo.” Lokhu akusho ukuba ongenandaba, ongenabungane, noma ochwensa intsha engebona oFakazi BakaJehova. IBhayibheli lisinxusa ukuba sithande omakhelwane bethu futhi sibe “nokuthula nabantu bonke.” (Roma 12:18; Mathewu 22:39) Nokho, ungase uzithole ‘uhamba ngezeluleko’ zalabo abangazilandeli izindinganiso zeBhayibheli uma usondelana nabo kakhulu.
Izinzuzo Zokufunda IBhayibheli
15. Intsha ingakuhlakulela kanjani ukulangazelela ukufunda iBhayibheli?
15 Umhubi waphawula nokuthi umuntu ophumelelayo uyakuthokozela ukufunda umthetho kaNkulunkulu ‘ngezwi eliphansi imini nobusuku.’ (IHubo 1:1, 2, NW) Kuyavunywa, akulula ukufunda iBhayibheli, futhi kulo “kukhona izinto ezithile . . . okunzima ukuziqonda.” (2 Petru 3:16) Kodwa ukufunda iBhayibheli akumelwe kube isidina. Ungakwazi ‘ukwakha ukulangazelela ubisi olungonakalisiwe’ lweZwi likaNkulunkulu. (1 Petru 2:2) Zama ukufunda amavesi ambalwa nje ngosuku. Uma kunamaphuzu ongawaqondi, cwaninga. Ngemva kwalokho, cabanga ngalokho okufundile. (IHubo 77:11, 12) Uma unenkinga ngokugxilisa ingqondo, zama ukufunda uphumisele “ngezwi eliphansi.” Ngemva kwesikhathi, uthando lwakho lokufunda iBhayibheli nakanjani luyokhula. Udade osemusha eBrazil uyakhumbula: “Njalo uJehova wayebonakala ekude nami. Kodwa sekuyizinyanga ezithile manje ngizama ukuthuthukisa isifundo sami siqu nokufunda iBhayibheli. Manje nginomuzwa wokuthi ubuhlobo bami noJehova buqine kakhudlwana. Usengokoqobo ngokwengeziwe kimi.”
16. Singakuthola kanjani okwengeziwe emihlanganweni yebandla?
16 Ukuya emihlanganweni yebandla nakho kubalulekile ukuze ukhule ngokomoya. Uma ‘unaka indlela olalela ngayo,’ ungathola isikhuthazo esikhulu. (Luka 8:18) Ingabe ngezinye izikhathi uye ube nomuzwa wokuthi imihlangano ayimnandi kangako? Uma kunjalo, zibuze, ‘Ngenzani mina ukuze ngenze imihlangano ibe mnandi? Ingabe ngiyanaka? Ngiyalungiselela yini? Ngiyaphendula?’ Phela iBhayibheli lisitshela ukuba “sicabangelaneni ukuze sivuselelane othandweni nasemisebenzini emihle, . . . sikhuthazane.” (Heberu 10:24, 25) Ukuze ukwenze lokhu kumelwe ube nengxenye! Yebo, ukuze ube nengxenye kumelwe utadishe kusengaphambili. Udade osemusha uyavuma: “Kulula ngempela ukuba nengxenye emihlanganweni uma ulungiselela.”
Ukulandela Indlela KaNkulunkulu Kuholela Empumelelweni
17. Umfundi weBhayibheli okhuthele ufana kanjani “nomuthi otshaliwe ngasemifuleni yamanzi”?
17 Umhubi uqhubeka achaze umuntu ophumelelayo ngokuthi “unjengomuthi otshaliwe ngasemifuleni yamanzi.” Le mifula yamanzi kungenzeka yayibhekisela emiseleni yokunisela ngenkasa eyayisetshenziselwa ukunisela imithi endaweni eyayitshalwe kuyo. (Isaya 44:4) Ukufunda iBhayibheli nsuku zonke kufana nokuxhunywa emthonjeni onjalo ongapheli wokondleka nokuqabuleka. (Jeremiya 17:8) Nsuku zonke uzothola amandla owadingayo okubekezela ngaphansi kovivinyo nobunzima. Lapho usukwazi ukucabanga kukaJehova, uyothola ukuhlakanipha okudingayo ukuze wenze izinqumo ezihlakaniphile.
18. Yini engaqinisekisa ukuthi osemusha uyaphumelela ekukhonzeni kwakhe uJehova?
18 Ngezinye izikhathi ukukhonza uJehova kungase kubonakale kunzima. Kodwa ungalokothi ube nomuzwa wokuthi kunzima kakhulu ukuba ungakwenza. (Duteronomi 30:11) IBhayibheli likuthembisa ukuthi ‘konke okwenzayo kuyophumelela’ ngokuhamba kwesikhathi, inkani nje uma umgomo wakho oyinhloko uwukujabulisa uJehova nokwenza inhliziyo yakhe ithokoze! (IzAga 27:11) Futhi khumbula, awuwedwa. UJehova noJesu Kristu bayakusekela. (Mathewu 28:20; Heberu 13:5) Bayakwazi ukucindezeleka obhekene nakho, futhi abasoze bakushiya. (IHubo 55:22) Unanokusekela kwayo “yonke inhlangano yabafowethu” nokwabazali bakho uma besaba uNkulunkulu. (1 Petru 2:17) Unalokho kusekelwa, kanye nokuzimisela nomzamo wakho, ungajabulela ukuphila okuphumelelayo hhayi manje kuphela kodwa naphakade!
Imibuzo Yokubukeza
◻ Iyini impumelelo yangempela?
◻ Kungani sidinga uJehova ukuba aqondise izinyathelo zethu?
◻ Intsha ‘ingazibala’ kanjani ‘izinsuku zayo’?
◻ Kungani kuwubuwula ukuba nomhawu ngabenzi bokubi?
◻ Ukufunda iBhayibheli nsuku zonke nokuya njalo emihlanganweni kungayisiza kanjani intsha ukuba ijabulele ukuphila okuphumelelayo?
[Isithombe ekhasini 20]
Ngenxa yokuthi intula ‘ukumesaba uNkulunkulu’ okunempilo, intsha eningi yenza imikhuba ebhubhisayo
[Isithombe ekhasini 22]
Ngokuvamile intsha iyakhohlwa ukuthi izenzo zayo zinemiphumela
[Isithombe ekhasini 23]
Hlakulela uthando lokufunda iBhayibheli
[Isithombe ekhasini 23]
Uyoyijabulela ngokwengeziwe imihlangano uma uba nengxenye kuyo