‘Yiba Nesibindi Uqine!’
“Yimani isibindi! Mina ngilinqobile izwe.”—JOHANE 16:33.
1. Isiphi isikhuthazo ama-Israyeli asithola ngenxa yalokho okwakuwalindele eKhanani?
LAPHO ama-Israyeli esezowela uMfula iJordani angene eZweni Lesithembiso, uMose wathi kuwo: “Yibani nesibindi niqine. Ungazesabi noma zikwethuse, ngoba uJehova uNkulunkulu wakho nguye ohamba nawe.” UMose wabe esebiza uJoshuwa, owayezohola ama-Israyeli awangenise eKhanani, wasiphinda kuye ngokuqondile iseluleko sokuba nesibindi. (Duteronomi 31:6, 7) Kamuva, uJehova ngokwakhe wakhuthaza uJoshuwa, wathi: “Yiba nesibindi uqine . . . Kuphela yiba nesibindi uqine kakhulu.” (Joshuwa 1:6, 7, 9) Lawo mazwi ayefike ngesikhathi. Ama-Israyeli ayezodinga isibindi ukuze abhekane nezitha ezinamandla ezaziwalindele ngaphesheya kweJordani.
2. Sikusiphi isimo namuhla, futhi yini esiyidingayo?
2 Namuhla, amaKristu eqiniso asezongena ezweni elisha elithenjisiwe, futhi kudingeka abe nesibindi, njengoJoshuwa. (2 Petru 3:13; IsAmbulo 7:14) Nokho, esethu isimo sihlukile kwesikaJoshuwa. UJoshuwa walwa ngezinkemba nangemikhonto. Thina silwa impi engokomoya, asizilokothi izikhali ezingokoqobo. (Isaya 2:2-4; Efesu 6:11-17) Ngaphezu kwalokho, uJoshuwa kwadingeka alwe izimpi eziningi ezishubile ngisho nangemva kokungena eZweni Lesithembiso. Kodwa thina sizilwa manje izimpi zethu ezishubile—singakangeni ezweni elisha. Ake sibheke ezinye zezimo ezidinga isibindi.
Kungani Kudingeka Sizabalaze?
3. IBhayibheli livezani ngomphikisi wethu omkhulu?
3 Umphostoli uJohane wabhala: “Siyazi ukuthi singabakaNkulunkulu, kodwa lonke izwe lisemandleni omubi.” (1 Johane 5:19) Lawo mazwi abonisa isizathu esiyisisekelo esenza kudingeke amaKristu azabalaze ukuze alondoloze ukholo lwawo. Lapho umKristu egcina ubuqotho, ngezinga elithile kuba ukunqotshwa kukaSathane uDeveli. Ngakho, uSathane uhamba “njengengonyama ebhongayo” ezama ukwesabisa nokushwabadela amaKristu athembekile. (1 Petru 5:8) Empeleni, uyalwa namaKristu agcotshiwe nabangane bawo. (IsAmbulo 12:17) Kule mpi, usebenzisa abantu abafeza izinjongo zakhe bazi noma bengazi. Kudinga isibindi ukumelana ngokuqinile noSathane nawo wonke amanxusa akhe.
4. UJesu waxwayisa wathini, kodwa iyiphi imfanelo amaKristu eqiniso aye ayibonisa?
4 Njengoba uJesu ayazi ukuthi uSathane namanxusa akhe babeyokhamelela bephikisa izindaba ezinhle, waxwayisa abalandeli baKhe: “Abantu bayoninikela osizini banibulale, futhi niyoba yizinto zokuzondwa yizizwe zonke ngenxa yegama lami.” (Mathewu 24:9) Lawo mazwi agcwaliseka ekhulwini lokuqala, futhi ayagcwaliseka nanamuhla. Empeleni, ukushushiswa abanye oFakazi BakaJehova banamuhla abaye babhekana nakho kungokunye kokunzima kakhulu kuwo wonke umlando. Noma kunjalo, amaKristu eqiniso aba nesibindi lapho ebhekene nalokho kucindezela. Ayazi ukuthi “ukwesaba abantu kubeka ugibe,” futhi awafuni ukubanjwa yilo.—IzAga 29:25.
5, 6. (a) Iziphi izimo ezifuna sibe nesibindi? (b) AmaKristu athembekile enze njani lapho isibindi sawo sivivinywa?
5 Ngaphandle kokushushiswa, kukhona nezinye izinselele ezifuna sibe nesibindi. Kwabanye, ukukhuluma nabantu abangabazi ngezindaba ezinhle kuyinselele. Isibindi sezinye izingane zesikole siyavivinyeka lapho kuthiwa azisho isivumo sokuzinikela ezweni lakubo noma efulegeni. Njengoba empeleni ziyizenzo ezingokwenkolo, ngesibindi izingane zamaKristu ziye zanquma ukwenza lokho okujabulisa uNkulunkulu, futhi umlando wazo omuhle uyajabulisa.
6 Sidinga isibindi nalapho abaphikisi bethonya abemithombo yezindaba ukuba basakaze imibiko emibi ngezinceku zikaNkulunkulu noma lapho bezama ukuthiya ukukhulekela kweqiniso ngokudala “inkathazo ngesinqumo somthetho.” (IHubo 94:20) Ngokwesibonelo, kufanele sizizwe kanjani lapho amaphephandaba, umsakazo noma ithelevishini kunikeza imibiko ehlanekezelwe noma engamanga aluhlaza ngoFakazi BakaJehova? Ingabe kufanele sishaqeke? Cha. Izinto ezinjalo sizilindele. (IHubo 109:2) Asimangali futhi lapho abanye bewakholwa lawo manga nezinto ezihlanekezelwe ezisakazwayo, ngoba “noma ubani ongenalwazi uba nokholo kuwo wonke amazwi.” (IzAga 14:15) Noma kunjalo, amaKristu aqotho ayenqaba ukukholelwa yinoma yini eshiwoyo ngabazalwane bawo, futhi awakuvumeli neze ukugxekwa obala kuwenze aphuthe emihlanganweni yobuKristu, ehlise izinga enkonzweni yasensimini, noma antengantenge okholweni. Ngokuphambene, ‘azitusa njengezikhonzi zikaNkulunkulu, ngenkazimulo nehlazo, ngombiko omubi nombiko omuhle; njengabakhohlisi [ngokusho kwabaphikisi] kodwa [empeleni] abe eneqiniso.’—2 Korinte 6:4, 8.
7. Imiphi imibuzo yokuzihlola esingazibuza yona?
7 Lapho ebhalela uThimothewu, uPawulu wathi: “UNkulunkulu akasinikanga umoya wobugwala, kodwa owamandla . . . Ngakho-ke, ungabi namahloni ngokufakaza mayelana neNkosi yethu.” (2 Thimothewu 1:7, 8; Marku 8:38) Ngemva kokufunda lawo mazwi, singazibuza: ‘Ingabe mina nginamahloni ngokholo lwami, noma nginesibindi? Emsebenzini (noma esikoleni), ngiyabazisa yini abanye ukuthi nginguFakazi KaJehova, noma ngizama ukukufihla lokho? Kungiphathisa amahloni yini ukuhluka kwabanye, noma ngiyaziqhenya ngokuhluka kwami ngenxa yobuhlobo bami noJehova?’ Uma noma ubani ekwesaba ukushumayela izindaba ezinhle noma ukuba nezinkolelo ezingathandwa, makakhumbule iseluleko sikaJehova kuJoshuwa: “Yiba nesibindi uqine.” Ungalokothi ukhohlwe ukuthi into ebalulekile akuwona umbono wesisebenza nabo noma esifunda nabo kodwa okaJehova noJesu Kristu.—Galathiya 1:10.
Indlela Yokuhlakulela Isibindi
8, 9. (a) Isibindi samaKristu okuqala savivinywa kanjani ngesinye isikhathi? (b) UPetru noJohane benze njani lapho besongelwa, futhi kwenzekani kubo nabafowabo?
8 Singasihlakulela kanjani isibindi esiyosenza sikwazi ukugcina ubuqotho bethu kulezi zikhathi ezinzima? AmaKristu okuqala wona asihlakulela kanjani? Cabanga ngalokho okwenzeka lapho abapristi abakhulu namadoda amadala eJerusalema betshela uPetru noJohane ukuba bayeke ukushumayela ngegama likaJesu. Abafundi benqaba ukuyeka, base besongelwa, badedelwa. Ngemva kwalokho, baphindela kubazalwane futhi bonke bathandaza ndawonye, bathi: “Jehova, naka izinsongo zabo, unike izinceku zakho ukuba ziqhubeke zikhuluma izwi lakho ngaso sonke isibindi.” (IzEnzo 4:13-29) UJehova waphendula ngokubaqinisa ngomoya ongcwele, base ‘begcwalisa iJerusalema’ ngemfundiso yabo, njengoba kwafakaza abaholi bamaJuda kamuva.—IzEnzo 5:28.
9 Ake sikuhlaziye okwenzeka lapho. Lapho abafundi besongelwa abaholi bamaJuda, abazange bacabange ukuyeka ngenxa yokucindezelwa. Kunalokho, abafundi bathandazela isibindi sokuqhubeka beshumayela. Babe sebenza ngokuvumelana nomthandazo wabo, uJehova wabaqinisa ngomoya wakhe. Okwenzeka kubo kubonisa ukuthi lokho uPawulu akubhala eminyakeni ethile kamuva esimweni esihlukile kuyasebenza kumaKristu lapho eshushiswa. UPawulu wathi: “Nginamandla azo zonke izinto ngenxa yalowo ongipha amandla.”—Filipi 4:13.
10. Okwenzeka kuJeremiya kubasiza kanjani labo abanamahloni ngokwemvelo?
10 Nokho, ake sithi umuntu unamahloni nje ngokwemvelo. Angamkhonza yini uJehova ngesibindi noma kunjalo, lapho ephikiswa? Ngokuqinisekile! Khumbula indlela uJeremiya aphendula ngayo lapho uJehova embeka umprofethi. Leyo nsizwa yathi: “Ngisewumfana nje.” Kusobala ukuthi yayizizwa ingafaneleki. Noma kunjalo, uJehova wayikhuthaza ngala mazwi: “Ungasho ukuthi, ‘Ngisewumfana nje.’ Kodwa kubo bonke labo engizokuthuma kubo, kufanele uye; futhi konke engizokuyala ngakho, kufanele ukukhulume. Ungesabi ngenxa yobuso babo, ngoba ‘nginawe ukuba ngikukhulule.’” (Jeremiya 1:6-10) UJeremiya wayethembele kuJehova, futhi ngenxa yalokho, ngamandla kaJehova wakunqoba ukuba manqikanqika kwakhe, waba ufakazi onesibindi ngokuphawulekayo kwa-Israyeli.
11. Yini esiza amaKristu namuhla ukuba abe njengoJeremiya?
11 AmaKristu agcotshiwe namuhla anikwe umsebenzi othi awufane nokaJeremiya, futhi njengoba esekelwa “isixuku esikhulu” ‘sezinye izimvu,’ ayaqhubeka ememezela izinjongo zikaJehova, yize enganakwa, ehlekwa futhi eshushiswa. (IsAmbulo 7:9; Johane 10:16) Athola isikhuthazo emazwini kaJehova kuJeremiya: “Ungesabi.” Awakhohlwa ukuthi athunywe nguNkulunkulu futhi ngowakhe umyalezo awushumayelayo.—2 Korinte 2:17.
Izibonelo Zesibindi Ezifanelwe Ukulingiswa
12. Isiphi isibonelo esihle kakhulu sesibindi uJesu asibeka, futhi wabakhuthaza wathini abalandeli bakhe?
12 Ukuzindla ngezibonelo zabanye abaye baba nesibindi, njengoJeremiya, kungasisiza emizamweni yethu yokuhlakulela isibindi. (IHubo 77:12) Ngokwesibonelo, njengoba sihlola inkonzo kaJesu, sisihlaba umxhwele isibindi sakhe lapho elingwa nguSathane nalapho abaholi bamaJuda bemphikisa ngokuzimisela. (Luka 4:1-13; 20:19-47) Ngamandla kaJehova, uJesu wayegxilile, futhi ngaphambi nje kokufa kwakhe, wathi kubafundi bakhe: “Ezweni nilusizi, kodwa yimani isibindi! Mina ngilinqobile izwe.” (Johane 16:33; 17:16) Uma abafundi bakaJesu babelandela isibonelo sakhe, nabo babeyonqoba. (1 Johane 2:6; IsAmbulo 2:7, 11, 17, 26) Kodwa kwakuyodingeka ‘bame isibindi.’
13. UPawulu wabakhuthaza wathini abaseFilipi?
13 Ngemva kweminyaka ethile uJesu afa, uPawulu noSila bavalelwa ejele eFilipi. Kamuva, uPawulu wakhuthaza ibandla laseFilipi ukuba liqhubeke ‘limi liqinile emoyeni munye, ngomphefumulo munye lilulwela ndawonye ukholo lwezindaba ezinhle, futhi lingethuswa nangayiphi indlela yilabo abaphikisana nalo.’ Ukuze aliqinise kulokhu, uPawulu wathi: “Yona le nto [ukushushiswa kwamaKristu] iwubufakazi bokubhujiswa kwabo [abashushisi], kodwa bokusindiswa kwenu; futhi lesi siboniso sivela kuNkulunkulu, ngoba leli lungelo lanikezwa nina ngenxa kaKristu ukuba ningabi nje kuphela nokholo kuye, kodwa futhi nokuba nihlupheke ngenxa yakhe.”—Filipi 1:27-29.
14. Waba yini umphumela wesibindi sikaPawulu eRoma?
14 Lapho uPawulu ebhalela ibandla laseFilipi, wayesephinde waboshwa, kulokhu eRoma. Noma kunjalo, waqhubeka eshumayela ngesibindi kwabanye. Kwaba namuphi umphumela? Wabhala: “Ukuboshwa kwami sekwaziwa obala ebuhlotsheni noKristu phakathi kwabo bonke abaQaphi Bombusi nabo bonke abanye; futhi iningi labazalwane eNkosini, njengoba lizizwa linesibindi ngenxa yokuboshwa kwami etilongweni, libonisa isibindi esikhulu nangokwengeziwe sokukhuluma izwi likaNkulunkulu ngokungesabi.”—Filipi 1:13, 14.
15. Singazitholaphi izibonelo ezinhle zokholo eziyosenza sizimisele nakakhulu ukuba nesibindi?
15 Isibonelo sikaPawulu siyasikhuthaza. Kunjalo nangezibonelo ezinhle zamaKristu anamuhla aye ashushiswa emazweni abuswa omashiqela noma abefundisi. Izindaba zamaningi awo ziye zalandiswa komagazini INqabayokulinda ne-Phaphama! kanye ne-Ncwadi Yonyaka YoFakazi BakaJehova. Njengoba ufunda lokho kulandisa, khumbula ukuthi abantu okukhulunywa ngabo babengabantu abavamile njengathi; kodwa lapho besezimweni ezinzima kakhulu, uJehova wabanika amandla angaphezu kwavamile, bakhuthazela. Singaqiniseka ukuthi uyosenzela okufanayo nathi uma kwenzeka izimo zifuna lokho.
Ukuma Kwethu Kwesibindi Kudumisa UJehova
16, 17. Singasihlakulela kanjani isibindi namuhla?
16 Uma umuntu ema aqine ngenxa yeqiniso nokulunga, yisibindi leso. Uma enza kanjalo yize enovalo ngaphakathi, sikhulu leso sibindi. Yebo, noma imuphi umKristu angaba nesibindi uma efuna ngempela ukwenza intando kaJehova, uma ezimisele ukuhlala ethembekile, uma ethembela njalo kuNkulunkulu, uma futhi ehlale ekhumbula ukuthi uJehova uye waqinisa inqwaba yabanye abantu abanjengaye esikhathini esidlule. Ngaphezu kwalokho, lapho siqaphela ukuthi ukuma kwethu ngesibindi kuyamjabulisa futhi kumdumise uJehova, sizimisela nakakhulu ukuba singantengantengi. Sizimisele ukubekezelela ukuhlekwa noma okubi kunalokho, ngoba simthanda ngokujulile.—1 Johane 2:5; 4:18.
17 Ungalokothi ukhohlwe ukuthi lapho sihlupheka ngenxa yokholo lwethu, akusho ukuthi kukhona okubi esikwenzile. (1 Petru 3:17) Sihlupheka ngoba sisekela ubukhosi bukaJehova, ngoba senza okuhle nangoba singeyona ingxenye yezwe. Mayelana nalokhu, umphostoli uPetru wathi: “Uma, lapho nenza okuhle futhi nihlupheka, nikukhuthazelela, lokhu kuyinto enhle kuNkulunkulu.” UPetru wathi futhi: “Labo abahlupheka ngokuvumelana nentando kaNkulunkulu mabaqhubeke bebeka imiphefumulo yabo kuMdali othembekile kuyilapho benza okuhle.” (1 Petru 2:20; 4:19) Yebo, ukholo lwethu luyamjabulisa uNkulunkulu wethu onothando, uJehova, futhi lumnika udumo. Yeka isizathu esinamandla sokuba nesibindi!
Ukukhuluma Neziphathimandla
18, 19. Lapho siba nesibindi phambi kwejaji, kuba njengokungathi sidlulisela muphi umyalezo kulo?
18 Lapho uJesu etshela abalandeli bakhe ukuthi babeyoshushiswa, wathi futhi: “[Abantu] bayoninikela ezinkantolo zendawo, futhi banibhaxabule emasinagogeni abo. Phela, niyohudulelwa phambi kwababusi namakhosi ngenxa yami, ngenjongo yobufakazi kubo nasezizweni.” (Mathewu 10:17, 18) Ukuvela phambi kwejaji noma umbusi ngenxa yokumangalelwa ngamanga kufuna isibindi. Noma kunjalo, lapho sizisebenzisa ngesibindi izikhathi ezinjalo ukuze sifakaze kubo, siphendula isimo esinzima sibe ithuba lokufeza okuthile okubalulekile. Kunjengokungathi sidlulisela kwabasahlulelayo la mazwi kaJehova, akumaHubo 2: “Manje, makhosi, bonisani ukuqondisisa; O bahluleli bomhlaba, kuvumeni ukuqondiswa. Khonzani uJehova ngokwesaba.” (IHubo 2:10, 11) Ezikhathini eziningi, lapho oFakazi BakaJehova beye bamangalelwa ngamanga enkantolo, amajaji aye asekela inkululeko yokukhulekela, futhi siyakwazisa lokho. Nokho, amanye amajaji aye avuma ukuthonywa abaphikisi. Kulawo, imiBhalo ithi: “Kuvumeni ukuqondiswa.”
19 Amajaji kufanele aqonde ukuthi umthetho ophakeme kunayo yonke okaJehova uNkulunkulu. Kufanele akhumbule ukuthi bonke abantu, kuhlanganise nawo amajaji, bayolandisa kuJehova uNkulunkulu noJesu Kristu. (Roma 14:10) Thina-ke, kungakhathaliseki ukuthi siyabuthola noma asibutholi ubulungisa ejajini elingumuntu, sinezizathu eziqinile zokuba nesibindi ngoba sisekelwa uJehova. IBhayibheli lithi: “Bayajabula bonke abaphephela [kuye].”—IHubo 2:12.
20. Kungani singajabula nakuba kudingeka sibekezelele ukushushiswa nokunyundelwa?
20 ENtshumayelweni YaseNtabeni, uJesu wathi: “Niyajabula lapho abantu benihlambalaza, benishushisa futhi besho yonke inhlobo yento embi ngani, beniqambela amanga ngenxa yami. Jabulani nigxumagxume ngenjabulo, ngoba umvuzo wenu mkhulu emazulwini; ngoba babashushisa ngaleyo ndlela abaprofethi ngaphambi kwenu.” (Mathewu 5:11, 12) Yiqiniso, ukushushiswa ngokwakho akumnandi, kodwa ukuma kwethu siqine naphezu kokushushiswa nemibiko enyundelayo yabezindaba kuyisizathu sokujabula. Kusho ukuthi siyamjabulisa uJehova futhi siyothola umvuzo. Isibindi sethu sibonisa ukuthi sinokholo lwangempela futhi sisenza samukeleke kuNkulunkulu. Yebo, sibonisa ukuthi sithembele ngokuphelele kuJehova. Ukuqiniseka okunjalo kubalulekile kumKristu, njengoba isihloko esilandelayo sizobonisa.
Ufundeni?
• Iziphi izimo ezifuna isibindi namuhla?
• Singayihlakulela kanjani imfanelo yesibindi?
• Iziphi ezinye zezibonelo ezinhle zesibindi?
• Kungani sifisa ukwenza ngesibindi?
[Izithombe ekhasini 9]
USimone Arnold (osengowakwaLiebster) eJalimane, uWiddas Madona eMalawi, noLydia beno-Oleksii Kurdas e-Ukraine babonisa isibindi, bamelana nomubi
[Izithombe ekhasini 10]
Asinamahloni ngezindaba ezinhle
[Isithombe ekhasini 11]
Isibindi sikaPawulu esejele safeza lukhulu mayelana nezindaba ezinhle
[Isithombe ekhasini 12]
Uma silichazela ngesibindi ijaji ukuthi simiphi ngokuvumelana nemiBhalo, sidlulisa umyalezo obalulekile