Imibuzo Evela Kubafundi

Kungani INqabayokulinda ka-April 1, 2002, ekhasini 11, esigabeni 7, ithi ubhapathizo lwamanzi lwamakholwa amasha angamaJuda ngePhentekoste lika-33 C.E. lwalufanekisela “ukuzinikezela kwawo kuNkulunkulu ngoKristu,” kuyilapho umbono wangaphambili wawuthi ukucwiliswa kwamaJuda kusukela ngo-33 C.E. kuze kube ngu-36 C.E. kwakungadingi ukuzinikezela komuntu siqu okunjalo?

Ngo-1513 B.C.E., uJehova uNkulunkulu wanika ama-Israyeli ithuba lokuba yisizwe esingcwele kuye ngombandela wokuthi ‘azolilalela nokulilalela izwi lakhe futhi asigcine impela isivumelwano sakhe.’ Aphendula athi: “Konke uJehova akukhulumile sizimisele ukukwenza.”—Eksodusi 19:3-8; 24:1-8.

Ngokuvuma ukugcina isivumelwano soMthetho kaMose, ama-Israyeli azinikezela kuNkulunkulu. Izizukulwane zamaJuda ezalandela zazalelwa kulesi sizwe esizinikezele. Nokho, ubhapathizo lwamaJuda aba abalandeli bakaJesu Kristu kusukela ngePhentekoste lika-33 C.E. kuqhubeke, lwaluhlanganisa okungaphezu kokuziletha kwawo kuNkulunkulu njengamalungu esizwe esizinikezele. Lwalufanekisela ukuzinikezela kwawo kuJehova uNkulunkulu ebuhlotsheni obusha ngoJesu Kristu. Kanjani?

Ngemva kokuthululwa komoya ongcwele phezu kwabafundi abangaba ngu-120 ababehlangene ekamelweni eliphezulu eJerusalema ngePhentekoste lika-33 C.E., umphostoli uPetru wasukuma futhi waqala ukushumayela oquqabeni lwamaJuda namaproselithe ayehlanganele ukuzobona lokho okwakwenzekile. Ngemva kokunikeza ubufakazi obuphelele, wathi kumaJuda ayethinteke unembeza: “Phendukani, yilowo nalowo kini abhapathizwe egameni likaJesu Kristu ngenjongo yokuthethelelwa kwezono zenu.” Besabela esikhuthazweni sikaPetru esiqhubekayo, “labo abamukela izwi lakhe ngenhliziyo yonke babhapathizwa, futhi ngalolo suku kwanezelwa imiphefumulo ecishe ibe yizinkulungwane ezintathu.”—IzEnzo 2:1-41.

Ingabe lawo maJuda abhapathizwa ngemva kwesikhuthazo sikaPetru ayengewona yini kakade amalungu esizwe esizinikezele? Ayengenabo yini ubuhlobo bokuzinikezela noNkulunkulu? Cha. Umphostoli uPawulu wabhala ukuthi ‘uNkulunkulu usewususile uMthetho endleleni ngokuwubethela esigxotsheni sokuhlushwa.’ (Kolose 2:14) Ngokufa kukaKristu ngo-33 C.E., uJehova uNkulunkulu wasisusa isivumelwano soMthetho—sona kanye isisekelo sokulethwa kwama-Israyeli ebuhlotsheni bokuzinikezela kuYe. Isizwe esanqaba iNdodana kaNkulunkulu manje sasinqatshwa uNkulunkulu uqobo. ‘Lokho okwakungu-Israyeli ngendlela engokwenyama’ kwakungeke kusasho ukuthi kuyisizwe esizinikezele kuNkulunkulu.—1 Korinte 10:18; Mathewu 21:43.

Isivumelwano soMthetho saqedwa ngo-33 C.E., kodwa inkathi kaNkulunkulu yokubonisa amaJuda umusa nokuwanaka ngokukhethekile ayizange iphele ngaleso sikhathi.a Leyo nkathi yayizoqhubeka kuze kube ngu-36 C.E., lapho uPetru eshumayela kuKorneliyu ozinikele wase-Italiya nabendlu yakhe kanye nakwabanye beZizwe. (IzEnzo 10:1-48) Sasiyini isisekelo salokhu kwandiswa komusa?

“[UMesiya] kumelwe agcine isivumelwano sisebenza ngenxa yabaningi isonto elilodwa,” kusho uDaniyeli 9:27. Isivumelwano esagcinwa sisebenza iminyaka engu-7, noma “isonto elilodwa,” kusukela ekubhapathizweni kukaJesu nasekuqaliseni kwakhe inkonzo kaMesiya yasobala ngo-29 C.E. kwakuyisivumelwano sika-Abrahama. Ukuze abe sebuhlotsheni baleso sivumelwano, umuntu kwakumelwe nje abe owozalo luka-Abrahama lwamaHebheru. Leso sivumelwano sohlangothi olulodwa asizange sinike umuntu ngamunye isisekelo sobuhlobo bokuzinikezela kuJehova. Ngakho, amaJuda angamakholwa abhapathizwa ngemva kwenkulumo kaPetru ngePhentekoste lika-33 C.E., nakuba ayengabamukeli bomusa okhethekile njengamaJuda emvelo, ayengeke esasho ukuthi anobuhlobo obukhethekile noNkulunkulu ngemva kokususwa kwesivumelwano soMthetho. Kwakudingeka wona ngamanye azinikezele kuNkulunkulu.

Ukuzinikezela komuntu siqu kwamaJuda namaproselithe azinikela ukuba abhapathizwe ngosuku lwePhentekoste lika-33 C.E. kwakubaluleke ngenxa yesinye futhi isizathu. Umphostoli uPetru wanxusa izilaleli zakhe ukuba ziphenduke futhi zibhapathizwe egameni likaJesu. Ukwenza kanjalo kwakudinga ukuba alahle indlela yezwe futhi amukele uJesu njengeNkosi noMesiya, njengoMpristi oPhakeme, nanjengohlala ngasesandleni sokunene sikaNkulunkulu ezulwini. Kwakudingeka abize egameni likaJehova uNkulunkulu ngoKristu Jesu ukuze asindiswe, okwakusho ukubonisa ukholo kuKristu nokumqaphela njengoMholi wawo. Isisekelo sokuba nobuhlobo noNkulunkulu nokuthethelelwa izono sase sishintshile manje. Njengabantu ngabanye, amaJuda akholwayo ayedinga ukulwamukela lolu hlelo olusha. Kanjani? Ngokuzinikezela kuNkulunkulu nangokumemezela obala ukuthi azinikezele ngokuba abhapathizwe emanzini egameni likaJesu Kristu. Ubhapathizo lwamanzi lwaluwuphawu lokuzinikezela kwawo kuNkulunkulu, oluwaletha ebuhlotsheni obusha naye ngoJesu Kristu.—IzEnzo 2:21, 33-36; 3:19-23.

[Umbhalo waphansi]