Umkhaya Wakubo KaJesu Kwakungobani?

KUVAMILE ukuba ngo-December, ezindaweni eziningi zomhlaba kubonakale izithombe zomntwana uJesu egonwe unina, uMariya, kukhona nosingayise, uJosefa. Izithombe ezinjalo zomkhaya zingase zikhange ngisho nalabo abathi abawona amaKristu. Njengoba kunguJesu osemqoka kulezi zithombe, imiBhalo isitshelani ngomkhaya wakubo kaJesu wasemhlabeni?

Umkhaya wakubo kaJesu wawuthakazelisa ngempela. Wazalwa yintombi okuthiwa uMariya, ngakho waba ilungu lomkhaya ongabantu. NgokweBhayibheli, ukuphila kwakhe kwasuswa ezulwini kwafakwa esibelethweni sikaMariya ngomoya ongcwele. (Luka 1:30-35) Ngaphambi kokuba kumenyezelwe lokhu kuhlala kukaJesu esiswini okuyisimangaliso, uMariya wayethenjiswe umshado yindoda okuthiwa uJosefa, ngenxa yalokho owayezoba usingayise kaJesu.

Ngemva kokuzalwa kukaJesu, uJosefa noMariya baba nabanye abantwana, abafowabo nodadewabo bakaJesu ngomzali oyedwa. Lokho kubonakala ngombuzo abantu baseNazaretha abawubuza kamuva ngoJesu: “Lo akayona yini indodana yombazi? Unina akabizwa yini ngokuthi uMariya, nabafowabo ngokuthi oJakobe noJosefa noSimoni noJuda na? Futhi odadewabo, abekho yini bonke kanye nathi?” (Mathewu 1:25; 13:55, 56; Marku 6:3) Kulokhu singaphetha ngokuthi amalungu omkhaya wakubo kaJesu kwakungabazali bakhe, abafowabo abane nodadewabo okungenani ababili.

Nokho, abanye namuhla abakholwa ukuthi abafowabo nodadewabo bakaJesu kwakungabantwana bakaJosefa noMariya. Ngani? I-New Catholic Encyclopedia ithi: “Kusukela ekuqaleni kwalo, iSonto belifundisa ukuthi uMariya wahlala eyintombi. Ngenxa yalokhu-ke, akukho kungabaza ukuthi uMariya akazange abe nabanye abantwana.” Yona le ncwadi ithi igama elithi “umfowabo” nelithi “udadewabo” angasho “umuntu noma abantu abahlangene ngokwenkolo noma ngesinye isibopho” noma angasho izihlobo, mhlawumbe abazala.

Ingabe kunjalo ngempela? Ngisho nezinye izazi zenkolo zamaKatolika, lapho ziphikisa imfundiso yesonto, zisekela umbono wokuthi uJesu wayenabafowabo nodadewabo benyama. UJohn P. Meier, owayengumengameli we-Catholic Bible Association of America, wabhala wathi: “[EThestamenteni Elisha], elithi adelphos [umfowabo], uma lingasetshenziswa ngokomfanekiso noma njengesifenqo nje kodwa libhekisele ebuhlotsheni obuthile benyama noma obungokomthetho, lisho nje kuphela umfowabo womuntu noma umfowabo ngomzali oyedwa, alisho lutho olunye.”a Yebo imiBhalo ibonisa ukuthi uJesu wayenabafowabo nodadewabo ababezalwa uJosefa noMariya.

AmaVangeli akhuluma ngezinye futhi izihlobo zikaJesu, kodwa manje ake sihlole amalungu omkhaya wakubo kaJesu sibone ukuthi yini esingayifunda kuwo.

[Umbhalo waphansi]