Ubukhazikhazi Bendalo KaJehova

“Imithi KaJehova Yanelisekile”

WAKE waba yini sehlathini lapho imisebe yokukhanya kwelanga ivundla phakathi kwemithi ethi ayikhothe amafu? Wabuzwa yini ubuhashahasha njengoba umoya ohelezayo udlula phakathi kwamacembe?—Isaya 7:2.

Kwezinye izingxenye zomhlaba phakathi nesikhathi esithile sonyaka, amacembe ezihlahla ezihlukahlukene abonakala sengathi ayavutha ngenxa yemibala yawo ebomvu, esawolintshi, ephuzi neminye. Ngempela, kuba sengathi ihlathi liyavutha! Lokhu kufanelana kahle nala mazwi okukhamuluka: “Yenamani, nina zintaba, ngokukhamuluka kwenjabulo, wena hlathi nani nonke mithi ekulo!”—Isaya 44:23.a

Cishe ingxenye eyodwa kwezintathu kuyiplanethi enguMhlaba imbozwe amahlathi. Amahlathi kanye nenqwaba yezinto eziphilayo ezikuwo kukhazimulisa uMklami noMdali wako, uJehova uNkulunkulu, ngendlela emangalisayo. Umhubi ophefumulelwe wahlabelela: “Dumisani uJehova . . . nina mithi ethela izithelo nani nonke misedari.”—IHubo 148:7-9.

Incwadi ethi The Trees Around Us ithi: “Izihlahla zibalulekile kubantu ngoba zanelisa izidingo zabo ezingokwenyama nesifiso sabo sokubona izinto ezinhle.” Amahlathi avikela, alondoloze futhi ahlanze amanzi asetshenziswa abantu. Izihlahla zihlanza nomoya. Ngenqubo emangalisayo okuthiwa i-photosynthesis, amangqamuzana amacembe ashintsha isikhutha, amanzi, okusansimbi nokukhanya kwelanga kube izakhi nomoyampilo.

Ihlathi liyisibonelo esihle kakhulu somsebenzi omuhle noklanywe kahle. Ngokuvamile izizemazema zemithi yizona zinto ezihlaba umxhwele kakhulu ehlathini. Phakathi kwazo kumila inqwaba yama-fern, ulembu, imivini, izihlahla ezincane nezithombo. Lezi zitshalo zithembele emthunzini walezi zihlahla futhi zimunca umswakama osehlathini.

Kwamanye amahlathi anezihlahla ezinamacembe avuthukayo, kungawohloka ayizigidi ezingu-25 endaweni eyihektare elilodwa enkwindla. Kwenzekani kuwo? Ekugcineni, izinambuzane, isikhunta, izibungu nezinye izilwanyana ziphendula le mfucumfucu ibe umquba, okuyisithako esibalulekile somhlabathi ovundile. Yebo, akukho okulahlwayo njengoba lezi zisebenzi ezinganakekile zivundisa umhlabathi ukuze ulungele ukuhlumisa izithombo.

Ngaphansi kwala macembe abunile, inhlabathi esehlathini igcwele uswebezane lwezilwanyana. Ngokwencwadi ethi The Forest, “zingu-1 350 izilwanyana . . . ezingatholaka endaweni engamasentimitha-skwele angu-30 ejule ngamasentimitha angu-2,5 zingakabalwa izigidigidi zezilwanyana ezingabonakali ngamehlo ezitholakala emhlabathini ongawubamba ngesandla.” Ngaphezu kwalokho, ehlathini kugcwele izilwane ezihuquzelayo, izinyoni, izinambuzane nezilwane ezincelisayo. Ubani okufanele adunyiswe ngalobu buhle nangale mvange? Ngokufanelekile, uMdali wazo uthi: “Zonke izilwane zasendle ezisemahlathini zingezami, izilo eziphezu kwezintaba eziyinkulungwane.”—IHubo 50:10.

Ezinye izilwane zidalwe zinekhono elimangalisayo lokulala ubusika bonke futhi ziqhubeke ziphila ebusika obubanda kakhulu nangenkathi ende yokuntuleka kokudla. Nokho, akuzona zonke izilwane ezilala ubusika bonke. Ngisho naphakathi nobusika, ungase ubone umhlambi wezinyamazane weqa amangqabangqeshe unqamula ensimini. Izinyamazane azilali ubusika bonke futhi azikuqongeleli ukudla, kodwa ziyakugqwaba, zinquntula amagatsha athambile nemiqumbe, njengoba ubona kulesi sithombe esithathwe eJalimane.

Kukhulunywa kaningi ngezitshalo emiBhalweni. Ngokokunye ukubala, iBhayibheli likhuluma ngezitshalo ezihlukahlukene ezicishe zibe ngu-130, nangezinhlobo ezingaba ngu-30 zezihlahla. Siphawula ngalokhu kukhuluma kweBhayibheli ngezitshalo okuphawulekayo, isazi sezitshalo, uMichael Zohary sithi: “Ngisho nasezincwadini nje ezivamile, akukhulunywa kaningi kangaka ngezitshalo ngokuphathelene nezici ezihlukahlukene zazo njengaseBhayibhelini.”

Izihlahla namahlathi kuyizipho ezinhle kakhulu ezivela kuMdali onothando. Uma uke waba sehlathini isikhathi esithile, nakanjani uyavumelana nala mazwi omhubi: “Imithi kaJehova yanelisekile, imisedari yaseLebhanoni ayitshalile, lapho izinyoni zakha khona izidleke.”—IHubo 104:16, 17.

[Umbhalo waphansi]

[Ibhokisi/Izithombe ekhasini 9]

Esinye sezihlahla zezithelo zaseMpumalanga Ephakathi esihlaba umxhwele kakhulu um-alimondi. Siqhakaza ekuqaleni konyaka—ngaphambi kokuba ezinye ziqhakaze. AmaHebheru asendulo ayebiza um-alimondi ngokuthi umaqhakaza-kuqala. Lesi sihlahla siqhakaza izimbali zaso ezibomvana noma ezimhlophe.—UmShumayeli 12:5.

Ezinhlotsheni ezingaba ngu-9 000 zezinyoni ezaziwayo, cishe zingu-5 000 ezihlabelelayo. Emajukujukwini ehlathi lapho kuthule khona cwaka, uzwa nje izingoma zazo. (IHubo 104:12) Ngokwesibonelo, izingoma zondlunkulu abahlabelelayo ziqhelisa izihlathi. Ombuzana ababangalasayo, njengalona olapha esithombeni, bayimizwilili emincane evunule yaconsa ngemvange yombala ompunga, ophuzi noluhlaza.—IHubo 148:1, 10.

[Isithombe ekhasini 9]

Ihlathi laseNormandy, eFrance