Qaphela Ukukhohliswa

“Xwayani: mhlawumbe kungase kube khona oyomuka nani njengezisulu zakhe . . . ngenkohliso eyize.”—KOLOSE 2:8.

1-3. (a) Iziphi izibonelo ezibonisa ukuthi ukukhohlisa kukhona cishe kuzo zonke izici zokuphila kwansuku zonke? (b) Kungani kungafanele kusimangaze ukukhohlisa okwandile emhlabeni?

“BANGAKI kini okungakaze kwenzeke kubo ukuthi umuntu abazommela ecaleni aqambe amanga kubo?” Eminyakeni ethile edlule, uprofesa wezomthetho wenza ukuhlola ngokubuza lowo mbuzo. Watholani? Uyachaza: “Ezinkulungwaneni zabameli, uyedwa kuphela okwakungakaze kwenzeke kuye ukuthi umuntu azommela ecaleni aqambe amanga.” Sasiyini isizathu? “Lowo mmeli wayesanda kuqala ukusebenza emahhovisi amakhulu abameli futhi wayengakakhulumi namuntu ofuna ukumelwa.” Le ndaba ibonisa iqiniso elidabukisayo—ukuqamba amanga nokukhohlisa kuyinsakavukela ezweni lanamuhla.

² Ukukhohlisa kunhlobo-ningi futhi cishe kukhona kuzo zonke izici zokuphila kwanamuhla. Kunezibonelo eziningi ezindabeni—abezombusazwe abaqamba amanga ngalokho abakwenzile, abahloli bamabhuku ezimali nabameli abenza ihaba ngezinzuzo zezinkampani, abakhangisi abadukisa abathengi, abantu abaqola izinkampani zomshuwalense, uma sibala okumbalwa. Bese kuba nokukhohlisa okungokwenkolo. Abefundisi badukisa inqwaba yabantu ngokufundisa izimfundiso zamanga, njengokungafi komphefumulo, isihogo somlilo, noZiqu-zintathu.—2 Thimothewu 4:3, 4.

³ Ingabe kufanele kusimangaze konke lokhu kukhohlisa? Cha. Likhuluma ‘ngezinsuku zokugcina,’ iBhayibheli laxwayisa: “Abantu ababi nabakhohlisi bayoqhubeka besuka kokubi baye kokubi kakhulu, bedukisa futhi bedukiswa.” (2 Thimothewu 3:1, 13) NjengamaKristu, kudingeka siqaphele imibono edukisayo engasiphambukisa eqinisweni. Kunemibuzo emibili ephakama kufanele: Kungani ukukhohlisa kwande kangaka namuhla, futhi singaqapha kanjani ukuze singakhohliswa?

Kungani Kunokukhohlisa Okuningi Kangaka?

4. IBhayibheli lisichaza kanjani isizathu esenza ukukhohlisa kwande ezweni?

⁴ IBhayibheli lisichaza ngokucacile isizathu esenza ukukhohlisa kwande kuleli zwe. Umphostoli uJohane wabhala ukuthi “lonke izwe lisemandleni omubi.” (1 Johane 5:19) “Omubi” nguSathane uDeveli. UJesu wathi ngaye: “Akazange ame aqine eqinisweni, ngoba iqiniso alikho kuye. Lapho ekhuluma amanga, ukhuluma ngokuvumelana nesimo sakhe, ngoba ungumqambimanga noyise wamanga.” Kuyamangaza-ke yini ukuthi leli zwe libonisa umoya, izindinganiso, nezimfanelo zokukhohlisa zombusi walo?—Johane 8:44; 14:30; Efesu 2:1-3.

5. USathane uye wayiqinisa kanjani imizamo yakhe yokukhohlisa kulesi sikhathi sokuphela, futhi obani aye wabaqonda ngokukhethekile?

⁵ Kulesi sikhathi sokuphela, uSathane uye waqinisa imizamo yakhe. Uphonswe phansi emhlabeni. Uyazi ukuthi isikhathi sakhe sifushane, futhi ‘uthukuthele kakhulu.’ Ezimisele ukuceka abantu abaningi ngangokunokwenzeka, ‘udukisa umhlaba wonke owakhiwe.’ (IsAmbulo 12:9, 12) USathane akayena umkhohlisi oqabukelayo. Kunalokho, uyaphikelela emizamweni yakhe yokudukisa isintu.a Usebenzisa zonke izindlela zokukhohlisa angazisebenzisa—kuhlanganise nobuqili nokuphamba—ukuze aphuphuthekise izingqondo zabangakholwa futhi abagcine bekude noNkulunkulu. (2 Korinte 4:4) Le ngcweti yokukhohlisa izimisele ngokukhethekile ukushwabadela labo abakhulekela uNkulunkulu “ngomoya nangeqiniso.” (Johane 4:24; 1 Petru 5:8) Ungalokothi ukhohlwe ukuthi kunjengokungathi uSathane uthe: ‘Ngingasusa noma ubani kuNkulunkulu.’ (Jobe 1:9-12) Ake sibheke amanye “amacebo okukhohlisa” kaSathane nezindlela zokuzivikela kuwo.—Efesu 6:11, Jewish New Testament.

Qaphela Ukukhohliswa Yizihlubuki

6, 7. (a) Zingase zithini izihlubuki? (b) ImiBhalo ikubonisa kanjani ngokucacile lokho okufunwa izihlubuki?

⁶ USathane unesikhathi eside esebenzisa izihlubuki emizamweni yakhe yokuyenga izinceku zikaNkulunkulu. (Mathewu 13:36-39) Izihlubuki zingase zithi zikhulekela uJehova futhi ziyalikholelwa iBhayibheli, kodwa ziyayenqaba ingxenye ebonakalayo yenhlangano yakhe. Ezinye zize ziphindele ezimfundisweni ezihlazisa uNkulunkulu ‘zeBhabhiloni Elikhulu,’ umbuso wezwe wenkolo yamanga. (IsAmbulo 17:5; 2 Petru 2:19-22) Bephefumulelwe uNkulunkulu, abalobi beBhayibheli bazidalula ngamazwi anamandla izisusa nezindlela zezihlubuki.

⁷ Zifunani izihlubuki? Iningi lazo alaneliswa ukushiya inkolo okungenzeka zaziyibheka njengeyeqiniso. Ngokuvamile, zifuna ukuhamba nabanye. Kunokuba ziphume ziyozakhela abazo abafundi, izihlubuki eziningi zizama ‘ukumonyula abafundi [bakaKristu] ukuba bazilandele.’ (IzEnzo 20:29, 30) Mayelana nabafundisi bamanga, umphostoli uPawulu wanikeza lesi sixwayiso esiphuthumayo: “Xwayani: mhlawumbe kungase kube khona oyomuka nani njengezisulu zakhe.” (Kolose 2:8) Akukhona yini lokho izihlubuki eziningi ezikuzamayo? Njengomthumbi othatha isisulu esingasoli lutho asihlukanise nabakubo, labo abayizihlubuki basizakala ngamalungu ebandla abethembayo, bazame ukuwakhipha emhlambini.

8. Izihlubuki zisebenzisa ziphi izindlela ukuze zifeze izinjongo zazo?

⁸ Iziphi izindlela ezisetshenziswa izihlubuki ukuze zifinyelele umgomo wazo? Ngokuvamile zihlanekezela izinto, zikhulume amaqiniso angaphelele namanga aluhlaza cwé. UJesu wayazi ukuthi abalandeli bakhe babeyohlukunyezwa yilabo ‘ababeyoqamba yonke inhlobo yamanga amabi’ ngabo. (Mathewu 5:11, Today’s English Version) Abaphikisi abanjalo abanezinhloso ezimbi babeyoqamba amanga ngenhloso yokukhohlisa abanye. Umphostoli uPetru waxwayisa ngezihlubuki ezaziyosebenzisa “amazwi enkohliso,” zisakaze ‘izimfundiso zokukhohlisa,’ futhi ‘zisonte imiBhalo’ ukuze zifeze izinjongo zazo. (2 Petru 2:3, 13; 3:16) Ngokudabukisayo, izihlubuki ziyaphumelela ‘ukuchitha ukholo lwabanye.’—2 Thimothewu 2:18.

9, 10. (a) Singaqapha kanjani ukuze singakhohliswa izihlubuki? (b) Kungani singakhathazeki uma indlela esiqonda ngayo injongo kaNkulunkulu idinga ukulungiswa?

⁹ Singaqapha kanjani ukuze singakhohliswa izihlubuki? Ngokulalela iseluleko esiseZwini likaNkulunkulu, esithi: “Niqaphele labo ababangela ukuhlukana nezimo ezingabangela ukukhubeka ngokuphambene nemfundiso eniyifundile, futhi nibagweme.” (Roma 16:17) ‘Sibagwema’ ngokufulathela ukucabanga kwabo—abakuletha mathupha, ngezinto ezinyathelisiwe, noma kuyi-Internet. Kungani senza kanjalo? Okokuqala, ngoba iZwi likaNkulunkulu lisiyala kanjalo, futhi siyaqiniseka ukuthi uJehova uhlale esifunela okungcono kakhulu.—Isaya 48:17, 18.

¹⁰ Okwesibili, siyayithanda inhlangano esifundise amaqiniso ayigugu asihlukanisa ngokucacile neBhabhiloni Elikhulu. Ngesikhathi esifanayo, siyaqaphela ukuthi ulwazi lwethu ngenjongo kaNkulunkulu aluphelele; indlela esiqonda ngayo izinto ibilokhu ilungiswa kuyo yonke le minyaka. AmaKristu aqotho kuyawanelisa ukulinda uJehova ukuze athole konke ukulungisa okunjalo. (IzAga 4:18) Uma kungakafiki, ngeke siyishiye inhlangano uNkulunkulu akujabulelayo ukuyisebenzisa, ngoba siyabubona ubufakazi obucacile besibusiso sakhe kuyo.—IzEnzo 6:7; 1 Korinte 3:6.

Qaphela Ukuzikhohlisa

11. Kungani abantu abangaphelele benokuthambekela kokuzikhohlisa?

¹¹ Abantu abangaphelele banokuthambekela uSathane asizakala ngakho ngokushesha—ukuzikhohlisa. Incwadi kaJeremiya 17:9 ithi: “Inhliziyo ikhohlisa ngaphezu kwanoma yini enye futhi yenza ngokuphelelwa yithemba.” Futhi uJakobe wabhala: “Yilowo nalowo ulingwa ngokuhehwa nangokuhungwa yisifiso sakhe siqu.” (Jakobe 1:14) Uma inhliziyo yethu ihungeka, kungase kube sengathi isigabisela ngesono, isenza sibonakale sikhanga futhi singalimazi. Umbono onjalo uyakhohlisa, ngoba ukuvumela isono kugcina kuholele encithakalweni.—Roma 8:6.

12. Iziphi izindlela esingase sibanjwe ngazo ugibe lokuzikhohlisa?

¹² Ugibe lokuzikhohlisa lungasibamba kalula. Inhliziyo ekhohlisayo ingase ithole izizathu zokuthethelela ukushiyeka kobuntu okungathí sina noma ibekele isono esibi izaba. (1 Samuweli 15:13-15, 20, 21) Inhliziyo yethu eyenza ngokuphelelwa yithemba ingase ifune nezindlela zokuthethelela ukuziphatha okungabazekayo. Ngokwesibonelo, cabanga ngendaba yezokuzijabulisa. Okunye ukuzijabulisa kuhlanzekile futhi kuhle. Nokho, okuningi kwalokho okunikezwa yileli zwe—kumabhayisikobho, ezinhlelweni zethelevishini nakuyi-Internet—kuyichilo futhi kunokuziphatha okubi. Kulula ukuzitshela ukuthi ukuzijabulisa okuhlazisayo singakubuka kodwa singalimali. Abanye baze bathi, “Akuwuhluphi unembeza wami, ikuphi-ke inkinga?” Kodwa abantu abanjalo ‘bazikhohlisa ngokucabanga okungamanga.’—Jakobe 1:22.

13, 14. (a) Isiphi isibonelo esisemiBhalweni esibonisa ukuthi unembeza wethu awusona isiqondiso esiphephile njalo? (b) Singaqapha kanjani ukuba singazikhohlisi?

¹³ Singaqapha kanjani ukuba singazikhohlisi? Okokuqala, kudingeka sikhumbule ukuthi unembeza womuntu awuthembeki ngaso sonke isikhathi. Cabanga ngomphostoli uPawulu. Ngaphambi kokuba abe ngumKristu, wayeshushisa abalandeli bakaKristu. (IzEnzo 9:1, 2) Kungenzeka unembeza wakhe wawungamkhathazi ngaleso sikhathi. Nokho, kusobala ukuthi wawudukisiwe. “Ngangingenalwazi futhi ngenza ngenxa yokuntula ukholo,” kusho yena. (1 Thimothewu 1:13) Ngakho ukuthi ukuzijabulisa okuthile akuwuhluphi unembeza wethu akusona neze isiqinisekiso sokuthi inkambo yethu ilungile. Ngunembeza ophile kahle noqeqeshwe ngokufanele iZwi likaNkulunkulu kuphela ongaba isiqondiso esiphephile.

¹⁴ Ukuze sigweme ukuzikhohlisa, kukhona ukusikisela okuwusizo okudingeka sikukhumbule. Zihlole ngosizo lomthandazo. (IHubo 26:2; 2 Korinte 13:5) Ukuzihlola ngobuqotho kungase kukuvule amehlo ubone isidingo sokwenza izinguquko embonweni noma emikhubeni yakho. Lalela abanye. (Jakobe 1:19) Njengoba ukuzihlola kuthonywa imibono yakho, kuwukuhlakanipha ukulalela amazwi angathonywe yilutho avela kwamanye amaKristu avuthiwe. Uma uzithola wenza izinqumo noma uziphatha ngendlela engabazekayo kumaKristu alinganiselayo nanokuhlangenwe nakho, ungase uzibuze, ‘Kungenzeka yini ukuthi unembeza wami awuqeqeshiwe kahle noma ukuthi inhliziyo yami iyangikhohlisa?’ Funda iBhayibheli njalo futhi utadishe izincwadi ezisekelwe kulo. (IHubo 1:2) Ukwenza kanjalo kuyokusiza ukuba ugcine imicabango yakho, isimo sakho sengqondo, nemizwa yakho kuvumelana nezimiso zikaNkulunkulu.

Qaphela Amanga KaSathane

15, 16. (a) Emizamweni yakhe yokusikhohlisa, uSathane usebenzisa maphi amanga? (b) Singakugwema kanjani ukukhohliswa amanga anjalo?

¹⁵ USathane usebenzisa amanga ahlukahlukene emizamweni yakhe yokusikhohlisa. Uzama ukusenza sikholwe ukuthi izinto ezibonakalayo ziletha injabulo nokwaneliseka, kodwa ngokuvamile kuba okuphambene nalokho. (UmShumayeli 5:10-12) Ufuna sikholelwe ukuthi leli zwe elibi lizoqhubeka unomphela, yize kunobufakazi obucacile bokuthi siphila “ezinsukwini zokugcina.” (2 Thimothewu 3:1-5) USathane ugqugquzela umbono wokuthi ukuphila ngokuziphatha okubi akulimazi, yize kukaningi abantu abakhonze injabulo bevuna imiphumela ebuhlungu. (Galathiya 6:7) Singakugwema kanjani ukukhohliswa amanga anjalo?

¹⁶ Zuza ezibonelweni eziseBhayibhelini. IBhayibheli linezibonelo eziyisixwayiso zabantu abakhohliswa amanga kaSathane. Babethanda izinto ezibonakalayo, bangazinaka izikhathi ababephila kuzo, noma bavumela ukunqotshwa ukuziphatha okubi—kwaba nemiphumela emibi. (Mathewu 19:16-22; 24:36-42; Luka 16:14; 1 Korinte 10:8-11) Funda ezibonelweni zanamuhla. Ngokudabukisayo, ngezinye izikhathi amanye amaKristu alahlekelwa umuzwa wokuphuthuma, abese ekholelwa ukuthi ukukhonza uNkulunkulu kuwaphuthisela ngokuthile okuhle. Angase aphume eqinisweni ayophishekela ukuphila kwalokho okuthiwa injabulo. Nokho, abantu abanjalo ‘basemhlabathini oshelelayo,’ ngoba bagcina beluthezile olunenkume ngenxa yokuziphatha kwabo kokungamhloniphi uNkulunkulu. (IHubo 73:18, 19) Kuwukuhlakanipha ukuba sifunde emaphutheni abanye.—IzAga 22:3.

17. Kungani uSathane egqugquzela amanga okuthi uJehova akasithandi futhi akasazisi?

¹⁷ Kukhona amanye futhi amanga uSathane aye wawasebenzisa—amanga okuthi uJehova akasithandi futhi akasazisi. USathane usenezinkulungwane zeminyaka ecwaninga abantu abangaphelele. Wazi kahle ukuthi ukudumazeka kungasithena amandla. (IzAga 24:10) Ngakho, ugqugquzela amanga okuthi siyize kuNkulunkulu. Uma “siphonswa phansi” bese sikholelwa ukuthi uJehova akanandaba nathi, singase silingeke ukuba siyeke phansi. (2 Korinte 4:9) Yilokho kanye uMkhohlisi omkhulu akufunayo! Singazivikela kanjani-ke ekukhohlisweni yila manga kaSathane?

18. IBhayibheli lisiqinisekisa kanjani ukuthi uJehova uyasithanda?

¹⁸ Zindla ngalokho iBhayibheli elikushoyo ngothando lukaNkulunkulu ngathi. IZwi likaNkulunkulu lisebenzisa imifanekiso ethinta inhliziyo ukuze lisiqinisekise ukuthi uJehova uyasiqaphela futhi uyasithanda ngamunye ngamunye. Ufaka izinyembezi zakho ‘egabheni [noma, ebhodleleni] lakhe lesikhumba,’ okusho ukuthi uyazibona futhi uyazikhumbula izinyembezi zakho ezehla njengoba uzabalazela ukuhlala uthembekile. (IHubo 56:8) Uyabona lapho ‘inhliziyo yakho iphukile’ futhi useduze nawe ezikhathini ezinjalo. (IHubo 34:18) Wazi konke ngawe, kuhlanganise ‘nezinwele zonke zekhanda lakho.’ (Mathewu 10:29-31) Ngaphezu kwakho konke, uNkulunkulu “wanikela ngeNdodana yakhe ezelwe yodwa” ngenxa yakho. (Johane 3:16; Galathiya 2:20) Ngezinye izikhathi, ungase ukuthole kunzima ukukholelwa ukuthi imiBhalo enjalo isebenza kuwe siqu. Nokho, kumelwe sikukholwe lokho uJehova akushoyo. Ufuna sikholwe ukuthi akagcini ngokusithanda njengeqembu, kodwa futhi uyasithanda ngamunye ngamunye.

19, 20. (a) Kungani kubalulekile ukubona futhi wenqabe amanga kaSathane okuthi uJehova akakuthandi? (b) Umbonisi othile ojikelezayo uye wabasiza kanjani abadikibele?

¹⁹ Wabone futhi uwenqabe amanga. Uma wazi ukuthi othile uqamba amanga, ungazivikela ekukhohlisweni. Ngokufanayo, ukwazi nje ukuthi uSathane ufuna ukholelwe amanga okuthi uJehova akakuthandi kungaba usizo olunamandla. Ngemva kokufunda isihloko se-Nqabayokulinda esasixwayisa ngamaqhinga kaSathane, omunye umKristu wathi: “Bengingazi ukuthi uSathane uzama ukusebenzisa imizwa yami ukuze angidikibalise. Ukwazi lokhu kunginika umdlandla wokulwa nale mizwa.”

²⁰ Cabanga ngendaba yombonisi ojikelezayo ezweni elithile laseNingizimu Melika. Lapho enza ukuhambela kokwalusa amaKristu adangele, uvame ukuwabuza, ‘Uyakholelwa kuZiqu-zintathu?’ Lowo odikibele uye athi, ‘Cha,’ ngoba usuke azi ukuthi lawo amanga kaSathane. Lo mbonisi ojikelezayo ube esebuza, ‘Uyakholelwa esihogweni somlilo?’ Impendulo iphinde ithi, ‘Cha!’ Lo mdala ube esetshela umKristu ukuthi kukhona namanye amanga kaSathane angavamile ukubonakala ukuthi angamanga. Ube esecela babheke ikhasi 249, isigaba 21, encwadini ethi Sondela KuJehova,b esidalula amanga okuthi uJehova akasithandi ngamunye ngamunye. Umbonisi ojikelezayo ubika ukuthi uba nemiphumela emihle ekusizeni abadikibele ukuba bawabone futhi bawenqabe la manga kaSathane.

Zivikele Ekukhohlisweni

21, 22. Kungani singebona abangawazi amacebo okukhohlisa kaSathane, futhi yini okufanele sizimisele ukuyenza?

²¹ Kule ngxenye yokugcina yezinsuku zokugcina, kulindelekile ukuthi uSathane uzoqhubeka ehlasela ngendathane yamanga nokukhohlisa. Siyajabula ngokuthi uJehova akasishiyanga singawazi amacebo okukhohlisa kaSathane. IBhayibheli nezincwadi ezisekelwe kulo ‘zenceku ethembekileyo neqondayo’ kuzidalula ngokucacile izindlela ezimbi zikaDeveli. (Mathewu 24:45) Njengoba sesixwayisiwe, sihlonyisiwe.—2 Korinte 2:11.

²² Ngakho-ke, masiqaphele ukucabanga kwezihlubuki. Masizimisele ukugwema ugibe olucashile lokuzikhohlisa. Futhi masiwabone futhi siwenqabe wonke amanga kaSathane. Ngokwenza kanjalo, siyoqapha ubuhlobo bethu ‘noNkulunkulu weqiniso,’ okuzondayo ukukhohlisa.—IHubo 31:5; IzAga 3:32.

[Imibhalo yaphansi]

Uyakhumbula?

• Kungani kukhona ukukhohlisa okuningi kangaka ezweni namuhla?

• Singaqapha kanjani ukuze singakhohliswa izihlubuki?

• Singakuqapha kanjani ukuthambekela kokuzikhohlisa?

• Singakugwema kanjani ukukhohliswa amanga kaSathane?

[Isithombe ekhasini 17]

Ungazikhohlisi mayelana nokuzijabulisa

[Izithombe ekhasini 18]

Qaphela ukuzikhohlisa ngokuzihlola ngomthandazo, ngokulalela abanye, nangokuzondla njalo ngeZwi likaNkulunkulu