Ubuhle Bendalo KaJehova
“Umkhulu Ngokubabazekayo Kunezintaba”
UKUBUKA ilanga liphuma usesiqongweni seNtaba iFuji kuyinto ongeke uyikhohlwe. Ulibona liphuma kude lé, linombala ongathi owelangabi lomlilo, likhanyise iqhwa elimhlophe nedwala elimpunga lodaka lwentaba-mlilo. Njengoba kuqala olunye usuku, isithunzi sentaba esicace bhá sinaba ngokushesha simboze amagquma nezigodi.
NjengeNtaba iFuji—igama elake labhalwa ngezinhlamvu ezisho ukuthi “engenakulinganiswa nalutho”—izintaba eziphakeme zisishiya sibambe ongezansi njalo nje. Phela, ubukhulukazi bazo bungasenza sizizwe sibancane! Ezinye izintaba ziphakeme kangangokuthi abantu abaningi baye bakholelwa ukuthi iziqongo eziphakeme kunazo zonke, ezivame ukugubuzelwa inkungu namafu, zazihlala onkulunkulu.
Owukuphela kukaNkulunkulu iziqongo zezintaba ezimdumisa ngempela nguMdali wazo oyingcweti, uJehova. Nguye yedwa “uMbumbi wezintaba.” (Amose 4:13) Cishe ingxenye yomhlaba eyodwa kwezine iyizintaba, futhi lapho uNkulunkulu edala umhlaba, wenza namandla emvelo agcina ebangele iziqongo nokhahlamba lwezintaba okumangalisayo. (IHubo 95:4) Ngokwesibonelo, abanye bakholelwa ukuthi ukuzamazama okukhulu okwenzeka emajukujukwini omhlaba, nokunyakaza kwezingxenye zongqimba lomhlaba, yikona okwakha izintaba zokhahlamba zaseHimalaya nezase-Andes.
Thina bantu asiqondi ngokugcwele ukuthi izintaba zaba khona kanjani nokuthi kungani zaba khona. Ngokuqinisekile, asikwazi ukuphendula le mibuzo eyayibhekiswe kuJobe olungile: “Wawukuphi lapho [mina Jehova] ngisekela umhlaba? . . . Zabethelwa kuphi izisekelo zawo ezinesikhoxe.”—Jobe 38:4-6.
Nokho, siyazi ukuthi ukuphila kwethu kuxhomeke kuzo izintaba. Bezilokhu zibizwa ngokuthi izinqaba zamanzi ezingokwemvelo, njengoba yonke imifula emikhulu isuka ezintabeni, nengxenye yabantu abasemhlabeni ithembele kuzo izintaba ukuze ithole amanzi. (IHubo 104:13) Ngokukamagazini i-New Scientist, “ezitshalweni ezidliwayo ezingu-20 okuyizona ezivelele emhlabeni, eziyisithupha kuzo zaqala ukumila ezintabeni.” Ezweni elisha elithenjiswe uNkulunkulu, lapho indalo iyobe isebenzelana kahle, “kuyoba khona inala yokusanhlamvu emhlabeni; kuyoba khona ukuchichima esiqongweni sezintaba.”—IHubo 72:16; 2 Petru 3:13.
Kwabaningi, ukuzwa kukhulunywa ngezintaba kubakhumbuza i-Alps yaseYurophu. Lezi ziqongo zezintaba, kuhlanganise neNtaba iCivetta eboniswe lapha, ziwubufakazi obumangalisayo bokuba khona koMdali. (IHubo 98:8) Zidumisa uJehova, ‘omisa izintaba ziqine ngamandla akhe.’—IHubo 65:6.a
Ngempela, buhlaba umxhwele ubuhle be-Alps, esho ngeziqongo namagquma ambethe iqhwa, imithambeka yakhona emhlophe yiqhwa, nezigodi namachibi ayo, kanye nezimfunda zakhona. INkosi uDavide yabiza uJehova ngokuthi “Owenza ukuba izintaba zihlume utshani obuluhlaza.”—IHubo 147:8.
Izintaba zokhahlamba ezimagqumagquma—njengalezi zazeGuilin, eChina—zingase zingawadonsi amehlo njenge-Alps, kodwa nazo zinhle ngendlela yazo. Eceleni koMfula iLi, kunamahele eziqongo ze-limestone ezicijile ezihlaba izivakashi umxhwele ngobuhle bazo. Ukubuka amanzi acwebile egeleza kula magquma anenkungu kungakukhumbuza amazwi omhubi: “[UJehova] uthumela iziphethu ezigodini zezifufula; ziqhubeka zigeleza phakathi kwezintaba.”—IHubo 104:10.
Izintaba zisixhexisa kufanele ngoba sizibheka njengeziyingxenye emangalisayo yelungiselelo lothando elivela kuMdali, alenzele isintu ukuze sihlale kahle futhi sijabule. Nokho, nakuba izintaba zihlaba umxhwele, azinakulingana noJehova ngobukhulu. Ngempela, uJehova “mkhulu ngokubabazekayo kunezintaba.”—IHubo 76:4.
[Umbhalo waphansi]
a Bheka IKhalenda LoFakazi BakaJehova Lika-2004, March/April.
[Ibhokisi/Isithombe ekhasini 9]
Abantu abangamaphesenti ayishumi emhlabeni wonke bahlala ezindaweni eziyizintaba. Kodwa lokho akusona isithiyo esingenakunqotshwa kulabo abamemezela izindaba ezinhle zoMbuso kaNkulunkulu. Lezi zikhonzi ezingamaKristu zimatasa ngempela ezindaweni eziningi eziphakeme. Futhi “yeka ukuthi zibukeka kahle kanjani ezintabeni izinyawo zoletha izindaba ezinhle, omemezela ukuthula, oletha izindaba ezinhle zokuthile okungcono, omemezela insindiso!”—Isaya 52:7.
Umhubi wahlabelela: “Izintaba eziphakeme zingezezimbuzi zasezintabeni.” (IHubo 104:18) Izimbuzi zasezintabeni, njenge-Nubian ibex esho ngezimpondo zayo ezinhle, ziphakathi kwezilwane zasezintabeni ezizigijimela kalula nje kulezo zintaba ukudlula zonke ezinye izilwane zakhona. Zikwazi ukuhamba emaweni amabi kakhulu, abonakala kungenakuhambeka kuwo. I-ibex ikwazi kahle ukuhlala ezindaweni ezingafinyeleleki. Ngokwengxenye lokhu kungenxa yokwakheka kwezinselo zayo. Izinselo zingavuleka njengoba zithwele umzimba wembuzi, okwenza lesi silwane sikwazi ukubambelela siqinise lapho simile noma sihamba emaweni awumngcingo. Ngempela, i-ibex iklanywe ngobuciko!
[Isithombe ekhasini 9]
INtaba iFuji, eHonshu, eJapane